Hii u tuu da bakama mii u di fosu womi de kai Adam. Fëën mbei hii u tuu da wan famii. Hii fa dee sëmbë u wan famii musu lobi deseei, ta lesipeki deseei, tökuseei di soni dë an ta pasa hia a di ten aki. Di Gadu fuu di lobi u an kë fuu ta libi sö.

„I musu lobi di wotowan fii leti kumafa i lobi i seei.”​—LEIFITIKI 19:18.

„Un musu lobi dee felantima fuunu.”​—MATEOSI 5:44.

Gadu ta taki soni u di soni de kai lobi a di Wöutu fëën. A sikifi a 1 Kolenti 13:4-7 taa:

„Ee i lobi wan sëmbë joo ta hoi pasensi dëën e. Joo ta fii ku ën.”

Pakisei di soni aki: Unfa i ta fii te wotowan ta hoi pasensi da i, te de ta fii da i, söseei te hati u de an ta boonu ku i te i mbei wan föutu?

„Ee i lobi wan sëmbë, ja o ta haun ku ën.”

Pakisei di soni aki: Unfa i ta fii te wotowan an ta futoou i, nasö te de ta haun ku i?

Ee i lobi wan sëmbë „ja o ta suku bunu fii seei wanwan nöö a kaba, ma joo ta suku bunu fii ku ën tuu”.

Pakisei di soni aki: Unfa i ta fii te wotowan ta lesipeki i, söseei te de an ta pakisei deseei nöö?

Ee i lobi wan sëmbë „ja o ta hoi ën a bëë”.

Pakisei di soni aki: Gadu dë kabakaba u da sëmbë paadon u dee zöndu u de ee de ta lei taa de ta tjali u dee soni di de du. „An o ta suku föutu a u nöömö. Nöö an o hoi u a bëë tu” (Psalöm 103:9). U ta wai seei te wan sëmbë di u bi du wan soni ku ën di hati ën, ta da u paadon. Fëën mbei u musu ta dë kabakaba u da wotowan paadon tu te de du wan soni di hati u.​—Psalöm 86:5.

Ee i lobi wan sëmbë, „nöö ja o ta abi piizii ku hogi du fëën möönsö”.

Pakisei di soni aki: Te wan hogi miti u, wa kë u wotowan ta wai taa sö wan soni miti u. Fëën mbei wa ta wai tu te hogi miti wotowan, aluwasi de bi libi hogi ku u.

Ee u kë feni wini u dee gaan bunu dee Gadu ta da u, nöö u musu lobi wotowan aluwasi ambë de dë. Wan fasi fa u sa lei taa u lobi wotowan, da te u ta heepi de te de dë ku fuka.