Skip to content

Skip to table of contents

Dee tjabukama u Gadu ta lei u soni fëën

Dee tjabukama u Gadu ta lei u soni fëën

A di ten di pasa, Gadu bi da dee tjabukama fëën fanöudu bosikopu u de da libisëmbë. Dee bosikopu aki sa heepi u fuu feni bunu ö? Aai de sa heepi u. Boo luku andi u sa lei u dii tjabukama u Gadu, dee bi abi wan taanga biibi.

ABAHAMU

Gadu an ta si wan sëmbë hei möön wan wotowan, nöö a kë u hii sëmbë feni bunu.

Gadu bi paamusi di tjabukama fëën de kai Abahamu taa hën a bi o tei u heepi ’hii sëmbë u goonliba u de feni gaan bunu’.​—Kenesesi 12:3.

Andi u ta lei? Gadu lobi u gaanfa seei, nöö a kë u hii pei sëmbë di ta piki hën buka, feni gaan bunu.

MOSESI

Gadu abi tjalihati u sëmbë, nöö a ta da sëmbë dee ta mbei möiti u sabi ën, gaan bunu.

Di makiti Gadu u mundu bi da Mosesi makiti u du gaan foombo soni. Tökuseei Mosesi bi begi ën taa: „Be mi ko sabi di pasi fii, sö taa mi sa ko sabi i, fii feni mi bunu” (Ëkisodesi 33:13). Gadu bi wai seei ku di soni di Mosesi bi hakisi ën. Fëën mbei a bi dëën köni, a bi heepi ën faa bi ko sabi dee soni dee a ta du, söseei faa ko sabi dee fasi dee a abi tu. Mosesi bi ko si taa di Gadu di mbei u, da „wan Gadu di abi tjalihati u sëmbë, nöö a lobi sëmbë tu”.​—Ëkisodesi 34:6, 7.

Andi u ta lei? Gadu kë u hii u tuu feni gaan bunu ee u ta mbei möiti fuu ko sabi ën, aluwasi ee u da womi, mujëë, nasö miii. A ta lei u a di Wöutu fëën unfa u musu dini ën, söseei taa a dë kabakaba u du bunu da u.

JESOSI

U di Jesosi bi abi tjalihati u sëmbë mbei a bi ta kula hii pei siki di de bi abi

 Ee u lei soni u Jesosi, nöö Gadu o da u gaan bunu u nöömö

U sa lei sömëni soni u Jesosi a di Wöutu u Gadu. Gadu bi da Jesosi kaakiti faa du sömëni foombo soni. A bi ta kula bookowojoma, ku bookojesima, a bi ta kula sëmbë di bi lan, söseei a bi ta weki sëmbë di dëdë ko a libi baka. Jesosi bi lei u un gaan bunu Gadu o da libisëmbë a di ten di ta ko. A bi taki andi hiniwan fuu musu du fuu feni dee gaan bunu aki. A bi taki taa: „Andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki.”​—Johanisi 17:3.

Jesosi bi abi tjalihati u sëmbë, söseei a bi lobi sëmbë. Womi ku mujëë, gaanwan ku pikiwan tuu, bi nango nëën. A bi piki de taa: „Be mi ta tii unu ta lei unu soni. Biga fa mi dë aki, mi abi tjalihati, mi a saka fasi, nöö ee wan sëmbë i ko a mi nöö joo feni böö te dou a i hati” (Mateosi 11:29). Jesosi an bi dë kuma sömëni sëmbë u di ten fëën dee an bi ta lesipeki mujëë sëmbë, ma a bi ta lesipeki mujëë sëmbë, söseei a bi abi tjalihati u de.

Andi u ta lei? Jesosi bi ta lei sëmbë taa a bi lobi de tuutuu, söseei a bi lei u unfa u musu lobi woto sëmbë.

JESOSI NA GADU

Di Wöutu u Gadu ta lei u taa „wan kodo Gadu nöö dë”, nöö Jesosi Keesitu da di tjabukama fëën (1 Kolenti 8:6). Jesosi bi lei gbelingbelin taa Gadu hei möön ën, söseei taa Gadu hën bi mandëën ko a goonliba.​—Johanisi 11:41, 42; 14:28. *

^ pal. 17 Ee i kë sabi möön soni u Jesosi Keesitu, nöö luku woto 8 ku 9 u di buku Echt geloof leidt tot een gelukkig leven, di dë u feni a www.jw.org.