Skip to content

Skip to table of contents

Di Gadu di mbei u lobi u

Di Gadu di mbei u lobi u

1. DI GADU DI MBEI U TA MBEI DI SONU TA JABI

Wa bi o sa dë a libi ee di sonu an bi dë. Di sonu hën ta mbei taa dee pau sa abi uwii, taa de sa buta folo, taa de sa pai fuuta, söseei taa de ta abi sii. A ta mbei tu taa dee pau sa hai wata u di goon tei ku dee lutu u de. Di wata dë nango a dee uwii u di pau, nöö bakaten a ta ko dë do wata.

2. DI GADU DI MBEI U TA MBEI TJUBA TA KAI

Tjuba da wan bunu soni di Gadu da u. A ta mbei di goonliba ta da njanjan. Di tjuba di Gadu ta da u ta mbei soni ta göö, nöö u ta feni soni u njan, söseei u ta dë ku wai.

 3. DI GADU DI MBEI U TA MBEI TAA U ABI SONI U NJAN KU SONI U BISI

Dee tata ta booko de hedi ku di feni di de musu ta feni soni u njan ku soni u bisi da dee sëmbë u de wosudendu. Luku andi di Wöutu u Gadu ta taki: „Un luku dee fou ta buwa ta lontu a liba ala. Fa de sai naandë, nöö de aan goon ta paandi fu de sa feni njanjan. De an abi na wan suwa möönsö ka de sa tjubi njanjan tu. Ma de ta njan këdë biga di Tata fii di dë a liba ala ta sölugu de. Wë nöö mi taki da unu taa un bumbuu gaanfa möön dee fou e!”​—Mateosi 6:25, 26.

„Un luku dee folo naandë, fa de hanse . . . Ma nöö mi taki da unu e, taa fa Könu Salumon bi ta bisi dee gaan waiti bisi fëën seei, ma dee bisi fëën an bi ta hanso kuma dee folo naandë. Nöö fa Gadu ta bisi dee sösö uwii ku hanse folo dë . . . , na möön hesi Gadu o sölugu unu ku soni u bisi tu nö?”​—Mateosi 6:28-30.

Ee Gadu sa mbei taa u abi soni u njan ku soni u bisi, nöö u sa dë seiki taa a sa da u dee woto soni dee u abi fanöudu a di libi tu. Ee u ta mbei möiti u du di kë u Gadu, nöö a sa mbei u feni gaan bunu u di a sa mbei dee soni dee u ta paandi ta göö, nasö a sa mbei u feni wan wooko di sa heepi u fuu bai dee soni dee u abi fanöudu.​—Mateosi 6:32, 33.

Te u luku dee soni dee Gadu da u kuma di sonu, tjuba, dee fou ku dee folo, nöö u musu kë lei Gadu taa u lobi ën. A di woto di ta ko woo luku unfa di Gadu di mbei u bi ta fan ku libisëmbë.