Skip to content

Skip to table of contents

„Di goonliba seei o ta da njanjan. Gadu, di Gadu fuu, o mbei u feni gaan bunu.”​—PSALÖM 67:6

I sa feni wini u dee gaan bunu di Gadu o da u u nöömö

I sa feni wini u dee gaan bunu di Gadu o da u u nöömö

Gadu bi paamusi di tjabukama fëën de kai Abahamu taa wan u dee bakamii fëën bi o mbei taa „hii föluku u goonliba” feni gaan bunu (Kenesesi 22:18). Ambë bi o dë di bakamii dë?

Söwan 2000 jaa pasa, Gadu bi da Jesosi, di bi dë wan bakamii u Abahamu, di makiti faa du gaan foombo soni. Dee foombo soni dee a du dë, ta lei taa Jesosi hën o mbei di soni di Gadu bi paamusi Abahamu pasa tuutuu.​—Galasia 3:14.

Dee foombo soni dee Jesosi bi ta du, bi heepi dee sëmbë u de si taa hën da di sëmbë di Gadu bi tei u mbei hii sëmbë a goonliba feni gaan bunu. Dee soni dë bi ta lei tu unfa Gadu o mbei sëmbë feni gaan bunu u nöömö. A dee foombo soni dee Jesosi bi ta du, i bi sa si so u dee bunu fasi dee a bi abi.

Tjalihati u sëmbë​—Jesosi bi ta kula dee suwakima.

Wan daka wan womi di bi abi kököbë bi hakisi Jesosi faa kulëën. Jesosi bi panjan di womi aki, hën a taki taa: „Aai mati, mi kë e.” Wantewante dë di womi bi ko bëtë.​—Maikusi 1:40-42.

A bi lo’ u da sëmbë soni​—Jesosi bi ta da sëmbë soni u njan, te hangi bi ta kii de.

Jesosi an bi kë u dee sëmbë bi toona go ku hangi bëë. A bi da de soni u njan. A wan foombo fasi a bi da dusudusu sëmbë soni u njan ku wantu bëëë ku wantu piki fisi. Nöö na wan pasi nöö a bi du di soni aki (Mateosi 14:17-21; 15:32-38). Baka di de kaba njan, hën hii de tuu bëë bi fuu, nöö te a hia soni u njan bi fika jeti.

A bi ta fii da sëmbë​—Jesosi bi ta weki sëmbë ko a libi baka.

„Tjali” u wan mujëë di manu fëën bi lasi libi kaa, bi kisi Jesosi. Fëën mbei a bi weki di wan kodo womi mii u di mujëë aki di bi lasi libi, ko a libi baka. Di mujëë aki an bi abi na wan sëmbë möön tu u sölugu ën.​—Lukasi 7:12-15.