Skip to content

Skip to table of contents

 WOTO 36

U dë seei ta wakiti u Amagedon ko!

U dë seei ta wakiti u Amagedon ko!

„De tuu hai ko makandi a . . . Amagedon.”​—AKO. 16:16.

KANDA 150 Suku Gadu faa sa tjubi i

WANTU SONI U DI WOTO *

1-2. (a) Faandi mbei u sa taki taa Amagedon o tja wini ko da libisëmbë? (b) Un hakisi woo luku a di woto aki?

I JEI sëmbë taki kaa taa Amagedon da wan gaan feti ka sëmbë o feti ku wanlö kofaliki bömu ö, nasö taa a dë wan ten ka soni kuma gaan wata nasö gaan ventu o ko poi hii soni a goonliba u? Wë di Bëibel ta taki taa Amagedon o tja wini ko da u! (Ako. 1:3) Di feti u Amagedon an o kii libisëmbë kaba, ma a o tjubi libisëmbë! Na un fasi?

2 Di Bëibel ta lei u taa di feti u Amagedon o tjubi libisëmbë, u di a o puu di tii di libisëmbë ta tii. Di feti dë o puu dee hogihati sëmbë, nöö a o mbei dee bunuhati sëmbë fika a libi. Söseei di feti dë o tjubi libisëmbë, u di a di feti dë Gadu o kii dee sëmbë dee ta poi di goonliba (Ako. 11:18). Fuu sa ko fusutan dee lei u Bëibel aki möön bunu, nöö woo luku fö hakisi: Andi da Amagedon? Andi ku andi o pasa ufö Amagedon dou? Andi u sa du fuu sa dë wan u dee sëmbë di o fika a libi te Amagedon dou? Unfa u sa hoi useei a Jehovah u te Amagedon dou?

ANDI DA AMAGEDON?

3. (a) Andi di Wöutu „Amagedon” kë taki? (b) Faandi mbei u sa taki taa Amagedon an dë wan tuutuu kamian, te u luku Akoalimbo 16:14, 16?

3 Lesi Akoalimbo 16:14, 16. Wan pasi nöö di wöutu Amagedon dë sikifisikifi a di Bëibel, nöö de puu di wöutu aki a wan Hebelejën wöutu di kë taki „di kuun u Mëgido” (Ako. 16:16). Mëgido bi dë wan foto na awooten Isaëli (Jos. 17:11). Ma Amagedon an dë wan tuutuu kamian a goonliba aki. Ma a dë di pisiten di „dee könu” u goonliba o ko makandi u de hopo fia ku Jehovah (Ako. 16:14). Te woo taki u „Amagedon” a di woto aki, nöö a o nama tu ku di feti di de o feti baka te dee könu  u goonliba o ko makandi. Unfa u du sabi taa Amagedon an dë wan tuutuu kamian? Di fosu soni di mbei u taki sö, hën da wan tuutuu kuun an dë di de ta kai Mëgido. Di u tu soni, hën da di kamian de ta kai Mëgido piki poi u hii „dee könu u dee köndëköndë” u goonliba ko makandi naandë ku dee fetilai u de, u de feti. Di u dii soni, hën da a di woto aki woo si taa di feti u Amagedon o bigi te dee „könu” u goonliba o go feti ku dee sëmbë u Gadu dee dë a hii së u goonliba.

4. Faandi mbei Jehovah tei di Gaan feti fëën maaka ku Mëgido?

4 Faandi mbei Jehovah tei di Gaan feti fëën maaka ku Mëgido? Wë na awooten, nöö sömëni feti bi ta feti a di kamian de kai Mëgido, söseei a di lagi kamian u Jesijëli di bi dë zuntu ku Mëgido. So juu Jehovah bi ta heepi dee sëmbë fëën u de feti wini dee felantima u de a di kamian dë. Wan u dee pasi, Gadu bi heepi di kuutuma u Isaëli de kai Balaki, faa feti wini dee sodati u Kaana, di Sisela bi ta tii. De bi feti a di së u di „lio u Mëgido”. Balaki ku di mujëë tjabukama de kai Debola, bi da Jehovah tangi u di a bi heepi de wini di feti a wan foombo fasi. De bi kanda taa: „Dee teeja bi dë a liba ala . . . ta feti ku Sisela. Kison lio sawa de go.”​—Kuutm. 5:19-21.

5. Na un fasi di feti u Amagedon o tooka ku di feti di Balaki bi feti?

5 Di lasiti soni di Balaki ku Debola bi taki a di kanda u de, da: „Jehovah o, sö hii dee felantima fii musu dëdë. Be dee sëmbë dee lobi i ko dë kuma te di sonu ta tuwë di limbo fëën” (Kuutm. 5:31). A di feti u Amagedon, Gadu o kii dee felantima fëën, nöö a o tjubi dee sëmbë dee lobi ën. Ma di feti u Amagedon an o dë kuma dee feti dee bi ta feti a Mëgido. A di feti u Amagedon dee sëmbë u Gadu an o feti. De an o pena dë ku fetilai seei! ’Di wan kodo soni di de o du, hën da de o dë piii ta futoou’ Jehovah ku dee sodati fëën.​—Jes. 30:15; Ako. 19:11-15.

6. Andi ku andi Gadu sa tei u feti wini dee felantima fëën a di feti u Amagedon?

6 Unfa Gadu o feti wini dee felantima fëën a di feti u Amagedon? Wë a sa du ën a peipei fasi. Kandë a sa mbei goon seki, a sa mbei ëisi kai kumutu a liba ala kii sëmbë, nasö a sa mbei gaangadu bai koti faja (Jöpu 38:22, 23; Eze. 38:19-22). A sa mbei dee felantima fëën feti kii deseei (2 Klon. 20:17, 22, 23). Söseei a sa mbei dee ëngëli fëën kii dee hogihati sëmbë (Jes. 37:36). Ma di soni di u sa dë seiki fëën, hën da Gadu o kii hii dee felantima fëën a di feti dë. Nöö Gadu o tjubi hii dee bunuhati sëmbë.​—Nöng. 3:25, 26.

ANDI O PASA UFÖ AMAGEDON BIGI?

7-8. (a) Un buka dee tiima u goonliba o paaja, te u luku 1 Tesalonika 5:1-6? (b) Faandi mbei di taki di de o taki di soni aki o dë wan hogi soni seei?

7 Di taki di de o ta taki taa „Aai, hii soni dë bunu kaa. An dë fuu fëëë möön”, da wan soni di de o taki ufö di „daka u Jehovah” dou. (Lesi 1 Tesalonika 5:1-6, NW.) Di „daka u Jehovah” di sikifi a 1 Tesalonika 5:2, da di „gaan fuka” (Ako. 7:14). Unfa woo du sabi taa di gaan fuka o bigi? Wë di Bëibel ta taki taa sëmbë o paaja wan buka. Nöö di buka dë o dë wan soni di o lei taa di gaan fuka o bigi.

8 Di buka di de o paaja dë, da di buka di di Bëibel bi taki gaanduwe kaa taa de bi o paaja. De bi o taki taa: „Aai, hii soni dë bunu kaa. An dë fuu fëëë möön.” Ma faandi mbei dee tiima u goonliba o taki di soni aki? A dë sö taa dee hedima u keiki o dë a dendu tu te dee tiima o taki di soni aki ö? Wë a sa dë sö. Ma u sabi taa te dee tiima u goonliba o taki taa „Aai, hii soni dë bunu kaa. An dë fuu fëëë möön”, nöö an o dë wan tuutuu soni, ma a o dë wan mindimindi soni di dee taku jeje o mbei de taki.  Di soni di de o taki aki o hogi seei, biga a o mbei sëmbë biibi taa de dë bunu, hii fa di gaan fuka hën ta ko. Awa, „hogi o miti de wan pasi vau sö, leti kumafa bëë ta njan wan mujëë wan pasi vau sö te a dë u pai”. Andi o pasa ku dee dinima u Jehovah? Wë u di de an sabi di juu di di gaan fuka o bigi, mbei kandë a sa bigi da de te a bigi, ma de an o fëëë.

9. Jehovah o booko hii soni u di goonliba u Saatan kaba a sösö wan pasi ö?

9 Jehovah an o booko hii soni u di goonliba u Saatan kaba a sösö wan pasi, kumafa a bi du ën a di ten u Noa. Ma a o booko wan pisi fëën ufö, nöö bakaten nöö a o booko di o woto pisi di fika. Di fosu soni di a o puu, hën da di Gaan Babilon. Hën da hii dee poipoi keiki u goonliba tuu. Nöö te di feti u Amagedon bigi, nöö a o booko di woto pisi, te kisi dee sëmbë dee ta du politiki soni, dee ta du sodati wooko, ku dee ta seeka möni soni a di goonliba. Boo taki u dee tu soni aki, dee musu pasa jeti.

10. Faandi mbei Jehovah o booko di Gaan Babilon kaba a sösö, te u luku Akoalimbo 17:1, 6, ku 18:24?

10 „Di sitaafu di di gaan mötjö mujëë . . . o kisi.” (Lesi Akoalimbo 17:1, 6; 18:24.) Di Gaan Babilon mbei sömëni sëmbë an ko ta lesipeki Gadu në möön. A ta lei sëmbë poipoi soni u Gadu. Di Gaan Babilon an ta hoi hënseei a Jehovah, ma a ta du kuma wan mötjö mujëë, u di a ta wooko makandi ku dee tiima u goonliba. Di Gaan Babilon ta kaba sëmbë a sösö, söseei a ta puu sëmbë möni a de sinkii tuu fiaa. Boiti dee soni aki, a kii sömëni sëmbë, te kisi so u dee dinima u Jehovah seei tu (Ako. 19:2). Unfa Jehovah o booko di Gaan Babilon kaba a sösö?

11. Andi da di ’mbeti di sinkii fëën bë hëii sö’, nöö andi Gadu o mbei a du ku di Gaan Babilon?

11 Jehovah o mbei „dee teni tutu” u di ’mbeti di sinkii fëën bë hëii sö’, kii „di gaan mötjö mujëë”. Di mbeti aki da di ölganisaasi de kai De Verenigde Naties. Dee teni tutu da dee peipei tiima dee ta wooko makandi ku di ölganisaasi aki. Gadu buta wan ten ka a o mbei dee  tiima aki poi di Gaan Babilon. De o „puu hii soni nëën di a abi, te a fika pënëpënë ku maun tjululuu”, u di de o tei dee gudu dee a bi abi, nöö de o mbei sëmbë ko si unfa a abi hogihati tjika (Ako. 17:3, 16). Di soni aki o pasa hesi tee taa a o djei kuma a wan kodo daka dendu nöö a pasa. Dee sëmbë dee ta wooko makandi ku di Gaan Babilon an o pena mëni seei taa sö wan hogi bi o ko miti di Gaan Babilon, u di na tide jaa a bi ta njan buka ta taki taa: „Fa mi dë aki, könu mi dë e. Ma dë kuma dee mujëë manu u de dëdë, de fika a ganda. Nönö. Di soni de kai kusumi, na wan ten seei mi o sabi ën a mundu möönsö.”​—Ako. 18:7, 8.

12. Andi Jehovah an o da dee tiima pasi u de du, nöö faandi mbei an o da de pasi u de du di soni dë?

12 Gadu an o da dee tiima pasi u de kii dee sëmbë fëën puu a goonliba aki. Dee sëmbë u Gadu ta wai taa de sa ta tja di në u Gadu, nöö de bi piki hën buka di a bi piki de taa de musu kumutu a di Gaan Babilon (Tjab. 15:16, 17; Ako. 18:4). Söseei de toona heepi woto sëmbë u de kumutu a Babilon. Fëën mbei dee dinima u Jehovah an o tja ’dee sitaafu di Babilon o tja’. Ma tökuseei a o dë u de lei taa de abi wan taanga biibi u de sa pasa dee ten dë.

Aluwasi naasë u goonliba dee sëmbë u Gadu dë, de o ta futoou Gadu te sëmbë o hopo ko feti ku de (Luku palaklafu 13) *

13. (a) Ambë da Gögi? (b) Andi o mbei Gögi o hopo go feti ku dee sëmbë u Gadu, te u luku Ezekiëli 38:2, 8, 9?

13 Di ko di Gögi o ko feti ku dee sëmbë u Gadu. (Lesi Ezekiëli 38:2, 8, 9.) Baka te Jehovah puu hii dee poipoi keiki, nöö dee dinima fëën nöö o fika a goonliba aki ta dini ën. Wë di soni aki o mbei Saatan hati boonu seei. Nöö a o lei taa hati fëën boonu, u di a o mbei dee taku jeje paaja „buka” da dee tiima u goonliba u de fiti buka go feti ku dee dinima u Jehovah (Ako. 16:13, 14). Di kulupu tiima dë Bëibel ta kai „Gögi u Magögi”. Te dee tiima aki o hopo u go feti ku dee dinima u Jehovah, nöö di feti u Amagedon o bigi.​—Ako. 16:16.

14. Andi Gögi o ko fusutan?

14 Gögi o buta futoou a „libisëmbë kaakiti”, nasö a dee sodati fëën (2 Klon. 32:8). Ma u woo buta futoou a Jehovah di Gadu fuu, nöö  dee tiima o si u kuma donma. Faandi mbei de o si u sö? Wë de o pakisei taa di Gaan Babilon bi abi makiti, ma tökuseei dee gadu fëën an bi sa tjubi ën u „di mbeti” ku dee „teni tutu” fëën, an kii ën! (Ako. 17:16) Fëën mbei Gögi o si kuma an o taanga faa go kii dee sëmbë u Gadu kaba. ’De o go a de liba kumafa bundji ta ko tapa wan köndë’ (Eze. 38:16). Ma te u kaba fëën, Gögi o ko si taa wan hogi hën o ko miti ën dë. Leti kumafa Falao bi ko fusutan taa ku Jehovah a bi ta feti di de bi dë a di bë ze, sö nöö Gögi o ko fusutan taa ku Jehovah a ta feti tu.​—Ëki. 14:1-4; Eze. 38:3, 4, 18, 21-23.

15. Andi Jesosi o du a di feti u Amagedon?

15 Keesitu ku dee sodati fëën dee dë a liba ala, o hopo feti da dee sëmbë u Gadu, nöö de o kii Gögi ku dee sodati fëën (Ako. 19:11, 14, 15). Ma andi o pasa ku di gaan felantima u Jehovah de kai Saatan, di ganjan Gögi faa go feti ku dee sëmbë u Jehovah a di feti u Amagedon? Jesosi o vinde Saatan ku dee taku jeje fëën go a wan fundu baaku di an abi goon, ka de o dë wan dusu jaa longi.​—Ako. 20:1-3.

UNFA I SA FIKA A LIBI A DI FETI U AMAGEDON?

16. (a) Unfa u ta lei taa u „sabi Gadu”? (b) Faandi mbei u sa taki taa di sabi di u sabi Jehovah sa heepi u a di feti u Amagedon?

16 Ee u kë fika a libi a di feti u Amagedon, nöö u musu lei taa u „sabi Gadu”, söseei taa u ta „piki di Bunu Buka fuu Masa Jesosi”. U musu du dee soni dë aluwasi u dë a di tuutuu lei wantu jaa kaa nasö aluwasi wa dë nëën sö longi jeti (2 Tes. 1:7-9). U sa taki taa u „sabi Gadu” te u sabi andi a lobi ku andi an lobi, söseei te u sabi dee wëti fëën. U ta lei tu taa u sabi ën te u ta lei taa u lobi ën, te u ta piki hën buka, söseei te u ta dini hën wanwan nöö (1 Joh. 2:3-5; 5:3). Te u ta lei taa u sabi Gadu, nöö Gadu seei ta sabi u tu. Di soni dë hën o heepi u fuu sa fika a libi a di feti u Amagedon! (1 Kol. 8:3) Faandi mbei u taki sö? U di te Gadu ’sabi taa u dë sëmbë fëën’, nöö a o feni u bunu.

17. Andi da di piki di u musu ta „piki di Bunu Buka fuu Masa Jesosi”?

17 „Di Bunu Buka fuu Masa Jesosi” da hii dee soni di Jesosi bi lei dee bakama fëën, dee  dë sikifisikifi a di Wöutu u Gadu. U ta lei taa u ta piki di bunu buka te u ta du dee soni dee u ta lei. Hën da woo ta buta soni u di Könuköndë u Gadu a di fosu kamian a u libi, woo ta hoi dee wëti u Gadu, söseei woo ta paaja di buka u di Könuköndë u Gadu (Mat. 6:33; 24:14). Boiti dee soni aki, woo ta heepi dee salufu baaa u Keesitu u de du di wooko u de.​—Mat. 25:31-40.

18. Unfa dee salufu baaa u Keesitu o sa lei taa de tei di heepi di wotowan bi ta heepi de, u bigi?

18 Abiti möön dee salufuwan u Gadu o sa lei dee ’woto sikapu’ taa de bi tei di heepi di de bi ta heepi de u bigi (Joh. 10:16). Na un futu? Ufö di feti u Amagedon bigi, nöö hii dee 144.000 salufuwan o dë a liba ala kaa. De o dë jeje, nöö de o dë a dendu u dee sodati u Jehovah dee a o tei u kii Gögi, nöö de o tjubi dee „gaan hia sëmbë” u Jehovah (Ako. 2:26, 27; 7:9, 10). A di ten dë, dee sëmbë u Gadu o wai seei taa de bi heepi dee salufuwan u Gadu, di de bi dë a goonliba aki jeti!

UNFA U SA HOI USEEI A GADU A DI KABA PISITEN U DI GOONLIBA AKI?

19-20. Unfa u sa du hoi dou u te Amagedon ko, hii fa fuka ta miti u?

19 A dee lasiti daka aki, fuka ta miti sömëni u dee dinima u Jehovah. Ma hii fa a dë sö, tökuseei u sa hoi dou ku piizii (Jak. 1:2-4). Wan soni di sa heepi u gaanfa, hën da u musu ta begi nöömö ku hii u hati (Luk. 21:36). Boiti di dë, u musu ta lesi soni a di Wöutu u Gadu hiniwan daka, söseei u musu ta pakisei fundu u dee soni dee u ta lesi. Kandë u sa ta lei soni u dee tjabukama woto u Bëibel dee ta taki soni u di ten fuu aki (Ps. 77:12). Te u ta du dee soni aki, söseei te u ta du di peleikiwooko ka u sa du ën dou, nöö di biibi fuu an o ko suwaki, ma woo dë seei ta wakiti dee soni dee Gadu o du da u!

20 Pakisei unfa joo wai tjika te di Gaan Babilon an o dë möön, söseei te di gaan feti u Amagedon kaba! Ma boiti di dë, pakisei unfa joo wai tjika te hii sëmbë ko ta lesipeki Gadu ta hei hën në, söseei te de ko fusutan taa hën musu tii u! (Eze. 38:23) Dee sëmbë dee sabi Gadu, dee ta piki di Womi Mii fëën buka, söseei dee ta hoi dou, dë seei ta wakiti u Amagedon ko.​—Mat. 24:13.

KANDA 143 I musu ta du soni, ta wakiti, ta luku pasi

^ pal. 5 Dee sëmbë u Jehovah ta wakiti Amagedon wan longi pisiten kaa. A di woto aki woo taki andi da Amagedon, woo luku andi ku andi o pasa ufö Amagedon dou, söseei woo luku unfa u sa hoi useei a Jehovah u te Amagedon dou.

^ pal. 71 DEE SONI DI DEE PEENTJE KË TAKI: Gaan soni ta pasa. (1) Woo ta du di peleikiwooko solanga u sa du ën jeti, (2) woo ta lei soni u Bëibel go dou, söseei (3) woo ta buta futoou a Jehovah go dou taa a o tjubi u.

^ pal. 85 DEE SONI DI DEE PEENTJE KË TAKI: Wanlö siköutu ta seeka u de booko go a wan wosu u wanlö Keesitu sëmbë, di ta biibi taa Jesosi ku dee ëngëli fëën ta si andi ta pasa.