Skip to content

Skip to table of contents

I sabi un lati u dë u?

I sabi un lati u dë u?

TE I kë sabi un lati a dë, nöö andi i ta du? Wë kandë joo luku di oloisi fii. Kandë joo si taa a dë 1 juu pasa 30 miniti. Andi i bi o piki wan mati fii ee a bi hakisi i taa: „Un lati u dë?”

Wë di fasi fa joo kai di juu dëën sa tooka ku di fasi fa sëmbë bi o taki ën a woto kamian. Kandë joo piki ën taa: „1:30.” Nasö kandë joo piki ën taa: „13:30.” Kandë a so kamian sëmbë bi o taki taa: „Halufu tu.” Hën da 30 miniti ufö tu juu.

Unfa dee sëmbë fu awooten bi ta konda dee juu? Wë de bi ta du ën a peipei fasi. Dee Hebelejën Buku u Bëibel ta taki soni u „mamate”, „sonuati”, ku „ndeti” (Kenesesi 8:11; 19:27; 43:16; Detolonomi 28:29; 1 Könu 18:26). Ma so juu di Bëibel ta kai di juu seei.

Na awooten, dee Isaëli sëmbë bi ta abi wakitima, möönmöön u hoi wakiti a ndeti. Dee Isaëli sëmbë bi paati wan ndeti a dii pisiten ka peipei wakitima bi ta ko u du di wooko u de. A di pisiten di de pai Jesosi, dee Dju bi paati wan ndeti a fö pisiten, leti kumafa dee Giiki sëmbë ku dee Loomë sëmbë bi ta du ën.

Dee buku u Bëibel de kai Mateosi, Maikusi, Lukasi ku Johanisi, bi konda soni u dee pisiten aki. A wan pisiten u ganian kanda Jesosi bi waka a wata liba, go miti dee bakama fëën dee bi dë a wan boto (Mateosi 14:25). A Lukasi 12:38 Jesosi bi taki u „ganian kanda”, söseei a bi taki u „mindi ndeti”.

Di Jesosi bi piki dee bakama fëën taa de musu dë kabakaba ta wakiti ën, nöö a bi taki u peipei juu. A bi taki taa: „Wan o sabi di ten nasö di juu di mi o ko e, ee a sapate buka, ee a gaan ndeti, ee a ganian kanda, ee te kamian ta limbo, wan o sabi” (Maikusi 13:35). Di fosu wakitima bi ta bigi hoi wakiti a di pisiten te sonu nango, te kisi nëigi juu ndeti. Di u tu wakitima bi ta bigi a di pisiten u nëigi juu ndeti, te kisi tuwalufu juu ndeti. Di u dii wakitima bi ta bigi a di pisiten u tuwalufu juu ndeti, te kisi dii juu ganian kanda. A sa dë sö taa a di pisiten aki di ganian bi kanda a di ndeti di de bi go kisi Jesosi (Maikusi 14:72). Di u fö wakitima bi ta bigi a di pisiten u dii juu ganian kanda, te kisi mamate te „kamian ta limbo”.

Hii fa dee sëmbë fu awooten an bi abi dee oloisi fuu dee u abi a di ten aki, tökuseei de bi ta sabi un lati a dë.