Skip to content

Skip to table of contents

’Te un ko sabi dee soni mi ta lei unu aki ta du de kaa, nöö woon ta dë waiwai’

’Te un ko sabi dee soni mi ta lei unu aki ta du de kaa, nöö woon ta dë waiwai’

’Di njanjan u mi, hën da te mi ta du dee soni di di Sëmbë di manda mi ko aki kë u mi du, be di wooko fëën kaba.’​—JOHANISI 4:34.

KANDA: 80, 35

1. Andi sa pasa ee u ko ta pakisei kuma dee sëmbë u di goonliba?

FAANDI mbei a ta taanga da u fuu du dee soni dee sikifi a di Wöutu u Gadu? Wan u dee soni di mbei a ta taanga, hën da ee u kë du soni a wan bunu fasi, nöö u musu abi sakafasi. A dee „lasiti daka u di goonliba aki”, a ta taanga da u fuu lei taa u abi sakafasi u di sömëni sëmbë ’an lobi oto sëmbë möön leki de seei nöö, de abi langahati möön hii soni, de ta njan buka ta mbei deseei taa de dë gaan womi’, söseei de an ta duwengi deseei (2 Timoteo 3:1-3). U di u da dinima u Gadu, mbei u sabi taa wa musu ta tja useei a dee lö fasi aki. Ma a sa ta djei kuma soni ta waka bunu da dee sëmbë dee ta libi a di lö fasi aki, nöö de ta dë waiwai (Psalöm 37:1; 73:3). Kandë u sa ta hakisi useei taa: ’Mi o feni wini fëën ee mi ta booko mi hedi ku wotowan möön leki fa mi ta booko mi hedi ku miseei ö? Ee mi ta du soni a wan fasi di ta lei taa mi abi sakafasi, nöö sëmbë o ta lesipeki mi jeti ö?’ (Lukasi 9:48) Ee u ko ta pakisei kuma dee sëmbë u di goonliba aki, nöö di soni dë sa mbei u  ku dee baaa ku dee sisa fuu an dë mati möön, söseei a sa mbei a taanga da sëmbë u de si taa u da bakama u Keesitu. Ma te u ta lei soni u dee dinima u Gadu dee bi abi sakafasi, söseei te u ta djeesi de a di fasi fa de bi ta du soni, nöö soni o waka bunu da u.

2. Andi u sa lei a dee dinima u Gadu fu awooten, dee bi ta hoi deseei a Gadu?

2 Andi bi heepi dee dinima u Gadu fu awooten u de ko dë mati u Gadu? Andi de bi du u Gadu bi sa feni de bunu? Naasë de bi feni taanga u du soni a wan bunu fasi? Te u ta lesi dee woto u dee sëmbë aki a di Bëibel, söseei te u ta pakisei fundu u dee soni dee u ta lesi, nöö di biibi fuu o ko möön taanga.

SONI DI TA HEEPI U FUU SA ABI WAN TAANGA BIIBI

3, 4. (a) Unfa Jehovah ta lei u soni? (b) Faandi mbei u sa taki taa na sabi nöö u musu ko sabi soni u Bëibel ee u kë ko abi wan taanga biibi?

3 Jehovah ta heepi u fuu sa abi wan taanga biibi. A ta lei u soni ku di Bëibel, ku dee woto buku fuu, ku di website fuu, ku di JW Broadcasting, söseei ku dee komakandi. Ma Jesosi bi taki taa na sabi nöö u musu sabi andi di Bëibel ta taki. A bi taki taa: ’Di njanjan u mi, hën da te mi ta du dee soni di di Sëmbë di manda mi ko aki kë u mi du, be di wooko fëën kaba.’​—Johanisi 4:34.

4 Di du di Jesosi bi ta du di soni di Gadu kë, bi dë kuma njanjan dëën. Di njan di u ta njan bumbuu soni ta mbei u fii bunu, söseei a ta heepi u fuu ta dë gösöntu. Sö nöö di du di u ta du andi Gadu kë, ta mbei di biibi fuu ko möön taanga tu. A bi pasa kaa taa i bi go weiwei a di peleikiwooko, hën di i toona ko a wosu hën i ko ta fii möön bunu ö?

5. Un wini u ta feni te u ta du soni ku köni?

5 Te u ta du andi Jehovah ta piki u fuu du, nöö u ta lei taa u köni (Psalöm 107:43). Soni ta waka bunu da dee sëmbë dee ta du soni ku köni. „Soni an dë di sa da i piizii kuma di köni di i sa ko köni . . . Ee wan sëmbë ta panjëën hoi gingin, nöö a o dë kuma wan pau di ta da di sëmbë dë libi. Di sëmbë di ta panjëën hoi gingin o ta dë waiwai” (Nöngö 3:13-18). Jesosi bi taki taa: ’Te un ko sabi dee soni mi ta lei unu aki ta du de kaa, nöö woon ta dë waiwai’ (Johanisi 13:17). Dee bakama u Jesosi bi o dë waiwai solanga de bi ta piki Jesosi buka a soni. Solanga de bi dë a libi, nöö de bi musu ta du dee soni di Jesosi bi piki de taa de musu ta du. Te u kaba fëën, de bi ko ta djeesi ën a di fasi fa a bi ta libi.

6. Faandi mbei u musu ta du dee soni dee u ta lei?

6 A di ten aki, useei musu ta du dee soni dee u ta lei tu. Wan sëmbë di ta mbei wagi ta abi peipei wookolai, söseei a ta sabi unfa a musu du di wooko fëën. Te a ta wooko ku dee soni aki ufö a o sa du di wooko fëën a wan bunu fasi. Kandë di sëmbë aki ta du di wooko aki sömëni jaa kaa, ma tökuseei a musu ta wooko ku dee soni dee a lei ko sabi ee a kë ta du di wooko fëën a wan bunu fasi go dou. Wë sö nöö a dë ku u tu. Di u bi ko sabi soni u di tuutuu lei, nöö u bi ta wai u di u bi ta du dee soni di di Bëibel ta taki. Ma ee u kë dë waiwai u nöömö, nöö hiniwan daka u musu ta du dee soni di Jehovah ta lei u.

7. Andi u musu du ee u kë lei soni a dee woto dee sikifi a di Bëibel?

7 A di woto aki, woo taki u wantu soni di sa mbei a ta taanga da u so juu fuu lei taa u abi sakafasi. Woo luku unfa dee dinima u Jehovah u di ten di pasa bi lei taa de bi abi sakafasi. Ma na lesi nöö u musu ta lesi dee woto u de. Ma u musu ta pakisei fundu u de, söseei u musu ta luku andi u sa lei a de.

 NA SI ISEEI HEI MÖÖN WOTOWAN

8, 9. Andi u ta lei a di sakafasi di Paulosu bi abi, te u luku andi Tjabukama 14:8-15 ta taki? (Luku di peentje a bigi u di woto.)

8 Gadu kë taa „hii sëmbë u goonliba tuu musu feni libi u teego nëën. A kë fu hii sëmbë musu ko sabi dee soni fëën, biga de nöö da tuutuu soni a mundu” (1 Timoteo 2:4). Unfa i ta si dee sëmbë dee an sabi soni u di tuutuu lei jeti? Apösutu Paulosu bi peleiki da Dju sëmbë dee bi sabi soni u Jehovah kaa. Ma a bi ta peleiki da sëmbë di bi ta dini poipoi Gadu tu. Di soni aki bi o lei ee a bi abi sakafasi tuutuu. Faandi mbei u taki sö?

9 Di Paulosu bi go a di fosu sëndëlengi waka fëën, nöö hën ku Banabasi bi go a di pisiwata de kai Likonia, a di foto Lisita. Dee sëmbë u Likonia bi ta si Paulosu ku Banabasi kuma gadu. Fëën mbei de bi da de dee në u dee gadu u de. De bi ta kai de Zeus ku Hermes. Paulosu ku Banabasi bi wai ku di soni aki ö? De bi ta fii bunu taa dee sëmbë aki bi ta tei de kuma gadu, u di sëmbë an bi libi bunu ku de a dee tu lasiti foto ka de bi go u? De bi ta si kuma di soni aki bi o heepi möön hia sëmbë u de ko jei soni u di bunu buka u? Wë nönö! Di soni aki bi hogi a de tee, hën de bai taa: „Dee sëmbë aki, andi u ta du aki eee! Un disa ooo, gaantangi un disa! U seei da sösö sinkii sëmbë kuma unu tu!”​—Tjabukama 14:8-15.

10. Faandi mbei u sa taki taa Paulosu ku Banabasi an bi ta si kuma de hei möön dee sëmbë u Likonia?

10 Di Paulosu ku Banabasi bi piki dee sëmbë taa de seei da sösö sinkii sëmbë kuma de, nöö de bi kë taki taa de da zöndu libisëmbë tu. Ma na taki de bi kë taki taa de bi ta dini dee gadu u dee sëmbë u Likonia. Gadu hën bi manda Paulosu ku Banabasi u de du di sëndëlengiwooko (Tjabukama 13:2). Gadu bi salufu de ku di santa jeje fëën, nöö de bi o go tii ku Jesosi a liba ala. Ma di soni dë an bi mbei de fii kuma de hei möön wotowan. De bi sabi taa dee sëmbë dë seei bi o sa go tii ku Jesosi a liba ala tu ee de bi haika di bunu buka.

11. Unfa u sa djeesi Paulosu a di sakafasi di a bi abi, te u ta du di peleikiwooko?

11 Boo taki u wan soni di u musu ta du, di ta lei taa u abi sakafasi. U musu dë kuma Paulosu. Nöiti u musu si kuma di peleikiwooko di u ta du, ku dee soni dee Jehovah heepi u fuu du, ta mbei u hei möön wotowan. U sa hakisi useei dee soni aki: ’Unfa mi ta si dee sëmbë u di pisiwata ka mi ta peleiki? Mi ta si so u dee sëmbë aki wan fasi, u di de dë u wan woto pei föluku ö?’ A hii së u di goonliba, dee Jehovah Kotoigi ta suku dee sëmbë dee bi o kë jei soni u di bunu buka. So u dee Kotoigi ta mbei möiti u lei wan woto töngö, nasö de ta mbei möiti u de ko sabi unfa sëmbë u wan woto föluku ta du soni, hii fa sëmbë sa ta si dee sëmbë dë kuma sösö sëmbë. Dee Kotoigi an ta fii kuma de hei möön dee sëmbë di de ta peleiki da. Ma de ta mbei hii möiti u de ko sabi unfa de sa heepi sëmbë u de ko sabi soni u di Könuköndë bosikopu di de ta tja.

TE I TA BEGI DA WOTOWAN, NÖÖ I SA KAI DE NË

12. Unfa Epafasi bi lei taa a bi ta booko hën hedi ku wotowan tuutuu?

12 Wan woto soni di sa lei taa u abi sakafasi, hën da te u ta begi da dee baaa ku dee sisa fuu „dee ko ta biibi Masa Jesosi” kuma u (2 Petuisi 1:1). Di soni aki Epafasi bi ta du. A dii kamian nöö di Bëibel ta konda soni u Epafasi. Di siköutu bi kisi Paulosu söötö nëën pisi a Loomë, hën a bi sikifi wan biifi manda da dee Keesitu sëmbë u Kolosën. A bi piki de andi Epafasi bi ta du. A bi taki taa: „Hën seei dë wan futuboi u [Masa Jesosi] Keesitu tu, nöö  a ta begi taanga seei da unu fuun musu dë gingin a di biibi un ta biibi a Masa Jesosi” (Kolosën 4:12). Epafasi bi sabi dee baaa ku dee sisa bumbuu, nöö a bi ta booko hën hedi ku de gaanfa. Paulosu bi taki taa: „Epafasi dë ku mi aki. Hën seei dë a dunguwosu tu.” Hën da Epafasi seei bi abi fuka di a bi musu ta tja (Filemon 23). Ma tökuseei a bi ta booko hën hedi ku wotowan, nöö a bi ta heepi de. Epafasi bi ta begi da dee baaa ku dee sisa fëën, nöö useei sa du di wan seei soni tu. U sa ta kai në u de te u ta begi. Ee u ta begi da dee baaa ku dee sisa fuu, nöö di soni aki o heepi de tuutuu.​—2 Kolenti 1:11; Jakobosi 5:16.

13. Unfa i sa djeesi Epafasi te joo begi?

13 Pakisei ambë i sa begi da, nöö i kai di sëmbë dë në te i ta begi. I sa pakisei dee mati fii dee dë a di kemeente, nasö dee famii fii dee dë ku fuka. Kandë de musu luku unfa de musu du so soni, nasö kandë de musu hoi dou u di tesi ta miti de. Söseei i sa begi da dee baaa ku dee sisa, dee në u de sikifi a jw.org, a di pisi „Jehovah’s Getuigen die vanwege hun geloof gevangenzitten”. (Go a di pisi NIEUWS > JURIDISCHE ONTWIKKELINGEN.) I sa begi da dee baaa ku dee sisa di wan sëmbë u de lasi libi. I sa begi da dee baaa ku dee sisa dee ta dë a wan köndë ka feti dë, ka gaan ventu nasö gaan wata ko booko di köndë u de wan ten pasa dë, nasö dee abi möni fuka. Sömëni baaa ku sisa dë di bi o kë taa u musu begi da de! Te u ta begi da de, nöö u ta lei taa wa ta pakisei useei nöö, ma u ta lei taa u ta pakisei wotowan tu (Filipi 2:4). Jehovah ta jei te u ta begi da de.

’U MUSU HESI U JEI SONI’

14. Faandi mbei u sa taki taa Jehovah da di möön bunu sëmbë di u sa djeesi a di haika di a ta haika sëmbë ku pasensi?

14 Wan woto soni di sa lei taa u abi sakafasi, hën da te u ta haika bumbuu te wotowan ta fan. Jakobosi 1:19 ta taki taa u „musu hesi u jei soni”. Jehovah da di möön bunu sëmbë di u sa djeesi a di fasi fa a ta haika wotowan (Kenesesi 18:32; Josua 10:14). I sa lesi Ëkisodesi 32:11-14 fii si unfa Jehovah bi ta haika Mosesi di a bi ta fan ku ën. (Lesi ën.) Hii fa  Jehovah an bi musu u haika Mosesi, ma tökuseei Jehovah bi da Mosesi pasi faa konda unfa a ta fii. Ee wan sëmbë di bi mbei wan föutu a di ten di pasa, piki i wan soni, nöö i bi o tei ten haikëën, nöö i du andi a taki ö? Wë Jehovah ta tei ten haika sëmbë te de ta begi ën, u di de ta biibi ën.

15. Unfa u sa ta djeesi Jehovah a di lei di a ta lei taa a ta lesipeki wotowan?

15 Hakisi iseei dee soni aki: ’Ee Jehovah abi sakafasi tee taa a ta haika ku pasensi te sëmbë ta fan ku ën, leti kumafa a bi haika Abahamu, Lakëli, Mosesi, Josua, Manoa, Elia ku Esikia, nöö an bi o bunu u miseei du di wan seei soni tu ö? Unfa mi sa möön lei taa mi ta haika dee soni di dee baaa ku dee sisa u mi ta taki, söseei taa mi ta du kumafa de taki? Wan sëmbë dë a di kemeente nasö a di famii u mi di mi musu ta möön buta pakisei nëën u? Ee sö a dë, nöö andi mi sa du u lei taa mi ta buta möön pakisei nëën?’​—Kenesesi 30:6; Kuutuma 13:9; 1 Könu 17:22; 2 Kloniki 30:20.

’KANDË JEHOVAH O SI ANDI TA MITI MI’

Dafiti bi piki di futuboi fëën taa: „Disëën!” Andi ii bi o du? (Luku palaklafu 16, 17)

16. Unfa Könu Dafiti bi du soni di Simei bi ta du ku ën?

16 Te u abi sakafasi, nöö woo ta hoi useei te sëmbë ta libi hogi ku u (Efeise 4:2). U ta si fa wan sëmbë bi du di soni aki a 2 Samuëli 16:5-13. (Lesi ën.) Wan womi de kai Simei, di bi dë wan famii u Könu Saulosu, bi ta kosi Dafiti ku dee futuboi fëën, ta vinde kodjo da de. Dafiti bi sa du wan soni ku Simei, ma Dafiti bi disa Simei faa du ku ën nöö. A bi hoi hënseei di Simei bi ta kosi ën. Ma unfa Dafiti bi du hoi hënseei? U sa ko sabi di soni aki te u lesi Psalöm kapitë 3.

17. Andi bi heepi Dafiti faa bi sa hoi hënseei, nöö unfa u sa djeesi ën?

17 Dafiti bi sikifi Psalöm kapitë 3, di di womi mii fëën de kai Absalöm bi kë kii ën. Wë a di seei ten dë Simei bi du di soni ku Dafiti, ma tökuseei Dafiti bi hoi hënseei. Andi bi heepi ën faa bi sa du di soni aki? Wë Dafiti bi taki a Psalöm 3:4 taa: „Mi o bai kai Jehovah, nöö a o dë a di santa kuun fëën ala ta piki mi.” Te sëmbë an ta libi bunu ku u, nöö u musu begi Jehovah kumafa Dafiti bi du ën. Nöö Jehovah o da u di santa jeje fëën fuu sa hoi dou. Kandë i musu ko ta möön hoi iseei te sëmbë ta du ku i, nasö kandë i musu ta möön dë kabakaba u da wotowan paadon te de ta libi hogi ku i. I ta biibi taa Jehovah ta si te i dë a fuka, söseei taa a o heepi i, nöö a o mbei i feni gaan bunu ö?

„KÖNI DA DI MÖÖN GAAN SONI”

18. Un wini woo feni te u ta du andi Jehovah ta taki?

18 Te u ta du di soni di u sabi taa bunu, nöö woo ko köni, nöö Jehovah seei o mbei u feni gaan bunu. Di Bëibel ta taki a Nöngö 4:7 taa: „Köni da di möön gaan soni.” Hii fa wan sëmbë musu sabi soni ufö a sa du soni ku köni, ma tökuseei na fusutan nöö u musu ta fusutan soni. Te wan sëmbë ta du soni ku köni, nöö a ta dë u si a dee soni dee a ta du. Dee hansi seei ta du soni ku köni, u di de ta buta njanjan a wan së u de sa feni bakaten (Nöngö 30:24, 25). Di Bëibel ta taki taa a Keesitu u „ta si fa Gadu . . . köni tjika”. Hii juu Keesitu ta du soni di ta kai ku hën Tata (1 Kolenti 1:24; Johanisi 8:29). Gadu o paka u te u ta du soni di ta kai ku ën, söseei te u ta lei taa u abi sakafasi. (Lesi Mateosi 7:21-23.) Fëën mbei i musu ta mbei taanga möiti sö taa di kemeente sa dë wan kamian ka sëmbë sa ta dini Jehovah ku sakafasi. A ta tei ten fuu sa du soni di ta kai ku Gadu, söseei u musu abi pasensi tu. Ma te u ta du di soni aki, nöö u ta lei taa u abi sakafasi, nöö te u ko abi sakafasi, nöö woo ta dë waiwai u teego.