Skip to content

Skip to table of contents

Sëmbë musu jei di buka u Gadu, möönmöön fa di gaan daka fëën ta ko aki!

Di fasi fa Gadu ta kuutu soni​—A ta da sëmbë ten tjika u de bia de libi te a bai de a soni ö?

Di fasi fa Gadu ta kuutu soni​—A ta da sëmbë ten tjika u de bia de libi te a bai de a soni ö?

WAN sëmbë di ta öndösuku soni u di wei, si taa wan gaan ventu ta ko a wan kamian ka hia sëmbë ta libi. A ta mbei hii möiti faa piki dee sëmbë a fesi ufö a lati, u di a ta booko hën hedi ku dee sëmbë.

Sö nöö Jehovah ta piki sëmbë a hii së u goonliba taa wan „gaan ventu” dë ta ko di kofaliki möön hiniwan woto gaan soni di sëmbë bi o sa taki a njunsu taa dë a pasi ta ko. Unfa Jehovah ta piki sëmbë di soni aki? Nöö unfa u sa dë seiki taa a ta da sëmbë ten tjika u de sa du wan soni ufö a lati? Wë boo luku unfa Jehovah bi bai sëmbë a di ten di pasa taa wan hogi soni dë a pasi ta ko.

NA UN TEN GADU BI PIKI SËMBË TAA WAN HOGI DË A PASI TA KO?

Di Bëibel ta lei u taa a di ten di pasa, Jehovah bi ta bai sëmbë a fesi, ufö a ko kuutu dee sëmbë dee an bi ta kë piki hën buka. Jehovah bi lo’ u tei di kuutu di a bi ta ko kuutu sëmbë, maaka ku „gaan ventu” (Nöng. 10:25; Jel. 30:23). Hii juu Jehovah bi ta piki dee sëmbë sömëni ten a fesi taa sö a bi o du, söseei a bi ta piki de andi de bi musu du, u de sa ko ta libi kumafa a kë (2 Kön. 17:12-15; Neh. 9:29, 30). U di a bi ta kë da dee sëmbë taanga u de bia libi, mbei a bi lo’ u manda dee dinima fëën dee dë a goonliba aki go a de, u go piki de taa a bi o kuutu de, söseei u heepi de u de ko fusutan taa de bi musu bia libi ufö a lati poi.​—Amös. 3:7.

Noa bi dë wan u dee dinima dë. Dee sëmbë u di ten fëën bi ta libi fanafiti libi, söseei de bi ta du hogihati soni. Nöö Noa bi puu sömëni jaa longi ta piki de taa Gadu bi o tja wan Gaan Wata ko (Ken. 6:9-13, 17). Boiti di dë, Noa bi ta piki de tu andi de bi musu du sö taa de bi sa fika a libi te di Gaan Wata ko. A bi du di soni dë sö tee taa di Bëibel ta taki taa „Noa hën bi ta konda da dee sëmbë u di ten dë fa u de musu libi bunu a Gadu wojo”.​—2 Pet. 2:5.

Hii fa Noa bi mbei möiti u heepi dee sëmbë, tökuseei de an bi piki di buka u Gadu möönsö. De bi lei taa de an bi ta pena biibi na wan pikisö tësitësi seei. Di soni dë bi mbei taa di Gaan Wata bi ko „sawa de tuu fia tja go kii puu dë” (Mat. 24:39; Heb. 11:7). De an bi sa taki taa Gadu an bi bai de a fesi.

So juu Gadu an bi ta piki sëmbë wan hii pisiten a fesi taa a bi o kuutu de. Ma hii fa soni bi ta dë sö, tökuseei a bi ta da dee sëmbë ten tjika, u de bi sa bia de libi. A bi piki dee Egepiti sëmbë a fesi, di a bi o tja dee Teni Sitaafu ko. Wan u dee pasi, Jehovah bi manda Mosesi ku Alon u de go piki Falao ku dee futuboi fëën taa a bi o mbei de tja di u seibi sitaafu. A bi o mbei pisipisi ëisi kai a di köndë u de di debooko fëën. Ma ee hën dee pisipisi ëisi dë bi o kai di debooko fëën, nöö u sa taki taa Gadu bi da dee Egepiti sëmbë ten tjika u de bi sa feni kamian tjubi, u de an dëdë te di soni dë bi o pasa u? Wë di Bëibel ta taki taa: „Dee futuboi u di könu di bi biibi di soni di Jehovah bi taki, bi mbei dee futuboi u de ku dee mbeti u de go tjubi hesihesi a daki basu. Ma dee sëmbë dee an bi buta pakisei a di soni di Jehovah bi taki, bi disa dee futuboi u de ku dee mbeti u de a dee goon u de” (Ëki. 9:18-21). Wë, u ta si gbelingbelin taa Jehovah bi da dee sëmbë ten tjika. Fëën mbei hogi an bi miti dee sëmbë dee bi hopo du soni hesihesi.

Wë sö nöö Jehovah bi bai Falao ku dee futuboi fëën wantu ten a fesi, ufö a tja di u teni sitaafu ko. Ma de an bi pena dë a di soni dë (Ëki. 4:22, 23). Di soni dë bi mbei taa di fosu mii u de di de bi pai bi ko dëdë. Gaan soni wë bi miti de dë! (Ëki. 11:4-10; 12:29) De bi feni pasi u de du wan soni ufö a lati poi ö? Wë aai! Mosesi bi biinga go piki dee Isaëli sëmbë taa Gadu bi o tja di u teni sitaafu ko, söseei a bi piki de andi de bi musu du sö taa soni sa waka bunu da de ku dee sëmbë u de wosudendu (Ëki. 12:21-28). Un mëni sëmbë hopo du soni  kumafa Mosesi taki? Wë a kan taa söwan dii milion sëmbë bi haika. „Sömëni woto köndë sëmbë” seei bi haika tu, hën de kumutu a Egepiti makandi ku dee Isaëli sëmbë. Nöö sö wë mbei hogi an bi miti de. Dee sëmbë aki bi dë Egepiti sëmbë, ku woto köndë sëmbë tu.​—Ëki. 12:38.

Wë u ta si a hii dee soni dee u taki aki, taa te Jehovah bai sëmbë a soni, nöö hii juu a ta da de ten tjika u de sa bia de libi (Deto. 32:4). Ma faandi mbei Gadu ta du di soni dë? Apösutu Petuisi bi taki taa Jehovah „an kë fu na wan kodo sëmbë musu lasi kaba a sösö. Ma a kë u hii sëmbë musu bia de libi ko nëën” (2 Pet. 3:9). Awa, Gadu bi ta booko hën hedi ku dee sëmbë. A bi kë u de bia de libi, sö taa de an kisi sitaafu.​—Jes. 48:17, 18; Lom. 2:4.

U MUSU PIKI GADU BUKA A DI TEN AKI

A di ten aki, Jehovah ta mbei sëmbë a hii së u goonliba ko sabi taa wan gaan soni o pasa tu. Fëën mbei a dë fanöudu seei u sëmbë musu piki Gadu buka. Di Jesosi bi dë a goonliba aki, hën a bi piki sëmbë taa wan „gaan fuka” bi o ko, nöö di hogi goonliba aki bi o poi kaba a sösö (Mat. 24:21). Wë u di Gadu bi o ko kuutu sëmbë, mbei a bi taki wan tjabukama woto di bi ta lei gbelingbelin andi ku andi dee bakama fëën bi o ta si ta pasa, söseei a bi taki tu andi bi o ta miti de te di kuutu daka bi ta zuntu. Jesosi bi taki taa wanlö gaangaan soni bi o ta pasa a goonliba, nöö u ta si dee soni dë a di ten fuu aki.​—Mat. 24:3-12; Luk. 21:10-13.

Fëën mbei Jehovah ta da hii sëmbë taanga a di ten aki, u de bia ko ta dini ën, söseei u de ko ta piki hën buka a soni. A kë taa dee sëmbë dee ta piki hën buka a soni musu abi wan möön bunu libi nöunöu kaa, söseei a kë u de libi a di njunjun goonliba fëën di a o tja ko, ka de o sa feni hii dee gaan bunu dee a kë da de (2 Pet. 3:13). U di Jehovah kë u sëmbë biibi dee soni dee a ta paamusi de taa a o da de, mbei a ta mbei sëmbë konda wan buka da de, di sa mbei de feni libi. Di buka dë da di „bunu buka u di Njunjun Tii u Gadu”, di Jesosi bi taki taa bi o „paaja te dou hii goonliba . . . , be hii föluku musu jei” (Mat. 24:14). Gadu seeka dee tuutuu dinima fëën u de sa ta paaja di buka aki a söwan 240 köndë. Jehovah kë u sëmbë feni pasi piki di buka aki ka de sa piki ën dou, sö taa de sa fika a libi te a o poi di hogi goonliba aki kaba a sösö.​—Sef. 1:14, 15; 2:2, 3.

Wë u ta si taa an dë fuu hakisi useei ee Jehovah ta da sëmbë ten tjika u de sa feni pasi bia de libi, ufö a ko kuutu de. Biga u si taa hii juu a ta da de pasi u de du ën. Ma di soni di u musu hakisi useei, hën da: Dee sëmbë o bia ko ta piki Gadu buka ufö a lati poi ö? Wë u dë bosikopuma u Gadu. Fëën mbei boo mbei möiti go dou fuu sa heepi sëmbë ka u sa heepi dou, u de sa fika a libi te Gadu o poi di hogi goonliba aki kaba a sösö.