Skip to content

Skip to table of contents

U musu ko abi njunjun fasi, nöö u musu hoi dee fasi dë nöömö

U musu ko abi njunjun fasi, nöö u musu hoi dee fasi dë nöömö

„Un musu ko dë njunjun sëmbë di abi njunjun fasi.”​—KOLOSËN 3:10.

KANDA: 126, 28

1, 2. (a) Unfa u du sabi taa u sa ko dë njunjun sëmbë di abi njunjun fasi? (b) Andi da wantu fasi di sikifi a Kolosën 3:10-14 di sa heepi u fuu ko dë njunjun sëmbë?

DI NYUN-Grontapuvertaling fu den Kresten Griki Buku fu Bijbel, ta taki u di „njunjun libi” di u musu ko abi, söseei a ta taki taa u musu ko dë „njunjun sëmbë di abi njunjun fasi” (Efeise 4:24; Kolosën 3:10). Di soni aki nama ku dee fasi dee Gadu kë taa u musu ko abi, sö taa u sa „ko ta djeesi ën”. Ma woo sa ko abi dee njunjun fasi aki ö? Wë aai. Jehovah mbei libisëmbë kumafa hënseei dë. Fëën mbei u sa djeesi ën a dee bunu fasi dee a abi.​—Kenesesi 1:26, 27; Efeise 5:1.

2 A dë sö tuu taa hii u tuu da zöndu libisëmbë, nöö so juu u sa ta fii u du soni di an bunu. Di kamian ka u dë sa mbei u du soni di an bunu tu. Ma u di Jehovah abi tjalihati fuu, mbei a sa heepi u fuu sa ko dë kumafa a kë. Wë ee u kë dë kabakaba fuu sa du di soni aki, nöö boo luku wantu fasi di sa heepi u fuu  ko dë njunjun sëmbë. (Lesi Kolosën 3:10-14.) Baka di dë, woo luku unfa u sa lei taa u abi dee fasi aki te u ta du di diniwooko fuu.

„UNU TUU KO DË DI WAN”

3. Andi da wan fasi di u musu ko abi ee u kë ko dë njunjun sëmbë?

3 Paulosu bi taki taa ee u kë ko dë njunjun sëmbë di abi njunjun fasi, nöö wa musu lobi wan sëmbë möön wan wotowan. A bi taki taa: „Antoobi möön aluwasi ee i dë Dju sëmbë, ee ja dë Dju sëmbë, ee i koti di maaka u Dju, ee ja koti ën, ee i sabi soni, ee ja sabi wan wojo soni, ee i dë saafuma, ee i dë fiima.” Na wan sëmbë a di kemeente musu fii kuma a bunu möön wotowan, u di a ta si kuma di nasiön fëën möön hei, di köndë fëën möön hei, nasö u di a ta si kuma di wooko di a ta du möön hei. Faandi mbei an musu dë sö? U di u dee bakama u Keesitu tuu „dë di wan”.​—Kolosën 3:11; Galasia 3:28.

U ta libi bunu ku hii sëmbë aluwasi un nasiön sëmbë de dë, nasö aluwasi unfa de kiija de

4. (a) Unfa dee dinima u Jehovah musu ta libi ku wotowan? (b) Faandi mbei a sa taanga da Keesitu sëmbë u de libi makandi kuma wan famii?

4 Te u ko dë njunjun sëmbë di abi njunjun fasi, nöö woo ta lesipeki hii sëmbë, aluwasi un nasiön sëmbë de dë, nasö aluwasi unfa de kiija de (Loomë 2:11). A so köndë, di soni aki sa dë wan taanga soni seei. A di ten di pasa, hën dee tiima u Zuid-Afiikan bi paati sëmbë u peipei nasiön buta apaiti u de libi a wan kamian. Gaansë u dee sëmbë u di köndë dë ta libi a dee kamian dë jeti, te kisi dee Kotoigi tu. Di Tii Kulupu bi kë da dee baaa ku dee sisa u di köndë dë taanga u de ta ’hopo de hati’ da wotowan. Fëën mbei a tinimu-liba u di jaa 2013, hën dee baaa seti soni u de sa heepi dee baaa ku dee sisa u peipei nasiön dee ta libi a di köndë dë, u de sa ko sabi deseei möön bunu.​—2 Kolenti 6:13.

5, 6. (a) Andi di ölganisaasi u Jehovah bi seti u heepi dee sëmbë u Gadu u de ko ta libi möön gaanfa kuma wan famii? (Luku di peentje a bigi u di woto.) (b) Unfa soni bi waka?

5 Dee baaa bi seti soni sö taa a so sata nasö a so sonde, nöö Kotoigi u tu kemeente di ta fan tookatooka töngö bi sa ta du soni makandi. De bi nango a di peleikiwooko makandi, de bi nango a dee komakandi, söseei de bi nango ta luku de na de a de pisi. Höndöhöndö kemeente bi ta du di soni di dee baaa bi seti aki, nöö dee baaa u di bëikantoo bi ta jei fa soni bi ta waka bunu. Dee sëmbë dee an bi dë Kotoigi seei di soni aki bi ta bigi da. Wan sëmbë u wan keiki bi taki taa: „Mi na Kotoigi e, ma mi sa taki taa un seti soni a wan bunu fasi fuun du di peleikiwooko, nöö mi si taa un ta libi makandi kuma wan famii, hii fa un dë sëmbë u peipei nasiön.” Unfa dee baaa ku dee sisa bi si di soni di di ölganisaasi bi seti aki?

6 Bigibigi wan sisa de kai Noma, di ta fan di Xhosatöngö, bi ta sen u kai Kotoigi u Ingisitöngö kemeente ko nëën pisi, u di an bi abi hia soni. Ma baka di a bi peleiki makandi ku Kotoigi di dë bakaa, söseei di a bi go a de pisi, nöö an bi ta sen sö möön. A bi  taki taa: „De dë kuma u nöö!” Fëën mbei di dee baaa ku dee sisa u di Ingisitöngö kemeente bi ko peleiki makandi ku di Xhosatöngö kemeente, hën Noma bi kai so u dee baaa ku dee sisa dë ko njan nëën pisi. A bi bigi dëën seei di a si taa an bi toobi wan gaanwomi di dë wan bakaa u sindo a wan soni kuma söfu baki. Di soni di dee baaa bi seti aki, bi mbei sömëni baaa ku sisa ko abi njunjun mati, nöö nöunöu seei a ta mbei de ko dë mati u dee woto baaa ku sisa u de di kiija a peipei fasi tu.

KO ABI TJALIHATI KU BUNUHATI

7. Faandi mbei hii juu u musu ta lei taa u abi tjalihati u wotowan?

7 Solanga di goonliba u Saatan aki dë jeti, fuka o ta miti dee sëmbë u Jehovah. Kandë wa sa feni wooko, kandë u ko siki, kandë de ta du ku u, kandë gaan wata nasö gaan ventu ko booko di köndë fuu, kandë fufuuma ko fufuu soni fuu, nasö kandë wan woto soni miti u. Ee u kë ta heepi wotowan te de dë a fuka, nöö u musu abi tjalihati u de. Te u abi tjalihati u wotowan, nöö a o mbei u libi bunu ku de (Efeise 4:32). Ee u kë ko dë njunjun sëmbë, nöö u musu ko abi dee fasi aki sö tu. De o heepi u fuu sa djeesi Gadu, söseei fuu sa da wotowan kötöhati.​—2 Kolenti 1:3, 4.

8. Konda wan woto di ta lei andi sa pasa te u abi tjalihati u wotowan, söseei te u ta libi bunu ku hii sëmbë a di kemeente?

8 Unfa u sa lei möön gaanfa taa u ta libi bunu ku dee sëmbë dee kumutu a woto köndë ko a di kemeente fuu, nasö sëmbë di abi heepi fanöudu? Wë u musu tei de ku wai, u musu ko dë mati u de, söseei u musu mbei de fii bunu (1 Kolenti 12:22, 25). Wan womi de kai Dannykarl bi foloisi kumutu a di köndë Filipijnen go libi a di köndë Japan. U di a bi dë wan woto köndë sëmbë, mbei dee woto sëmbë dee hën ku de bi dë a di wan wookope an bi ta libi bunu ku ën. Bakaten a bi go a wan komakandi u dee Jehovah Kotoigi. A bi taki taa: „Hii fa gaansë u dee sëmbë dee bi sai dë bi dë sëmbë u Japan, tökuseei de bi tei mi ku wai kuma mi ku de bi sabi gaanduwe kaa.” U di dee baaa ku dee sisa bi libi bunu ku ën, mbei hën ku Jehovah bi ko dë gaan mati. An tei longi möön, hën Dannykarl tei dopu, nöö nöunöu a dë gaanwomi u wan kemeente. Dee woto gaanwomi ta wai taa hën ku hën mujëë Jennifer dë a di kemeente, nöö dee gaanwomi aki taki taa: „De an ta kule a gudu baka. De ta du di pioniliwooko, söseei sëmbë sa djeesi de a di fasi fa de ta buta di Könuköndë a di fosu kamian a de libi.”​—Lukasi 12:31.

9, 10. Konda wan woto di ta lei unfa soni sa waka bunu te u ta lei taa u abi tjalihati u wotowan a di peleikiwooko.

9 U abi di okasi fuu du „sëmbë bunu”, te u ta paaja di bunu buka u di Könuköndë u Gadu (Galasia 6:10). Sömëni Kotoigi ta abi tjalihati u dee sëmbë dee ta foloisi ko libi a di köndë u de, nöö de ta mbei möiti u lei di töngö u dee sëmbë dë (1 Kolenti 9:23). Di möiti di de bi mbei bi heepi wotowan. Wan sisa di ta libi a Ösutualia de kai Tiffany ta du di pioniliwooko, nöö a bi lei di Swahilitöngö faa bi sa go heepi a di Swahili kemeente di dë a di foto de kai Brisbane. Hii fa a bi taanga dëën faa lei di töngö, tökuseei a bi ta dë waiwai seei. Tiffany taki taa: „Ee i kë ta dë waiwai a di peleikiwooko, nöö i musu go a wan kemeente ka de ta fan wan woto töngö. A ta dë kuma i go a wan woto köndë söndö fii kumutu a di köndë fii. I ta  ko si taa dee baaa ku dee sisa fuu ta libi makandi kuma wan famii tuutuu.”

Andi ta mbei taa Keesitu sëmbë ta kë heepi dee sëmbë dee foloisi ko libi a di köndë u de? (Luku palaklafu 10)

10 Wanlö sëmbë u wan wosudendu di ta libi a Japan bi du di wan seei soni. Wan u dee mujëë mii de kai Sakiko, nöö a taki taa: „U lo’ u miti sëmbë u Balaziliköndë te u dë a di peleikiwooko. Te u bi ta lesi tëkisi kuma Akoalimbo 21:3, 4 da de, nasö Psalöm 37:10, 11, 29, da de a di Balazilitöngö Bëibel u de, nöö de bi ta haika. So juu wata bi ta pasa a de wojo tu.” Tjali u dee sëmbë bi kisi dee sëmbë u di wosudendu aki, nöö de bi kë heepi de u de ko sabi soni u di tuutuu lei. Fëën mbei de bi bigi lei di Balazilitöngö makandi. Bakaten dee sëmbë u di wosudendu aki bi heepi sëmbë sö tee taa dee baaa bi sa hopo wan Balazilitöngö kemeente. De bi heepi sömëni sëmbë u de ko toon dinima u Jehovah. Sakiko taki taa: „A bi taanga da u fuu lei di Balazilitöngö, ma wa sa tei dee möiti dee u bi mbei maaka ku dee gaan bunu di Jehovah bi mbei u feni. U dë ku tangi a hati seei u di gaan bunu di Jehovah bi da u aki.”​—Lesi Tjabukama 10:34, 35.

KO ABI SAKAFASI

11, 12. (a) Faandi mbei wa musu kë ko dë njunjun sëmbë di abi njunjun fasi u woto sëmbë hedi? (b) Andi o heepi u fuu abi sakafasi nöömö?

11 Di soni mbei u musu ko dë njunjun sëmbë di abi njunjun fasi, hën da u di u kë gafa Jehovah, ma na u di u kë u wotowan gafa u. Na fëëkëtë taa wan bumbuu ëngëli seei bi ko abi gaanfasi, hën a du zöndu. (Luku Ezekiëli 28:17.) U da zöndu libisëmbë. Fëën mbei a ta möön taanga da u fuu ko abi sakafasi. Ma tökuseei u sa ko abi sakafasi. Andi sa heepi u fuu ko abi di fasi aki?

12 Wan soni di sa heepi u fuu ko abi sakafasi, hën da te u ta lesi di Wöutu u Gadu hiniwan daka, söseei te u ta pakisei fundu fëën (Detolonomi 17:18-20). U musu ta pakisei fundu u dee soni di Jesosi bi ta lei sëmbë, söseei u musu ta pakisei fundu u di fasi fa a bi lei taa a abi sakafasi (Mateosi 20:28). Jesosi bi abi sakafasi sö tee taa a bi wasi dee apösutu fëën futu (Johanisi 13:12-17). Wan woto soni di u sa du, hën da u sa begi Jehovah faa da u di santa jeje fëën. Di santa jeje fëën sa heepi u fu wa ko ta fii taa u bunu möön wotowan.​—Galasia 6:3, 4; Filipi 2:3.

Te u abi sakafasi, nöö woo ta libi fiifii makandi ku useei a di kemeente

13. Andi da dee wini dee u ta feni te u abi sakafasi?

13 Lesi Nöngö 22:4. Jehovah kë taa u musu abi sakafasi. Te u abi di fasi aki, nöö  a ta tja sömëni wini ko da u. Te u abi sakafasi, nöö woo ta libi fiifii makandi ku useei a di kemeente. Boiti di dë, Jehovah o lei u di bunuhati fëën. Apösutu Petuisi bi taki taa: „Un musu ta abi saka fasi da unu na unu, kuma wan koosu di i lo’ u ta bisi hiniwan daka, an ta kumutu a i sinkii. Sö di sakafasi musu dë gaan soni da unu tjika. Wë biga a dë a di Buku taa: Gadu dë felantima u dee sëmbë dee abi gaan fasi, ma dee sakafasi sëmbë a ta heepi ku ën bunuhati.”​—1 Petuisi 5:5.

KO ABI SAAPI FASI KU PASENSI

14. Ambë da di sëmbë di abi saapifasi ku pasensi möön gaanfa?

14 A di ten aki, te wan sëmbë abi saapifasi ku pasensi, nöö wotowan ta si ën kuma sösö sëmbë. Ma di soni aki an dë sö tuutuu. Jehovah, di möön makiti sëmbë a hii di mundu, hën ta da sëmbë dee fasi aki. Hën da di sëmbë di abi saapifasi ku pasensi möön gaanfa (2 Petuisi 3:9). Pakisei unfa Jehovah bi abi pasensi tjika di a bi mbei dee ëngëli fëën go fan ku Abahamu ku Lotu (Kenesesi 18:22-33; 19:18-21). Pakisei unfa Jehovah bi abi pasensi tjika ku dee Isaëli sëmbë, hii fa möön leki 1500 jaa longi de bi tja deseei a wan fasi di ta lei taa de abi taangajesi.​—Ezekiëli 33:11.

15. Unfa Jesosi bi lei taa a abi saapifasi ku pasensi tjika?

15 Jesosi bi abi saapifasi tu (Mateosi 11:29). A bi ta hoi pasensi da dee bakama fëën, hii fa de bi abi suwakifasi. Di Jesosi bi ta du di diniwooko fëën a goonliba aki, nöö sëmbë bi ta kuutu ën, hii fa an bi du na wan hogi soni. Ma a bi abi saapifasi ku pasensi te kuma di daka di a dëdë. Di Jesosi bi dë a di posu ta tja sitaafu, hën a bi hakisi hën Tata faa da dee sëmbë dee bi ta kii ën paadon. A bi taki taa: „De an saandi de ta du” (Lukasi 23:34). Aluwasi Jesosi bi ta tja sitaafu seei, tökuseei a bi ta lei taa a abi saapifasi ku pasensi.​—Lesi 1 Petuisi 2:21-23.

16. Unfa u sa lei taa u abi saapifasi ku pasensi?

16 Paulosu bi lei u wan fasi fa u sa lei taa u abi saapifasi ku pasensi. A bi sikifi taa: „Un musu hoi pasensi da unuseei ta da unuseei paadon ku hii unu hati, aluwasi un feni taa wan wotowan du wan soni di hati unu. Leti kumafa Jehovah ta da unu paadon, sö nöö un musu ta da wotowan paadon tu” (Kolosën 3:13). Ee u kë ta da wotowan paadon, nöö u musu ko abi saapifasi ku pasensi. Di soni aki o mbei woo sa ta libi fiifii ku useei a di kemeente.

17. Faandi mbei u musu ko abi saapifasi ku pasensi?

17 Jehovah kë taa u musu abi saapifasi ku pasensi te u ta libi ku wotowan. U musu ko abi dee fasi aki ee u kë libi a di njunjun goonliba (Mateosi 5:5; Jakobosi 1:21). Te u abi saapifasi ku pasensi, nöö u ta tja gafa ko da Jehovah, söseei u ta da wotowan taanga u de ko abi dee fasi aki sö tu.​—Galasia 6:1; 2 Timoteo 2:24, 25.

KO ABI LOBI

18. Unfa lobi nama ku di si di wa musu si wan sëmbë hei möön di wotowan?

18 Hii dee fasi dee u taki u de a di woto aki  tuu nama ku lobi. Di bakama u Jesosi de kai Jakobosi bi musu da dee baaa ku dee sisa fëën lai, u di de bi ta libi bunu ku dee baaa ku dee sisa u de di bi gudu, möön fa de bi ta libi ku dee pootiwan. A bi lei de taa di soni aki an ta kai ku di wëti u Gadu di ta taki taa i musu „lobi sëmbë kumafa i lobi i seei”. A bi taki tu taa: „Ee i ta luku taa di ala hei nöö di otowan möfina, nöö na Gadu soni i ta du möön e” (Jakobosi 2:8, 9). Ee u lobi wotowan, nöö wa o ta si kuma wan sëmbë hei möön di wotowan, u di a go a hei siköö, u di a dë sëmbë u wan pei nasiön, nasö u di a ta du wan pei wooko. Wa musu ta du kuma u lobi hii dee baaa ku dee sisa fuu, hii fa an dë sö. Ma u musu lobi hii de tuu ku hii u hati.

19. Faandi mbei u musu ko abi lobi?

19 „Ee i lobi wan sëmbë joo ta hoi pasensi dëën e. Joo ta fii ku ën”, söseei „ja o mbei i seei hei dëën” (1 Kolenti 13:4). Ee u kë ta paaja di bunu buka da sëmbë, nöö u musu abi pasensi, u musu abi sutifasi, söseei u musu abi sakafasi tu (Mateosi 28:19). Dee fasi aki ta mbei u sa ta libi ku hii dee baaa ku dee sisa fuu a di kemeente. Te hii u tuu ta lei taa u lobi useei a di lö fasi aki, nöö woo ta libi makandi kuma wan famii a di kemeente, söseei woo ta tja gafa ko da Jehovah. Te wotowan si di soni aki, nöö de o kë ko a di tuutuu lei. Fëën mbei a kaba u di pisi di dë a Bëibel di ta taki taa u musu ko dë njunjun sëmbë di ko abi njunjun fasi, wan pisi ta taki taa: „U hii dee libi aki tuu, nöö lobi hën da di mama u de e. Biga te un lobi unu na unu, nöö un sa libi makandi ku wan hati kumafa Gadu kë.”​—Kolosën 3:14.

I MUSU ’KO DË WAN HII NJUNJUN SËMBË’

20. (a) Andi ku andi u musu hakisi useei? Nöö faandi mbei u musu du ën? (b) Un soni u sa dë ku di mëni taa o pasa a di ten di ta ko?

20 Hii u tuu musu hakisi useei di soni aki: ’Andi mi sa du jeti u tooka dee awoo fasi dee mi bi abi, söseei u ma ko abi dee fasi dë möön?’ U musu begi Jehovah faa heepi u. U musu mbei taanga möiti fuu tooka di fasi fa u ta pakisei, ku di fasi fa u ta libi, sö taa u sa dë a „dendu u dee sëmbë Gadu ta tii” (Galasia 5:19-21). Söseei u musu hakisi useei taa: ’Mi ta mbei möiti jeti u tooka di fasi fa mi ta pakisei, sö taa Jehovah sa wai ku mi ö?’ (Efeise 4:23, 24). U da zöndu libisëmbë, nöö fëën mbei u musu ta mbei taanga möiti fuu ko dë njunjun sëmbë di ko abi njunjun fasi. Di soni aki da wan soni di u musu ta du nöömö. Wë di libi o suti seei te hii sëmbë ko dë njunjun sëmbë di abi njunjun fasi, söseei te woo ta djeesi Jehovah a dee waiti fasi dee a abi, söndö fuu ta mbei föutu!