Skip to content

Skip to table of contents

Djeesi Jehovah, di Gadu di ta da sëmbë taanga

Djeesi Jehovah, di Gadu di ta da sëmbë taanga

„Na fëëë, biga mi dë ku i. Na fëëë . . . Mi o mbei i ko taanga. Mi o heepi i tuutuu.”​—JESAAJA 41:10, NW.

KANDA: 7, 3

1. Di Adam ku Eva bi hopo fia ku Gadu, nöö unfa Jehovah bi da libisëmbë taanga?

JEHOVAH da wan Gadu di ta da sëmbë taanga. A bi bigi du di soni aki sensi di libisëmbë ko abi zöndu. Baka di Adam ku Eva hopo fia ku Gadu, hën wantewante dë a taki wan tjabukama woto di bi o sa da dee bakamii u Adam ku Eva taanga. Di tjabukama woto aki sikifi a Kenesesi 3:15, nöö a ta taki taa Saatan Didibi ku dee hogi di a ta du, an o dë möön.​—1 Johanisi 3:8; Akoalimbo 12:9.

JEHOVAH BI TA DA DEE DINIMA FËËN TAANGA A DI TEN DI PASA

2. Unfa Jehovah bi da Noa taanga?

2 Buta pakisei a di fasi fa Jehovah bi da Noa taanga. Dee sëmbë dee bi ta libi a di ten u Noa bi abi hogihati, söseei de bi ta libi fanafiti a di së u manu ku mujëë soni. Noa ku dee sëmbë fëën nöö bi ta dini Jehovah. Di soni aki bi sa mbei Noa lasi hati (Kenesesi 6:4, 5, 11; Judasi 6). Ma Jehovah bi da Noa degihati  faa sa dini ën go dou, söseei faa ta du bunu soni (Kenesesi 6:9). Jehovah bi piki Noa taa a bi o kii dee hogihati sëmbë, söseei a bi piki ën andi a bi musu du, fu hën ku dee sëmbë fëën bi sa fika a libi (Kenesesi 6:13-18). Jehovah bi da Noa taanga tuutuu.

3. Unfa Jehovah bi da Josua taanga? (Luku di peentje a bigi u di woto.)

3 Bakaten, Jehovah bi da Josua degihati u di a bi musu du wan gaan wooko. A bi musu tja dee sëmbë u Gadu go a di paamusi köndë, söseei a bi musu feti wini dee taanga sodati dee bi ta libi ala. Jehovah bi sabi taa Josua bi sa fëëë, fëën mbei a bi piki Mosesi taa: „Buta Josua kuma fesima. Dëën degihati ku taanga, biga hën o tja dee sëmbë go a aba lio. Hën o mbei de wini di köndë di joo si” (Detolonomi 3:28). Baka di dë, hën Jehovah seei da Josua taanga di a bi taki taa: „Ma bi taki da i kaa taa: ’Tai hati, na fëëë u?’ Na mbei sëmbë panta i, nöö na tëëmë tu, biga Jehovah i Gadu dë ku i, aluwasi naasë i nango” (Josua 1:1, 9). Unfa i si kuma Josua bi fii di a bi jei dee soni aki?

4, 5. (a) Unfa Jehovah bi da dee dinima fëën taanga a di ten di pasa? (b) Unfa Jehovah bi da di Womi Mii fëën taanga?

4 Jehovah bi da hii dee sëmbë fëën taanga tu. Jehovah bi sabi taa dee Dju bi o abi taanga fanöudu te de bi o tja de go a katibo a Babilon. Fëën mbei a da de taanga di a taki taa: „Na fëëë, biga mi dë ku i. Na fëëë, biga mi da di Gadu fii. Mi o mbei i ko taanga. Mi o heepi i tuutuu. Awa, mi o panjan i ku di leti së maun u mi di ta du soni a wan leti fasi” (Jesaaja 41:10). Bakaten, Jehovah bi da dee fesiten Keesitu sëmbë taanga, nöö a di wan seei fasi a ta da u taanga a di ten aki tu.​—Lesi 2 Kolenti 1:3, 4.

5 Jehovah bi da di Womi Mii fëën taanga tu. Baka di Jesosi bi tei dopu, hën a jei wan töngö a liba ala taa: „Ja si di sëmbë aki ö? Hën wë da di lobi womi mii u mi. Libi fëën ta kai ku mi” (Mateosi 3:17). U sa dë seiki taa dee wöutu aki bi da Jesosi taanga di a bi ta du di peleikiwooko a goonliba aki.

JESOSI BI TA DA WOTOWAN TAANGA

6. Unfa di woto di Jesosi bi konda u dee talënti ta da u taanga?

6 Jesosi bi ta djeesi hën Tata, u di a bi ta da wotowan taanga sö taa de bi sa hoi deseei a Gadu. A bi du di soni aki di a bi konda di woto u dee talënti, ka di masa bi piki hiniwan u dee futuboi fëën dee bi hoi deseei nëën taa: „Aai, womi, i dë wan sëmbë u futoou e. I dë wan bumbuu futuboi u mi seei. Wë nöö di i wooko sö bunu ku di piki soni mi bi buta a i maun dë, nöö mi o toona buta wan möön gaan soni a i maun awaa. Nöö be i fika ku mi aki e, be u tuu ta wai makandi” (Mateosi 25:21, 23). Dee wöutu aki bi da dee bakama u Jesosi taanga u de ta dini Jehovah ku hii de hati!

Jesosi bi da Petuisi kötöhati, söseei a bi dëën di wooko u da wotowan taanga

7. Unfa Jesosi bi da dee apösutu fëën taanga, möönmöön Petuisi?

7 Hii fa dee apösutu bi ta fia ku deseei ee undi u de hei möön woto, tökuseei hii juu Jesosi bi ta abi pasensi ku de. A bi piki de taa a dë fanöudu u abi sakafasi, söseei u dini wotowan ka u de kë u wotowan dini de (Lukasi 22:24-26). Sömëni pasi Petuisi bi mbei föutu, nöö di soni dë bi hati Jesosi (Mateosi 16:21-23; 26:31-35, 75). Ma Jesosi an bi bia baka da Petuisi. Ma a bi da Petuisi taanga, söseei a bi dëën di wooko u da wotowan taanga.​—Johanisi 21:16.

 DE BI TA DA DESEEI TAANGA NA AWOOTEN

8. Unfa Esikia bi da dee hedima u sodati ku dee sëmbë u Juda, degihati?

8 Hii fa Jesosi an bi ko a goonliba jeti u lei sëmbë unfa de musu da wotowan taanga, tökuseei dee dinima u Jehovah bi sabi taa de bi musu ta da wotowan taanga. Pakisei di woto u Esikia. Di dee Asilia sodati bi ko u ko feti ku dee sëmbë u Jelusalen, hën a bi kai dee hedima u sodati ku dee sëmbë u di köndë ko u da de kötöhati, nöö dee soni dee a bi taki „bi da de degihati”.​—Lesi 2 Kloniki 32:6-8.

9. Andi u sa lei u di fasi fa Jöpu bi ta da wotowan kötöhati?

9 U sa lei soni a di fasi fa Jöpu bi ta da wotowan kötöhati. Hii fa hënseei bi abi kötöhati fanöudu, tökuseei a bi ta lei sëmbë unfa de sa da wotowan kötöhati. Jöpu bi piki dee womi dee bi ko u dëën kötöhati taa ee hën bi musu da de kötöhati, nöö a bi o taki soni u da de taanga, söseei u mbei de fii bunu, ka faa bi mbei de fii bookosaka (Jöpu 16:1-5). Ma te u kaba fëën, Jehovah ku Elihu bi da Jöpu taanga.​—Jöpu 33:24, 25; 36:1, 11; 42:7, 10.

10, 11. (a) Faandi mbei di mujëë mii u Jefita bi abi kötöhati fanöudu? (b) Ambë ku ambë u sa ta da taanga a di ten aki?

10 Di mujëë mii u Jefita seei bi abi kötöhati fanöudu. Hën tata Jefita, di bi dë wan kuutuma, bi o go feti ku dee Amon sëmbë. A bi paamusi Jehovah taa ee a bi heepi ën faa wini di feti, nöö a bi o dëën di fosu sëmbë di bi o kumutu a di wosu fëën ko miti ën, faa go dini Jehovah a di tenti fëën. Wë dee Isaëli sëmbë bi wini di feti, nöö di fosu sëmbë di bi ko miti Jefita bi dë di wan kodo mii fëën. Di soni aki bi mbei Jefita tjali gaanfa. Ma a bi hoi hënseei a di buka di a bi mbei ku Jehovah, hën a manda di mujëë mii fëën faa go dini Jehovah a di tenti fëën, hii hën libi longi.​—Kuutuma 11:30-35.

11 Di soni aki bi musu u taanga da Jefita faa du, ma a bi o möön taanga da di mujëë mii fëën. Di mujëë mii fëën bi dë kabakaba u du andi hën tata bi paamusi Jehovah (Kuutuma 11:36, 37). Di soni aki bi kë taki taa an bi o sa tööu, söseei an bi o pai miii. Di böngö u Jefita bi o kaba. A bi abi kötöhati ku taanga fanöudu seei. Di Bëibel ta taki taa: „A bi ko dë wan guwenti a Isaëli taa hiniwan jaa dee mujëë mii u Isaëli bi nango gafa di mujëë mii u Jefita fö daka longi” (Kuutuma 11:39, 40). Di mujëë mii u Jefita ta mbei u mëni dee Keesitu sëmbë u di ten aki di an tööu, u di de kë du möön soni a di dini di de ta dini Jehovah. U musu ta gafa de, söseei u musu ta da de taanga.​—1 Kolenti 7:32-35.

DEE APÖSUTU BI TA DA DEE BAAA KU DEE SISA TAANGA

12, 13. Unfa Petuisi bi da dee baaa ku dee sisa degihati?

12 Di ndeti ufö de kii Jesosi, hën a piki apösutu Petuisi taa: „’Simon o.’ Hën a piki.  Hën a taa: ’Haika e, mi o taki wan soni da i. Di didibi Saatan . . . o pooba unu leti kuma te wan sëmbë ta fon alisi ta böö, faa musu sabi undi da di kakisa, undi da di njanjan. Ma haika Simon, mi begi da i kaa e, fu ja musu disa di biibi fii di i abi. Biga joo disa mi. Ma te i toona ko a mi baka nöö i musu heepi dee otowan fii tu, fu de ko möön taanga a di biibi.’”​—Lukasi 22:31, 32.

Dee biifi di dee apösutu bi sikifi, bi da dee fesiten Keesitu sëmbë taanga, nöö de ta da u taanga a di ten aki jeti (Luku palaklafu 12-17)

13 Petuisi bi dë wan u dee baaa di bi ta tei fesi a di kemeente u dee fesiten Keesitu sëmbë (Galasia 2:9). A bi da dee baaa ku dee sisa taanga u di a bi du wan soni a di Pensiti daka, di bi lei taa a bi abi degihati. Nöö bakaten a bi du woto soni di bi lei taa a bi abi degihati tu. Di a bi dini Jehovah sömëni jaa longi, hën a bi sikifi wan biifi manda da dee baaa ku dee sisa. A bi taki taa: „Fa mi ta mbei di biifi da unu aki, . . . nöö mi mbei ën a wan sati fasi sö fuun feni degihati nëën. Biga dee soni mi sikifi aki, de ta lei unu di bunuhati u Gadu fa a dë tuutuu soni tjika, nöö un musu taanpu nëën gingin e, dee sëmbë” (1 Petuisi 5:12). Dee biifi u Petuisi bi da dee Keesitu sëmbë u di ten dë degihati. Ma a ta da u degihati a di ten aki tu, hii fa u dë ta wakiti u Jehovah du hii dee soni dee a paamusi u!​—2 Petuisi 3:13.

14, 15. Unfa dee buku u Bëibel dee apösutu Johanisi bi sikifi ta da u taanga?

14 Apösutu Johanisi seei bi dë wan u dee baaa di bi ta tei fesi a di kemeente u dee fesiten Keesitu sëmbë. A bi sikifi soni di ta taki u di libi u Jesosi di a bi dë a goonliba  aki. Di Bëibel buku Johanisi bi da Keesitu sëmbë taanga höndöhöndö jaa longi, nöö a ta da u taanga a di ten aki jeti. A di buku Johanisi nöö u ta lesi taa Jesosi bi taki taa sëmbë bi o sabi dee tuutuu bakama fëën, a di lobi di de bi o ta lobi de na de.​—Lesi Johanisi 13:34, 35.

15 U ta lei sömëni soni a dee dii biifi di Johanisi bi sikifi. Te u ta fii bookosaka u di u bi mbei wan föutu, nöö u ta fii bunu te u ta lesi taa di lusupaima u Jesosi ta „puu dee hogilibi fuu tuu a u hati fuu ta dë limbolimbo” (1 Johanisi 1:7). Ma ee háti fuu ta fon u jeti, nöö u sa feni kötöhati te u ta lesi taa „Gadu hei möön libisëmbë hati. A sabi hii soni” (1 Johanisi 3:20). Johanisi da di wan kodo sëmbë di sikifi a Bëibel taa „Gadu, hën hatiböö da lobi” (1 Johanisi 4:8, 16). Di u tu ku di u dii biifi di Johanisi bi sikifi bi gafa dee Keesitu sëmbë dee ta „piki di lei u Masa Gadu”.​—2 Johanisi 4; 3 Johanisi 3, 4.

16, 17. Unfa apösutu Paulosu bi da dee fesiten Keesitu sëmbë taanga?

16 Apösutu Paulosu da wan sëmbë di u sa djeesi a di fasi fa a bi ta da dee baaa ku dee sisa taanga. Baka di Jesosi dëdë, hën gaansë u dee apösutu bi fika a Jelusalen, di kamian ka di tii kulupu bi dë (Tjabukama 8:14; 15:2). Dee Keesitu sëmbë dee bi ta libi a Judea bi ta konda soni u Keesitu da dee sëmbë dee bi ta biibi taa wan kodo Gadu nöö dë. Ma di santa jeje bi manda Paulosu faa bi go peleiki da dee Giiki sëmbë, dee Loomë  sëmbë, ku woto sëmbë di bi ta dini peipei gadu.​—Galasia 2:7-9; 1 Timoteo 2:7.

17 Paulosu bi waka a di köndë di de ta kai Tolukuköndë a di ten aki. A bi waka a Giikiköndë ku Italiaköndë tu. A bi peleiki da dee sëmbë dee an bi dë Dju, nöö a bi seti wantu Keesitu kemeente. Soni bi ta taanga da dee sëmbë dee bi ko toon Keesitu sëmbë. Dee sëmbë u di köndë u de bi ta du ku de, fëën mbei de bi abi kötöhati fanöudu (1 Tesalonika 2:14). A di pisiten u di jaa 50, hën Paulosu bi sikifi wan biifi da dee baaa ku dee sisa u Tesalonika u da de taanga. A bi taki taa: „Wë nöö dee sëmbë, u kë fuun ko sabi taa hiniwan ten te u ta begi nöö u ta mëni hii unu tuu a u Tata Masa Gaangadu fesi. U ta dëën tangi da unu seei. Biga u ta mëni fa un ta biinga da di wooko u Gadu fu di un ta biibi ën hedi, nöö u ta mëni tu fa un ta wooko taanga fu di di lobi u Gadu dë a unu hati. U ta mëni fa un ta tai hati a dee sitaafu dee un ta tja naandë te go dou” (1 Tesalonika 1:2, 3). A bi piki dee baaa ku dee sisa tu taa de musu ta da de na de degihati. A bi taki taa: „Be un ta da unu seei degihati ta heepi unu na unu fuun nango fesi nöömö.”​—1 Tesalonika 5:11.

DI TII KULUPU TA DA SËMBË TAANGA

18. Unfa di tii kulupu u di ten u dee fesiten Keesitu sëmbë bi heepi Filipi?

18 A di ten u dee fesiten Keesitu sëmbë, nöö Jehovah bi wooko ku di tii kulupu u da hii dee Keesitu sëmbë taanga, te kisi dee baaa dee bi ta tei fesi a dee kemeente. Di tii kulupu bi heepi Filipi di a bi go konda soni u Keesitu da dee Samalia sëmbë. De bi manda Petuisi ku Johanisi di bi dë a di tii kulupu tu, u de go begi da dee sëmbë dee bi ko toon Keesitu sëmbë, sö taa di santa jeje bi sa tii de (Tjabukama 8:5, 14-17). Filipi ku dee baaa ku dee sisa aki bi feni kötöhati seei, u di di tii kulupu bi heepi de!

19. Unfa dee fesiten Keesitu sëmbë bi fii di de bi lesi di biifi di di tii kulupu bi manda da de?

19 Bakaten, di tii kulupu bi musu du wan fanöudu soni. De bi musu taki ee dee Keesitu sëmbë dee an bi dë Dju bi musu koti di maaka u dee Dju, kumafa di wëti di Gadu bi da Mosesi bi ta taki (Tjabukama 15:1, 2). Baka di di tii kulupu bi begi hakisi Jehovah faa mbei di santa jeje fëën heepi de, söseei baka di de bi öndösuku di Wöutu u Gadu, hën de ko si taa an dë fanöudu u dee sëmbë du di soni aki. De bi sikifi wan biifi, hën de da wantu baaa u de tjëën go a dee peipei kemeente. Di dee Keesitu sëmbë bi lesi di biifi aki te de kaba, „hën de wai. A da de hati seei”.​—Tjabukama 15:27-32

20. (a) Unfa di Tii kulupu u di ten aki ta da hii u tuu taanga? (b) Fuun soni woo taki a di woto di ta ko?

20 A di ten aki di Tii Kulupu u dee Jehovah Kotoigi ta da dee sëmbë dee ta wooko a Bëtëli, taanga. Söseei a ta da dee baaa ku dee sisa dee ta du di Pioniliwooko, ku hii dee woto baaa ku sisa tuu, taanga. Leti kumafa dee baaa ku dee sisa u di ten u dee fesiten Keesitu sëmbë bi wai di de bi da de taanga, sö nöö u ta wai a di ten aki tu! U di di Tii kulupu bi kë da dee sëmbë dee go disa di tuutuu lei degihati u de bigi dini Jehovah baka, mbei a di jaa 2015 de tja di brochure Drai kon baka na Jehovah, ko a döö. Ma dee baaa dee ta tei fesi nöö musu ta da wotowan taanga u, naa hii u tuu musu ta du di soni aki? Woo taki u di soni aki a di woto di ta ko.