Skip to content

Skip to table of contents

Dini Jehovah, di Gadu di ta mbei sëmbë ko fii

Dini Jehovah, di Gadu di ta mbei sëmbë ko fii

„Di jeje u Jehovah, hën nöö sa da sëmbë fusutan u de kumutu a dee wëti dë basu ko fii.”​—2 KOLENTI 3:17, NW.

KANDA: 49, 73

1, 2. (a) Faandi mbei sëmbë bi lo’ u taki u di buta di de bi ta buta sëmbë ko saafu ku di mbei de bi ta mbei sëmbë ko fii a di ten u Paulosu? (b) Ambë Paulosu bi taki taa ta mbei sëmbë ko fii tuutuu?

DEE fesiten Keesitu sëmbë bi dë a di tii u Loomë basu, nöö dee sëmbë u dee pisiwata ka Loomë bi ta tii bi lobi dee wëti u Loomë gaanfa seei, söseei de bi lobi di fasi fa soni bi seti u de bi sa ta libi fiifii. Ma tökuseei dee tiima u Loomë bi ta mbei dee saafu du dee möön taanga wooko. Fëën mbei te i bi konda 3 sëmbë a di pisiwata ka Loomë bi ta tii, nöö 1 u de bi ta dë wan saafu. A musu u dë sö taa gaansë sëmbë, te kisi dee Keesitu sëmbë seei, bi lo’ u taki soni u di buta di de bi ta buta sëmbë ko saafu ku di fii di sëmbë bi musu ko fii.

2 Apösutu Paulosu bi lo’ u taki soni u di fii di sëmbë musu ko fii. Ma na seeka a bi kë seeka soni a di goonliba kumafa sömëni sëmbë u di ten dë bi ta kë du ën. Ma Paulosu ku dee woto Keesitu sëmbë bi ta mbei möiti u de lei sëmbë soni u di bunu buka u di Könuköndë u Gadu, söseei de bi ta heepi de u de ko fusutan unfa di lusupaima u Keesitu dë wan gaan soni tjika.  Paulosu bi piki dee woto Keesitu sëmbë ambë ta mbei sëmbë ko fii tuutuu. A bi piki de taa: „Di jeje u Jehovah, hën nöö sa da sëmbë fusutan u de kumutu a dee wëti dë basu ko fii.”​—2 Kolenti 3:17, NW.

3, 4. (a) Andi Paulosu bi taki ufö a taki di soni di sikifi a 2 Kolenti 3:17? (b) Andi u musu du ee u kë u Jehovah mbei u ko fii?

3 A di u tu biifi u Paulosu di a bi manda da dee Keesitu sëmbë u Kolenti, a bi taki unfa Mosesi bi dë di a bi saka kumutu a di kuun de kai Sinai, baka di Jehovah bi mbei wan ëngëli fan ku ën. Mosesi fesi bi ta koti faja! Di dee Isaëli sëmbë si Mosesi, hën de ko fëëë. Fëën mbei Mosesi tei wan koosu tapa hën fesi (Ëkisodesi 34:29, 30, 33; 2 Kolenti 3:7, 13). Paulosu bi taki taa: „Ma te wan sëmbë i ko biibi a Masa Jesosi bifö wojo fii o ko limbo awaa” (2 Kolenti 3:16). Wë andi Paulosu bi kë taki ku di soni aki?

4 Wë u bi si a di fosu woto taa Jehovah, di Gadu di mbei hii soni, da di wan kodo Sëmbë di sa du hii soni di a kë du. Fëën mbei u ta fusutan taa te wan sëmbë ko zuntu ku Jehovah, nasö te a dë ka di „jeje u Jehovah” dë, nöö a ta ko fii tuutuu. Paulosu bi taki taa ee u kë ko fii, nöö u musu ko a Jehovah. Di soni aki kë taki taa u ku Jehovah musu ko dë gaan mati. Dee Isaëli sëmbë dee bi dë a di sabana bi ta si soni kumafa libisëmbë ta si soni, ma na kumafa Jehovah ta si soni. A bi dë sö kuma wan koosu bi tapa de fusutan ku de hati. De bi kë tei di fii di de bi ko fii u de sa ta du dee soni di de hati ta manda de u de du.​—Hebelejën 3:8-10.

Wan sëmbë di de buta a dunguwosu seei sa dë fiifii

5. (a) Unfa di jeje u Jehovah ta mbei sëmbë ko fii? (b) Unfa u du sabi taa wan sëmbë sa ta fii taa Jehovah mbei a ko fii, aluwasi a dë wan saafu nasö aluwasi a dë a dunguwosu? (c) Un soni woo luku?

5 Di fii di di jeje u Jehovah ta mbei sëmbë ko fii an dë kuma di puu di de ta puu sëmbë a katibo u mbei de ko fii. Di jeje u Jehovah ta mbei sëmbë ko fii a wan apaiti fasi, nöö libisëmbë an sa mbei sëmbë ko fii a di lö fasi dë. Di jeje u Jehovah sa mbei u ko fii kumutu a zöndu ku dëdë basu, söseei a sa mbei u ko fii kumutu a poipoi biibi ku guwenti di an bunu (Loomë 6:23; 8:2). Di jeje u Jehovah ta mbei u ko fii tuutuu! Wan sëmbë di dë saafu nasö wan sëmbë di de buta a dunguwosu seei sa ko fii a di lö fasi aki tu (Kenesesi 39:20-23). De bi söötö Baaa Horst Henschel ku baaa Harold King a dunguwosu sömëni jaa longi, u di biibi u de hedi. Ma tökuseei di jeje u Jehovah bi ta mbei de fii taa de dë fiifii. I sa luku di fëlön ka de ta konda di woto u de a JW Library. (Go a INTERVIEWS AND EXPERIENCES > ENDURING TRIALS.) Ma boo taki u tu soni. Unfa u sa lei taa di fii di u ko fii dë wan gaan soni da u? Unfa u sa wooko a wan köni fasi ku di fii di u ko fii?

DI FII DI GADU TA MBEI U KO FII DA WAN GAAN SONI

6. Unfa dee Isaëli sëmbë bi lei taa de an bi ta si di fii di Jehovah bi mbei de ko fii, kuma wan gaan soni?

6 Te wan sëmbë da u wan apaiti kado, nöö u ta tei ën u bigi. Ma dee Isaëli sëmbë an bi ta tei di fii di Jehovah bi mbei de ko fii, u bigi. Wantu liba nöö bi pasa di Jehovah bi  puu de a Egepiti, hën de bi bigi ta fii taa de bi kë toona feni dee soni di de bi ta njan a Egepiti. De bi ta kaagi u di de an bi kë di mana di Jehovah bi ta da de. De bi kë toona go a Egepiti baka! De bi möön lobi di ’fisi, dee kömköm, dee baasia, dee ajon, ku di lai-ajon’ di de bi ta njan a Egepiti, möön di fii di Jehovah bi mbei de ko fii u de bi sa dini ën. Wë u ta fusutan faandi mbei Jehovah hati bi ko boonu ku de gaanfa (Nöbu 11:5, 6, 10; 14:3, 4). U ta lei wan fanöudu soni a di woto aki.

7. Unfa Paulosu bi du di soni di hënseei bi taki a 2 Kolenti 6:1, nöö unfa useei sa djeesi ën?

7 Jehovah bi seeka soni ku di lusupaima u di Womi Mii fëën Jesosi Keesitu, u mbei sëmbë ko fii. Paulosu bi piki dee Keesitu sëmbë taa hii juu de musu ta tei di soni aki u bigi. (Lesi 2 Kolenti 6:1.) Paulosu bi dë wan zöndu libisëmbë. Hën da a bi dë a zöndu ku dëdë basu, nöö di soni aki bi ta mbei a fii kuma an dë na wan hojo soni. Ma tökuseei a bi taki taa: „Wë gaantangi u Gadu di a dë taa a manda heepi ko a Jesosi Keesitu u Masa.” Faandi mbei Paulosu bi taki di soni aki? Wë a bi piki dee woto Keesitu sëmbë taa: „Di wëti u di jeje di ta da libi, di dee sëmbë dee dë makandi ku Jesosi Keesitu ta feni, nöö hën wë i si lusu u puu a zöndu ku dëdë basu” (Loomë 7:24, 25; 8:2, NW). Leti kumafa Paulosu an bi fëëkëtë taa Jehovah hën puu u a zöndu ku dëdë basu, sö useei an musu fëëkëtëën tu. Di lusupaima hën mbei u sa dini Gadu ku wan limbo háti, nöö di soni aki ta mbei u ta dë waiwai tuutuu.​—Psalöm 40:8.

I ta wooko ku di taki di i sa taki da iseei andi i kë du, fii du andi Jehovah kë u, naa fii du andi iseei kë? (Luku palaklafu 8-10)

8, 9. (a) Andi apösutu Petuisi bi taki u di fasi fa u musu wooko ku di fii di Jehovah mbei u ko fii? (b) Unfa a sa pasa taa wan sëmbë wooko a wan föutu fasi ku di fii di Jehovah mbei u ko fii?

8 Na taki nöö u musu ta taki taa u ta tei dee soni dee Jehovah ta du da u u bigi, ma u musu ta köni fu wa wooko a wan föutu fasi ku di fii di Jehovah mbei u ko fii. Apösutu Petuisi bi taki taa wa musu tei di fii di u ko  fii u du soni di an bunu. (Lesi 1 Petuisi 2:16.) Di soni aki ta mbei u pakisei di soni di bi miti dee Isaëli sëmbë di de bi dë a di sabana, nöö u musu ta köni be di soni aki an miti u tu. Saatan ku di goonliba fëën ta kë piki u andi u musu bisi, andi u musu njan, andi u musu bebe, söseei andi ku andi u musu du u mbei piizii. De ta buta hansehanse sëmbë u mbei popokanda sö taa u sa kule go bai soni, hii fa wa bi abi de fanöudu. Di goonliba aki sa ganjan u fuu wooko a wan föutu fasi ku di fii di Jehovah mbei u ko fii.

9 Di soni di Petuisi bi taki nama ku möön gaan soni tu. A sa nama a siköö lei, wooko, nasö ku di soni di i buta taa joo du a di libi fii. A di ten aki, so njönkuwan ta mbei möiti seei u de sa go a dee möön hei siköö. Sëmbë ta piki dee njönkuwan aki taa ee de go a dee hei siköö dë, nöö de o sa feni wan bumbuu wooko, de o sa wooko hia möni, söseei sëmbë o ta lesipeki de. Kandë dee sëmbë aki o ta lei dee njönkuwan aki soni u de fusutan taa te de go a dee möön hei siköö ufö de o sa wooko hia möni. Njönkuwan sa ta si kuma a bi o bunu u de go a wan heihei siköö u di di soni dë o heepi de bakaten. Ma andi dee njönkuwan aki ku de mama ku de tata musu hoi a pakisei?

10. Andi u musu ta hoi a pakisei te u kë du wan soni?

10 So sëmbë sa ta fii taa u di de sa taki da deseei andi de kë du, mbei de sa du andi de kë, solanga an ta toobi de. Kandë de ta pakisei di soni di Paulosu bi taki. A bi taki taa: „Wë andi mbei di sëmbë di ta dë fëëëfëëë ku dee soni dë musu ko buta wëti da mi?” (1 Kolenti 10:29) Hii fa u sa taki da useei na un siköö u kë go, nasö un wooko woo du, tökuseei u musu hoi a pakisei taa na hii soni ta bunu u du, söseei taa hii soni di u ta du o tja bunu nasö hogi ko da u. Fëën mbei Paulosu bi taki taa: „Hii soni mi a’ pasi u du, . . . ma na hii soni ta tja heepi ko e. Hii soni mi a’ pasi u du tuu, ma na hii soni ta heepi otowan u de ko a fesi a di libi u Masa Gadu” (1 Kolenti 10:23). Fëën mbei aluwasi u sa taki da useei andi u kë du, tökuseei na di soni di u ta kë, hën da di möön fanöudu soni.

DI DINI DI I TA DINI JEHOVAH DA DI MÖÖN BUNU SONI DI I SA DU

11. Faandi mbei Jehovah mbei u ko fii?

11 Di apösutu Petuisi bi taki taa wa musu wooko ku di taki di u sa taki da useei a wan föutu fasi, hën a bi taki tu taa wan fasi fa u sa ta wooko ku ën a wan bunu fasi, hën da te u ta dini „Gadu kuma wan saafuma fëën”. Di soni mbei Jehovah bi tei Jesosi u puu u a zöndu ku dëdë basu, hën da fuu sa dini Jehovah hii u libi longi.

Di möön bunu fasi fa u sa wooko ku di fii di Jehovah mbei u ko fii, hën da te u ta wooko ku di ten fuu ku di kaakiti fuu u dini Jehovah

12. Na un fasi u sa djeesi Noa ku dee sëmbë fëën wosudendu?

12 Di möön bunu fasi fa u sa wooko ku di fii di Jehovah mbei u ko fii, hën da te u ta wooko ku di ten fuu ku di kaakiti fuu u dini Jehovah. Di soni aki o heepi u fu wa mbei dee soni u di goonliba aki, ku dee soni dee useei ta kë, ko dë di möön fanöudu soni a u libi (Galasia 5:16). Pakisei di soni di Noa ku dee sëmbë fëën wosudendu bi du. De bi ta libi a wan pisiten ka sëmbë bi ta du hogihati soni seei, söseei de bi ta libi fanafiti. Ma tökuseei Noa ku dee sëmbë fëën wosudendu an bi go du dee soni di dee sëmbë u di ten dë bi ta du. De bi du di wooko di Jehovah bi da de. De bi mbei di ark, de bi suku soni u njan buta go a di ark u de ku dee mbeti bi sa njan, söseei de bi piki sëmbë taa di Gaan Wata bi o ko. „Noa du hii dee soni Gadu mandëën faa du. Leti sö a du gbolo” (Kenesesi 6:22).  Te u kaba fëën, hën Noa ku dee sëmbë fëën fika ku libi di di Gaan Wata bi ko poi di goonliba a di ten dë.​—Hebelejën 11:7.

13. Andi Jehovah piki u fuu du?

13 Andi Jehovah piki u fuu du a di ten aki? Wë u di u da bakama u Jesosi, mbei Jehovah piki u fuu du di peleikiwooko. (Lesi Lukasi 4:18, 19.) Saatan ta dungu gaansë sëmbë wojo a di ten aki, nöö de an ta fusutan taa de dë a poipoi keiki. De ta kule a dee gudu u di goonliba aki baka, söseei de ta ganjan de ku dee politiki soni u di goonliba aki (2 Kolenti 4:4). Wë kuma Jesosi, u abi di gaandi fuu heepi wotowan u de ko sabi Jehovah, di Gadu di ta mbei sëmbë ko fii. Nöö u kë u dee sëmbë aki ko ta dini ën tu (Mateosi 28:19, 20). So juu a ta taanga u peleiki da sëmbë. A so kamian, sëmbë an ta kë ko sabi soni u Gadu, söseei so sëmbë hati ta boonu te u go peleiki da de. Ma u di Jehovah hën manda u fuu du di peleikiwooko, mbei u musu hakisi useei di soni aki: ’Mi sa du möön soni a di dini di mi ta dini Jehovah u?’

14, 15. Andi sömëni u dee sëmbë u Jehovah ta du a di ten aki? (Luku dee peentje a bigi u di woto.)

14 U ta wai seei taa sömëni u dee sëmbë u Jehovah ta fusutan taa abiti möön Jehovah o poi di hogi goonliba aki, nöö u wai taa de tooka soni a de libi u de sa du di pioniliwooko (1 Kolenti 9:19, 23). So u de ta du di pioniliwooko a di pisiwata ka de ta libi, ma wotowan ta foloisi go a wan kemeente ka de abi heepi fanöudu. A dee feifi jaa dee pasa, möön leki 250.000 baaa ku sisa bi bigi du di pioniliwooko, nöö nöunöu möön leki 1.100.000 baaa ku sisa ta du di kowoonu pioniliwooko. U ta wai seei te u ta si fa sömëni baaa ku sisa ta wooko ku di fii di Jehovah mbei de ko fii, u de dini ën a di lö fasi aki!​—Psalöm 110:3.

15 Andi bi heepi dee baaa ku dee sisa aki u de wooko ku di fii di Jehovah mbei de ko fii, u du di pioniliwooko? Boo luku di woto u John ku Judith, wan baaa ku hën mujëë di bi dini Jehovah a peipei köndë, a dee 30 jaa dee pasa. De bi taki taa di di Pionili-siköö bi bigi a di jaa 1977, hën di ölganisaasi bi da hii sëmbë degihati u de foloisi go heepi a wan kamian ka möön peleikima dë fanöudu. Di soni aki mbei John ku Judith bi tooka soni a de libi. John bi lo’ u suku woto wooko, sö taa de bi sa du di pioniliwooko go dou. Te u kaba fëën, hën de bi go peleiki a wan woto köndë. Di soni aki mbei de bi musu lei wan woto töngö, de bi musu lei wan njunjun fasi u libi, söseei de bi musu ko guwenti di wei u di köndë. Ma andi bi heepi de u de sa du dee soni aki? De bi begi Jehovah, nöö de bi abi di futoou taa a o heepi de. Wë unfa de ta fii u di dini di de bi dini Jehovah hii dee jaa dee pasa? John bi taki taa: „Mi ta fii taa mi bi ta du di möön bunu wooko. Jehovah bi ko dë kuma wan tuutuu sëmbë da mi, a bi ko dë kuma wan lobihati tata da mi. Nöunöu mi ko ta möön fusutan di soni di Jakobosi 4:8 ta  taki. A ta taki taa: ’Pusa go a Gadu e, nöö Gadu seei o pusa ko a i tu.’ Mi sabi taa mi feni di soni di mi bi kë. Mi ko sabi faandi mbei mi dë a libi.”

16. Unfa dusudusu baaa ku sisa bi wooko ku di fii di Jehovah mbei de ko fii?

16 So baaa ku sisa sa ta du di pioniliwooko u wan longi pisiten, kumafa John ku Judith bi du ën. Ma so baaa ku sisa an sa du di pioniliwooko longi sö, u di soni dë woto fasi da de. Sömëni baaa ku sisa ta heepi mbei Könuköndë zali a hii së u goonliba. Söwan 27.000 baaa ku sisa bi go heepi mbei di hedikantoo fuu di dë a Warwick, New York. So baaa ku sisa bi go wooko tu wiki, so u de bi wooko wan liba, söseei so u de bi go wooko wan hii jaa, nasö möön longi seei. Sömëni u de bi musu disa so soni, nasö de bi musu du so soni u de bi sa go heepi a Warwick. Dee sëmbë aki da sëmbë di u sa djeesi, u di de bi wooko ku di fii di Jehovah mbei de ko fii, a wan fasi di ta tja gafa ko da Jehovah!

17. Un soni u sa dë ku di mëni taa woo feni, ee u ta wooko a wan köni fasi ku di fii di Gadu mbei u ko fii?

17 U ta wai seei taa u ko sabi Jehovah, söseei taa u ko dë fiifii u di u ta dini ën. Boo du soni a wan fasi di ta lei taa u ta tei di fii di a mbei u ko fii, u bigi. Wa musu wooko ku ën a wan föutu fasi, ma u musu wooko ku ën u du hii soni di u sa du a di dini di u ta dini Jehovah. Te u du sö, nöö woo feni dee gaan bunu dee Jehovah paamusi u. A bi taki taa: ’Hii dee soni Gadu mbei tuu o feni di fii naandë tu. Ma nöö fa u dë aki, dee soni Gadu mbei an sa ko wan wojo soni möönsö, dee sëmbë. Biga di soni mbei. De dë a wan hebi siba basu taa de o dëdë wan daka nöömö. Ma bakaten de tuu o toona kumutu a di siba dë basu’.​—Loomë 8:21.