Skip to content

Skip to table of contents

Un da unuseei taanga, möönmöön a di ten aki

Un da unuseei taanga, möönmöön a di ten aki

„Un boo buta mëni a di fa u sa du heepi u seei . . . ta da u seei taanga nöömö. Di soni dë, a dë gaan fanöudu soni da unu e, fa un ko ta si taa di daka ta zuntu.”​—HEBELEJËN 10:24, 25.

KANDA: 90, 87

1. Faandi mbei apösutu Paulosu bi piki dee Hebelejën Keesitu sëmbë taa de bi musu ta möön da deseei taanga?

APÖSUTU Paulosu bi da dee Hebelejën Keesitu sëmbë taanga. A bi piki de taa: „Un boo buta mëni a di fa u sa du heepi u seei fuu libi bunu ta lobi u seei makandi. Wan boo disa u ta miti makandi e, kumafa so sëmbë ta disa. Ma un boo ta ko makandi ta da u seei taanga nöömö. Di soni dë, a dë gaan fanöudu soni da unu e, fa un ko ta si taa di daka ta zuntu” (Hebelejën 10:24, 25). Kandë dee baaa ku dee sisa bi ta hakisi deseei ee faandi mbei Paulosu bi piki de taa de bi musu ta möön da de na de taanga. An bi dou feifi jaa di apösutu Paulosu taki di soni aki, hën wan soni bi pasa di bi ta lei faandi mbei a bi piki de di soni dë. A di ten dë, de bi ko si taa di daka u Jehovah ka a bi o kuutu dee sëmbë u Jelusalen bi ko zuntu. De bi ko si taa de bi musu kumutu a di foto kumafa Jesosi bi piki de (Lukasi 21:20-22; Tjabukama 2:19, 20). Di daka dë bi dou di dee Loomë sodati ko booko Jelusalen kaba a sösö a di jaa 70.

2. Faandi mbei u musu ta möön buta pakisei a di da di u musu ta da useei taanga a di ten aki?

 2 Di wan seei soni nöö o pasa a di ten fuu aki tu. Di „gaan daka” u Jehovah di ta „mbei sëmbë fëëë”, dë zuntu seei (Joëli 2:11). Di soni di Sefanja bi taki o pasa a di ten fuu aki tu. A bi taki taa: „Di gaan daka u Jehovah dë zuntu. A dë zuntu, nöö a ta ko hesi seei” (Sefanja 1:14). Fëën mbei u musu ta „buta mëni a di fa u sa du heepi u seei fuu libi bunu ta lobi u seei makandi” (Hebelejën 10:24). U musu ta möön booko u hedi ku dee baaa ku dee sisa fuu, nöö a sö wan fasi woo sa da de taanga te de abi ën fanöudu.

AMBË KU AMBË TA ABI TAANGA FANÖUDU?

3. Andi apösutu Paulosu bi taki u di abi di wan sëmbë ta abi taanga fanöudu? (Luku di peentje a bigi u di woto.)

3 Di Bëibel ta taki taa: „Te wan sëmbë ta booko hën hedi pasa maaka, nöö a o lasi hati, ma te sëmbë ta fan a wan suti fasi ku ën, nöö a ta dë waiwai” (Nöngö 12:25). Hii u tuu ta abi taanga fanöudu so juu. Paulosu bi taki taa dee sëmbë dee abi di faantiwöutu u da wotowan taanga seei ta abi taanga fanöudu tu. A bi sikifi wan biifi manda da dee baaa ku dee sisa dee bi dë a Loomë. A bi taki taa: „Mi hangi u si unu gaanfa seei, dee sëmbë, u mi musu tja wan soni u di [santa jeje] u Gadu ko paati ku unu, be di biibi fuunu ko möön taanga. Boo taki ën sö taa mi kë fu mi ku unu tuu musu miti fuu da u seei taanga, fa u ta biibi Gadu makandi aki” (Loomë 1:11, 12). Di tëkisi aki ta lei u taa so juu apösutu Paulosu seei bi ta abi taanga fanöudu tu.​—Lesi Loomë 15:30-32.

4, 5. Ambë da dee sëmbë dee u sa da taanga a di ten aki, nöö faandi mbei u musu ta du ën?

4 A di ten aki, u sa da dee baaa ku dee sisa dee ta du di hii-ten diniwooko taanga. So u de ta du di pioniliwooko, nöö de bi disa sömëni soni di de bi lobi u de bi sa du di wooko aki. Dee sëmbë dee ta du di sëndëlengiwooko, dee sëmbë dee ta wooko a Bëtëli, dee keling-gaanwomi ku de mujëë, ku dee woto sëmbë dee ta wooko a dee kantoo ka de ta puu buku ko a woto töngö, bi du di wan seei soni tu. Hii dee baaa ku dee sisa aki bi disa soni di de bi lobi, sö taa de bi sa du möön soni da Jehovah. Fëën mbei a bunu fuu ta da de taanga. Ma boiti dee baaa ku dee sisa aki, sömëni baaa ku sisa dë tu di bi ta du di hii-ten diniwooko, ma bakaten de an bi sa du di hii-ten diniwooko möön, hii fa de bi kë du ën go dou. Wë u musu ta da dee baaa ku dee sisa aki taanga tu. Te u ta da de taanga, nöö de o tei ën u bigi seei.

5 Ambë abi taanga fanöudu tu? Wë sömëni baaa ku sisa an tööu jeti, u di de kë tööu ku wan sëmbë di „dë wan biibima tu”, kumafa Jehovah taki. U sa ta da dee baaa ku dee sisa aki taanga tu (1 Kolenti 7:39). Dee mujëë dee tööu ta feni taanga te de manu ta piki de taa de lobi de, söseei taa de ta tei dee soni di de ta du u bigi (Nöngö 31:28, 31). Dee Keesitu sëmbë dee ta hoi dou hii fa sëmbë ta du ku de, nasö hii fa de abi wan siki di data an sa kula, abi taanga fanöudu tu (2 Tesalonika 1:3-5). Jehovah ku Jesosi ta da hii dee baaa ku dee sisa dee u kai aki taanga, u di de ta hoi dou.​—Lesi 2 Tesalonika 2:16, 17.

DEE GAANWOMI SA DA U TAANGA

6. Andi u ta lei u di wooko di dee gaanwomi musu du, te u luku di soni di sikifi a Jesaaja 32:1, 2?

6 Lesi Jesaaja 32:1, 2U ta libi a wan ten di hogi seei, nöö hesihesi seei u sa ko ta tjali nasö u sa lasi hati. Jesosi Keesitu ta tei dee salufu baaa fëën ku dee „gaama” dee a ta tei puu a dee woto sikapu dendu, u da u taanga. Dee baaa aki dë gaanwomi a kemeente, nöö de an dë „basi” a u liba ta taki da u unfa u musu biibi,  ma de ta wooko makandi ku u ta heepi u fuu sa ta dë waiwai te dou.​—2 Kolenti 1:24.

7, 8. Unfa dee gaanwomi sa da wotowan taanga ku dee soni di de ta taki ku dee soni di de ta du?

7 Dee gaanwomi sa djeesi apösutu Paulosu, a di mbei di a bi ta mbei möiti hii juu u da dee baaa ku dee sisa taanga. A bi sikifi wan biifi manda da dee baaa ku dee sisa u Tesalonika. A bi taki taa: „U bi lobi unu tee na soni, hën mbei u bi ta wai seei taa u sa paati di Buka u Masa Gaangadu da unu. Nöö na di buka wanwan u bi paati da unu e, dee sëmbë, ma di libi fuu seei tu. Sö un ko dë wan hati soni da u tjika.”​—1 Tesalonika 2:8.

8 Dee gaanwomi sa da wotowan taanga ku dee soni di de ta taki. Ma taki nöö de musu ta taki soni u da wotowan taanga u? Wë Paulosu bi piki dee gaanwomi u Efeise taa: „Un musu wooko taanga ta heepi dee otowan dee suwaki möön unu. Un musu ta mëni nöömö fa Masa Jesosi bi taki taa dee sëmbë ta da sëmbë soni, de dë waiwai möön leki dee sëmbë ta feni” (Tjabukama 20:35). Paulosu bi ’dë seei kabakaba faa lasi hii soni te dou ku hënseei tu’, da dee baaa ku dee sisa. Dee soni dee a bi ta du bi ta lei taa a bi dë kabakaba u du hiniwan soni da de (2 Kolenti 12:15). Wë sö nöö dee gaanwomi an musu ta da wotowan taanga ku kötöhati ku dee soni di de ta taki nöö, ma de musu ta du ën tu ku dee soni di de ta du. Te de ta du ën sö, nöö de ta lei taa de ta booko de hedi ku dee baaa ku dee sisa u de tuutuu.​—1 Kolenti 14:3.

9. Unfa dee gaanwomi sa da dee baaa ku dee sisa u de lai a wan bunu fasi?

9 Ee dee gaanwomi kë da dee baaa ku dee sisa taanga, nöö so juu de musu ta fan ku de u heepi de u de sabi andi de musu du. Di Bëibel sa heepi dee gaanwomi u de du di soni aki a wan bunu fasi. Jesosi bi lei unfa de sa du ën a wan bunu fasi, di a bi manda buka da dee kemeente a Piki Asia, baka di a bi weki ko a libi baka. A bi musu piki dee kemeente u Efeise, Peegamu ku Tiatila wantu fanöudu soni. Ma ufö a piki de dee soni dë, a bi gafa de u dee bunu soni di de bi ta du (Akoalimbo 2:1-5, 12, 13, 18, 19). Jesosi bi piki di kemeente u Laodisea taa: „Nöö mi taki e, di sëmbë di mi lobi nöö hën mi ta gandji da ta kiijëën ku sitaafu faa musu ko bumbuu sëmbë. Nöö un biinga e, be un bia disa dee hogilibi fuunu dee un abi dë” (Akoalimbo 3:19). Dee gaanwomi ta mbei möiti u waka a Jesosi baka a di fasi fa de ta da sëmbë lai.

NA DEE GAANWOMI NÖÖ MUSU DA WOTOWAN TAANGA

Un dee mama ku dee tata, un ta lei dee mii fuunu fa de musu ta da wotowan taanga u? (Luku palaklafu 10)

10. Unfa hiniwan fuu sa da wotowan taanga?

10 Na dee gaanwomi nöö musu da wotowan taanga. Paulosu ta da hii Keesitu sëmbë taanga u de „ta fan dee lö fan dee dë fanöudu fu sa heepi sëmbë tja de ko a fesi” (Efeise 4:29). Hii u tuu musu pakisei luku andi u sa du u heepi wotowan. Paulosu bi sikifi wan biifi manda da dee Hebelejën Keesitu sëmbë. A bi taki taa: „Un hopo taanpu be dee suwakisuwaki maun fuunu ku dee suwakisuwaki kini fuunu ko taanga baka. Un musu ta waka tololoo a di pasi u Masa Jesosi e, ta koti ën ku sinkii tee a ko gbegedee. Nöö te dee sëmbë dee an bi sa waka taanga ta ko, nöö de o feni ën limbolimbo fu de waka, nöö de o ta waka a di pasi te de ko kisi deseei” (Hebelejën 12:12, 13). Hii u tuu sa da wotowan taanga ku dee soni dee u ta taki, aluwasi u njönku.

11. Andi bi heepi Marthe di a bi lasi hati?

11 Wan sisa de kai Marthe bi lasi hati wan pisiten. * (Luku di pisi a basu.) A bi taki taa: „Wan daka di mi bi ta begi Gadu faa da mi  kötöhati, hën mi miti wan sisa di bi lei taa a ta booko hën hedi ku mi. A bi konda da mi taa di wan seei soni di ta miti mi bi miti ën tu, nöö di soni dë bi mbei mi fii möön bunu.” Kandë di sisa aki an bi pena sabi unfa dee soni dee a bi taki dë, bi heepi Marthe tjika!

12, 13. Unfa u sa du di soni di sikifi a Filipi 2:1-4?

12 Paulosu bi sikifi wan biifi da dee baaa ku dee sisa u Filipi. A bi taki taa: „Wë dee sëmbë o, fa unu ku Masa Jesosi Keesitu ko di wan naandë, nöö an ta da unu degihati nö? Fa a lobi unu tjika naandë, nöö hati fuunu an ta dë bööböö nö? Fa un kisi di [santa jeje] u Masa Gadu dë, an ta heepi unu fuun libi makandi a wan suti fasi nö? Wan ko ta abi fii ku tjalihati da unu na unu nö? Ma seei a fika wan soni eti o. Biga mi kë ta jei fuunu taa un tuu ta libi makandi ku wan hati nöömö. Mi kë ta jei taa un ta lobi unu seei ta fiti buka makandi ta biinga ku di wan soni nango nöömö. Wan musu ta du soni fuun feni nëbai hedi e, dee sëmbë. Wan musu mbei taa i hei möön otowan tu, ma be i saka i seei da dee otowan fii ta luku de kuma de hei möön i. Ja musu ta mëni fii wanwan soni nöö a kaba e, ma hibiwan fuunu musu ta mëni soni u di otowan fëën tu.”​—Filipi 2:1-4.

13 Hiniwan fuu musu luku na un fasi u sa heepi wotowan. U sa da dee baaa ku dee sisa fuu taanga te u ta lei taa u „lobi” de, te u ta „libi makandi a wan suti fasi” ku de, söseei te u abi „tjalihati” u de.

WANTU FASI FA U SA DA WOTOWAN TAANGA

14. Andi da wan fasi fa u sa da wotowan taanga?

14 U ta wai seei te u ta jei taa dee sëmbë dee u bi heepi, ta hoi dou a di tuutuu lei. Apösutu Johanisi bi sikifi taa: „Te mi ta jei sö taa dee  mii u mi ta piki di lei u Masa Gadu, nöö mi ta wai te na soni. Soni seei an dë a goonliba di ta da mi wai kuma di dë” (3 Johanisi 4). Sömëni pionili ta wai seei te de ko jei taa wan sëmbë di de bi heepi u ko sabi di tuutuu lei, ta dini Jehovah ku hii hën hati jeti, nöö de ta wai seei te de ko jei taa a ta du di pioniliwooko. Wë ee wan pionili lasi hati, nöö u sa mbei a toona mëni dee bunu soni dee a bi du da wotowan.

15. Andi da wan soni di u sa du u da dee sëmbë dee ta dini Jehovah ku hii de hati, taanga?

15 Sömëni u dee keling-gaanwomi ku de mujëë bi taki taa di dee baaa ku dee sisa bi sikifi wan biifi u da de tangi di de bi go luku di kemeente u de, nöö di soni dë bi da de taanga seei. Di wan seei soni nöö dee gaanwomi u kemeente, dee sëndëlengi, dee pionili, ku dee sëmbë dee ta wooko a Bëtëli bi taki tu. Hii dee sëmbë aki ta dini Jehovah ku hii de hati. Te u ta da de tangi, nöö u ta da de taanga möön fa u bi o mëni.

UNFA HINIWAN FUU SA TA DA WOTOWAN TAANGA?

16. Andi i sa du fii da wan sëmbë taanga?

16 Andi i sa du ee a ta taanga da i fii piki wotowan unfa i ta pakisei u de? Te u luku ën bunu, an dë wan taanga soni u da wotowan taanga. Mbei möiti u ta lafu da wotowan. Ee wan sëmbë an toona lafu da i baka, hën da wan soni ta toobi ën, nöö a abi wan sëmbë fanöudu fu hën ku ën fan. Di sëmbë sa fii bunu aluwasi haika nöö i haikëën.​—Jakobosi 1:19.

17. Andi bi da wan njönku baaa taanga?

17 Di wanlö famii u wan njönku baaa de kai Henri an bi ta dini Jehovah möön, nöö di soni dë bi hati ën seei. Wan u dee sëmbë dë bi dë di tata fëën, di bi dë wan gaanwomi u kemeente.  Wan keling-gaanwomi bi si taa Henri bi ta tjali, hën a tjëën go a wan kamian ka de sa bebe kofi. A bi haika bunu di Henri bi ta konda dëën unfa a ta fii. Henri bi ko fusutan taa di wan kodo fasi fa a bi sa heepi dee famii fëën u de toona ko a Jehovah baka, hën da hënseei musu hoi hënseei a Jehovah ku hii hën hati. Di a lesi Psalöm 46, Sefanja 3:17, ku Maikusi 10:29, 30, nöö de bi dëën taanga seei.

Hiniwan fuu sa ta da wotowan taanga (Luku palaklafu 18)

18. (a) Andi Könu Salumon bi sikifi, u di da di u musu ta da useei taanga? (b) Andi apösutu Paulosu bi taki taa u musu ta du?

18 Andi u sa lei a di woto u Marthe ku Henri? U ta lei taa hiniwan fuu sa da wan baaa nasö wan sisa taanga te a abi ën fanöudu. Könu Salumon bi taki taa: „Wan soni di de taki a wan soifi ten, bunu seei! Te wan sëmbë ta dë waiwai nöö hati fëën ta dë ku piizii. Wan bunu buka ta mbei bonu ko fatu” (Nöngö 15:23, 30). I sabi wan sëmbë di ta tjali nasö di ta fii bookosaka u? I sa lesi wan woto u Di Hei Wakitimawosu, nasö wan woto a di website fuu dëën. Paulosu bi taki tu taa u musu ta kanda Könuköndë kanda makandi fuu sa fii bunu. A bi sikifi taa: „Un musu ta lei unu seei dee soni u Masa Gadu ta fan ku unu na unu ku fusutan ta kanda dee kanda dee dë a Gadu Buku ku dee di [Santa jeje] u Gadu ta da unu. Un musu ta gafëën ku hii unu hati ta dëën tangi nöömö fu dee soni dee a du da unu.”​—Kolosën 3:16; Tjabukama 16:25.

19. Faandi mbei abiti möön a o ko dë möön fanöudu fuu ta da useei taanga, nöö andi u musu du?

19 A dë fanöudu seei fuu ta da useei taanga, möönmöön fa di daka u Jehovah ta ko zuntu aki (Hebelejën 10:25). Woo ta dë waiwai seei ee u ta du andi Paulosu piki u taa u musu ta du, di a taa: „Un ta da unu seei degihati ta heepi unu na unu fuun nango fesi nöömö, leti kumafa un ta du dë kaa.”​—1 Tesalonika 5:11.

^ pal. 11 Dee në tooka.