Skip to content

Skip to table of contents

’Un bumbuu gaanfa möön dee piki fou.’​—MATEOSI 10:31

Gadu ta buta pakisei a i ö?

Gadu ta buta pakisei a i ö?

ANDI DEE SONI DI GADU MBEI TA LEI U?

Di fosu juu baka te wan mujëë pai wan mii, dë wan pisiten ka sömëni soni ta tooka. Faandi mbei u taki sö? U di dee mujëë dee ta hoi dee mii u de a de sinkii a di ten dë, ta heepi di mii faa sa göö möön bunu, söseei a sa heepi di mii fu hën fusutan sa wooko möön bunu tu. *

Andi ta mbei wan mama ta fii da di mii fëën di a pai? Wë Professor Jeannette Crenshaw taki wan soni a di Journal of Perinatal Education. A bi taki taa te wan soni di ta dë a wan mujëë sinkii de ta kai oxytocin hormoon, ta ko möön hia, nöö a ta mbei „di mama u di mii ta fii u panjëën, u luku ën, nasö u da di mii fëën bobi baka te a pai ën.” Wan woto hormoon ta ko möön hia tu a di ten dë, nöö a ta „mbei di mama ta kë dë ku di mii fëën”. Faandi mbei a dë fanöudu fuu taki u di soni aki?

Jehovah Gadu hën ta mbei dee mujëë ta fii da dee mii u de a sö wan fasi. * Könu Dafiti bi gafa Gadu u di a bi puu ën „nëën mama bëë”, söseei u di a bi ta mbei a fii bunu di hën mama bi ta tjëën. A bi piki Gadu taa: „I wë bi ta sölugu mi sensi di mi mama pai mi. I bi dë Gadu u mi, sensi di mi bi dë a mi mama bëë dendu.”​—Psalöm 22:9, 10.

BUTA PAKISEI A DI SONI AKI: Ee Gadu mbei wan mujëë a sö wan fasi taa a sa ta buta pakisei a dee soni di di mii fëën abi fanöudu, nöö a ta dëën dee soni di a abi fanöudu tu, nöö an dë u taki taa Gadu seei ta buta pakisei a ’dee mii fëën’.​—Tjabukama 17:29.

ANDI DI BËIBEL TA LEI U U DI FASI FA GADU TA BUTA PAKISEI A U?

Jesosi Keesitu sabi di Gadu di mbei u möön hii woto sëmbë. A ta piki u taa: „Dee sëmbë o, un luku dee sösö piki fou ta buwa ta lontu aki. Sëmbë an ta si de u gaan soni, hën mbei de ta sei tu u de u wan tiisënsi nöö. Ma nöö fa i si de ta buwa dë, na wan kodo u de sa puu kai a goon ee na u Tata a liba da pasi. Wë nöö un dee libisëmbë wë? Wan bumbuu gaanfa möön dee piki fou naandë ö? Nöö te i si wan soni pasa ku unu, nöö nëën da u Tata dëën pasi fa a pasa sö nö? Nöö hën mbei mi taa wan musu fëëë. Biga Masa Gaangadu sabi hii soni fuunu finifini, te dou ku un mëni niën uwii dë a unu hedi.”​—Mateosi 10:29-31.

Gaansë fuu an ta buta pakisei a dee piki fou dee u ta si, nöö an dë u taki taa wa o ta pena buta pakisei seei taa de „puu kai a goon”. Ma di Tata fuu a liba ala ta buta pakisei a hiniwan u de! Wan fou nasö ee gaan hia fou seei, an dii kuma libisëmbë da Jehovah. Di soni aki ta lei u taa nöiti i musu „fëëë” taa Gadu an ta buta pakisei a i, ma i musu hoi a pakisei taa a ta buta pakisei a i gaanfa!

Gadu kë taa soni waka bunu da u, nöö a ta luku u u di a ta booko hën hedi ku u

 Di Wöutu u Gadu ta mbei u dë seiki u di soni aki

  • „Dee wojo u Jehovah ta si hii soni. A ta si dee sëmbë dee ta du hogi, söseei a ta si dee sëmbë dee ta du bunu.”​—NÖNGÖ 15:3.

  • „Dee wojo u Jehovah ta si dee limbohati sëmbë, nöö dee jesi fëën ta jei te de ta bai kai ën faa ko heepi de.”​—PSALÖM 34:15.

  • „Mi o wai, söseei mi o piizii, u di i lei taa i abi bunuhati u mi, u di i si di fuka u mi. I sabi bumbuu unfa mi ta tja fuka.”​—PSALÖM 31:7.

„MI BI TA FII KUMA JEHOVAH AN LOBI MI”

A ta tja wini ko da u ee u sabi taa Gadu kë taa soni waka bunu da u, nasö taa a ta buta pakisei a u ö? Wë aai, a ta tja wini ko da u tuu, te u luku di soni di Hannah, * di ta libi a Ingisiköndë bi taki. A bi taki taa:

„Sömëni pasi seei mi bi ta fii taa Jehovah an bi lobi mi, söseei taa an bi ta piki dee begi u mi. Mi bi ta si kuma a bi dë sö tuu u di ma bi abi biibi tjika. Mi bi ta fii kuma Jehovah bi ta sitaafu mi, nasö taa an bi ta buta pakisei a mi, u di ma bi dë wan hojo soni dëën. Mi bi ta fii kuma Gadu an bi ta booko hën hedi ku mi.”

Ma nöunöu Hannah an ta fii möön taa Jehovah an ta buta pakisei nëën, naso taa an lobi ën. Andi bi mbei taa an ta fii sö möön? Hannah bi taki taa: „A bi tei wan longi pisiten ufö soni ko tooka. Mi ta mëni wan taki di de bi hoi sömëni jaa pasa u di lusupaima u Jesosi, nöö a bi dou mi hati seei. A bi mbei mi ko dë seiki taa Jehovah lobi mi. Te mi bi ta si unfa Jehovah piki dee begi u mi, nöö mi bi ta këë seei, u di mi bi ta ko si taa Jehovah lobi mi. Söseei di lei di mi bi ta lei soni u Bëibel, ku di go di mi bi nango a dee komakandi, bi mbei mi ko sabi möön soni u Jehovah. A bi mbei mi ko sabi dee fasi fëën ku di fasi fa a ta pakisei fuu. Nöunöu mi ta si gbelingbelin taa Jehovah ta heepi u, söseei taa a lobi hii u tuu, nöö a dë kabakaba u sölugu hiniwan fuu apaiti.”

Di soni di Hannah taki ta da u taanga seei. Ma unfa ii sa dë seiki taa Gadu ta fusutan i, söseei taa a ta hoi a pakisei unfa i ta fii? A di woto di ta ko, woo luku di hakisi aki.

^ pal. 3 A sa taanga da so mujëë u de hoi di mii u de a de sinkii, u di baka te de pai, nöö de ta ko abi wan siki di ta mbei de ta kusumi gaanfa. Ma dee lö mujëë aki an musu si kuma de hën mbei. Di ölganisaasi de kai National Institute of Mental Health, bi taki taa möön gaanfa di soni aki ta pasa ku dee mujëë u di de ta „suwaki, nasö u di de ta dë ku bookohedi. Ma na u di di mujëë seei bi du wan soni”. Ee i kë sabi möön soni u di woto aki, nöö luku di pisi „Een beter begrip van postpartumdepressie” di dë a di Ontwaakt! u 8 u höndima-liba u di jaa 2003.

^ pal. 5 Jehovah da di në u Gadu kumafa di Bëibel ta taki.​—Psalöm 83:18.

^ pal. 15 So u dee në u dee sëmbë u dee woto u di buku aki tooka.