Skip to content

Skip to table of contents

Abiti möön Gadu o puu hii fuka a goonliba

Abiti möön Gadu o puu hii fuka a goonliba

„Jehovah o, un longi mi musu bai kai i fii ko heepi mi, ufö i jei mi? Un longi mi musu hakisi i fii heepi mi u de an du hogi ku mi, ufö joo du wan soni?” (Habaki 1:2, 3) Wan womi de kai Habaki hën bi taki dee soni aki. A bi dë wan womi di Gadu bi lobi. Di soni di Habaki taki aki bi kë lei taa an bi ta biibi Gadu ö? Wë nönö! Gadu bi piki Habaki taa a bi o puu di fuka di sëmbë ta fuka a goonliba.​—Habaki 2:2, 3.

Te fuka ta miti i nasö wan famii fii, nöö a sa djei kuma Gadu an ta du soni hesi tjika. U bi o kë taa a du wan soni wantewante. Ma di Bëibel ta piki u taa: „Wan musu pakisei kuma [so sëmbë di ta pakisei] taa [Jehovah] ta buuja poi. Nönö, kwetikweti. Ma pasensi nöö a ta hoi da libisëmbë sö. Fa i si a sai dë, an kë fu na wan kodo sëmbë musu lasi kaba a sösö. Ma a kë u hii sëmbë musu bia de libi ko nëën, fu de sa kumutu a di sitaafu di u taki dë basu.”​—2 Petuisi 3:9.

NA UN TEN GADU O DU WAN SONI?

Abiti möön! Jesosi bi taki taa wan apaiti kulupu u sëmbë bi o si hii dee maaka dee bi o ta lei taa di „ten di u dë aki o kaba” (Mateosi 24:3-42). U ta si taa dee soni di Jesosi bi taki, ta pasa a di ten fuu aki, nöö di soni dë ta lei u taa abiti möön Gadu o du wan soni u seeka di goonliba aki. *

Ma unfa Gadu o puu hii fuka a goonliba? Di Jesosi bi dë a goonliba, a bi ta lei sëmbë unfa Gadu abi kaakiti tjika u puu sëmbë a fuka. Boo luku dee soni dee a bi ta du.

Gaan hogi pasa di ko booko kamian: Di Jesosi ku dee apösutu fëën bi dë a wan boto a di ze u Galilea, hën wan gaan ventu bi ko, di bi sa mbei di boto u de singi. Ma Jesosi bi lei taa hën ku hën Tata bi sa tapa dee lö gaan ventu dë (Kolosën 1:15, 16). Di soni aki nöö Jesosi taki: „Un tan pii e!” Andi bi pasa? „Wantewante hën di ventu ku di wata tan piii.”​—Maikusi 4:35-39.

Siki: Sëmbë bi sabi taa Jesosi bi sa kula bookowojoma, lanma, sëmbë dee bi abi pikimii siki, sëmbë di bi abi kököbë, ku sëmbë di bi abi hiniwan woto pei siki. Di Bëibel ta taki taa : „A kula hii dee suwakima.”​—Mateosi 4:23, 24; 8:16; 11:2-5.

Gaan hangi: Jesosi bi wooko ku di kaakiti di hën Tata bi dëën, u da gaan hia sëmbë soni u njan a wan foombo fasi. Di Bëibel ta taki taa di soni aki pasa tu pasi. A bi da dusudusu sëmbë soni u njan.​—Mateosi 14:14-21; 15:32-38.

Dëdë: Dee dii woto dee sikifi a Bëibel taa Jesosi bi weki sëmbë toona ko a libi baka, ta lei u taa Jehovah abi di makiti u toona tja sëmbë ko a libi baka te de dëdë. Wan u dee sëmbë di a bi weki toona ko a libi baka, bi dëdë fö daka longi.​—Maikusi 5:35-42; Lukasi 7:11-16; Johanisi 11:3-44.

^ pal. 5 Ee i kë ko sabi möön soni di nama ku dee lasiti daka, nöö luku woto 9 u di buku Andi di Bëibel ta lei u tuutuu?, di Jehovah Kotoigi tja ko a döö. I sa download ën tei söndö u paka a www.jw.org/srm.