Skip to content

Skip to table of contents

Di libi sa ta suti da i fii sa kë libi go dou

Di libi sa ta suti da i fii sa kë libi go dou

Faizal mujëë bi lasi libi, nöö wan jaa baka di dë, hën de bi musu opalasi Faizal nëën hati. A taki taa: „Di mi lesi di buku Jöpu, nöö mi ko fusutan taa na u sösö Jehovah bi mbei de sikifi ën buta a di Bëibel. Te u ta fii bookosaka, nöö u feni wan woto lesi a di Bëibel u wan sëmbë di bi abi di wan seei bookohedi kuma u, nöö di soni dë ta da u taanga seei.” A taki möön taa: „Di libi sa ta suti da i jeti.”

Tarsha bi njönku jeti di hën mama dëdë. A taki taa: „Di sabi di mi ko sabi di Gadu di mbei u, da wan soni di mbei mi ko si taa soni sa waka bunu a di libi jeti, söseei taa mi sa ta dë waiwai jeti, hii fa mi abi bookohedi. U sa dë seiki taa Jehovah sa heepi u ku dee bookohedi fuu hiniwan daka.”

DEE WOTO DEE U BI LUKU UFÖ DISI, bi lei fa peipei fuka di sëmbë ta abi ta mbei di libi ta taanga da de. Ee iseei abi fuka ta tja, nöö kandë i ta hakisi iseei ee i musu libi go dou jeti, nasö ee sëmbë ta booko de hedi ku i. I sa dë seiki taa Gadu ta booko hën hedi ku di fuka di i ta tja. I dë wan sëmbë di dii nëën wojo.

Di sëmbë di sikifi Psalöm 86 bi lei taa a ta futoou Gadu, di a bi taki taa: „Te mi dë ku fuka, nöö ju mi o kai, biga mi sabi taa joo piki mi” (Psalöm 86:7). Ma kandë i ta hakisi iseei taa: ’Unfa Gadu o piki mi „te mi dë ku fuka”?’

Hii fa Gadu an o puu dee fuka fii wantewante, tökuseei di Wöutu fëën, Bëibel, ta lei u gbelingbelin taa a sa da u di kötöhati di o heepi u ku dee fuka fuu. A sikifi a Bëibel taa: „Wan musu ta booko hedi a na wan soni e, ma un musu ta begi Masa Gadu nöömö ta dëën tangi. I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan, nöö a hoi hii pakisei fii ku i hati tuu” (Filipi 4:6, 7). Luku fa dee Bëibel tëkisi dee woo taki u de aki, ta heepi u fuu dë seiki taa Gadu ta booko hën hedi ku u tuutuu.

Gadu ta booko hën hedi ku i

„Gadu ta mëni [dee piki fou]. Wë nöö un dee libisëmbë wë? An möönsö nö?” ​Lukasi 12:6, 7.

BUTA PAKISEI A DI SONI AKI: Kandë gaansë u sëmbë an ta booko de hedi ku dee piki fou seei, ma Gadu hën a ta booko hën hedi ku de. Gadu ta buta pakisei a hiniwan u dee piki fou dë. Hiniwan u de da soni di a mbei, di dii nëën wojo. Wë nöö libisëmbë musu u dii a Gadu wojo möön dee piki fou. Libisëmbë da di möön apaiti soni di Gadu mbei buta a goonliba aki. A mbei libisëmbë „kumafa hënseei dë”, nöö de sa ko abi dee fasi u Gadu.​—Kenesesi 1:26, 27.

„Jehovah o, i öndösuku mi, nöö i sabi mi bumbuu. . . . I sabi fa mi ta pakisei . . . Luku mi finifini, nöö ko sabi dee soni dee ta möön mi.”​Psalöm 139:1, 2, 23.

BUTA PAKISEI A DI SONI AKI: Gadu sabi i bumbuu. A sabi unfa i ta fii tuutuu, söseei a sabi un bookohedi i abi. Kandë woto sëmbë an sabi dee bookohedi dee i abi, ma Gadu ta booko hën hedi ku i, nöö a kë heepi i. Fëën mbei i musu kë libi go dou jeti.

 Na u sösö i dë a libi

„Jehovah o, mi begi i fii haika di begi u mi e. Haika mi te mi ta bai ta suku heepi a i. . . . Seti jesi haika mi. . . . A o haika di begi u dee sëmbë dee lasi hii dee gudu u de.” ​Psalöm 102:1, 2, 17.

BUTA PAKISEI A DI SONI AKI: Jehovah ta si di këë di libisëmbë ta këë ta tuwë wojowata, u di de ta tja sitaafu (Psalöm 56:8). Hën da a ta si dee fii seei wojowata tu. Gadu ta mëni hii dee tesi dee bi miti i, söseei dee sömëni pasi dee i bi këë, u di i da wan sëmbë di dii nëën wojo.

„Na fëëë, biga mi da di Gadu fii. Mi o mbei i ko taanga. Mi o heepi i tuutuu . . . Mi, Jehovah da i Gadu, . . . Mi da di sëmbë di ta piki i taa: ’Na fëëë. Miseei o heepi i.’”​Jesaaja 41:10, 13.

BUTA PAKISEI A DI SONI AKI: Gadu dë kabakaba faa heepi i. Ee i pasa kai, nöö a o hopo i taanpu.

I sa abi wan möön bunu libi bakaten

„Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa.”​Johanisi 3:16.

BUTA PAKISEI A DI SONI AKI: I dë wan sëmbë di dii a Gadu wojo sö tee taa a bi dë kabakaba u manda di Womi Mii fëën, Jesosi, ko dëdë da i. Di soni di a du aki jabi pasi da i fii sa libi waiwai u teego a goonliba aki. *

Kandë i abi bookohedi, nasö kandë a sa djei kuma dee fuka fii hebi da i fii tja. Hii fa a dë sö, tökuseei mbei möiti fii ta lei soni a di Wöutu u Gadu finifini, söseei mbei möiti fii ko ta biibi dee soni dee Gadu paamusi u möön gaanfa. Di soni dë o heepi i fii sa ta dë waiwai, söseei a o heepi i fii kë libi go dou.

^ pal. 19 Ee i kë sabi möön soni u di wini di i sa feni u di dëdë di Jesosi ko dëdë da u, nöö luku di fëlön Mëni di dëdë u Jesosi, di dë u feni a www.jw.org. Go a BUKU KU WOTO SONI > FËLÖN > DEE KOMAKANDI FUU KU DI PELEIKIWOOKO FUU.