Skip to content

Skip to table of contents

I sa libi u teego a goonliba aki

I sa libi u teego a goonliba aki

WAN BUNU TEN TA KO! Di sëmbë di mbei u, paamusi u taa a o da u teego libi, a goonliba aki. Ma di soni aki ta taanga da hia sëmbë u biibi. De ta taki taa: ’Hii u tuu o dëdë wan daka. Wa ko aki u ko bia sitonu. U musu u dëdë wan daka nöömö.’ Woto sëmbë ta biibi ta woo sa libi u teego, ma na a goonliba aki. De ta taki taa te wan sëmbë dëdë, nöö a nango a Gadu Köndë, nöö ala a o libi u teego. Ma andi ii pakisei?

Ufö i piki di hakisi aki, a bi o bunu fii luku unfa di Bëibel ta piki dee dii hakisi aki: Unfa di fasi fa libisëmbë mbei, ta lei u taa Gadu bi mbei u fuu libi u teego? Andi Gadu bi abi a pakisei da libisëmbë ku di goonliba? Unfa a du ko taa libisëmbë ko ta dëdë?

LIBISËMBË MBEI A WAN APAITI FASI

Libisëmbë tooka gaanfa seei u hii dee woto soni di Gadu mbei a goonliba aki. Unfa sö? Di Bëibel ta piki u taa libisëmbë wanwan Gadu mbei „kumafa hënseei dë” (Kenesesi 1:26, 27). Andi di soni aki kë taki? Di soni aki kë taki taa Gadu mbei libisëmbë a sö wan fasi taa de sa djeesi ën a dee fasi dee a abi, kuma di lobi di a abi ku di du di a ta du soni a wan leti fasi.

Boiti di dë, libisëmbë sa pakisei soni, de sa sabi andi da hogi ku andi da bunu, söseei de sa ko dë mati ku Gadu. Fëën mbei u ta foondo te u luku di mundu ku dee foombo soni di Gadu mbei buta a goonliba aki, söseei u ta lobi waiti soni di sëmbë ta tëmbë, nöö u ta lobi poku tu. Ma boiti dee soni dë, libisëmbë wanwan tö nöö sa dini Gadu. Dee soni aki mbei libisëmbë tooka gaanfa seei u dee woto soni di Gadu mbei a goonliba aki.

Pakisei di soni aki: I si kuma Gadu bi o mbei sëmbë ku dee waiti fasi aki, ee de bi musu libi u wan kölö pisiten nöö u? Gadu da sëmbë dee waiti fasi aki u de sa piizii u di libi a goonliba, u teego.

DI SONI DI GADU BI ABI A PAKISEI

So sëmbë ta taki taa Gadu an bi mbei libisëmbë u de libi a goonliba u teego. De ta taki taa Gadu mbei di goonliba kuma wan kamian ka u ta ko libi luku ee u fiti u go libi ku Gadu a liba ala, u nöömö. Wë ee di soni aki dë sö, nëën da Gadu hën mbei taa hii dee fuka dë a di goonliba aki ö? Wë di soni aki an ta kai ku di fasi fa Gadu dë tuutuu. Di Bëibel ta taki di soni aki u Gadu: „Hii juu a ta du soni a wan leti fasi. A dë wan Gadu di dë u futööu, na wan hogilibi  dë nëën. A ta libi leti, nöö a a’ limbohati tu.”​—Detolonomi 32:4.

Di Bëibel ta piki u gbelingbelin faandi mbei Gadu bi mbei di goonliba. U ta lesi taa: „Liba ala da u Jehovah, ma a da libisëmbë di goonliba” (Psalöm 115:16). Sö a dë, Gadu mbei di goonliba faa dë wan hanse tankamian da libisëmbë, söseei a buta hii soni a di goonliba di libisëmbë abi fanöudu u de sa piizii u di libi u teego.​—Kenesesi 2:8, 9.

„Liba ala da u Jehovah, ma a da libisëmbë di goonliba.”​—Psalöm 115:16

Di Bëibel ta lei u gbelingbelin andi Gadu bi abi a pakisei da libisëmbë. A bi piki di fosu womi ku hën mujëë taa: „Un pai miii be un ko hia, be un fuu di goonliba, nöö un musu dë basi fëën e. Un musu dë basi u . . . hii libilibi soni di ta dë a tela” (Kenesesi 1:28). Wan apaiti gaandi de bi kisi u seeka di goonliba, söseei u mbei hii di goonliba ko dë kuma di hanse Paladëisi ka de bi ta libi! Jehovah an bi mbei Adam ku Eva u de go libi a Gadu Köndë ala, ma de ku dee mii u de bi sa libi u teego a goonliba aki.

FAANDI MBEI U TA DËDË?

Ma faandi mbei u ta dëdë? Di Bëibel ta piki u taa wan u dee basia u Gadu, di u ko sabi bakaten kuma Saatan Didibi, bi kë tapa di soni di Gadu bi seti a Eden. Andi a bi du?

Saatan mbei dee fosu gaan sëmbë fuu, Adam ku Eva, go nama ku ën a di hopo di a hopo fia ku Gadu. Saatan taki taa Gadu bi ta tjubi bunu soni da de. A taa Gadu an da de di leti u taki da deseei andi da bunu ku andi da hogi. Hën de tuwë gogo ku Saatan a wan së, hën de pasa Gadu buka. Andi bi ko pasa bakaten? Baka wan pisiten, de dëdë leti kumafa Gadu bi taki. De lasi di gaandi di de bi abi u libi u teego a wan Paladëisi a goonliba.​—Kenesesi 2:17; 3:1-6; 5:5.

Di pasa di Adam ku Eva pasa Gadu buka mbei taa hii sëmbë ta tja sitaafu te kisi tide. Di Bëibel ta taki taa: „Adam hën tja hogi du ko da hii sëmbë a goonliba aki e, nöö di hogi du tja dëdë ko. Hën wë mbei dëdë ko ta kii hii sëmbë te kisi tide, biga hii sëmbë tuu ta du hogi” (Loomë 5:12). U ta dëdë u di u kisi zöndu ku dëdë u dee fosu gaansëmbë fuu, ma na u di Gadu bi taki a fesi kaa taa sö u musu ta dëdë.

I SA LIBI U TEEGO A GOONLIBA AKI

Di fia di de fia ku Gadu a di djai u Eden mbei taa di goonliba an ko dë möön kumafa Gadu bi abi a pakisei a di bigi. Ma di lobi di Gadu abi söseei di du di a ta du soni a wan leti fasi mbei a seeka soni sö taa u sa kumutu a zöndu ku dëdë basu. Apösutu Paulosu bi taki taa: „Hogilibi abi hën paka, hën da dëdë. Ma nöö Gadu, na paka a ta paka u. Soni a ta da u fu sösö, hën da di libi u teego di u sa feni a Jesosi Keesitu u Masa” (Loomë 6:23). U di Gadu lobi libisëmbë mbei „a da de di wan kodo Womi Mii fëën [Jesosi Keesitu], sö taa di sëmbë di ta biibi a di mii fëën aki liba, an o sa lasi go kaba a sösö, ma a sa feni di libi u teego” (Johanisi 3:16). U di Jesosi bi dë kabakaba u dëdë paka paima da libisëmbë, mbei u sa toona feni hii dee soni di Adam bi lasi. *

Abiti möön di goonliba o ko toon wan paladëisi kumafa Gadu bi taki. Di soni aki na anasi woto. I sa feni di libi aki te i du di soni di Jesosi bi taki. A bi taki taa: „Denda go a di piki dööbuka, biga di pasi di ta tja sëmbë go poi kaba a sösö, bigi nöö a baai tu. Nöö hia sëmbë ta waka a di pasi dë. Ma di pasi di ta tja sëmbë go feni libi, sumaa nöö di dööbuka fëën piki. Nöö biti sëmbë ta feni ën” (Mateosi 7:13, 14, NW). Di amanjan fii dë a i maun dendu. Andi joo du?

^ pal. 17 Ee i kë sabi andi di lusupaima sa du da i, nöö luku woto 5 u di buku Andi di Bëibel ta lei u tuutuu? di dee Jehovah Kotoigi tja ko a döö. A dë u feni tu a www.jw.org/srm.