Skip to content

Skip to table of contents

Gaansë u sëmbë di dë a wan biibi, ta biibi taa libisëmbë abi wan akaa di ta libi go dou baka te de dëdë

 DI WOTO DI NAMA KU DI KAFITI | ANDI DI BËIBEL TA TAKI U DËDË KU LIBI?

Sëmbë ta libi go dou baka te de dëdë u?

Sëmbë ta libi go dou baka te de dëdë u?

SËMBË ta pakisei peipei soni di nama ku di libi, söseei ku di dëdë di sëmbë ta dëdë. So sëmbë ta pakisei taa te de dëdë, nöö de o go libi a wan woto kamian nasö a wan woto pei fasi. Wotowan ta biibi taa de o nasi u de ko libi a goonliba aki baka. Nöö woto sëmbë ta biibi taa te wan sëmbë dëdë, nöö soni fëën kaba a mundu.

Kandë iseei abi wan fasi fa i ta pakisei u di soni aki, u di de kiija i a wan woto fasi. U ta fusutan taa sëmbë abi peipei soni di de ta biibi, te a nama ku di soni di ta pasa ku wan sëmbë te a dëdë. Ma wan sëmbë nasö wan soni dë di u sa futoou, di sa heepi u fuu ko sabi andi ta pasa tuutuu ku wan sëmbë te a dëdë u?

Sömëni höndöhöndö jaa kaa dee hedima u keiki ta lei sëmbë taa libisëmbë abi wan akaa di ta libi go dou te de dëdë. Gaansë u dee sëmbë dee ta biibi a Keesitu, sëmbë di dë a di Hindu biibi, sëmbë di dë a di Dju biibi, sëmbë di dë a di Moslim biibi, nasö woto biibi, ta biibi taa libisëmbë abi wan akaa di ta libi go dou baka te de dëdë. Ma dee sëmbë dee dë a di Buda biibi ta biibi taa wan sëmbë ta nasi sömëni pasi baka te a dëdë. Söseei de ta biibi taa wan kaakiti ta dë a hii sëmbë dendu, di ta mbei taa te u kaba fëën di sëmbë sa ko ta fii bunu gaanfa seei. De ta kai di soni aki Nirvana.

U dee soni aki hedi mbei gaansë u sëmbë ko ta biibi taa te wan sëmbë dëdë, nöö a sa libi go dou jeti a wan woto kamian. Fëën mbei sömëni sëmbë ta pakisei taa libisëmbë musu ta dëdë, nöö de ta si kuma Gadu hën kë taa u musu ta dëdë. Ma andi di Bëibel ta taki u di soni aki? Gaantangi, lesi di woto di ta ko. A sa dë wan foombo soni da i te i ko sabi andi di Bëibel ta taki fëën.