Skip to content

Skip to table of contents

Andi da di në u Gadu?

Andi da di në u Gadu?

Te i kë ko sabi wan sëmbë, nöö di fosu soni di i ta du te i miti ën, hën da i ta hakisi ën taa: „Unfa de kai i?” Ee i bi musu hakisi Gadu di soni dë, nöö andi a bi o piki i?

„Mi da Jehovah. Mi në di dë.”​Jesaaja 42:8.

I bi sabi taa Gadu në da Jehovah u? Kandë ja bi sabi, u di sömëni u dee sëmbë dee puu di Bëibel buta a woto töngö sikifi di në u Gadu wantu pasi nöö. So u de an pena sikifi ën seei. De puu di në u Gadu hën de buta „MASA” nëën kamian. Di në u Gadu bi sikifi söwan 7000 pasi di de bi sikifi Bëibel. De ta sikifi di në aki ku fö Hebelejën lëtë, dee fö lëtë dë da YHWH nasö JHVH, nöö a Saamakatöngö de puu di në aki ko „Jehovah”.

Di në u Gadu dë u feni a dee Hebelejën Buku u Bëibel ku sömëni pisi u Bëibel di de puu ko a woto töngö

Pampia lolu u Psalöm di de feni a di Dëdë Ze Fosu höndö jaa Baka Keesitu, HEBELEJËNTÖNGÖ

Bëibel u Tyndale 1530, INGISITÖNGÖ

Reina-Valera Bëibel 1602, SIPANJÖLUTÖNGÖ

Union Version 1919, SINËISITÖNGÖ

FAANDI MBEI A DË FANÖUDU U SABI DI NË U GADU?

Di në u Gadu dë fanöudu dëën. Na sëmbë hën da Gadu di në dë, hën seei tei ën. Jehovah taki taa: „Mi në hën disi u nöömö, nöö sö sëmbë o ta mëni mi u teego” (Ëkisodesi 3:15). Di në u Gadu sikifi hia pasi a di Bëibel möön dee woto fasi fa sëmbë ta kai ën, kuma di makiti Gadu u mundu, Taata, Masa nasö Gadu. Söseei a sikifi hia pasi möön në kuma Abahamu, Mosesi, Dafiti nasö Jesosi. Wan woto soni, hën da Jehovah seei kë u sëmbë ko sabi hën në. Di Bëibel ta taki taa: „A sö wan fasi sëmbë o ko sabi taa di në fii da Jehovah. I wanwan tö da di Kaba Heiwan u hii mundu.”​—Psalöm 83:18.

Di në u Gadu dë fanöudu da Jesosi. A di begi di de ta kai di U Tata Begi nasö di Begi u Masa, Jesosi bi lei dee bakama fëën u hakisi Gadu di soni aki: „Be di në fii ko santa e” (Mateosi 6:9, NW). Jesosi seei bi begi Gadu taa: „Taata o, be sëmbë si di hei ku di kaakiti di i abi e, be di në fii bai” (Johanisi 12:28). Jesosi bi ta si di santa di di në u Gadu bi musu santa kuma wan fanöudu soni. Fëën mbei a bi begi taa: „Mi mbei de ko sabi i gbelin kumafa i dë, nöö mi o ta mbei de ko sabi i möönmöön eti.”​—Johanisi 17:26.

Di në u Gafu dë fanöudu da dee sëmbë dee sabi ën. Dee sëmbë u Gadu fu awooten bi sabi taa di në  u Gadu bi sa mbei de feni tjubi. „Di në u Jehovah da wan bunu tjubi kamian. Dee limbohati sëmbë ta kule go naandë, nöö de ta feni tjubi” (Nöngö 18:10). Di Bëibel ta taki taa: „Di sëmbë di ta kai di në u Jehovah o feni tjubi” (Joëli 2:32). Di Bëibël ta lei taa dee sëmbë dee ta dini Gadu, de bi o tja di në fëën. „Biga hiniwan sëmbë o tja di në fëën gadu, nöö de o du andi di gadu u de kë. Ma u, woo tja di në u Jehovah u Gadu hii juu, nöö woo du andi a kë. Awa, woo ta du ën nöömö.”​—Mika 4:5; Tjabukama 15:14.

ANDI DI NË U GADU TA TJA KO A LIMBO?

Di në dë ta lei ambë da di tuutuu Gadu. Sömëni öndösukuma ta taki taa di në u Gadu kë taki „A sa ko dë andi a kë ko dë”. Jehovah Gadu bi lei andi di në fëën kë taki di a bi taki da Mosesi taa: „Mi sa ko dë andi mi kë ko dë” (Ëkisodesi 3:14). Boiti taa di në u Gadu ta lei u taa hën mbei hii soni tuu ko dë, a ta lei u sömëni woto soni tu. Di në fëën ta lei u taa a sa mbei hënseei te kisi dee soni dee a mbei ko dë hiniwan soni di a kë, u di kë fëën sa pasa. Hii fa dee fasi fa de ta kai Gadu sa lei di fasi fa a hei tjika nasö di makiti di a abi, ma di në fëën, Jehovah, wanwan ta lei un pei Gadu a dë tuutuu ku dee soni dee a sa du.

Di në u Gadu ta mbei u ko sabi taa a ta booko hën hedi ku u. Di në u Gadu ta lei u tu taa hii juu a o ta lobi dee soni dee a mbei, möönmöön u kuma libisëmbë. Di mbei di Jehovah mbei u ko sabi hën në, ta lei u taa a kë fuu ko sabi ën. Boiti di dë, Jehovah kai hën në da u ufö useei mëni fuu hakisi ën hën në. Jehovah kë fuu ta si ën kuma wan tuutuu sëmbë di u ku ën sa dë mati.​—Psalöm 73:28.

Di kai di u ta kai di në u Gadu ta lei taa u kë ko sabi ën. Boo taa i piki wan sëmbë di i kë dë mati ku ën taa a sa kai i a ju në. Unfa i bi o fii ee di sëmbë aki an ta kë kai i a ju në? Baka wan pisiten, joo ko ta hakisi iseei ee di sëmbë aki kë dë mati ku i tuutuu. Di wan seei soni u sa taki u Gadu. Jehovah mbei libisëmbë ko sabi hën në, nöö a ta piki u taa u sa kai ën nëën në. Te u ta kai di në fëën, nöö u ta lei Jehovah taa u kë ko dë hën mati. Jehovah ta buta pakisei a „dee sëmbë dee ta pakisei fundu u di në fëën”!​—Maleaki 3:16.

A dë fanöudu u ko sabi Gadu në ee i kë ko sabi Gadu tuutuu. Ma wa musu ko sabi di në fëën nöö a kaba. U musu ko sabi di Sëmbë di abi di në. Söseei u musu ko sabi unfa Gadu dë tuutuu.

ANDI DA DI NË U GADU? Di në u Gadu hën da Jehovah. Di në aki ta mbei u ko sabi Gadu kuma di wan kodo Sëmbë di sa du andi a abi a pakisei u du