Skip to content

Skip to table of contents

U ta dë waiwai te u ta wooko makandi ku Gadu

U ta dë waiwai te u ta wooko makandi ku Gadu

„Wë nöö dee sëmbë, fu di u ku Gadu ta wooko makandi, nöö u kë begi unu a wan soni e. Wan si fa Gadu kai unu ku ën bunuhati tefa un ko nëën naandë nö? Wë nöö wan musu lasi di bunu di a kai unu fuun feni nëën e.”​—2 KOLENTI 6:1.

KANDA: 75, 74

1. Andi Jehovah ta mbei wotowan du hii fa hën da di Kaba Hei Gadu u mundu?

JEHOVAH da di Kaba Hei Gadu u mundu. Hën mbei hii soni, nöö na wan sëmbë abi köni ku makiti kuma ën. Baka di a bi heepi Jöpu u fusutan di soni aki, hën Jöpu piki ën taa: „Mi ko si taa i sa du hii soni, nöö na wan sëmbë sa tapa i u na du di soni di i abi a pakisei u du” (Jöpu 42:2). Jehovah sa du hiniwan soni di a buta taa a o du, söndö taa sëmbë heepi ën. Ma u di a abi lobi, nöö a ta mbei wotowan wooko makandi ku ën, u mbei di kë fëën pasa.

2. Un fanöudu wooko Jehovah bi da Jesosi faa du?

2 Gadu bi mbei di Womi Mii fëën, Jesosi, ufö a mbei woto sëmbë ku hii dee woto soni. Baka di dë, hën Jehovah mbei di Womi Mii fëën heepi ën mbei hii dee woto soni (Johanisi 1:1-3, 18). Apösutu Paulosu bi konda soni u Jesosi, di a bi taki taa: ’Biga Gadu mandëën faa mbei hii dee woto soni di dë a liba ala ku dee teeja u mundu ku  dee soni a goonliba aki tuu, dee soni u sa si ku dee soni wa sa si, ee da könu sutuu nasö makiti nasö tii nasö lanti. Hii woto soni Gadu mandëën faa heepi ën mbei’ (Kolosën 1:15-17). Wë Jehovah an da di Womi Mii fëën wan fanöudu wooko faa du nöö, ma a kondëën da woto sëmbë tu. A dë wan gaandi di di Womi Mii fëën kisi seei!

3. Andi Jehovah bi piki Adam faa du, nöö faandi mbei a bi piki ën sö?

3 Jehovah bi mbei libisëmbë wooko makandi ku ën tu. Adam da wan u dee sëmbë di bi wooko makandi ku ën. A bi piki Adam faa da dee mbeti në (Kenesesi 2:19, 20). Adam bi musu u ta wai seei di a bi ta du di wooko aki! A bi öndösuku di fasi fa dee mbeti bi dë ku di fasi fa de bi ta libi. Baka di dë, hën a da hiniwan u de wan në. Jehovah hën bi mbei hii dee mbeti tuu, nöö hënseei bi sa da de wan në. Ma u di a bi kë lei Adam fa a bi lobi ën tjika, mbei a bi piki ën faa da hii dee mbeti wan në. Gadu bi da Adam di wooko u mbei hii di goonliba ko toon wan paladëisi tu (Kenesesi 1:27, 28). Ma te u kaba fëën Adam an bi kë wooko makandi ku Gadu möön, nöö di soni aki hën tja gaan pena ku fuka ko da hii dee bakamii fëën.—Kenesesi 3:17-19, 23.

4. Unfa woto sëmbë bi wooko makandi ku Jehovah u mbei di kë fëën pasa?

4 Bakaten Jehovah bi tei woto sëmbë u wooko makandi ku ën. Noa bi mbei wan ark u tjubi hënseei ku dee sëmbë fëën wosudendu a di ten di di Gaan Wata bi ko. Mosesi bi fii dee Isaëli sëmbë puu a Egepiti. Josua bi tja dee Isaëli sëmbë go a di Paamusi Köndë. Salumon bi mbei di Wosu u Gadu a Jelusalen. Malia bi ko pai Jesosi. Hii dee sëmbë aki ku sömëni wotowan jeti bi hoi deseei a Jehovah, nöö de bi wooko makandi ku ën u mbei di kë fëën pasa.

5. Un wooko u sa du makandi ku Jehovah? A bi musu u tei u u du di wooko aki ö? (Luku di peentje a bigi u di woto.)

5 A di ten aki Jehovah ta kai u fuu du hii soni di u sa, u wooko da di Könuköndë fëën. Sömëni fasi dë fa u sa dini Gadu. Aluwasi hii u tuu an sa dini Jehovah a di wan seei fasi, ma hii u tuu sa paaja di bunu buka u di Könuköndë. Jehovah seei bi sa du di wooko aki. A bi sa dë a liba ala, nöö a fan ku dee sëmbë a goonliba aki. Jesosi bi taki taa Jehovah bi o sa mbei dee sitonu konda soni u di Könu u di Könuköndë fëën da wotowan (Lukasi 19:37-40). Jehovah da u pasi fuu u „ku ën ta wooko makandi” (1 Kolenti 3:9). Apösutu Paulosu bi sikifi taa: „Wë nöö dee sëmbë, fu di u ku Gadu ta wooko makandi, nöö u kë begi unu a wan soni e. Wan si fa Gadu kai unu ku ën bunuhati tefa un ko nëën naandë nö? Wë nöö wan musu lasi di bunu di a kai unu fuun feni nëën e” (2 Kolenti 6:1). A dë wan gaandi seei u wooko makandi ku Gadu. Boo go luku faandi mbei di soni aki ta mbei u ta piizii sö.

U TA DË WAIWAI TE U TA WOOKO MAKANDI KU GADU

6. Unfa di fosu Womi mii u Gadu taki taa a bi ta fii, di a bi ta wooko makandi ku ën Tata?

6 Hii juu dee dinima u Jehovah ta dë waiwai te de ta wooko makandi ku ën. Ufö di fosu Womi Mii u Gadu bi ko a goonliba, a bi taki taa: „Jehovah seei hën mbei mi. Mi bi dë di fosu soni di a mbei . . . Mi bi dë nëën bandja kuma di möön bunu wookoma. Hiniwan daka mi bi ta mbei a ta piizii seei. Hii juu mi bi ta dë waiwai, u di mi bi dë makandi ku ën” (Nöngö 8:22, 30). Di Jesosi bi ta wooko makandi ku ën Tata, a bi ta dë waiwai u di a bi ta du hia soni, nöö a bi sabi taa Jehovah lobi ën. Ma unfa a dë ku u?

Un woto wooko u sa du di ta mbei u ta dë waiwai, möön di lei di u ta lei wan sëmbë soni u di tuutuu lei? (Luku palaklafu 7)

7. Faandi mbei di peleikiwooko ta mbei u ta dë waiwai?

7 Jesosi bi taki taa, u ta dë waiwai te u ta da sëmbë soni ku te sëmbë ta da u soni (Tjabukama 20:35). U bi ta wai seei di u ko sabi soni u di tuutuu lei. Ma faandi mbei u ta wai te u ta konda soni u di tuutuu lei da wotowan tu? Wë u  di u ta si taa deseei ta ko dë waiwai, te de ko fusutan andi di Bëibel ta lei, söseei te de ku Gadu ko dë mati. U ta wai te u ta si fa de ta tooka di fasi fa de bi ta pakisei, ku di fasi fa de bi ta libi. Di peleikiwooko da di möön fanöudu wooko ku di möön piizii wooko di u bi sa du. A ta heepi dee sëmbë dee ko dë mati ku Gadu u feni teego libi tu.​—2 Kolenti 5:20.

8. Andi so sëmbë bi taki u di piizii di de ta piizii u di de ta wooko makandi ku Jehovah?

8 U sabi taa te u ta heepi wan sëmbë u ko sabi soni u Gadu, nöö u ta mbei Jehovah hati piizii, söseei u sabi taa a ta tei di möiti di u ta mbei u dini ën, u bigi. Di soni aki ta mbei u ta dë waiwai tu. (Lesi 1 Kolenti 15:58.) Marco di ta libi a Italiaköndë bi taki taa: „Mi feni di möön gaan piizii, u di mi sabi taa mi ta du hii soni di mi sa du da Jehovah, ma ma ta du ën da wan sëmbë di o fëëkëtë hesihesi andi mi bi du dëën.” Di wan seei soni Franco di ta dini Jehovah a Italiaköndë bi taki tu. A bi taki taa: „Jehovah ta mëni u ku di Wöutu fëën ku dee woto soni di a da u taa a lobi u. A ta mëni u tu taa hii soni di u ta du dëën a ta tei u bigi, hii fa a sa pasa taa wa ta si dee möiti dee u ta mbei kuma gaan soni. Fëën mbei di wooko di mi ta wooko makandi ku Gadu ta da mi piizii, nöö a ta mbei mi ta pakisei woto fasi u di libi u mi.”

TE U TA WOOKO MAKANDI KU GADU, NÖÖ U TA KO DË MÖÖN GAAN MATI KU ËN SÖSEEI KU WOTO SËMBË TU

9. Unfa Jehovah ku Jesosi bi lobi deseei tjika, nöö faandi mbei u taki sö?

9 Te u ta wooko makandi ku dee sëmbë dee u lobi, nöö u ta ko sabi de möön bunu. U ta ko sabi dee fasi di de abi, söseei u ta ko sabi andi de sa’ u du. U ta ko sabi dee soni di de buta taa de o du a de libi, söseei unfa de ta mbei möiti u du dee soni dë. A sa kan taa Jesosi bi wooko milionmilion jaa makandi ku Jehovah. De bi ko lobi deseei gaanfa, nöö na wan soni bi o sa mbei taa de an lobi deseei möön. Jesosi bi taki unfa de bi lobi deseei tjika, di a bi taki taa: „Biga mi ku mi Tata dë di wan” (Johanisi 10:30). Jehovah ku Jesosi bi ta libi makandi, nöö de bi ta wooko bunu makandi tu.

10. Faandi mbei di peleikiwooko ta mbei u ko dë möön gaan mati ku Gadu söseei ku woto sëmbë?

10 Jesosi bi hakisi Jehovah faa tjubi dee bakama fëën. Faandi mbei? A bi begi taa: „Be de dë di wan makandi leti kumafa mi ku i dë di wan aki” (Johanisi 17:11). Te u ta hoi useei a dee wëti u Gadu ku te u ta du di peleikiwooko, nöö u ta ko möön fusutan dee waiti fasi u Gadu. U ta ko sabi faandi mbei a dë wan köni soni u buta futoou nëën, söseei faa tii u. Nöö te u ta ko zuntu ku Gadu, nöö hënseei ta ko zuntu ku u tu. (Lesi Jakobosi 4:8.) U ta ko dë mati ku dee baaa ku dee sisa fuu tu, u di di wan seei fuka ta miti u, u di di wan seei soni ta mbei u ta piizii, söseei u di u ta kë dou di wan seei maaka a di libi. U ta wooko makandi, u ta piizii makandi, nöö u ta hoi dou makandi tu. Wan sisa de kai Octavia, di ta libi a Ingisiköndë bi taki taa: „Te mi ta wooko makandi ku Jehovah, nöö mi ta ko dë mati ku woto sëmbë.” A taki söseei taa di  soni mbei a dë sö, hën da u di dee mati fëën „kë dou di wan seei maaka di hënseei kë dou”. Wë useei ta pakisei di wan seei fasi tu. Te u ta si dee möiti di dee baaa ku dee sisa fuu ta mbei, u mbei Jehovah hati piizii, nöö di soni dë ta mbei u ko dë möön gaan mati ku de.

11. Faandi mbei woo ko dë möön gaan mati ku Jehovah söseei ku dee baaa ku dee sisa fuu a di njunjun goonliba?

11 U ko möön lobi Gadu ku dee baaa ku dee sisa fuu, ma woo möön lobi Gadu ku dee baaa ku dee sisa fuu a di njunjun goonliba. Pakisei dee gaan piizii soni dee woo du a di ten di ta ko! Woo tei dee sëmbë dee o toona ko a liba baka ku wai, nöö woo lei de soni u Jehovah. Söseei woo seeka di goonliba faa ko toon wan paladëisi. A o dë wan gaan piizii soni seei te woo ta wooko makandi, nöö pikipiki woo ko dë telutelu sëmbë di an abi zöndu, te Jesosi o ta tii. Hii libisëmbë o ko dë mati ku deseei, nöö de o ko dë mati ku Jehovah, di Gadu di o „da hiniwan soni di dë ku libi di soni di a kë”​—Psalöm 145:16.

WOO FENI TJUBI TE U TA WOOKO MAKANDI KU GADU

12. Unfa di peleikiwooko ta tjubi u?

12 Wa musu mbei soni poi di dë di u ku Jehovah dë mati. U di u ta libi a di goonliba u Saatan, söseei u di u da zöndu libisëmbë, mbei hesihesi seei u sa bigi ko ta pakisei kuma dee sëmbë u di goonliba aki, nöö u sa ko ta du soni kuma de tu. A dë kuma u ta sun a lio nöö di wata ta hai u tja go a wan së ka wa bi o kë go. Fëën mbei u musu mbei möiti fuu sun go a di së ka u kë go. Sö nöö u musu mbei taanga möiti fu wa mbei Saatan kisi u ku dee soni u di goonliba fëën. Wë unfa di peleikiwooko ta tjubi u? Hën da te u ta konda soni u Jehovah ku soni u di Bëibel, nöö u ta buta u pakisei a dee möön fanöudu soni ku dee möön bunu soni, ma na a soni di sa mbei di biibi fuu ko suwaki (Filipi 4:8). Te u ta peleiki, nöö di biibi fuu o ko taanga, u di a ta mbei u mëni dee soni di Gadu paamusi u, söseei a ta mbei u mëni dee wëti dee Gadu da u, u di a lobi u. A ta heepi u söseei tu, fuu sa abi dee fasi dee sa tjubi u da Saatan ku di goonliba fëën.—Lesi Efeise 6:14-17.

13. Unfa wan Kotoigi a Ösutualia ta si di peleikiwooko?

13 Te u ta peleiki hii juu, te u ta lei soni u Bëibel, söseei te u ta du soni da wotowan a di kemeente, nöö u ta tjubi useei, u di wa ta pakisei dee bookohedi fuu poi. Joel di ta libi a Ösutualia bi taki taa: „Di peleikiwooko ta heepi mi u si di libi kumafa a dë. A ta mbei mi ta mëni dee soni dee ta miti sëmbë, söseei a ta mbei mi ta mëni dee wini dee mi ta feni u di mi ta libi kumafa dee mama wëti u Bëibel ta taki. Di peleikiwooko ta heepi mi u abi sakafasi, söseei a ta mbei mi buta futoou a Jehovah ku dee baaa ku dee sisa u mi.”

14. Faandi mbei di hoi di u ta hoi dou a di peleikiwooko ta lei taa di jeje u Gadu dë ku u?

14 Di peleikiwooko ta mbei u möön abi di futoou taa di jeje u Gadu dë ku u. Boo luku wan woto: Boo taa de da i di wooko fii ta tja bëëë go da dee sëmbë u di pisiwata fii. Ma de an ta paka i da di wooko aki, nöö i abi kösutu ta paka. Söseei gaansë u dee sëmbë an kë di bëëë, nöö so u de ta buuse i u di i ta tja di bëëë go da de. Un longi i bi o kë du sö wan wooko? Wë hesihesi seei i bi o fii booko saka, nöö kandë i bi o kë disa di wooko. Tökuseei gaansë fuu ta du di peleikiwooko sömëni jaa kaa, hii fa a ta tei u ten, ku u möni. So juu sëmbë ta mbei u fa nasö hati u de ta boonu ku u. Di soni aki ta lei taa di jeje u Gadu hën ta heepi u.

TE U TA WOOKO MAKANDI KU GADU NÖÖ U TA LEI TAA U LOBI ËN, SÖSEEI TAA U LOBI WOTO SËMBË

15. Unfa di peleikiwooko nama ku di soni di Jehovah abi a pakisei da libisëmbë?

15 Unfa di peleikiwooko nama ku di soni di Jehovah abi a pakisei da libisëmbë? Di soni di  Gadu bi abi a pakisei da libisëmbë, hën da u de libi u teego, nöö di pakisei fëën an tooka di Adam du zöndu (Jesaaja 55:11). Gadu seti wan soni da u, u puu u a zöndu ku dëdë basu. Wë unfa a du ën? Jesosi ko a goonliba, hën a dëdë da u. Ma ee libisëmbë kë feni wini u di dëdë di Jesosi dëdë da u, nöö de musu ta piki Gadu buka. Fëën mbei Jesosi bi lei sëmbë andi Gadu kë taa de musu du, nöö a piki dee bakama fëën u de du di wan seei soni tu. Te u ta peleiki ku te u ta heepi wotowan u ko dë mati u Gadu a di ten aki, nöö u ta wooko makandi ku Gadu, u di a seti wan soni faa puu libisëmbë a zöndu ku dëdë basu.

16. Unfa di peleikiwooko fuu nama ku dee möön gaan wëti u Gadu?

16 Te u ta heepi wotowan u feni di pasi di ta tja sëmbë go a teego libi, nöö u ta lei taa u lobi de, söseei taa u lobi Jehovah. Jehovah „kë hii sëmbë u goonliba tuu musu feni libi u teego nëën. A kë fu hii sëmbë musu ko sabi dee soni fëën, biga de nöö da tuutuu soni a mundu” (1 Timoteo 2:4). Di wan Faliseima bi hakisi Jesosi andi da di möön gaan wëti u Gadu, hën Jesosi piki ën taa: „I musu lobi Gadu i Masa te dou ku hii i hati ku hii i akaa [libi, NW] ku hii di pakisei fii di i abi. Hën da di möön hebi wan u hii dee wëti tuu. Ma nöö wan otowan dë leti nëën baka, hën da i musu lobi di otowan fii leti kumafa i lobi i seei” (Mateosi 22:37-39). Te u ta paaja di bunu buka, hën da u ta du dee soni dee sikifi aki.​—Lesi Tjabukama 10:42.

17. Unfa i ta fii u di gaandi di i abi u paaja di bunu buka?

17 U feni wan gaan bunu seei! Jehovah da u wan wooko di ta mbei u ta dë waiwai, wan wooko di ta mbei u ku ën ku dee baaa ku dee sisa fuu ko dë möön gaan mati, söseei di ta tjubi di dë di u ku ën dë mati. Di wooko aki ta da u di okasi u lei taa u lobi Gadu ku wotowan tu. Jehovah abi milionmilion dinima a hii së u goonliba, nöö hii de tuu ta miti peipei soni. Ma aluwasi u njönku, u gaandi, u gudu, u ta pena, u taanga nasö u suwaki, tökuseei hii u tuu ta du andi u sa, u konda soni u di biibi fuu da wotowan. U ta fii kuma Chantel di ta libi a Faansiköndë, di bi taki taa: „Di möön taanga Sëmbë u hii di mundu, di Sëmbë di mbei hii soni, di piizii Gadu, piki mi taa: ’Go! Konda! Konda soni u mi, konda soni kumutu a i hati. Mi da i di kaakiti u mi, di Wöutu u mi di Bëibel, mi dë a liba aki ta heepi i, mi da i dee baaa ku dee sisa, mi da i lei di sa mbei i go a fesi, söseei mi ta da i lai a di soifi ten.’ A dë wan gaandi seei u du andi Jehovah hakisi u fuu du, söseei fuu wooko makandi ku di Gadu fuu!”