Skip to content

Skip to table of contents

 WOTO 24

„Heepi mi u mi sa lesipeki i në ku hii mi hati”

„Heepi mi u mi sa lesipeki i në ku hii mi hati”

Heepi mi u mi sa lesipeki i në ku hii mi hati. Jehovah Gadu, mi ta gafa i ku hii mi hati.”​—PS. 86:11, 12.

KANDA 7 Jehovah hën ta da u kaakiti

WANTU SONI U DI WOTO *

1. Andi a kë taki u abi gaan lesipeki da Gadu, nöö faandi mbei dee sëmbë dee lobi Jehovah musu abi gaan lesipeki dëën?

KEESITU sëmbë lobi Gadu, nöö de abi gaan lesipeki dëën tu. A di woto aki woo taki faandi mbei a dë fanöudu fuu abi gaan lesipeki da Gadu. Ma andi a kë taki u abi gaan lesipeki da Gadu? Wë, sëmbë di abi gaan lesipeki da Gadu, ta lesipeki ën ku hii de hati. De an ta kë du soni di an ta kai ku de Tata di dë a liba ala, u di de an kë poi di dë di de ku ën dë mati.​—Ps. 111:10; Nöng. 8:13.

2. Fuun soni woo taki, te u luku di soni di Könu Dafiti bi taki a Psalöm 86:11?

2 Lesi Psalöm 86:11. Dee soni dee Dafiti taki a di tëkisi aki, ta lei gbelingbelin taa a dë fanöudu u abi gaan lesipeki da Jehovah. Boo luku unfa u sa ta du dee soni di Dafiti bi taki. Di fosu soni di woo luku, hën da faandi mbei u musu abi gaan lesipeki da Gadu. Di u tu soni da unfa u sa lei hiniwan daka taa u abi gaan lesipeki da Gadu.

FAANDI MBEI U MUSU ABI GAAN LESIPEKI DA JEHOVAH?

3. Andi bi sa dë wan soni di bi ta mbei Mosesi abi gaan lesipeki da Jehovah?

3 Pakisei unfa Mosesi bi fii di a bi si di waiti u Jehovah. Mosesi bi go tjubi a wan baaku u wan gaan gindi sitonu. Kandë di soni di Mosesi bi si, bi dë di möön gaan foombo soni di wan libisëmbë bi si a di pisiten ufö Jesosi bi ko a goonliba aki. Bakaten, Mosesi bi jei wan fan. A kan taa wan ëngëli hën bi fan ku ën. A bi taki taa: „Jehovah, Jehovah, wan Gadu di abi tjalihati  u sëmbë, nöö a lobi sëmbë tu. Hati fëën an ta boonu hesi, a abi bunuhati pasa maaka, nöö hii juu a ta du dee soni dee a ta taki. A ta du bunu da dusudusu sëmbë, söseei a ta da sëmbë paadon te de mbei wan föutu” (Ëki. 33:17-23; 34:5-7). Kandë Mosesi bi ta toona mëni di soni di bi pasa di daka dë, te a bi ta kai di në Jehovah. Ee sö, nöö kandë di soni dë mbei a bi sa da dee Isaëli sëmbë taanga u de „abi gaan lesipeki da di në” u Gadu.​—Deto. 28:58.

4. Andi sa heepi u fuu ko abi möön gaan lesipeki da Jehovah?

4 Te u ta jei di në Jehovah, u musu pakisei unfa Jehovah dë tuutuu. U musu pakisei dee fasi dee a abi. Dee fasi kuma kaakiti, köni, letilibi, ku lobi. Te u ta buta pakisei a dee fasi aki, ku dee woto fasi dee a abi, nöö u ta ko abi möön gaan lesipeki dëën.​—Ps. 77:11-15.

5-6. (a) Andi di në Jehovah kë taki? (b) Unfa Jehovah ta mbei soni pasa, te u luku Ëkisodesi 3:13, 14 ku Jesaaja 64:8?

5 Andi di në Jehovah kë taki? Sömëni öndösukuma ta taki taa di në Jehovah sa kë taki „A ta mbei soni ko dë”. Di soni aki kë taki taa na wan soni sa tapa Jehovah faa du andi a kë du, söseei Jehovah sa mbei soni pasa kumafa a kë. Unfa sö?

6 Jehovah sa ko toon hiniwan soni di a kë, sö taa di soni di a abi a pakisei sa pasa. (Lesi Ëkisodesi 3:13, 14.) Sömëni pasi de ta da u taanga fuu buta pakisei a di fasi u Jehovah aki. Söseei Jehovah sa mbei dee dinima fëën ko dë andi dë fanöudu u de sa dini ën, söseei u de du soni kumafa a abi a pakisei. (Lesi Jesaaja 64:8.) A dee lö fasi aki, Jehovah ta du dee soni dee a abi a pakisei faa du. Na wan soni sa tapa Jehovah faa du andi a abi a pakisei u du.​—Jes. 46:10, 11.

7. Andi ku andi u sa du fuu ko abi möön gaan lesipeki da di Tata fuu di dë a liba ala?

7 U sa ko möön lobi di Tata fuu di dë a liba ala, te u ta pakisei fundu u dee soni dee a du da u, söseei te u ta pakisei dee soni dee a heepi u fuu du. Te u ta pakisei dee waitiwaiti soni di Jehovah mbei, nöö a ta bigi da u seei (Ps. 8:3, 4). Te u ta pakisei fundu u di soni di  Jehovah bi heepi u fuu du sö taa di soni di a abi a pakisei sa pasa, nöö u ta ko abi möön gaan lesipeki dëën. Jehovah fiti gafa! Di soni di di në fëën kë taki, ta lei ambë di Tata fuu dë tuutuu, a ta lei u andi ku andi a du kaa, söseei andi a o du da u jeti.​—Ps. 89:7, 8.

„MI O KONDA SONI U DI NË U JEHOVAH DA HII SËMBË”

Dee soni di Mosesi bi ta lei sëmbë bi ta mbei de fii bunu. A bi ta buta pakisei a di në u Gadu, ku di fasi fa a dë tuutuu (Luku palaklafu 8) *

8. Te u luku Detolonomi 32:2, 3, nöö andi Jehovah kë taa u musu du ku di në fëën?

8 Kölö sö ufö dee Isaëli sëmbë denda go a di Paamusi Köndë, hën Jehovah lei Mosesi wan kanda (Deto. 31:19). Nöö Mosesi bi musu toona lei dee Isaëli sëmbë di kanda dë. (Lesi Detolonomi 32:2, 3.) Te u ta pakisei fundu u vers 2 ku 3, nöö u ta si gbelingbelin taa Jehovah an kë taa sëmbë musu si di në fëën taa a santa sö tee taa sëmbë an musu kai ën. A kë taa hii sëmbë musu ko sabi di në fëën! Dee Isaëli sëmbë bi ta si ën kuma wan gaandi u haika Mosesi, di a bi ta lei de soni u Jehovah! Dee soni di Mosesi bi lei de bi mbei di biibi u de ko möön taanga. Dee soni di Mosesi bi lei dee sëmbë, bi dë kuma tjuba di ta mbei wan uwii göö. Unfa u sa ta lei sëmbë soni a sö wan fasi taa dee soni dee u ta lei de, dë kuma tjuba di ta kai a wan uwii?

9. Andi u sa ta du u mbei di në u Gadu ko santa?

9 Te u nango a sëmbë pisi u go peleiki da de, nasö te u ta peleiki ka hia sëmbë ta waka pasa, nöö u sa tei di Bëibel u lei sëmbë di në u Gadu. U sa da de buku, u sa lei de dee fëlön ku dee woto soni dee dë a di website fuu, dee ta tja gafa ko da Jehovah. Te u dë a wooko, te u dë a siköö, nasö te u nango a wan kamian, u sa feni wan okasi fuu konda soni u di Gadu fuu da sëmbë. Te u ta konda da dee sëmbë dee u miti andi ku andi Jehovah o du da libisëmbë, söseei andi a o du ku di goonliba, nöö de sa ko sabi unfa Jehovah lobi libisëmbë tjika. Te u ta konda soni u di lobihati Tata fuu da wotowan, nöö hën da u ta du soni di ta mbei di në fëën ko santa. U ta heepi sëmbë u de ko fusutan taa na hii soni di de bi jei u Jehovah da tuutuu soni. Dee soni u Bëibel dee u ta lei sëmbë, da soni di ta mbei sëmbë ko dë bööböö tuutuu.​—Jes. 65:13, 14.

10. Faandi mbei an ta tjika te u ta lei sëmbë dee wëti u Gadu nöö?

10 Te u ta lei sëmbë soni u Bëibel, u ta kë taa dee sëmbë aki musu ko sabi andi di në Jehovah kë taki, söseei u ta kë u de kai di në dë tu. Boiti di dë, u kë u de ko sabi unfa Jehovah dë tuutuu. Wë wa o sa du di soni aki ee lei nöö u ta lei de dee wëti u Jehovah ku di fasi fa a kë taa u musu libi. Wan sëmbë di ta lei soni u Bëibel, sa ko sabi dee wëti u Gadu, nöö kandë a ko lobi de tu. Ma an abi fu dë sö taa a ta piki Jehovah buka u di a lobi ën. Hoi a pakisei taa Eva bi sabi dee wëti u Gadu, ma an bi lobi Gadu ku hii hën hati. Sö nöö a bi dë da Adam (Ken. 3:1-6). Fëën mbei an tjika te u ta lei sëmbë dee wëti u Gadu nöö.

11. Unfa u sa heepi dee sëmbë dee u ta lei soni u Bëibel u de ko lobi di Sëmbë di ta da u wëti?

11 Dee wëti u Jehovah ta bunu da u hii juu (Ps. 119:97, 111, 112). Ma kandë dee sëmbë dee u ta lei soni u Bëibel an o si ën sö, ee de an ta fusutan taa Jehovah da u dee wëti aki u di a lobi u. Fëën mbei a bunu fuu hakisi di sëmbë di u ta lei soni u Bëibel taa: „Faandi mbei i si kuma Jehovah ta hakisi u fuu du di soni aki, nasö faandi mbei a ta piki u taa wa musu du di soni aki? Andi di soni aki ta lei u u Jehovah?” Ee u ta heepi dee sëmbë u de pakisei unfa Jehovah dë, söseei ee u ta heepi de u de ko lobi ën tuutuu, nöö woo sa dou de hati ku dee lei aki. Dee sëmbë dee u ta lei soni u Bëibel, o ko lobi di Sëmbë di da u wëti fuu ta hoi, söseei de o ko lobi dee wëti fëën tu (Ps. 119:68). Di biibi u dee sëmbë aki o ko möön taanga, nöö de  o sa hoi dou aluwasi ee gaan tesi miti de.​—1 Kol. 3:12-15.

„WOO TJA DI NË U JEHOVAH U GADU HII JUU”

Dafiti bi du wan soni di bi lei taa a bi mbei hati fëën ganjëën faa du soni di an bunu (Luku palaklafu 12)

12. Unfa Dafiti bi mbei hati fëën ganjëën, nöö andi bi ko pasa bakaten?

12 Könu Dafiti bi taki wan gaan fanöudu soni seei a Psalöm 86:11. A bi taki taa: „Heepi mi u mi sa lesipeki i në ku hii mi hati.” Gadu hën bi mbei Könu Dafiti sikifi dee wöutu dë. Dafiti bi si taa hii fa wan sëmbë lobi Jehovah, tökuseei a sa pasa taa a du wan soni di an ta kai ku Gadu. Wan daka, hën Dafiti bi dë nëën wosu liba, hën a si wan mujëë ta wasi. Di mujëë aki bi abi manu kaa. Andi Dafiti bi du di a si di mujëë? A bi sabi di wëti u Jehovah di ta taki taa: „Wan musu kë di mujëë u wan woto sëmbë” (Ëki. 20:17). Ma tökuseei Dafiti an bi puu wojo. A bi ko kë Batiseiba, hii fa a bi kë du soni di ta kai ku Jehovah. Sömëni jaa longi Dafiti bi lei taa a lobi Jehovah, söseei sömëni jaa longi a bi ta abi gaan lesipeki dëën, ma tökuseei a bi du andi di zöndu sinkii fëën bi kë faa du. Di soni aki mbei Dafiti bi du soni di an bi bunu. An bi tja gafa ko da Jehovah. Söseei a bi mbei hogi miti woto sëmbë te kisi dee sëmbë fëën wosudendu.​—2 Sam. 11:1-5, 14-17; 12:7-12.

13. Unfa u du sabi taa Dafiti bi ko ta dini Jehovah ku hii hën hati baka?

13 Jehovah bi sitaafu Dafiti, ma bakaten hën ku Jehovah bi ko dë mati baka (2 Sam. 12:13; Ps. 51:2-4, 17). Dafiti an bi fëëkëtë di hogi di a bi tja ko u di a bi du andi di zöndu sinkii fëën bi kë faa du. Dafiti bi sa taki dee soni dee sikifi a Psalöm 86:11 a di fasi aki tu: „Da mi wan hati di an paati.” Jehovah bi heepi Dafiti faa ko abi sö wan hati ö? Wë aai. Biga di Wöutu u Jehovah bi taki bakaten taa Dafiti „bi ta dini Jehovah Gadu ku hii ën hati”.​—1 Kön. 11:4; 15:3.

14. Andi u musu hakisi useei, nöö faandi mbei u musu hakisi useei di soni dë?

14 Di woto u Dafiti ta da u taanga, söseei u sa lei soni nëën tu. Dee dinima u Gadu u di ten aki, sa lei wan soni a di soni di bi mbei Dafiti du zöndu. Ee u ta dini Jehovah sömëni jaa longi kaa, nasö ee wa ta dini ën sö longi jeti, tökuseei a bunu fuu hakisi useei di soni aki: ’Mi ta köni ku dee soni di Saatan ta wooko ku de di sa mbei ma abi gaan lesipeki da Jehovah möön u?’

Saatan o mbei hii möiti fu ja dini Jehovah ku hii i hati möön. Na mbei a feni i ganjan! (Luku palaklafu 15-16) *

15. Unfa di abi di u abi gaan lesipeki da Jehovah sa heepi u te u si wan fanafiti soni?

15 Andi i ta du te i si wan fanafiti soni u womi ku mujëë a teefei, nasö a Internet? Kandë i sa pakisei taa di soni di i si dë an hogi sö. Ma di soni aki sa dë wan soni di Saatan sa wooko ku  ën u wa ko abi gaan lesipeki da Jehovah möön (2 Kol. 2:11). Di soni di i si sa dë kuma wan matjau di wan sëmbë ta tei u latja udu. Di sëmbë ta buta di udu ku tjongo, nöö a buta di matjau buka a di udu. Baka di dë, nöö a ta naki ën pikipiki u te di udu latja a tu pisi. Dee fanafiti soni dee u ta si a dee fëlön sa dë kuma di matjau. A sa ta djei kuma dee soni aki an hogi, ma de sa mbei wan sëmbë go du zöndu. Fëën mbei u musu mbei taanga möiti sö taa na wan soni di an fiti denda a u hati! Ma u musu mbei möiti u lei taa u abi gaan lesipeki da Jehovah!

16. Andi u musu hakisi useei te tesi miti u?

16 Boiti fanafiti soni, Saatan ta wooko ku sömëni soni jeti u mbei u du zöndu. Ma andi u ta du te a dë sö? Wë a sa pasa taa u si dee soni aki kuma soni di an hogi sö. Kandë u sa pakisei taa: ’Di soni aki an hogi sö, biga ee mi du ën seei de an o puu mi a di kemeente.’ Wa musu pakisei sö. Ma a bunu fuu hakisi useei dee soni aki: ’Saatan ta wooko ku di soni aki u mbei ma abi gaan lesipeki da Jehovah möön u? Ee mi du soni di mi hati kë, mi o mbei taa Jehovah an kisi gafa u? Di soni aki o mbei mi ku Gadu ko dë möön gaan mati ö, naa a o mbei taa mi ku ën poi?’ Pakisei fundu u dee hakisi aki. Begi Jehovah hakisi ën faa da i köni fii sa piki dee hakisi aki söndö fii ganjan iseei (Jak. 1:5). Di soni aki sa tjubi i. A sa heepi i fu ja du zöndu, kumafa Jesosi seei an bi du zöndu, ma a bi taki taa: „Hetji pasa kumutu a mi fesi aki, ju didibi Saatan!”​—Mat. 4:10.

17. Faandi mbei an dë wan bunu soni ee wa dë ku hii u hati a di dini di u ta dini Jehovah? Konda wan woto.

17 An dë wan bunu soni te wa ta du soni ku hii u hati, u di u ta mbei woto soni puu u pakisei. Pakisei unfa a o dë te sëmbë u wan sport team ta kisi toobi ku deseei. So u de ta kë taa  sëmbë musu ta gafa de wanwan, wotowan an ta hoi dee wëti u di pëë, söseei wotowan jeti an ta lesipeki di sëmbë di ta lei de unfa de musu pëë di pëë. Wë an dë u taki taa a o taanga da sö wan team u de wini wan pëë. Ma soni sa waka bunu da wan team ka sëmbë ta wooko makandi ku deseei. Di hati fii sa dë kuma sö wan team, te dee soni dee i ta pakisei, dee soni dee i kë, ku di fasi fa i ta fii, ta kai ku Jehovah. Hoi a pakisei taa Saatan kë taa hati fii musu ta manda i fii du tu tooka soni. Boiti di kë di i kë du andi Gadu kë, Saatan kë tu fii musu kë du andi di zöndu sinkii fii ta manda i fii du. A kë taa a musu taanga da i fii sabi andi i musu du. Ma ee u kë dini Jehovah, nöö u musu mbei möiti u hii u hati dë a di dini di u ta dini ën (Mat. 22:36-38). Na da Saatan pasi faa mbei ja ko abi gaan lesipeki da Jehovah möön!

18. Andi i dë kabakaba u du, te i luku di soni di sikifi a Mika 4:5?

18 Begi Jehovah kumafa Dafiti bi du ën. Dafiti bi taki taa: „Heepi mi u mi sa lesipeki i në ku hii mi hati.” Du hii soni di i sa du, fii sa du di soni aki. Be a dë taa hii soni di joo du, ta lei taa i abi gaan lesipeki da Jehovah. Aluwasi ee wan gaan soni joo du nasö wan piki soni. Te u du sö, nöö wa o poi Jehovah në (Nöng. 27:11). Hii u tuu o sa taki di soni di di tjabukama Mika bi taki. A bi taki taa: „Woo tja di në u Jehovah u Gadu hii juu, nöö woo du andi a kë. Awa, woo ta du ën nöömö.”​—Mik. 4:5.

KANDA 41 Ke Gadu o, haika di begi u mi

^ pal. 5 A di woto aki woo taki u di soni di Könu Dafiti bi piki Jehovah, di sikifi a Psalöm 86:11, 12. Andi a kë taki taa wan sëmbë musu abi gaan lesipeki da Jehovah? Faandi mbei u musu abi gaan lesipeki da Jehovah? Unfa di gaan lesipeki di u abi da Gadu sa heepi u fuu finga futu da tesi?

^ pal. 53 DEE SONI DI DEE PEENTJE KË TAKI: Mosesi ta lei dee sëmbë u Gadu wan kanda di ta tja gafa ko da Jehovah.

^ pal. 57 DEE SONI DI DEE PEENTJE KË TAKI: Eva an bi bia baka da soni di di hati fëën bi kë. Ma uu ta koti pasi da footoo, nasö woto soni di sëmbë manda da u, di sa mbei taa u pakisei soni di an fiti, söseei di sa mbei u poi Gadu në.