Skip to content

Skip to table of contents

 WOTO 25

Mbei Jehovah heepi i te i abi bookohedi

Mbei Jehovah heepi i te i abi bookohedi

„Mi . . . dë ku te a hia fuka a hati.”​—1 SAM. 1:15.

KANDA 30 Mi Mati, mi Gadu, mi Tata

WANTU SONI U DI WOTO *

1. Faandi mbei u musu buta pakisei a di soni di Jesosi bi taki?

DI JESOSI bi taki unfa soni bi o dë a dee lasiti daka u di goonliba aki, hën a bi taki taa: „Dee sëmbë o, un mëni unu seei e, fu wan booko unu hedi ku dee sölugu u di goonliba aki” (Luk. 21:34). A dë fanöudu fuu buta pakisei a di soni di Jesosi bi taki aki. Faandi mbei u taki sö? Wë u di a di ten aki, useei ta abi bookohedi tu.

2. Un bookohedi dee baaa ku dee sisa fuu ta abi?

2 So juu u ta abi sömëni fuka ta tja a di wan seei ten. Boo luku wantu woto. Wan baaa de kai John, * abi wan siki di ta mbei taa so juu a ta taanga dëën faa waka, faa panjan soni, faa si soni, söseei faa fusutan soni. Di baaa aki mujëë bi go disëën tu, baka di de bi tööu söwan 19 jaa longi. Bakaten hën dee tu mujëë mii fëën seei an bi kë dini Jehovah möön. Wan woto soni bi miti wan baaa de kai Bob ku hën mujëë Linda. Hii de tuu bi lasi wooko, nöö de bi musu foloisi kumutu a di wosu ka de bi ta dë. Boiti di dë, data bi piki Linda taa a bi abi wan siki nëën hati di bi sa kii ën. Bakaten a bi ko abi wan siki di bi ta mbei dee kamiankamian fu hën sinkii ta hati ën.

3. Fuun soni u sa dë seiki te u luku Filipi 4:6, 7?

3 U sa dë seiki taa u Tata Jehovah Gadu ta fusutan unfa u ta fii te u abi bookohedi, nöö a kë heepi u ku dee bookohedi aki. (Lesi Filipi 4:6, 7.) Sömëni woto u sëmbë dë a di Wöutu u Gadu, di ta lei u un fuka bi miti dee dinima u Gadu. De ta taki tu unfa Jehovah bi heepi de ku dee bookohedi  di de bi abi. Boo luku wantu u dee woto aki.

ELIA „BI DË WAN LIBISËMBË LETI KUMA U TU”

4. Andi ku andi bi miti Elia, nöö unfa a bi ko ta si Jehovah a dee ten dë?

4 Elia bi ta dini Jehovah hii fa soni bi ta taanga dëën. Könu Akab, di bi dë wan u dee könu u Isaëli di an bi ta hoi hënseei a Gadu, bi tööu ku wan hogihati mujëë di bi ta dini Baali. Di mujëë aki de bi ta kai Iseibëli. Könu Akab ku hën mujëë bi mbei sömëni sëmbë ko ta dini Baali a di köndë, söseei de bi kii sömëni u dee tjabukama u Jehovah. Ma Elia bi feni pasi fusi go, söseei a bi fika a libi di wan gaan hangi bi ko a di köndë, u di a bi ta futoou Jehovah (1 Kön. 17:2-4, 14-16). Boiti di dë, Elia bi ta futoou Jehovah di a bi go miti dee tjabukama u Baali. A bi da dee Isaëli sëmbë taanga u de dini Jehovah (1 Kön. 18:21-24, 36-38). Elia bi si unfa Jehovah bi ta heepi ën di soni bi ta taanga dëën a dee pisiten dë.

Jehovah bi manda wan ëngëli go heepi Elia faa toona feni taanga (Luku palaklafu 5-6) *

5-6. Unfa Elia bi ta fii te u luku 1 Kön. 19:1-4, nöö unfa Jehovah bi lei taa a lobi Elia?

5 Lesi 1 Könu 19:1-4. Elia bi ta fëëë u di Iseibëli bi kë kii ën, hën a fusi go a di së u di kamian de ta kai Bëliseiba. A bi lasi hati sö tee taa a bi „hakisi Gadu faa mbei a dëdë”. Faandi mbei a bi ta fii sö? Wë Elia bi ta fii sö u di a bi dë wan zöndu libisëmbë. „A bi dë wan libisëmbë leti kuma u tu” (Jak. 5:17). Kandë fuka bi ta möön ën, nöö kandë a bi wei gaanfa. Kandë Elia bi ta si kuma u sösö a bi ta heepi sëmbë u de dini Jehovah. Nasö kandë a bi ta fii kuma möönmöön soni bi ta ko hogi a Isaëli. Nasö a  sa dë taa a bi ta fii taa hën wanwan bi ta dini Jehovah jeti (1 Kön. 18:3, 4, 13; 19:10, 14). Kandë di fasi fa Elia bi ta fii, sa foondo u, u di a bi dë wan tjabukama di bi ta hoi hënseei a Gadu. Ma Jehovah bi fusutan unfa Elia bi ta fii.

6 Jehovah an bi tei Elia u hogi di a bi konda dëën unfa a ta fii. Ma Jehovah bi heepi ën faa feni taanga baka (1 Kön. 19:5-7). Bakaten Jehovah bi heepi Elia faa tooka di fasi fa a bi ta pakisei, u di a bi lei ën unfa a abi kaakiti tjika. Jehovah bi piki Elia taa 7000 sëmbë bi dë a Isaëli jeti, di an bi go dini Baali (1 Kön. 19:11-18). Jehovah bi du dee soni aki u heepi Elia faa ko si taa a lobi ën.

UNFA JEHOVAH O HEEPI U?

7. Fuun soni u sa dë seiki te u luku di fasi fa Jehovah bi heepi Elia?

7 I dë ku wan bookohedi fii o? Wë a ta da u taanga seei u di u sabi taa Jehovah bi fusutan unfa Elia bi ta fii! Di soni aki ta mbei u dë seiki taa a o heepi u tu te u abi bookohedi. Jehovah sabi andi u sa du ku andi wa sa du. A sabi andi u ta pakisei, söseei a sabi unfa u ta fii (Ps. 103:14; 139:3, 4). Ee u ta djeesi Elia a di futoou di a bi ta futoou Jehovah, nöö Jehovah o heepi u ku dee bookohedi fuu.​—Ps. 55:22.

8. Unfa Jehovah o heepi i ku dee bookohedi fii?

8 Te u dë ku bookohedi, nöö di soni dë sa mbei u ko ta si kuma soni an o tooka möönsö. Ee sö i ta fii, nöö hoi a pakisei taa Jehovah o heepi i ku dee bookohedi fii. Ma unfa a o heepi i? Wë Jehovah ta piki i fii konda dee bookohedi fii dëën, söseei fii konda dëën unfa i ta fii. Te i du sö, nöö a o piki dee begi fii (Ps. 5:3; 1 Pet. 5:7). Fëën mbei hii juu i musu ta begi Jehovah ta konda dee fuka fii dëën. An o fan ku i kumafa a bi fan ku Elia, ma a o piki i ku di Wöutu fëën, söseei a o mbei di ölganisaasi fëën piki i andi i sa du. Dee soni dee i ta lesi a di Wöutu u Gadu sa da i kötöhati, söseei de sa mbei i abi di biibi taa soni o waka bunu da i. Dee baaa ku dee sisa fii seei sa da i taanga tu.​—Lom. 15:4; Heb. 10:24, 25.

9. Unfa wan mati di u ta futoou sa heepi u ku dee bookohedi fuu?

9 Jehovah bi piki Elia faa mbei Elisa du so u dee wooko dee a bi ta du. A sö wan fasi, Jehovah bi da Elia wan mati di bi o sa ta heepi ën te a bi ta fii bookosaka. A di wan seei fasi, te u ta konda da wan mati fuu unfa u ta fii, nöö a sa heepi u ku dee bookohedi fuu (2 Kön. 2:2; Nöng. 17:17). Ee i ta fii kuma ja abi sëmbë di i sa konda dee bookohedi fii da, nöö i sa begi Jehovah faa heepi i fii feni wan sëmbë di taanga a di biibi, di bi o sa heepi i.

10. Unfa di woto u Elia ta heepi u fuu hoi dou, nöö unfa di soni di sikifi a Jesaaja 40:28, 29 sa heepi u?

10 Jehovah bi heepi Elia faa bi sa libi ku dee bookohedi fëën, söseei faa dini ën go dou ku hii hën hati. U ta feni taanga a di woto u Elia. So juu, dee bookohedi fuu sa ta möön u sö tee taa u ta ko wei. Ma ee u buta futoou a Jehovah, nöö a o da u di taanga di u abi fanöudu fuu sa dini ën go dou.​—Lesi Jesaaja 40:28, 29.

HANA, DAFITI, KU WAN PSALÖM SIKIFIMA BI BUTA FUTOOU A JEHOVAH

11-13. Unfa bookohedi bi mbei wanlö dinima u Gadu bi ko ta fii?

11 Woto dinima u Gadu u di ten di pasa bi ta abi gaan bookohedi tu. Hana bi ta booko hën hedi u di an bi sa pai miii, söseei a bi ta booko hën hedi u di hën kambosa bi ta mbei ën fa (1 Sam. 1:2, 6). Dee soni aki bi ta da Hana bookohedi sö tee taa a bi ta këë, nöö an bi ta pena fii u njan seei.​—1 Sam. 1:7, 10.

12 A wan pisiten, Könu Dafiti bi abi gaan bookohedi. Buta pakisei a dee soni dee bi  miti ën. A bi ta fii bookosaka u di a bi mbei sömëni föutu (Ps. 40:12). Di womi mii fëën de kai Absalöm bi hopo fia ku ën, nöö te u kaba fëën Absalöm bi ko lasi hën libi (2 Sam. 15:13, 14; 18:33). Boiti di dë, wan u dee gaan mati u Dafiti bi bia baka dëën (2 Sam. 16:23–17:2; Ps. 55:12-14). Sömëni u dee soni dee Dafiti bi sikifi, ta taki u di fii di a bi ta fii bookosaka, söseei de ta taki tu u di futoou di a bi ta futoou Jehovah.​—Ps. 38:5-10; 94:17-19.

Andi bi heepi di Psalöm sikifima faa toona ta dini Jehovah waiwai? (Luku palaklafu 13-15) *

13 Bakaten wan psalöm sikifima bi bigi ko ta haun ku dee sëmbë dee an bi ta dini Jehovah. A kan taa di psalöm sikifima aki bi dë wan bakamii u wan Leifi sëmbë de kai Asafu, di bi ta dini Gadu a di „gaan santa kamian” fëën. Di psalöm sikifima aki bi abi gaan bookohedi, nöö di soni aki bi mbei taa an bi ta dë waiwai möön. A bi bigi ta si seei kuma dee bunu dee Gadu ta mbei sëmbë feni te de ta dini ën, an ta dë wan apaiti soni.​—Ps. 73:2-5, 7, 12-14, 16, 17, 21.

14-15. Andi u ta lei a dee dii sëmbë dee bi go suku heepi a Jehovah?

14 Dee dii dinima u Jehovah dee u taki u de aki tuu bi ta buta futoou a Jehovah. De bi ta begi Jehovah hii juu faa heepi de. De bi piki Jehovah faandi mbei de bi ta fii bookosaka, söseei de bi nango ta dini Jehovah a di Wosu fëën jeti.​—1 Sam. 1:9, 10; Ps. 55:22; 73:17; 122:1.

15 Jehovah bi piki dee begi u hii dee dii sëmbë aki. Wë u sabi taa Hana bi feni kötöhati a Jehovah (1 Sam. 1:18). Dafiti bi taki taa: „Dee fuka u wan sëmbë di ta libi a wan leti fasi hia, ma Jehovah ta puu ën a hii dee fuka dë” (Ps. 34:19). Di psalöm sikifima bi ta fii taa Jehovah bi ’panjëën hoi nëën leti së maun’, nöö a bi ta lei ën unfa a musu libi. A bi taki a wan  kanda taa: „A bunu da mi u ko zuntu ku Gadu. Di möön Hei Masa Jehovah mi ta si kuma di tjubi kamian u mi” (Ps. 73:23, 24, 28). Andi di woto aki ta lei u? Wë a ta lei u taa so juu woo ta abi bookohedi. Ma woo sa hoi dou te u ta begi, te u ta pakisei fundu u di fasi fa Jehovah bi heepi wotowan, söseei te u ta du dee soni dee Jehovah ta hakisi u fuu du.​—Ps. 143:1, 4-8.

BUTA FUTOOU A JEHOVAH FAA HEEPI I FII HOI DOU

Wan sisa an bi ta fii möön u dë a sëmbë dendu, ma bakaten a bi ko ta fii woto fasi, di a bi bigi suku fasi u heepi wotowan (Luku palaklafu 16-17)

16-17. (a) Faandi mbei hii juu u musu ta nama ku Jehovah ku dee dinima fëën? (b) Unfa u sa toona feni taanga?

16 U ta lei wan woto fanöudu soni a dee dii sëmbë dee u bi taki soni u de a di woto aki. Hii juu u musu ta nama ku Jehovah ku dee sëmbë fëën (Nöng. 18:1). Wan sisa de kai Nancy, di bi ta booko hën hedi gaanfa u di hën manu bi go disëën, bi taki taa: „So daka ma bi ta fii u fan ku na wan sëmbë, söseei ma bi ta kë dë a sëmbë dendu. Ma möön mi bi ta hai miseei puu a woto sëmbë dendu, möön mi bi ta tjali.” Soni bi ko tooka di Nancy bi bigi ta suku u heepi woto sëmbë di bi ta abi bookohedi. A bi taki taa: „Mi bi ta haika te dee wotowan bi ta konda dee fuka u de da mi. Mi bi ko si taa te mi bi ta buta pakisei a de, nöö ma bi ta buta pakisei a dee bookohedi u mi sö möön.”

17 U sa toona feni taanga te u nango a dee komakandi. Te u dë a dee komakandi, nöö u ta  da Jehovah pasi faa ko dë ’di sëmbë di ta heepi u, söseei di ta da u kötöhati’ (Ps. 86:17). Te u dë a dee komakandi, nöö Jehovah ta da u taanga ku di santa jeje fëën, ku di Wöutu fëën, söseei ku dee sëmbë fëën. A dee komakandi u sa ta „da u seei taanga” (Lom. 1:11, 12). Wan sisa de kai Sophia bi taki taa: „Jehovah ku dee baaa ku dee sisa u mi bi heepi mi u mi hoi dou. Di go di mi bi musu nango a komakandi bi dë di möön fanöudu soni da mi. Mi bi ko si taa möön mi bi ta peleiki, söseei möön mi bi ta du soni a di kemeente, möön mi bi ta ko sa’ u libi ku dee bookohedi u mi.”

18. Andi Jehovah sa da u ee u ta fii bookosaka?

18 Te u ta fii bookosaka, nöö u musu hoi a pakisei taa Jehovah ta paamusi u taa wa o ta abi bookohedi möön a di ten di ta ko, ma a ta piki u tu unfa u sa libi ku dee bookohedi fuu nöunöu kaa. A ta ’wooko a u hati fuu kë du dee soni dee ta dëën piizii, nöö hënseei ta toona da u taanga tu fuu sa du de’. Dee soni aki sa heepi u tu te u ta fii bookosaka.​—Fil. 2:13.

19. Un soni Gadu ta paamusi u te u luku Loomë 8:37-39?

19 Lesi Loomë 8:37-39. Apösutu Paulosu ta piki u taa na wan soni dë di sa mbei Gadu an lobi u möön. Unfa u sa heepi dee baaa ku dee sisa fuu u de sa libi ku dee bookohedi u de? A di woto di ta ko, woo luku unfa u sa djeesi Jehovah a di fasi fa a ta lei taa a lobi dee baaa ku dee sisa fuu, söseei a di fasi fa a ta heepi de te de abi bookohedi.

KANDA 44 Di begi u wan sëmbë di abi sakafasi

^ pal. 5 Te u abi hia fuka ta tja nasö te u ta tja fuka wan longi pisiten, nöö di soni dë sa du soni ku u. Unfa Jehovah sa heepi u? Woo luku unfa Jehovah bi heepi Elia di a bi abi bookohedi. Söseei woo luku andi wanlö woto sëmbë di di Bëibel ta taki soni u de bi du, di de bi abi bookohedi.

^ pal. 2 De tooka dee në a di woto aki.

^ pal. 53 DEE SONI DI DEE PEENTJE KË TAKI: Wan basia u Jehovah ta weki Elia, nöö a ta dëën bëëë faa njan, ku wata faa bebe.

^ pal. 55 DEE SONI DI DEE PEENTJE KË TAKI: Wan psalöm sikifima di bi sa dë wan bakamii u Asafu ta sikifi wanlö pisi u di buku psalöm, nöö a ta kanda makandi ku wanlö woto Leifi sëmbë.