Skip to content

Skip to table of contents

Di tei di u ta tei sëmbë a wosu da wan fanöudu soni di ta da u piizii!

Di tei di u ta tei sëmbë a wosu da wan fanöudu soni di ta da u piizii!

„Un musu ta kisi unu seei ta hoi a wosu ku piizii e, söndö guunjan.”​—1 PETUISI 4:9.

KANDA: 100, 87

1. Un soni bi ta mbei di libi ta taanga da dee fesiten Keesitu sëmbë?

A WAN pisiten u di jaa 62 te go miti 64, apösutu Petuisi bi sikifi wan biifi da „dee sëmbë u Masa Gaangadu dee dë paajapaaja kuma wakama a dee peipei köndë u goonliba, kuma Pontusi, Galasia, Kapadosia, ku Asia, te kisi Bitinia” (1 Petuisi 1:1). Dee baaa ku dee sisa aki bi dë sëmbë u peipei nasiön. De bi ta tja sitaafu di bi „hebi seei”, nöö de bi abi degihati fanöudu, söseei de bi abi heepi fanöudu. De bi ta libi a wan ten di bi hogi gaanfa seei. Petuisi bi taki taa: „Dee sëmbë o, fa u dë aki di ten ko zuntu u hii soni musu kaba.” An bi o dou teni jaa möön, ufö de ko booko Jelusalen kaba a sösö. Wë andi bi o heepi dee baaa ku dee sisa aki u de pasa di taanga ten dë?​—1 Petuisi 4:4, 7, 12, NW.

2, 3. Faandi mbei Petuisi bi da dee baaa ku dee sisa taanga u de ta kisi deseei ta hoi a wosu? (Luku di peentje a bigi u di woto.)

2 Petuisi bi da dee baaa ku dee sisa taanga u de ta ’kisi deseei ta hoi a wosu’ (1 Petuisi 4:9). Di Giiki wöutu di de puu ko „kisi sëmbë hoi a wosu”, kë taki taa „i lobi woto sëmbë nasö taa i ta libi bunu ku sëmbë di ja sabi”. Ma Petuisi bi ta da dee baaa ku dee sisa fëën taanga u de ta kisi ’deseei’ ta hoi a wosu, hii fa de  bi sabi deseei kaa, söseei hii fa de bi ta du soni makandi kaa. Ma unfa di soni aki bi o heepi de?

3 Di hoi di de bi o ta hoi wotowan a de wosu, bi o mbei de ko ta möön lobi deseei. Ma unfa a dë ku i? I ta mëni jeti unfa soni bi suti da i tjika di wan sëmbë bi kai i ko nëën pisi ö? Kandë di i bi kai wan sëmbë ko a i pisi, nöö i ku di sëmbë dë bi ko dë möön gaan mati. Wan bunu fasi fa u sa ko sabi dee baaa ku dee sisa fuu möön bunu, hën da te u ta kai de ko a u pisi. Dee Keesitu sëmbë dee bi ta libi a di ten u Petuisi bi musu ko sabi deseei möön bunu, u di möönmöön di libi bi o ko taanga da de. Useei musu ta du di wan seei soni a „dee lasiti daka u di goonliba aki” tu.​—2 Timoteo 3:1.

4. Andi woo taki a di woto aki?

4 Na un fasi u sa ta kisi ’useei’ ta hoi a wosu? Andi sa mbei taa wa ta kisi wotowan hoi a wosu, nöö andi sa heepi u fuu du ën? Andi sa heepi u fuu tja useei a wan bunu fasi te sëmbë kai u ko a de pisi?

NA UN TEN U SA TA TEI SËMBË KU WAI?

5. Unfa u sa lei taa u ta tei sëmbë ku wai, te u dë a komakandi?

5 Te u dë a komakandi: Jehovah ku di ölganisaasi fëën ta piki u fuu nango a dee komakandi. U kë taa hii dee sëmbë dee ta ko a dee komakandi musu ta fii bunu, möönmöön dee sëmbë dee ta ko a dee komakandi u di fosu pasi (Loomë 15:7). Jehovah hën ta kai dee sëmbë aki ko a dee komakandi, nöö fëën mbei u musu ta mbei möiti u de fii bunu te de ko a dee komakandi, aluwasi fa de dë nasö aluwasi andi de bisi (Jakobosi 2:1-4). Ee i si taa wan sëmbë di ko a zali u di fosu pasi sindo hën wanwan, nöö i sa kai ën faa ko sindo a i bandja. Kandë a o wai seei te i heepi ën faa ko fusutan andi ku andi woo du a di komakandi nasö te i heepi ën suku dee Bëibel tëkisi. Te u ta du di soni aki, nöö a o dë wan bunu fasi fa u ta lei taa u „ta tei sëmbë ku wai”.​—Loomë 12:13.

6. Ambë u musu ta möön tei ku wai a wosu?

6 Te woo kai sëmbë ko njan a u pisi: Na awooten, sëmbë bi ta kai wotowan ko njan ku de u lei de taa de tei de ku wai, söseei u lei de taa de kë dë mati ku de (Kenesesi 18:1-8; Kuutuma 13:15; Lukasi 24:28-30). Ambë u musu ta möön tei ku wai a wosu? Wë u musu ta möön tei dee baaa ku dee sisa fuu ku wai. U di di goonliba aki ta ko möön hogi, mbei möönmöön woo abi dee baaa ku dee sisa fuu fanöudu, nöö a o dë fanöudu fuu ku de dë gaan mati. A di jaa 2011, hën di Tii Kulupu tooka di juu di dee baaa ku dee sisa u di Bëtëli fu Amëëkanköndë bi ta luku di Hei Wakitimawosu-lei. De bi ta hoi ën a 6.45 juu sapate, hën de ko ta hoi ën a 6.15 juu sapate. Wë faandi mbei de du ën sö? Wë u di dee baaa bi ko si taa ee de seti soni u di komakandi kaba möön fuuku, nöö an o taanga da dee baaa ku dee sisa u Bëtëli u de ta kai de na de ko a de kamba. Woto Bëikantoo bi du di seei soni aki tu. Di soni aki bi heepi dee baaa ku dee sisa u Bëtëli u de ko möön sabi deseei.

A bi o dë wan bunu soni fii kai njunjun baaa ku sisa ko a i pisi u de ko njan wan soni, nasö fii ku de go köi a wan kamian makandi

7, 8. Andi u sa du te baaa ko hoi taki a di kemeente ka u dë?

7 So juu baaa u wan woto kemeente, keling-gaanwomi nasö baaa u di Bëikantoo komite ta ko hoi taki a di kemeente ka u dë. Te a dë sö, nöö i bi o sa tei dee baaa aki ku wai ö? (Lesi 3 Johanisi 5-8.) Wan fasi fa u sa du di soni aki da te u kai dee baaa aki ko a u pisi fuu ku de sa njan wan piki soni nasö u sa boi wan soni fuu ku de sa sindo njan makandi.

8 Wan sisa di ta libi na Amëëkanköndë bi taki taa: „A dee jaa dee pasa aki, mi ku mi  manu bi feni pasi kai dee baaa dee bi ko hoi taki a di kemeente fuu, u de ko njan a u pisi ku de mujëë.” A bi taki taa hii juu di biibi u de bi ta ko möön taanga te de bi kai dee baaa ku dee sisa aki ko a de pisi, söseei a bi ta dë wan piizii soni da de. A bi taki tu taa: „An bi hati u wan daka taa u bi ta du di soni aki.”

9, 10. (a) Ambë ku ambë u sa ta hoi a u pisi u wan pisiten? (b) Dee baaa ku dee sisa dee abi wan piki wosu seei sa hoi wotowan a de pisi tu ö?

9 Sëmbë di ta ko dë ku u wantu daka: Na awooten, sëmbë bi abi di guwenti u da sëmbë wan kamian u de sa dë, te de bi ko a de (Jöpu 31:32; Filemon 22). A di ten aki, u sa du di wan seei soni tu. Gaansë pasi dee keling-gaanwomi ta abi wan kamian fanöudu u de dë, te de go luku dee kemeente. Dee baaa ku dee sisa dee nango a dee peipei siköö u di ölganisaasi fuu, ku dee nango ta mbei Könuköndë zali ta abi kamian fanöudu tu. Ma nöö unfa a dë ku dee baaa ku dee sisa dee an abi wosu möön, u di gaan wata nasö gaan ventu ko booko di wosu u de? Wë deseei o abi wan kamian fanöudu u de sa dë u te de toona mbei di wosu u de baka. Wa musu ta si kuma dee baaa ku dee sisa dee abi gaan wosu nöö sa heepi de. Kandë dee baaa ku dee sisa aki bi heepi wotowan sömëni pasi kaa. I si kuma i bi o sa hoi wan sëmbë a i pisi aluwasi di wosu fii piki ö?

10 Wan baaa di ta libi a Zuid Kolea ta mëni jeti te a bi ta kai baaa ku sisa di bi nango a dee siköö u di ölganisaasi fuu, ko nëën pisi. A bi taki taa: „Bigibigi ma bi kë kai de ko a u pisi u di mi ku mi mujëë an bi tööu sö longi jeti, nöö di wosu fuu bi piki. Ma a bi dë wan piizii soni da u di u bi hoi dee baaa ku dee sisa aki a u pisi. Mi ku mi mujëë bi ko si unfa wan womi ku hën mujëë sa ta dë waiwai tjika te de ta dini Jehovah makandi.”

11. Faandi mbei i musu ta tei dee baaa ku dee sisa dee foloisi ko a di kemeente ka i dë, ku wai?

11 Te baaa ku sisa kumutu a wan woto kemeente ko a di kemeente ka i dë: So juu baaa ku sisa, nasö sëmbë u wan wosudendu sa foloisi kumutu a wan kemeente ko a di kemeente ka i dë. Kandë de foloisi ko dë, u di di kemeente ka i dë abi heepi fanöudu. Nasö kandë de dë pionili di dee baaa manda ko a di kemeente ka i dë. Di soni aki sa mbei de musu tooka soni a de libi. De musu ko guwenti wan njunjun kamian, wan njunjun kemeente, nasö kandë de musu ko lei wan njunjun töngö, nasö wan njunjun fasi u libi. Wë a bi o dë wan bunu soni fii kai de ko a i pisi u de ko njan wan soni, nasö fii kai de fii ku de go köi a wan kamian makandi. Di soni aki o mbei de ko abi njunjun mati, söseei a o heepi de u de ko guwenti di njunjun kamian ka de ko dë.

12. Un woto ta lei taa an dë fuu abi te a hia soni ufö u sa tei dee baaa ku dee sisa fuu ku wai?

12 An dë fii seeka te a hia soni, ufö i sa kai baaa ku sisa ko a i pisi. (Lesi Lukasi 10:41, 42.) Wan baaa ta mëni jeti andi bi pasa di hën ku hën mujëë bi bigi ta du di sëndëlengi wooko. A bi taki taa: „U bi njönku, nöö wa bi sabi soni u di sëndëlengi wooko sö, söseei u bi ta hangi dee sëmbë fuu. A wan ndeti, mi  mujëë bi ta hangi dee sëmbë fëën, nöö mi bi mbei möiti u dëën kötöhati, ma tökuseei an bi heepi. Ma a di pisiten u 7.30 juu sapate, hën wan sëmbë ko naki di döö fuu. Wan sëmbë di bi ta lei soni u Bëibel bi tja dii apeesina ko da u. A bi ko luku u, u di a bi jei taa wantu njunjun sëndëlengi bi ko a di köndë. U bi kai ën ko a wosu, hën u dëën wata u bebe. Hën u mbei te ku sukuati. Wa bi sa’ u fan di Swahilitöngö, nöö an bi sa’ u fan Ingisitöngö tu.” Di baaa bi taki taa di soni di bi pasa di ndeti dë bi heepi de u de ko dë mati ku woto baaa ku sisa u di köndë, söseei u de ko ta dë möön waiwai.

NA MBEI NA WAN SONI TAPA I FII TEI WOTOWAN KU WAI

13. Unfa di tei di i ta tei sëmbë ku wai a i pisi, ta tja wini ko da i?

13 A bi pasa wan daka kaa taa ja bi kë tei sëmbë ku wai a i pisi ö? Wë ee sö, nöö hën da i lasi wan okasi di i bi abi u pasa wan piizii ten ku wotowan, söseei fii ko feni mati di joo abi u teego. Te i ta tei sëmbë ku wai a i pisi, nöö ja o ta fii kuma i dë i wanwan. Ma nöö faandi mbei wan sëmbë an bi o kë tei sëmbë ku wai nëën pisi? Wë boo luku wantu soni di sa mbei wan sëmbë an bi o kë du di soni aki.

14. Andi u sa du ee wa abi ten ku kaakiti tjika fuu kai sëmbë ko a u pisi?

14 Di ten fuu ku di kaakiti fuu: Dee sëmbë u Jehovah ta abi sömëni soni ta du, nöö dee abi sömëni faantiwöutu tu. So sëmbë sa feni taa de an abi ten ku kaakiti tjika u de kai sëmbë ko a de pisi. Ee sö i ta si ën tu, nöö kandë i musu seeka soni möön bunu, sö taa i sa ta kai sëmbë ko a i pisi. Di soni aki dë fanöudu seei, u di di Bëibel ta piki u fuu du ën (Hebelejën 13:2). Fëën mbei di kai di u ta kai sëmbë ko a u pisi, da wan bunu soni. Ma ee u kë du di soni aki, nöö a o dë fuu disa so soni di an dë fanöudu.

15. Faandi mbei so sëmbë ta fii kuma de an o sa kai sëmbë ko a de pisi?

15 Di fasi fa i ta fii: A bi pasa ku i wan pasi kaa taa i bi kë kai sëmbë ko a i pisi, hën i ko ta fii kuma ja o sa du ën u? Kandë i ta sen, nasö i ta si kuma dee sëmbë dee joo kai ko a i pisi o ko sindo ta fuufei. Nasö kandë ja abi möni tjika, nöö i ta booko i hedi taa ja abi soni a di wosu fii kumafa woto baaa ku sisa abi. Ma hoi a pakisei taa an dë fii abi diidii soni a i pisi ufö i sa kai sëmbë. Dee sëmbë dee joo kai dë o wai te de si taa di wosu fii dë limbolimbo, söseei taa a dë seekaseeka. De o wai tu te de si taa i tei de ku wai.

16, 17. Andi i sa du te i ta booko i hedi, u di i kai sëmbë u de ko a i pisi?

16 Ee i ta fii wan fasi u kai sëmbë ko a i pisi, nöö hoi a pakisei taa na i wanwan ta fii sö. Wan gaanwomi di ta libi a Ingisiköndë bi taki taa: „So juu i sa ta booko i hedi te i ta seeka soni u kai sëmbë ko a i pisi. Ma i ta fii bunu te i du ën, leti kumafa i ta fii bunu te i ta du hiniwan woto wooko da Jehovah. Wan daka, mi bi kai sëmbë ko a mi pisi, nöö kofi nöö mi bi mbei da de, nöö u bi ta da woto.” Hii juu a ta bunu te u ta buta pakisei a dee sëmbë dee u kai ko a u pisi (Filipi 2:4). Gaansë sëmbë lo’ u taki u di fasi fa soni bi waka a di libi u de. Ma te u ta ko makandi ku de ufö woo sa jei dee woto aki. Wan woto gaanwomi bi taki taa: „Te mi ta kai baaa ku sisa u di kemeente ko a mi pisi, nöö a ta heepi mi u mi ko sabi de möön bunu. Mi ta ko sabi unfa de ko a di tuutuu lei.” Ee i ta lei dee sëmbë dee i kai ko a i pisi taa i abi ten da de, nöö i sa dë seiki taa hii sëmbë o fii bunu di daka dë.

17 Wan sisa di bi ta du di pioniliwooko, bi ta hoi baaa ku sisa nëën pisi te de bi musu go a  wan u dee siköö u di ölganisaasi. A bi taki taa: „Bigibigi mi bi ta booko mi hedi, u di ma bi abi hia soni a di wosu u mi, nöö dee soni dee mi bi abi an bi dë njunjun soni. Di mujëë u wan baaa di ta lei wotowan soni a dee siköö u di ölganisaasi, bi taki wan soni di bi mbei mi fii bunu seei. A bi taki taa te hën ku hën manu ta du di keling-wooko, nöö dee möön bunu pisiten ta dë te de dë ku sëmbë di ta si soni kumafa Gadu ta si soni, söseei di ta buta hii de pakisei a di dini di de ta dini Jehovah, aluwasi de an abi hia soni a de wosu. Di soni di di mujëë u di baaa bi taki dë, ta mbei mi mëni wan soni di mi mama bi ta piki u di u bi dë miii. A bi ta piki u taa: ’A möön bunu fii njan guluntu a wan kamian ka sëmbë lobi deseei.’” (Nöngö 15:17). An dë fii ta booko i hedi te joo kai sëmbë ko a i pisi, u di di möön fanöudu soni, hën da u musu lei dee sëmbë dee u kai ko a u pisi taa u lobi de.

18, 19. Unfa di kai di u ta kai wotowan ko a u pisi, ta heepi u fuu ko lobi de?

18 Di fasi fa i ta si wotowan: Wan sëmbë dë a di kemeente ka i dë di ta mbei hati fii boonu ö? Wë soni an o tooka ee ja ta mbei möiti u hati fii an ta boonu ku ën möön. Ja o kë kai wan sëmbë ko a i pisi ee ja lobi dee fasi fëën. Nasö kandë a dë wan sëmbë di bi du wan soni ku i di hati i, nöö a ta taanga da i fii fëëkëtë di soni di a bi du.

19 Di Bëibel ta taki taa te i ta tei wotowan ku wai a i pisi, nöö i sa ko dë möön gaan mati ku de, te kisi dee felantima fii seei. (Lesi Nöngö 25:21, 22.) Te i kai wan sëmbë ko a i pisi, nöö a sa heepi i u hati fii an ta boonu ku ën möön, söseei i ku ën sa ko dë mati. I sa ko ta si dee  seei fasi dee Jehovah bi si nëën di a bi hai ën ko a di tuutuu lei (Johanisi 6:44). Ee lobi hën bi mbei i kai wan sëmbë ko a i pisi, hii fa an bi dë ku di mëni taa i bi o kai ën, nöö i ku ën o sa ko dë mati. Unfa i sa sabi ee lobi hën ta mbei i kai sëmbë ko a i pisi? Wan fasi fa u sa ko sabi di soni aki, hën da te u ta lesi di soni di sikifi a Filipi 2:3, di ta taki taa: „Saka i seei da dee otowan fii ta luku de kuma de hei möön i.” U musu pakisei na un fasi dee baaa ku dee sisa fuu hei möön u. Kandë u sa djeesi de a di biibi di de abi, a di fasi fa de ta hoi dou, ku woto fasi di wan Keesitu sëmbë musu abi. Te u ta pakisei u dee bunu fasi di dee baaa ku dee sisa fuu abi, nöö woo möön lobi de, söseei an o ta taanga da u fuu kai de ko a u pisi.

TJA ISEEI A WAN BUNU FASI TE I GO A SËMBË PISI

Te wan sëmbë ta kai wotowan ko njan nëën pisi, nöö a ta seeka soni a fesi (Luku palaklafu 20)

20. Faandi mbei u musu dë u futoou te u ku wan sëmbë mbei buka fuu ko nëën pisi, nöö unfa u sa du ën?

20 Di Psalöm sikifima de kai Dafiti, bi hakisi Jehovah wan soni. A bi hakisi ën taa: „Jehovah o, ambë seei sa ko tan ku i a di tenti fii?” (Psalöm 15:1). Baka di dë, hën Dafiti bi taki u dee fasi di sëmbë musu abi u de sa go dë a di tenti u Jehovah. Wan u dee fasi aki, hën da di sëmbë musu dë u futoou. Dafiti bi taki taa: „Hii juu a ta du di soni di a paamusi taa a o du, aluwasi a sa tja hogi ko dëën” (Psalöm 15:4). Ee wan sëmbë kai u fuu ko nëën pisi, hën u piki taa woo ko, nöö u musu go, solanga na wan gaan soni hën mbei taa wa sa go möön. Kandë di sëmbë bi seeka soni a fesi kaa u di u bi o ko nëën, nöö ee wa go möön, nöö a o ko dë taa u sösö di sëmbë bi seeka soni da u (Mateosi 5:37). So sëmbë an nango möön, u di wan woto sëmbë kai de, nöö de nango a di de ta si kuma de o möön lobi. I si kuma di soni aki ta lei taa u lobi wotowan u, nasö taa u abi lesipeki da wotowan u? U musu dë tifeedi ku di soni di wan sëmbë seeka da u di a kai u ko nëën pisi (Lukasi 10:7). Ee a bi o dë taa wa sa go möön, nöö a bi o bunu fuu piki di sëmbë a fesi.

21. Unfa di lesipeki di u ta lesipeki di guwenti u wan köndë ta heepi u fuu tja useei a wan bunu fasi te u go a wan sëmbë pisi?

21 A dë fanöudu tu fuu ta hoi dee guwenti u wan köndë a pakisei. A so köndë wan sëmbë sa go a wan wotowan pisi, aluwasi de an bi kai ën. Ma a woto köndë, a ta möön bunu fii mbei buka ku de ufö i go a de pisi. A so köndë de ta da di sëmbë di de kai ko a de pisi dee möön bunu soni u njan, aluwasi ee di u de mii seei an feni wan apaiti. Ma a woto köndë hii sëmbë ta feni di wan fasi. A so köndë di sëmbë di i kai ko a i pisi seei ta tja wan soni ko. Ma a woto köndë di sëmbë di ta kai i ko nëën pisi, an ta kë fii tja soni ko. A so köndë te sëmbë kai i dee tu fosu pasi fii ko a de pisi, nöö an ta bunu fii piki taa joo go, ma a woto köndë te de kai i di fosu pasi, hën i piki taa ja o go, nöö a ta dë kuma ja abi lesipeki. Hii juu u musu ta mbei möiti u mbei dee sëmbë dee kai u ko a de pisi, dë waiwai.

22. Faandi mbei a dë fanöudu fuu ta ’kisi useei ta hoi a wosu ku piizii’?

22 Petuisi bi taki taa: „Di ten ko zuntu u hii soni musu kaba” (1 Petuisi 4:7). Abiti möön woo miti di möön gaan fuka di o ko a goonliba. Möön di goonliba aki ta ko möön hogi, möön a o dë fuu lei taa u lobi dee baaa ku dee sisa fuu. Nöunöu kaa u musu du di soni di Petuisi bi taki, di a bi taki taa: „Un musu ta kisi unu seei ta hoi a wosu ku piizii e” (1 Petuisi 4:9). Di kai di u musu ta kai sëmbë ko a u pisi, da wan soni di ta da u piizii seei, söseei a dë wan soni di u musu ta du nöunöu kaa, söseei u teego.