Skip to content

Skip to table of contents

Hii Keesitu sëmbë musu tei dopu

Hii Keesitu sëmbë musu tei dopu

„Di dopu ta heepi unu a di wan seei fasi.”​—1 PETUISI 3:21.

KANDA: 52, 41

1, 2. (a) Unfa so mama ku tata ta fii te wan mii u de kë tei dopu? (b) Faandi mbei de ta hakisi dee sëmbë dee kë tei dopu ee de buta de libi a Jehovah maun? (Luku di peentje a bigi u di woto.)

MARIA mama ku hën tata ta luku fa Maria ku dee woto sëmbë dee o tei dopu ta hopo taanpu. Di takima hakisi de tu soni, hën Maria piki be hii sëmbë jei. Baka di dë, hën a tei dopu.

2 Maria mama ku hën tata bi wai seei taa di mujëë mii u de bi buta hën libi a Jehovah maun, hën a tei dopu. Ma ufö di daka dë dou, Maria mama bi ta booko hën hedi pikisö. A bi ta hakisi hënseei taa: ’Maria bigi tjika faa sa tei dopu ö? A ta fusutan taa di buta di wan sëmbë ta buta hën libi a Jehovah maun da wan gaan faantiwöutu ö? A dë faa wakiti pikisö möön u?’ Sömëni mama ku tata ta hakisi deseei dee soni aki sö tu, te wan mii u de piki de taa a kë tei dopu (Peleikima 5:5). Wë di soni aki dë u fusutan, u di di buta di wan sëmbë ta buta hën libi a Jehovah maun u te a tei dopu, da di möön gaan soni di wan sëmbë sa du.​—Luku di pisi „ Unfa i ta buta i libi a Jehovah maun?

3, 4. (a) Unfa apösutu Petuisi bi lei u taa dopu da wan gaan fanöudu soni? (b) Faandi mbei Petuisi bi tei di dopu di wan sëmbë ta dopu maaka ku di mbei di Noa bi mbei di ark?

 3 Apösutu Petuisi bi tei di dopu di wan sëmbë ta tei dopu maaka ku di mbei di Noa bi ta mbei di ark. A bi taki taa: „Wë nöö di dopu ta heepi unu a di wan seei fasi.” (Lesi 1 Petuisi 3:20, 21.) Di mbei di Noa bi mbei di ark, bi lei sëmbë gbelingbelin taa Noa bi kë piki Gadu buka ku hii hën hati. Noa bi du di wooko di Jehovah bi dëën faa du kumafa Jehovah bi piki ën. U di Noa bi abi biibi, mbei Jehovah tjubi hën ku dee sëmbë fëën wosudendu u de pasa di Gaan Wata di bi ko. Wë andi Petuisi bi kë lei u ku di woto aki?

4 Te sëmbë bi ta si di ark, nöö de bi ta sabi taa Noa bi abi biibi a Gadu. Te sëmbë ta si fa wan sëmbë ta tei dopu, nöö de ta sabi taa di sëmbë dë buta hën libi a Gadu maun, u di a ta biibi taa Keesitu toona weki ko a libi baka. Dee sëmbë dee tei dopu ta piki Gadu buka, nöö de ta du di wooko di Gadu da de u de du, leti kumafa Noa bi du ën. Nöö leti kumafa Jehovah bi tjubi Noa a di pisiten u di Gaan Wata, sö nöö a o tjubi dee dinima fëën dee dopu kaa, söseei dee ta hoi deseei nëën, te a o ko poi di hogi goonliba aki kaba a sösö (Maikusi 13:10; Akoalimbo 7:9, 10). Wë a dë gbelingbelin u si taa u musu buta u libi a Jehovah maun nöö u tei dopu. Boo taa ee wan sëmbë ta biabia faa tei dopu, nöö a sa lasi di okasi di Gadu ta dëën faa libi u teego.

5. Andi woo luku a di woto aki?

5 Wë u di u ko sabi kaa taa dopu dë wan gaan fanöudu soni, nöö u musu ko sabi dee piki u dee dii hakisi aki: Andi di Bëibel ta  taki u dopu? Andi wan sëmbë musu du ufö a tei dopu? Te u ta lei dee mii fuu soni u Bëibel, nasö te u ta lei woto sëmbë soni u Bëibel, nöö faandi mbei hii juu u musu ta hoi a pakisei taa di tei di wan sëmbë musu tei dopu da wan gaan fanöudu soni?

ANDI DI BËIBEL TA TAKI U DOPU?

6, 7. (a) Faandi mbei sëmbë bi ta ko a Johanisi faa dopu de? (b) Ambë bi dopu wan apaiti dopu, nöö faandi mbei di dopu aki bi dë wan apaiti wan?

6 Di fosu sëmbë di di Bëibel ta taki taa dopu sëmbë, hën da Johanisi di Dopuma (Mateosi 3:1-6). Faandi mbei sëmbë bi nango a Johanisi faa dopu de? De bi ta du ën u lei taa de ta tjali u dee zöndu u de. Hën da de bi ta lei taa de an bi hoi dee wëti di Gadu bi da Mosesi, nöö di soni dë bi ta hati de. Ma di dopu di Johanisi bi dopu Jesosi, bi dë wan apaiti dopu. Johanisi bi abi di gaandi u dopu di Womi Mii u Gadu (Mateosi 3:13-17). Jesosi an bi du zöndu wan daka. Fëën mbei an bi dë faa lei taa a ta tjali u wan zöndu di a du (1 Petuisi 2:22). Wë nöö faandi mbei Jesosi bi tei dopu? Wë u di Jesosi bi kë lei taa a dë kabakaba faa du andi Gadu kë, aluwasi andi o pasa.​—Hebelejën 10:7.

7 Di Jesosi bi bigi du di peleikiwooko, hën dee bakama fëën seei bi bigi dopu sëmbë tu (Johanisi 3:22; 4:1, 2). Wë dee sëmbë dë seei bi ta tei dopu, u di de bi kë lei taa de ta tjali u dee soni di de bi du. De an bi hoi dee wëti di Gadu bi da Mosesi. Ma baka di Jesosi dëdë toona weki baka, nöö dee sëmbë dee bi kë ko dë bakama fëën bi musu ta tei dopu u wan woto soni hedi.

8. (a) Un soni Jesosi bi piki dee bakama fëën taa de musu ta du, baka di a weki ko a libi? (b) Faandi mbei Keesitu sëmbë musu tei dopu?

8 Baka di Jesosi bi weki ko a libi baka a di jaa 33, hën a bi fan ku möön leki 500 sëmbë. Womi ku mujëë bi dë a dendu, nöö a sa dë taa miii seei bi sai dë tu. Kandë a di pisiten dë nëën a bi taki taa: „Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de a di në u mi Tata ku di në u mi di Mii fëën aki ku di në u di Akaa [santa jeje] fu mi Tata tu. Nöö un musu ta lei de u de piki hii dee soni tuu dee mi manda unu fuun musu ta du kaa” (Mateosi 28:19, 20; 1 Kolenti 15:6). Jesosi bi piki dee bakama fëën taa de musu heepi woto sëmbë u de ko toon bakama fëën tu. Hiniwan sëmbë di kë ko toon bakama fëën, musu tei dopu (Mateosi 11:29, 30). Ee wan sëmbë kë dini Gadu a wan fasi di ta kai ku ën, nöö di sëmbë musu biibi taa Gadu tei Jesosi u heepi ën du soni, u mbei di kë fëën pasa. Te di sëmbë biibi di soni aki, nëën ufö di sëmbë dë sa tei dopu, nöö Gadu o wai ku di tei di a tei dopu. Sömëni soni sikifi a Bëibel di ta lei taa dee fosu bakama u Jesosi bi ta si dopu kuma wan fanöudu soni. De an bi ta biabia u tei dopu.​—Tjabukama 2:41; 9:18; 16:14, 15, 32, 33.

NA BIABIA U TEI DOPU

9, 10. Andi u sa lei u di tei di wan sëmbë ta tei dopu, te u luku di woto u di Etiopia womi ku di woto u Saulosu?

9 Lesi Tjabukama 8:35, 36. Wan Etiopia womi di bi tei di Dju biibi, bi kumutu a di Wosu u Gadu di bi dë a Jelusalen nango a wosu. Hën wan ëngëli u Jehovah manda Filipi faa go peleiki dëën, hën Filipi „konda di Bunu Buka u Masa Jesosi dëën”. Andi di Etiopia womi du? A bi fusutan unfa a dë fanöudu tjika u tei Jesosi kuma Masa, söseei a bi kë du dee soni di Jehovah kë taa dee  Keesitu sëmbë musu ta du. Fëën mbei a bi tei dopu wantewante.

10 Wan woto sëmbë, da di Dju womi de kai Saulosu. Hii dee Dju sëmbë bi buta de libi a Gadu maun, ma Jehovah an bi kë de kuma sëmbë fëën möön, u di de an bi ta piki hën buka. Saulosu bi ta si kuma dee Dju bi ta dini Gadu a di soifi fasi jeti. Fëën mbei a bi ta du ku dee Keesitu sëmbë. Ma wan daka, hën Jesosi bi fan ku Saulosu. Di ten dë Jesosi bi weki ko a libi baka kaa, nöö a bi dë a liba ala ta fan ku ën. Andi Saulosu du? Wë a bi mbei wan bakama u Jesosi de kai Ananiasi heepi ën. Di Bëibel ta taki taa: „Hën a hopo go dopu wante” (Tjabukama 9:17, 18; Galasia 1:14). Bakaten sëmbë bi ko sabi ën kuma apösutu Paulosu. Di a ko fusutan taa Gadu tei Jesosi u heepi ën du soni u mbei di kë fëën pasa, hën a tei dopu wantewante.​—Lesi Tjabukama 22:12-16.

Dee sëmbë dee ta lei soni u Bëibel ta tei dee lei u Bëibel u bigi, nöö de ta kë tei dopu

11. (a) Andi ta mbei dee sëmbë dee ta lei soni u Bëibel ta kë tei dopu? (b) Unfa u ta fii te wan sëmbë ta tei dopu?

11 Sömëni njönkuwan ku sëmbë di ko gaandi kaa, di ta lei soni u Bëibel a di ten aki, ta du di wan seei soni tu. U di de lobi dee soni di di Bëibel ta taki, söseei u di de ta biibi de, mbei de ta kë buta de libi a Jehovah maun, nöö de tei dopu. Hii juu di dopu-taki ta dë wan apaiti taki di de ta hoi a dee gaan komakandi, söseei a dee könklësi. Dee Jehovah Kotoigi ta wai seei te de si taa dee sëmbë di de ta lei soni u Bëibel ko lobi dee soni di de ta lei, söseei te de kë tei dopu. Dee mama ku dee tata seei ta wai te dee mii u de kë tei dopu. A di diniwooko jaa 2017, hën möön leki 284.000 sëmbë bi tei dopu, u lei taa de buta de libi a Jehovah maun (Tjabukama 13:48). A dë gbelingbelin u si taa de bi fusutan taa wan Keesitu sëmbë musu tei dopu. Ma andi de bi musu du ufö de tei dopu?

12. Andi wan sëmbë di ta lei soni u Bëibel musu du ufö a sa tei dopu?

12 Ee dee sëmbë dee ta lei soni u Bëibel kë tei dopu, nöö de musu ko sabi dee tuutuu lei u Gadu, de musu ko sabi andi Gadu abi a pakisei da libisëmbë ku di goonliba, söseei de musu ko sabi andi Gadu du faa puu libisëmbë a zöndu ku dëdë basu (1 Timoteo 2:3-6). Te de ko sabi dee soni aki kaa, nöö de musu biibi de tu. Dee soni aki o heepi de u de hoi dee wëti u Gadu, söseei de o heepi de u de an du dee soni dee Gadu ta buuse möön (Tjabukama 3:19). Di soni aki dë fanöudu seei, biga ee wan sëmbë ta du soni di Jehovah buuse, nöö Jehovah an o si di sëmbë dë kuma wan sëmbë di buta hën libi nëën maun (1 Kolenti 6:9, 10). Ma woto soni dë jeti di wan sëmbë musu du. Dee sëmbë dee kë buta de libi a Jehovah maun musu nango a dee komakandi hii juu, söseei de musu ta paaja di bunu buka, ta lei wotowan soni u Bëibel. Hiniwan sëmbë di kë waka a Keesitu baka musu ta du dee soni aki (Tjabukama 1:8). Wan sëmbë di ta lei soni u Bëibel musu ta du hii dee soni aki fosu, nöö baka di dë ufö a sa begi Jehovah u piki ën taa a kë buta hën libi nëën maun, nöö a tei dopu.

 HEEPI DE U DE KO FUSUTAN TAA DE MUSU TEI DOPU

I ta mbei möiti u heepi wotowan u de ko fusutan unfa di tei di wan sëmbë musu tei dopu dë fanöudu tjika u? (Luku palaklafu 13)

13. Faandi mbei u musu ta hoi a pakisei taa dee sëmbë dee u ta lei soni u Bëibel, musu tei dopu ee de kë ko dë tuutuu Keesitu sëmbë?

13 Te u ta heepi dee mii fuu, ku woto sëmbë di u ta lei soni u Bëibel, u de ko ta piki Gadu buka a soni, nöö u musu ta hoi a pakisei taa wan sëmbë di kë ko dë wan tuutuu bakama u Jesosi musu tei dopu. Di soni aki o mbei u heepi de u de ko fusutan taa di buta di wan sëmbë musu buta hën libi a Gadu maun, söseei di tei a musu tei dopu, da wan fanöudu soni. U kë taa dee mii fuu ku dee sëmbë dee u ta lei soni u Bëibel, musu go a fesi, nöö de tei dopu!

14. Faandi mbei wa ta duwengi sëmbë u de tei dopu?

14 A dë sö tuu taa na wan sëmbë musu duwengi wan mii, nasö wan sëmbë di ta lei soni u Bëibel faa tei dopu. Jehovah an ta duwengi na wan fuu u dini ën (1 Johanisi 4:8). Te u ta lei wotowan soni u Bëibel, nöö u musu heepi de u de ko fusutan taa de musu ko dë gaan mati u Jehovah. Te de lobi dee lei u Gadu, söseei ee de kë du hii soni di wan tuutuu Keesitu sëmbë musu ta du, nöö deseei o kë tei dopu.​—2 Kolenti 5:14, 15.

15, 16. (a) A abi toobi un mëni jaa wan sëmbë abi te a o tei dopu ö? (b) Faandi mbei wan sëmbë di ta lei soni u Bëibel musu toona tei dopu faa ko dë wan Jehovah Kotoigi, aluwasi a bi tei dopu a wan woto keiki kaa?

15 Hii sëmbë sa tei dopu, aluwasi un mëni jaa de abi. Na hii sëmbë dë di wan, nöö so sëmbë di ta lei soni u Bëibel nango a fesi möön hesi möön wotowan. Sömëni sëmbë ta tei dopu a dee njönku jaa u de, nöö de ta hoi deseei a Jehovah u te de ko gaandi. Wotowan bi dë gaansëmbë kaa di de bi ko sabi soni u Bëibel, hën de tei dopu. So sëmbë bi pasa 100 jaa seei, di de tei dopu!

 16 Wan mujëë di bi lei soni u Bëibel, söseei di bi dopu sömëni pasi kaa a woto keiki, bi hakisi di sisa di ta lei ën soni u Bëibel ee a musu u tei dopu baka. Di sisa lei ën wantu tëkisi a Bëibel di ta taki u di soni aki. Di di mujëë ko fusutan andi di Bëibel ta taki u di soni aki, hën a tei dopu. Di ten dë a bi sa abi söwan 80 jaa. Wë andi u ta lei a di woto aki? Wë u taa lei taa te u ko sabi dee tuutuu lei u Jehovah, nëën ufö Jehovah o si u kuma wan sëmbë di tei dopu tuutuu. Fëën mbei aluwasi ee u bi tei dopu a wan woto keiki, tökuseei u musu toona tei dopu fuu ko dë wan Jehovah Kotoigi.​—Lesi Tjabukama 19:3-5.

17. Andi wan sëmbë musu ta pakisei a di daka di a tei dopu?

17 Di daka di wan sëmbë ta tei dopu, da wan gaan piizii daka seei. Di daka dë seei da wan daka ka di sëmbë musu pakisei fundu u dee soni dee a musu ta du fa a tei dopu dë. Wan sëmbë musu mbei taanga möiti faa sa ta du hii dee soni di wan Keesitu sëmbë musu du. Dee bakama u Jesosi an musu ’libi a deseei kë möön. Ma de musu libi a di kë u di sëmbë di dëdë toona weki baka u de hedi naandë’.​—2 Kolenti 5:15; Mateosi 16:24.

18. Andi woo luku a di woto di ta ko?

18 Wë u lei a di woto aki taa di ko di wan sëmbë musu ko toon wan tuutuu Keesitu sëmbë, da wan gaan fanöudu soni. Di soni aki mbei Maria mama bi hakisi hënseei dee soni dee sikifi a bigi u di woto aki. Ee i da wan mama nasö wan tata, nöö kandë i ta hakisi iseei dee soni aki: ’Di mii u mi dë kabakaba u tei dopu ö? Di mii u mi sabi soni u Jehovah tjika faa sa buta hën libi a Jehovah maun ö? Di mii u mi musu u go a hei siköö, nasö a musu u feni wan bumbuu wooko ufö a sa tei dopu ö? Andi o pasa ee di mii u mi du wan gaan zöndu baka te a tei dopu?’ Wë woo taki u dee soni aki a di woto di ta ko, söseei woo luku unfa wan Keesitu sëmbë di abi miii, musu ta si di tei di wan sëmbë musu tei dopu.