Skip to content

Skip to table of contents

„Du dee soni dee mi ta lei unu, sö taa i sa ko köni”

„Du dee soni dee mi ta lei unu, sö taa i sa ko köni”

„Baa o . . . du dee soni dee mi ta lei unu, sö taa i sa ko köni.”​—NÖNGÖ 8:32, 33.

KANDA: 56, 89

1. Andi u musu du fuu sa ko köni, nöö unfa köni o heepi u?

A JEHOVAH hii köni ta kumutu, nöö hën ta da sëmbë köni tu. U ta lesi a Jakobosi 1:5 taa: „Ee wan sëmbë i si taa ja a’ fusutan tjika a soni, nöö i musu begi Gadu faa da i fusutan e, nöö a o da i ën. An o tei i u hogi.” Wan u dee fasi fa u sa ko köni, hën da te u ta haika te Gadu ta bai u a soni. Di soni aki ta heepi u fu wa go du soni di an bunu, söseei a ta heepi u fuu ku Jehovah dë mati u nöömö (Nöngö 2:10-12). Te u ta du sö, nöö u sa dë ku di mëni taa woo feni di libi u teego.​—Judasi 21.

2. Andi sa heepi u fuu ko lobi di bai di Gadu ta bai u a soni?

2 U di u dë zöndu libisëmbë, nasö u di u kiija a wan pei fasi, mbei a sa ta taanga da u fuu haika te sëmbë ta bai u a soni, nasö a sa ta taanga da u fuu si di bai di de ta bai u kuma wan soni di sa heepi u. Ma te u ko si dee wini dee u ta feni u di u ta haika te Gadu ta bai u a soni, nöö u ta ko fusutan unfa a lobi u tjika. Nöngö 3:11, 12 ta taki taa: „Baa o, na tuwë di lei u Jehovah buta a wan së e.” A ta taki tu taa: „Dee sëmbë dee Jehovah lobi, de a ta bai a soni.” U sa dë seiki taa Jehovah kë u soni waka bunu da u. (Lesi Hebelejën 12:5-11.) U di Gadu sabi u  bumbuu, mbei hii juu a ta bai u a soni a wan fasi di fiti, nöö a ta du ën u di a sabi andi u abi fanöudu. A di woto aki woo taki u fö soni di nama ku di sitaafu di Gadu ta sitaafu u: (1) te u ta duwengi useei, (2) di bai di mama ku tata ta bai dee mii u de a soni, (3) di bai di de ta bai u a soni a di kemeente, ku di u (4) wan soni di hati möön di bai di Gadu ta bai u a soni.

FAANDI MBEI A DË WAN KÖNI SONI TE U TA DUWENGI USEEI?

3. Konda wan woto di ta lei unfa miii sa ko sabi unfa de musu ta duwengi deseei ta bai deseei a soni.

3 Te u ta duwengi useei, hën da u ta köni ku di fasi fa u ta pakisei ku di fasi fa u ta tja useei. Te de pai u, nöö wa ta sa’ u du di soni aki, ma lei u ta lei ën. A dë kuma te wan mii ta lei lëi baisigi. Bigibigi hën mama nasö hën tata ta panjan di baisigi sö taa an kai. Ma baka wan pisiten, nöö di mii seei ta ko sa’ u lëi pikisö, nöö di mama nasö di tata an ta panjan di baisigi sö möön. Nöö te de dë seiki taa di mii an o kai möön, nöö de ta disëën be a lëi. Wë a di wan seei fasi, te mama ku tata ta lei dee mii u de soni ku pasensi, hën da de ta „kiija de a wan leti fasi ta lei de kumafa Masa Gadu kë u de musu libi”. A sö wan fasi de ta heepi dee mii u de u ko sabi unfa de sa ta duwengi deseei, söseei u de ko köni tu.​—Efeise 6:4.

4, 5. (a) Faandi mbei di duwengi di u ta duwengi useei dë wan u dee „fasi” dee u musu ko abi?(b) Faandi mbei wa musu lasi hati aluwasi u ta mbei föutu?

4 Te sëmbë di ko gaan sëmbë kaa ta ko sabi Jehovah, nöö sö nöö soni ta dë da de tu. Hii fa de o sa’ u duwengi deseei a soni kaa, ma tökuseei de musu ko dë gaangaan sëmbë a di biibi jeti. Te de ta ko abi njunjun „fasi”, söseei te de ta mbei möiti u de ko dë kuma Keesitu, nöö de ta ko dë gaangaan sëmbë a di biibi (Efeise 4:23, 24). Te u ko sa’ u duwengi useei, nöö woo sa disa ’dee libi Gadu an lobi. Woo kaba ku dee soni dee sëmbë u di goonliba aki ta hangi u de feni. Woo ta hoi useei fu wa du soni di an fiti. Woo libi a wan lesipeki fasi kumafa Masa Gadu kë fuu libi, hii fa u ta libi a di hogi ten u dë aki’.​—Titusi 2:12.

5 Hii u tuu da zöndu libisëmbë (Peleikima 7:20). Ma di soni aki kë taki taa ee u mbei wan föutu nöö hën da wa sa’ u duwengi useei ö? Wë an abi fu dë sö. Nöngö 24:16 ta piki u taa: „Aluwasi wan sëmbë di ta du soni a wan leti fasi kai seibi pasi, tökuseei a o hopo taanpu baka.” Andi sa heepi u fuu „hopo taanpu baka”? Wa o sa du di soni aki ku di u fuu seei kaakiti. Ma di jeje u Gadu hën sa heepi u fuu du di soni aki. (Lesi Filipi 4:13, NW.) Wan u dee fasi di di jeje u Gadu ta mbei sëmbë ko abi da di duwengi di u ta ko sa’ u duwengi useei.

6. Unfa u sa ko ta lei soni u Bëibel möön bunu? (Luku di peentje a bigi u di woto.)

6 Te u ta begi, te u ta lei soni u Bëibel, söseei te u ta pakisei fundu u dee soni dee u ta lei, nöö de sa heepi u tu fuu ko sa’ u duwengi useei. Ma nöö ee a ta taanga da i fii ta lei soni u Bëibel wë? Nasö ee ja lo’ u lei soni u Bëibel wë? Na lasi hati. Ee i kë tuutuu, nöö Jehovah o heepi i fii ko abi di „hangi” da di Wöutu fëën (1 Petuisi 2:2). Hakisi Jehovah faa heepi i fii duwengi iseei, sö taa i sa feni ten fii ta lei soni u Bëibel. Kandë i sa bigi ta lei soni u Bëibel wantu miniti nöö. Pikipiki an o ko taanga da i sö möön fii ta lei soni u Bëibel, söseei joo ko lobi ën tu. Joo ko lobi di tei di i ta tei ten u pakisei fundu u dee soni dee dë a di Wöutu u Gadu.​—1 Timoteo 4:15.

7. Unfa di duwengi di u ta duwengi useei ta heepi u fuu sa ta du dee soni dee u kë du da Jehovah?

 7 Te u ta duwengi useei, nöö a ta heepi u fuu sa du dee soni dee u kë du da Jehovah. Wan baaa bi ta fii taa an bi ta dini Jehovah kuma fosu möön. Fëën mbei a bi buta taa a o du di kowoonu pioniliwooko. Unfa di duwengi di a bi ta duwengi hënseei bi heepi ën? A bi lesi wanlö woto a dee buku fuu di ta taki u di pioniliwooko, hën a begi Jehovah faa heepi ën. Di soni aki bi mbei hën ku Jehovah ko dë möön gaan mati. Nöö a bi ta du di heepi pioniliwooko te a bi sa. An bi mbei na wan soni tapëën faa du di soni aki. Nöö baka wan pisiten, hën a bi bigi ta du di kowoonu pioniliwooko.

KIIJA DEE MII FII KU DEE LEI U JEHOVAH

8-10. Konda wan woto di ta lei andi sa heepi mama ku tata u kiija dee mii u de a sö wan fasi taa de ko dini Jehovah.

8 Jehovah da mama ku tata di faantiwöutu u de kiija dee mii u de „a wan leti fasi ta lei de kumafa Masa Gadu kë u de musu libi” (Efeise 6:4). Di soni aki da wan soni di taanga u du a di ten fuu aki (2 Timoteo 3:1-5). Te de pai wan mii, nöö di mii an ta sabi jeti andi da bunu ku andi da hogi, söseei háti fëën an ta fon mën te a du wan soni di an  bunu. Fëën mbei sëmbë musu heepi ën (Loomë 2:14, 15). Wan buku ta taki taa di Giiki wöutu di de puu ko „kiija” sa kë taki tu taa i ta heepi wan mii faa ko dë wan bumbuu sëmbë.

Te de pai wan mii, nöö di mii an ta sabi jeti andi da bunu ku andi da hogi. Fëën mbei sëmbë musu heepi ën (Luku palaklafu 8)

9 Te mama ku tata ta kiija dee mii u de a wan fasi di ta lei taa de lobi de, nöö dee mii ta fii taa dee sëmbë u de ta booko de hedi ku de. De ta ko fusutan taa na hii soni de o sa du, söseei taa ee de du wan soni di an bunu nöö a o tja hogi ko da de. Fëën mbei a dë fanöudu taa mama ku tata di dë Keesitu sëmbë, musu ta kiija dee mii u de ku dee lei u Jehovah. Di fasi fa sëmbë ta kiija miii ta tooka, nöö möön di ten ta pasa, möön sëmbë ta kiija miii woto fasi. Ma mama ku tata di ta haika Gadu, ta sabi unfa de musu kiija dee mii u de.

10 U sa lei wan soni a di woto u Noa. Di Jehovah bi piki ën faa mbei di ark, nöö Noa an bi sabi unfa a bi musu mbei ën. A bi musu hakisi Jehovah faa heepi ën, nöö u ta lesi a di Bëibel taa a du soni leti kumafa Jehovah bi piki ën. „Leti sö a du gbolo” (Kenesesi 6:22). Wë nöö unfa soni bi waka? Noa ku dee sëmbë fëën bi fika a libi! Noa bi dë wan tata di bi kiija dee mii fëën a wan bunu fasi. Unfa a du waka? Wë u di a bi ta futoou Gadu taa a o heepi ën. Noa bi lei dee mii fëën soni a wan bunu fasi, nöö hënseei bi ta libi bunu tu. Dee soni aki bi taanga u du a di pisiten dë, u di sëmbë u di ten dë bi ta libi hogi.​—Kenesesi 6:5.

11. Faandi mbei mama ku tata musu mbei hii möiti u kiija dee mii u de kumafa Jehovah kë?

11 Ee i abi miii, nöö andi sa heepi i fii du soni kumafa Jehovah kë? Wë i musu ta haika Jehovah, nöö be a heepi i kiija dee mii fii. Du soni kumafa di Wöutu fëën ta taki, söseei du dee soni di di ölganisaasi fëën ta piki i fii du. Kandë bakaten dee mii fii o da i tangi u di fasi fa i bi kiija de! Wan baaa bi taki taa: „Mi ta wai seei taa mi mama ku mi tata kiija mi a wan bunu fasi. De mbei hii möiti u heepi mi.” A bi taki taa hën mama ku hën tata bi heepi ën faa ko dë mati ku Jehovah. A dë sö tuu taa so miii nango disa Jehovah, aluwasi de mama ku de tata mbei hii möiti u lei de soni u Jehovah. Ma ee mama ku tata mbei hii möiti u heepi di mii u de, nöö de háti an o fon de, söseei de o sa dë ku di mëni taa di mii o toona ko a Jehovah wan daka.

12, 13. (a) Unfa mama ku tata sa lei taa de ta piki Gadu buka te de puu wan mii u de a di kemeente? (b) Unfa wanlö sëmbë u wan wosudendu bi feni wini u di di mama ku di tata bi piki Jehovah buka?

12 Wan u dee soni di sa mbei a ta taanga da mama ku tata u de piki Jehovah buka, hën da te de puu wan mii u de a di kemeente. De bi puu di mujëë mii u wan sisa a di kemeente, nöö di mujëë mii bi foloisi go ta libi a woto kamian. Di sisa bi taki taa: „Mi bi ta suku soni a dee buku fuu di ta da mi pasi u mi sa ta hulu ku di mujëë mii u mi ku di mujëë mii fëën.” Ma di manu u di sisa aki bi heepi ën a wan suti fasi faa ko si taa de an abi taki a di mujëë mii u de liba möön, ma de musu hoi deseei a Jehovah.

13 Baka wantu jaa, hën de bi toona tei di mujëë mii u de a di kemeente. Di sisa ta taki taa: „Nöunöu, daka an ta pasa di mi ku ën an ta bëli useei, nasö ta manda bosikopu da useei a tëlëfön! Boiti di dë, a ta lesipeki u, u di a sabi taa u bi piki Gadu buka, nöö u ku ën dë gaan mati seei.” Joo „buta futoou a Jehovah ku hii i hati”, ee de puu wan mujëë mii fii nasö wan womi mii fii a di kemeente u? Joo mbei Jehovah si taa ja ta „buta futoou  a iseei ö?” (Nöngö 3:5, 6). Hoi a pakisei taa di bai di Jehovah ta bai u a soni, ta lei unfa a köni tjika, söseei unfa a lobi u tjika. Hoi a pakisei tu taa a mbei di Womi Mii fëën ko dëdë da libisëmbë, hën da di womi mii fii nasö di mujëë mii fii seei dë a dendu tu. Gadu kë taa hii sëmbë musu feni di libi u teego. (Lesi 2 Petuisi 3:9.) Fëën mbei un dee mama ku dee tata, un musu ta hoi a pakisei nöömö taa di sitaafu di Jehovah ta sitaafu sëmbë, ku di tii di a ta tii wan sëmbë, da wan bunu soni, aluwasi ee a ta taanga fuu ta piki hën buka. Haika te Gadu ta bai i a soni, ma na hopo fia ku ën.

TE DE TA BAI U A SONI A DI KEMEENTE

14. Un wini u ta feni a dee lei u Jehovah di a ta mbei „di saafu di dë u futoou”, ta da u?

14 Jehovah paamusi u taa a o ta luku u, a o ta tjubi u, söseei taa a o ta lei u soni a di kemeente. Wë a ta du di soni aki a peipei fasi. A buta di Womi Mii fëën faa luku dee kemeente, hën di Womi Mii fëën buta „di saafu di dë u futoou”, faa sa ta lei u soni fuu sa hoi useei a Jehovah (Lukasi 12:42). Di „saafu” dë ta lei u sömëni soni, nöö a ta bai u a soni tu. Kandë i bi jei wan soni a wan taki nasö i bi lesi wan soni a wan u dee buku fuu di bi heepi i fii ko ta si soni woto fasi, nasö fii tooka di fasi fa i bi ta du soni. Wë i musu ta wai seei ee i bi du dee soni aki, u di a sö wan fasi i ta lei taa i ta da Jehovah pasi faa ta bai i a soni.​—Nöngö 2:1-5.

15, 16. (a) Unfa u sa feni wini u di wooko di dee gaanwomi ta du? (b) Andi u sa du u dee gaanwomi sa ta du di wooko u de ku piizii?

15 Keesitu bi buta gaanwomi tu u luku di kemeente. Di Bëibel ta taki taa dee baaa aki dë kuma „gudu” (Efeise 4:8, 11-13). Un wini u sa feni u di wooko di dee gaanwomi ta du? Wë u sa djeesi de a di fasi fa de ta biibi, söseei u sa ta du dee soni di de ta piki u di kumutu a Bëibel. (Lesi Hebelejën 13:7, 17.) Dee gaanwomi lobi u, nöö de kë fuu ku Gadu ko dë möön gaan mati. Ee de si taa wa ko nango a dee komakandi sö möön, nasö taa wa ko ta dini Gadu kumafa u bi ta dini ën fosu möön, nöö wantewante de ta mbei möiti u heepi u. De o haika u te u ta konda da de andi du u, nöö de o da u degihati, söseei de o da u köni lai di kumutu a di Bëibel. I ta si di heepi di de ta heepi i kuma wan fasi fa Jehovah ta lei taa a lobi i ö?

16 Hoi a pakisei taa so juu a sa ta taanga da dee gaanwomi u de da u wan lai. Unfa i ta si kuma di tjabukama Naatan bi fii di a bi musu go fan ku Könu Dafiti baka di a bi du wan gaan zöndu? (2 Samuëli 12:1-14) Petuisi bi du soni di ta lei taa a ta libi bunu ku dee Dju dee bi ko dë Keesitu sëmbë, möön dee woto köndë sëmbë dee bi ko toon Keesitu sëmbë. Unfa i si kuma apösutu Paulosu bi fii di a bi musu da Petuisi lai u di soni aki hedi, hii fa Petuisi bi dë wan u dee 12 apösutu? Wë Paulosu bi musu abi degihati faa du di soni aki (Galasia 2:11-14). Ma andi i sa du fu an ta taanga da dee gaanwomi u de ko da i wan lai? Wë i musu abi sakafasi, i musu ta tei dee wooko di de ta du u bigi, söseei ja musu mbei a ta taanga da de u de ko fan ku i. I musu ta si di heepi di de ta heepi i kuma wan fasi fa Gadu ta lei taa a lobi i. Joo feni wini fëën, söseei dee gaanwomi seei o du di wooko u de ku piizii.

17. Unfa dee gaanwomi bi heepi wan sisa?

17 Wan sisa bi taki taa dee soni dee bi miti ën a di ten di pasa, bi mbei a bi ta taanga dëën faa lobi Jehovah, nöö a bi ta fii bookosaka. A bi taki taa: „Mi bi sabi taa mi bi  musu go fan ku dee gaanwomi, nöö di mi bi go fan ku de, de an bi gandji da mi, söseei de an bi kuutu mi tu, ma de bi da mi degihati, söseei de bi da mi taanga. Baka hiniwan komakandi, de bi ta ko hakisi mi ee unfa a nango ku mi, aluwasi de bi abi sömëni soni u du. Dee soni dee bi miti mi a di ten di pasa, bi mbei a ta taanga da mi u mi si taa Gadu lobi mi. Ma hii juu Jehovah bi ta mbei dee sëmbë u di kemeente, ku dee gaanwomi, lei mi taa a lobi mi. Mi ta begi Jehovah be a heepi mi u ma go disëën nöiti.”

ANDI DA WAN SONI DI HATI MÖÖN DI BAI DI GADU TA BAI U A SONI?

18, 19. Konda wan woto di ta lei taa wan soni dë di hati möön di bai di Gadu ta bai wan sëmbë a soni.

18 Te Gadu bai u a wan soni, nöö a sa hati u. Ma te wa haika te a bai u a soni, nöö a ta möön hati seei (Hebelejën 12:11). Wë u sa lei wan soni a di soni di bi miti Kain ku Könu Sedekia. Di Gadu si taa Kain bi buuse hën baaa, söseei taa a bi kë kii ën, hën a bai Kain. A piki ën taa: „Faandi mbei hati fii boonu sö? Faandi mbei fesi fii dë gudjuu sö? Ja pakisei taa ee i bia ko ta du bunu baka, mi o toona wai ku i ö? Ma ee ja du sö, nöö zöndu dë leti a i dööbuka ta lulu i. A kë hai i tja go du hogi. Ma i si kuma joo sa koti pasi dëën u?” (Kenesesi 4:6, 7) Kain an haika di Jehovah bai ën a soni, nöö fëën mbei a kii hën baaa. Te u kaba fëën a tja sömëni fuka u di soni aki hedi hii hën libi longi (Kenesesi 4:11, 12). Ee Kain bi haika di Gadu bi ta bai ën, nöö an bi o abi di pen dë ta tja.

19 Sedekia bi dë wan hogihati könu. Di a bi ta tii, nöö soni an bi ta waka bunu da dee sëmbë u Jelusalen. Di tjabukama u Gadu de kai Jelemia, bi ta bai Sedekia taa a bi musu tooka di fasi fa a bi ta libi. Ma di könu aki an bi ta haika di bai di Jehovah bi ta bai ën, hën te u kaba fëën soni an bi waka bunu dëën (Jelemia 52:8-11). Jehovah an kë u di soni aki miti u!​—Lesi Jesaaja 48:17, 18.

20. Andi o pasa ku dee sëmbë dee ta haika te Gadu ta bai de a soni, nöö andi o pasa ku dee an ta haika?

20 A di ten aki, sömëni sëmbë an ta haika te Gadu ta bai de a soni. Ma abiti möön dee sëmbë dee an ta haika te Gadu ta bai de a soni, o tja pen u di soni dë hedi (Nöngö 1:24-31). Fëën mbei boo ’du dee soni dee Gadu ta lei u, sö taa u sa ko köni’. Nöngö 4:13 ta taki taa: „Tei di sitaafu di i kisi, hoi ën gingin. Tjubi ën bunu, biga hën da di libi fii.”