Skip to content

Skip to table of contents

Feni wini u hii dee soni dee Jehovah seti u lei u soni

Feni wini u hii dee soni dee Jehovah seti u lei u soni

„Mi Jehovah, da i Gadu. Mi da di Sëmbë di ta lei i sö taa i sa feni bunu.”​—JESAAJA 48:17.

KANDA: 117, 114

1, 2. (a) Unfa dee Jehovah Kotoigi ta si di Bëibel? (b) Un pisi u Bëibel i möön lobi?

U KUMA Jehovah Kotoigi lobi di Bëibel. A ta da u kötöhati, nöö a ta mbei u abi di biibi taa woo feni bunu a di ten di ta ko, söseei a ta lei u soni di u sa futoou (Loomë 15:4). An dë wan buku di abi libisëmbë pakisei, ma a dë „Gadu Buka”.​—1 Tesalonika 2:13.

2 A ta pasa möön gaanfa taa hii u tuu abi wan pisi u Bëibel di u möön lobi. So sëmbë lobi dee fö buku u Bëibel dee ta taki soni u di libi u Jesosi a goonliba aki, u di dee buku dë ta lei u dee fasi dee Jehovah abi te u luku unfa Jesosi bi libi (Johanisi 14:9). Wotowan lobi dee buku dee ta taki u ’dee soni dee o pasa abiti möön’, kuma di buku Akoalimbo (Akoalimbo 1:1). So sëmbë ta feni kötöhati te de lesi di buku Psalöm, nöö wotowan lobi dee lai di de ta feni te de lesi di buku Nöngö. U ta fusutan gbelingbelin taa di Bëibel da wan buku di sa heepi hii pei sëmbë.

3, 4. (a) Unfa u ta si dee buku fuu? (b) Un buku u ta sikifi da wan apaiti kulupu u sëmbë?

3 U di u lobi di Bëibel, mbei u lobi dee buku fuu dee ta taki soni u di Bëibel tu. Hii dee buku fuu, dee brochure fuu, Di Hei Wakitimawosu  ku di Ontwaakt!, da soni di Jehovah seti u lei u soni. De ta heepi u fuu sa ko dë gaan mati ku ën, söseei fuu sa ko abi wan taanga biibi.​—Titusi 2:2.

4 Gaansë u dee buku fuu sikifi da Jehovah Kotoigi. Ma tökuseei so buku dë di de ta sikifi da njönkuwan apaiti, nasö da mama ku tata. Gaansë u dee woto ku dee fëlön dee dë a di website fuu dë da sëmbë di an dë Jehovah Kotoigi. Dee peipei soni aki ta lei taa Jehovah ta lei hii pei sëmbë soni, leti kumafa a paamusi taa a o du ën.​—Jesaaja 25:6.

5. Ku andi u sa dë seiki taa Jehovah ta wai?

5 Gaansë fuu bi o kë feni möön ten fuu ta lesi di Bëibel ku dee buku fuu. Fëën mbei kandë na di wan ten di u bi o tei u lei soni a wan buku, hën u bi o tei fuu lei soni a wan woto buku. Ma u sa dë seiki taa Jehovah ta wai ku u te u ta wooko ku di ten fuu a wan köni fasi, u di u ta lesi di Bëibel ku dee buku fuu, söseei te u ta lei soni a de (Efeise 5:15, 16). Ma wan soni dë di u musu ta köni ku ën? Andi da di soni dë?

6. Andi sa mbei wa feni wini u dee soni dee Jehovah seti u lei u soni?

6 Ee wa ta luku bunu, nöö u bi o sa pakisei taa so pisi u Bëibel nasö so u dee buku fuu an dë da u. Unfa a dë ee u ta si kuma wan pisi u Bëibel an o heepi u ku wan bookohedi di u abi? Unfa a dë ee na u de sikifi wan buku da? U ta lesi ën hesihesi ö, naa wa ta pena lesi ën seei? Ee a dë sö, nöö a sa pasa taa u misi wa soni di u bi o sa feni wini fëën. Andi sa heepi u u di soni dë an miti u? U musu hoi a pakisei taa Jehovah hën ta mbei de ta sikifi hii dee soni dee u ta feni a dee buku fuu. U ta lesi a di Bëibel taa: „Mi Jehovah, da i Gadu. Mi da di Sëmbë di ta lei i sö taa i sa feni bunu” (Jesaaja 48:17). A di woto aki woo taki u dii soni di o heepi u fuu sa feni wini u hii dee soni dee Jehovah seti u lei u soni.

WANTU LAI DI SA HEEPI I FII FENI WINI TE I TA LESI BËIBEL

7. Faandi u musu ta lesi di Bëibel a sö wan fasi taa u sa lei wan soni nëën?

7 Lesi fii sa lei wan soni a di woto. A dë sö tuu taa so u dee pisi u Bëibel sikifi da wan sëmbë apaiti, nasö wan kulupu u sëmbë. Ma hii fa a dë sö, i musu hoi a pakisei taa di Bëibel ta piki u gbelingbelin taa: „Biga di fa hii dee pisipisi u di Buku u Gadu bi sikifi dë, nöö di Akaa [santa jeje, NW] fëën seei wë ko a peipei sëmbë liba fu de sikifi de e. Hën mbei di Buku sa heepi i” (2 Timoteo 3:16). Fëën mbei te u ta lesi di Bëibel, nöö u musu lesi ën a sö wan fasi taa u sa lei wan soni nëën. Wan baaa ta mëni jeti fa a bi sa lei sömëni soni a wan kodo woto u Bëibel. Di soni aki bi heepi ën faa ko si sömëni soni di an bi ta si wantewante. Fëën mbei ufö u lesi di Bëibel, nöö u musu hakisi Jehovah faa heepi u fuu sa lei wan soni a di pisi di woo lesi, söseei u musu hakisi ën faa da u di köni fuu sa fusutan dee soni dee a kë lei u.​—Ësala 7:10; lesi Jakobosi 1:5.

I ta feni hii dee wini dee i sa feni te i ta lesi di Bëibel ö? (Luku palaklafu 7)

8, 9. (a) Andi u sa hakisi useei te u ta lesi di Bëibel? (b) Andi u ta lei u Jehovah, te u luku dee maaka di wan baaa musu dou faa sa toon gaanwomi u kemeente?

8 Hakisi iseei wantu soni. Te i ta lesi di Bëibel, nöö i musu wakiti pikisö, nöö i hakisi iseei dee soni aki: ’Andi di soni aki ta lei mi u Jehovah? Unfa mi sa wooko ku di soni di mi lesi aki a mi libi? Unfa mi sa wooko ku di soni aki u heepi wotowan?’ Te u ta pakisei fundu u dee hakisi aki, nöö woo feni wini u di lesi di u ta lesi Bëibel. Boo luku wan woto. Di Bëibel ta taki u fasi di wan baaa musu abi faa sa toon gaanwomi u kemeente. (Lesi 1 Timoteo 3:2-7.) Ma u di gaansë fuu an dë gaanwomi, mbei u sa pakisei taa dee soni dee sikifi aki an dë da u. Boo luku dee dii hakisi dee u bi kai djunsu dë, fuu sa si un wini u sa feni te u luku dee fasi di sikifi a dee tëkisi dë.

 9 „Andi di soni aki ta lei mi u Jehovah?” Jehovah piki u andi da dee fasi dee wan baaa musu abi faa sa toon gaanwomi. U di Jehovah kë u dee baaa aki luku di kemeente bunu, mbei a da de apaiti maaka di de musu dou. Di soni aki ta lei taa Jehovah ta si di kemeente kuma wan gaan dii soni. Di Bëibel ta piki u taa Jehovah bai di kemeente di a mbei „Jesosi dëdë paka da ku di fëën seei buuu” (Tjabukama 20:28). Fëën mbei Jehovah kë taa dee gaanwomi musu tja deseei a wan bunu fasi, u di de o piki Gadu unfa de bi libi ku dee sëmbë u di kemeente. Jehovah kë fuu ta fii taa dee gaanwomi ta booko de hedi ku u (Jesaaja 32:1, 2). Te u ta lesi a Bëibel un fasi wan baaa musu abi faa sa toon gaanwomi, nöö u ta ko si unfa Jehovah ta booko hën hedi ku u tjika.

10, 11. (a) Te u ta lesi dee maaka di wan baaa musu dou faa toon gaanwomi, nöö unfa useei sa wooko ku dee soni dë? (b) Unfa u sa wooko ku di soni aki u heepi wotowan?

10 „Unfa mi sa wooko ku di soni di mi lesi aki a mi libi?” Ee i dë wan gaanwomi u kemeente, nöö i musu ta luku dee fasi dee i bi musu dou fii bi sa toon gaanwomi, nöö i musu mbei möiti fii sa lei a wan möön bunu fasi taa i abi dee fasi dë. Ee i ta mbei möiti u toon gaanwomi, nöö i musu ta mbei möiti u abi dee fasi aki möön gaanfa (1 Timoteo 3:1). Ma hii Keesitu sëmbë sa lei wan soni a dee fasi aki. Jehovah kë u hiniwan fuu sabi unfa u musu fiti useei a hii sëmbë, söseei fuu sa wegi soni luku a wan bunu fasi (Filipi 4:5; 1 Petuisi 4:7). Te dee gaanwomi ta libi a wan fasi u dee sëmbë u di kemeente sa „djeesi” de, nöö u sa ta lei sömëni soni a de, söseei u sa ta „djeesi de a di fa de ta biibi.”​—1 Petuisi 5:3; Hebelejën 13:7.

11 „Unfa mi sa wooko ku di soni aki u heepi wotowan?” U sa taki u dee maaka di wan baaa musu dou faa sa toon gaanwomi u kemeente, fuu sa heepi dee sëmbë dee u ta lei soni u Bëibel nasö sëmbë di kë ko sabi möön soni u Bëibel, u de ko fusutan unfa dee gaanwomi u kemeente tooka ku dee hedima u keiki. Dee maaka aki sa mbei u hoi a pakisei taa dee gaanwomi u di kemeente fuu ta wooko taanga. Nöö di soni aki o heepi u fuu ta lesipeki dee baaa aki (1 Tesalonika 5:12). Möön u ta lesipeki de, möönmöön de o ta wai ku di wooko di de ta du.​—Hebelejën 13:17.

12, 13. (a) Andi u sa öndösuku, te u wooko ku dee soni dee u abi u öndösuku soni? (b) Konda wan woto di ta lei unfa dee soni dee u ta öndösuku sa heepi u fuu lei soni di wa ta si wantewante.

12 Te u ta öndösuku soni a Bëibel. Te u ta lei soni a di Bëibel, nöö u sa pooba u feni dee piki u dee hakisi aki:

  • Ambë sikifi di pisi u Bëibel aki?

  • Naasë de bi sikifi ën, nöö na un ten de bi sikifi ën?

  • Un gaan soni bi ta pasa di de bi ta sikifi di buku aki?

Te u ko sabi dee soni aki, nöö de o sa heepi u fuu si soni di kandë wa bi sabi jeti.

13 Ezekiëli 14:13, 14 ta taki taa: „Libisëmbë mii, ee dee sëmbë u wan köndë du wan zöndu a mi fesi u di de bia baka da mi, nöö mi o naki de, nöö mi o booko dee kamian ka un ta buta soni u njan. Mi o mbei gaan hangi ko a di köndë, nöö mi o kii dee sëmbë ku dee mbeti u di köndë. ’Ee Noa, Daniëli, ku Jöpu, dee dii womi aki bi dë a di köndë, nöö de wanwan bi o feni tjubi, u di de bi dë limbohati sëmbë’, sö Jehovah di Möön Hei Masa taki.” Ee u go öndösuku ën luku, nöö u ta si taa Ezekiëli bi sikifi di soni aki söwan 612 jaa bifö Keesitu. Di ten dë Noa ku Jöpu bi dëdë sömëni höndö jaa kaa, ma tökuseei Jehovah an bi fëëkëtë di fasi fa de bi lei taa de abi biibi. Daniëli bi dë a libi jeti. U sa taki taa a bi abi söwan 20 jaa di Jehovah bi piki ën taa a bi libi a wan leti fasi kuma Noa ku Jöpu. Andi u ta lei a di soni aki? U ta lei taa Jehovah ta si dee möiti di dee dinima  fëën ta mbei, te kisi dee njönkuwan seei, nöö a ta tei ën u bigi.​—Psalöm 148:12-14.

FENI WINI U DEE PEIPEI BUKU FUU

14. Unfa dee buku di de ta sikifi da dee njönkuwan ta heepi de, nöö unfa woto sëmbë sa feni wini u de tu? (Luku di peentje a bigi u di woto.)

14 Buku da njönkuwan. U lei taa u sa feni wini a hii dee pisi u Bëibel. Sö nöö u sa feni wini a hii dee buku fuu tu. Boo go luku wantu soni di ta lei taa a dë sö tuutuu. A dee jaa dee pasa Jehovah mbei de sikifi sömëni soni u heepi njönkuwan. [1] (Luku di pisi a kaba u di woto.) Dee soni aki ta heepi dee njönkuwan ku dee tesi dee ta miti de a siköö, söseei a ta heepi de ku dee bookohedi di de ta abi u di de ta ko möön bigi. Ma unfa hiniwan fuu sa feni wini te u ta lesi dee buku ku dee soni di de ta sikifi da dee njönkuwan? Te u ta lesi dee soni aki, nöö u ta ko sabi dee fuka dee njönkuwan abi, nöö u sa ta heepi de möön bunu, söseei u sa ta da de degihati tu.

15. Faandi mbei Keesitu sëmbë di dë gaangaan sëmbë kaa, musu kë sabi dee soni di de ta sikifi da dee njönkuwan?

15 Keesitu sëmbë dë gaangaan sëmbë an musu si kuma njönkuwan nöö de ta sikifi dee soni dë da. Gaansë u dee bookohedi u dee njönkuwan di de ta sikifi a dee buku fuu, nama ku hii Keesitu sëmbë. Te u luku ën bunu, nöö hii u tuu musu ta hopo taki da di biibi fuu, söseei hii u tuu musu ta duwengi dee fii fuu. Boiti di dë, hii u tuu musu mbei möiti u dee pei fuu an duwengi u fuu du soni di an bunu, nöö u musu ta luku bunu ku taku mati, söseei ku piizii di an bunu. Fëën mbei hii fa dee buku aki sikifi da njönku sëmbë, tökuseei u sabi taa dee soni aki kumutu a Bëibel, nöö hii Keesitu sëmbë sa feni wini u de.

16. Andi da wan woto soni di dee buku fuu ta heepi dee njönkuwan u de du?

16 Dee buku fuu di de sikifi da dee njönku sëmbë sa heepi de u de ko taanga a di biibi, söseei u de sa ko dë mati u Jehovah. (Lesi Peleikima 12:1, 13.) Nöö gaangaan sëmbë sa feni wini u de tu. Di Ontwaakt! u piki-deewei-liba u di jaa 2009 abi wan pisi de ta kai „Jonge mensen vragen . . . Hoe maak ik Bijbellezen leuker?” Di woto aki abi sömëni bumbuu lai, nöö a abi wan pisi di i sa koti tei fii ta lei iseei soni u Bëibel. Gaangaan sëmbë bi feni wini fëën u? Wë, wan mujëë di bi abi miii bi taki taa hii juu a bi ta taanga dëën u lesi di Bëibel. Ma  a bi wooko ku dee lai dee sikifi a di woto aki, nöö nöunöu a ta kë ta lesi di Bëibel seei. A bi taki taa a ta wai seei fa a ko si unfa dee buku u Bëibel nama ku deseei tjika. A bi taki tu taa: „Nöiti di Bëibel bi suti da mi u lesi sö wan daka.”

17, 18. Unfa u sa feni wini te u ta lesi dee buku fuu dee u ta paati da sëmbë a di peleikiwooko?

17 Dee buku dee u ta paati da sëmbë a di peleikiwooko. Sensi di jaa 2008, u ta wooko ku Di Hei Wakitimawosu di u ta lei soni a komakandi. De sikifi di buku aki möön gaanfa da Jehovah Kotoigi, ma u abi woto buku tu di de sikifi da sëmbë di u ta peleiki da. Unfa u sa feni wini u dee buku aki tu? Boo luku wan woto. Te i kai wan sëmbë ko a di Könuköndë zali, nöö i ta wai seei te i si taa a ko. Te di baaa ta hoi di taki, nöö i ta pakisei di sëmbë di i kai. Kandë i ta pakisei unfa di sëmbë ta si dee soni di di baaa ta taki, söseei i sa ta pakisei unfa dee soni aki sa tooka di libi fëën. Te u kaba fëën, di taki di di baaa ta hoi ta dou i hati, nöö i ta möön dë ku tangi a hati.

18 Di wan seei soni sa ta pasa ku u te u ta lesi dee buku fuu dee u ta paati da sëmbë a peleikiwooko. De sikifi Di Hei Wakitimawosu di u ta paati da sëmbë a di peleikiwooko ku dee soni dee sikifi a di website fuu jw.org a sö wan fasi taa de an taanga da sëmbë u fusutan. Te u ta lesi dee soni aki, nöö u ta möön fusutan di Bëibel, söseei u ta ko möön lobi dee soni dee u bi lei kaa. Boiti di dë, u sa lei njunjun fasi fa u sa konda soni u di biibi fuu da sëmbë a di peleikiwooko. Ma di Ontwaakt! ta mbei u ko biibi möön taanga taa wan Gadu dë di mbei hii soni. A ta heepi u tu fuu hopo taki da di biibi fuu.​—Lesi 1 Petuisi 3:15.

19. Unfa u sa lei Jehovah taa u dë ku tangi a hati u dee soni dee a seti u lei u soni?

19 A dë gbelingbelin u si taa Jehovah ta da u sömëni lai, söseei a ta lei u sömëni soni di sa mbei u feni wini (Mateosi 5:3). Boo ta lesi hii dee soni dee a ta da u nöömö, söseei boo ta du dee soni dee a ta lei u a dee buku fuu. Te u ta du sö, nöö woo feni wini u de, söseei woo lei Jehovah taa u dë ku tangi a hati u hii dee soni dee a seti u lei soni.​—Jesaaja 48:17.

^ [1] (palaklafu 14) U sa feni dee soni aki a di buku Wat jonge mensen vragen​praktische antwoorden, Pisi 1 ku Pisi 2, ku dee pisi „Jonge mensen vragen” di dë a di website fuu.