Skip to content

Skip to table of contents

 DI LIBI FUU KUMA KEESITU SËMBË

Libi a di fasi fa Jehovah kë fuu libi

Libi a di fasi fa Jehovah kë fuu libi

Jehovah da u wëti di ta lei u unfa a kë taa u musu libi. Te u luku fa a seti di tööu libi, nöö wan womi musu abi wan mujëë nöö, nöö de musu libi u nöömö (Mt 19:4-6, 9). A ta buuse hii fasi u libi di nama ku fanafiti libi a di së u manu ku mujëë (1Ko 6:9, 10). A da dee sëmbë fëën wëti di ta heepi de u de an ta bisi nasö ta modo kuma dee sëmbë u di goonliba aki.​—Det 22:5; 1Ti 2:9, 10.

A di ten aki, sömëni sëmbë an kë hoi deseei a dee wëti u Jehovah (Lo 1: 18-32). De ta bisi koosu, ta modo, ta tja deseei kumafa gaansë sëmbë u di goonliba aki ta du ën. Sömëni sëmbë ta piizii ku di fasi u libi aki, nöö de ta kuutu dee woto sëmbë dee an ta libi kuma de.​—1Pe 4:3, 4.

U kuma kotoigi u Jehovah, musu abi degihati u hoi useei a dee wëti fëën (Lo 12:9). Unfa u musu du ën? A wan köni fasi woo ta mbei sëmbë ko sabi andi Jehovah ta feni bunu. Ma useei musu ta libi ku dee weti u Jehovah. Boo taa te woo bisi koosu nasö te woo modo, nöö u musu hakisi useei taa: ’Di fasi fa mi bisi ku di fasi fa mi modo ta lei taa mi ta libi kumafa Jehovah kë u, naa kumafa di goonliba kë? Di fasi fa mi bisi ku di fasi fa mi modo ta lei taa mi ta lesipeki Gadu ö?’ Nasö te woo luku wan soni a teefei, nöö u musu hakisi useei taa: ’Jehovah o lobi di soni di mi kë luku aki ö? Di soni di mi kë luku aki o heepi mi u du soni kumafa fa Jehovah kë u, naa kumafa di goonliba kë? Di soni di mi kë luku aki o heepi mi u mi hoi miseei a dee wëti u Jehovah u? (Ps 101:3) A sa mbei dee sëmbë u mi wosudendu nasö woto sëmbë naki futu ö?’​—1Ko 10:31-33.

Faandi mbei a bunu taa u ta hoi useei a dee wëti u Jehovah? Abiti möön Jesosi Keesitu o kii hii dee hogi sëmbë puu a goonliba (Eze 9:4-7). Dee sëmbë dee ta libi kumafa Gadu kë nöö o fika a libi (1Jo 2:15-17). Boo hoi useei a dee weti u Jehovah dee ta lei u unfa u musu libi, sö taa woto sëmbë sa si, nöö de gafa di Gadu fuu.​—1Pe 2:11, 12.

Di fasi fa mi ta modo ku di fasi fa mi ta bisi ta lei taa mi ta lesipeki dee wëti u Jehovah u?

PËË DI FËLÖN KO TOON JEHOVAH MATI​—WAN WOMI KU WAN MUJËË, NÖÖ BAKA DI DË, UN PIKI DEE HAKISI AKI:

  • Faandi mbei a dë wan köni soni u libi kumafa Jehovah kë?

  • Faandi mbei mama ku tata musu bigi lei dee mii u de njönkunjönku kaa unfa Jehovah kë taa de musu libi?

  • Unfa njönkuwan ku gaanwan tuu sa heepi woto sëmbë u feni wini u di bunuhati di Gadu abi?