Skip to content

Skip to table of contents

 DI LIBI FUU KUMA KEESITU SËMBË

Wooko makandi u peleiki a kamian ka de ta fan peipei töngö

Wooko makandi u peleiki a kamian ka de ta fan peipei töngö

Sëmbë lo’ u haika di bosikopu u di Könuköndë te de ta jei ën a de mamabëë töngö. Kandë fëën mbei Jehovah bi mbei „wanlö hia Dju sëmbë fu dee peipei köndë, jei di bunu buka a ’dee töngö u de’ a di Pensiti Daka u 33 Bi.K., hii fa kandë de bi ta fan wan woto töngö kuma di Hebelejëntöngö nasö Giikitöngö (Tja 2:5, 8). A dee kamian ka sëmbë ta fan peipei töngö a di ten aki, i abi kemeente di ta hoi komakandi a dee peipei töngö dë, nöö de ta peleiki a di wan seei pisiwata. Unfa dee peleikima u dee peipei kemeente dë sa wooko makandi u de sa peleiki da hii dee sëmbë a dee pisiwata dë, söndö u de nango hia pasi a dee sëmbë, sö taa de bigi fuufei da de?

  • Taki unfa woon du ën (Nön 15:22): Dee diniwooko gaanwomi u dee kemeente o ko makandi, nöö de o taki unfa de o seti soni, sö taa hii dee kemeente sa peleiki a di pisiwata dë. Dee kemeente dee ta peleiki a wan woto töngö o kë fii disa dee wosu ka de ta fan di töngö u di kemeente u de. Ma ee de an sa peleiki da hii dee sëmbë dë, u di a dë wan gaan pisiwata, nöö a kan taa de da pasi fuun peleiki da dee sëmbë dë, nöö bakaten u piki de taa un feni wan sëmbë di kë sabi möön soni (od-SR bld. 93 pal. 37). Nasö kandë de sa hakisi di kemeente fii u heepi de suku dee sëmbë dee ta fan di töngö u di kemeente u de, sö taa de sa nango ta peleiki da dee sëmbë dë (km-SR 7/12 di pisi a bld. 5). Hoi a pakisei taa a so wosudendu de ta fan möön leki wan töngö. De musu seti soni sö taa de sa hoi dee wëti u di köndë di ta taki unfa u musu wooko ku dee fanöudu soni u wan sëmbë. Soni kuma di në u di sëmbë, di tëlëfön nöbu fëën, ku di kamian ka a ta libi.

  • Wooko makandi (Ef 4:16): Du hii dee soni di di diniwooko gaanwomi piki i. I ta lei wan sëmbë soni u Bëibel di an ta fan di töngö u di kemeente fii ö? Di sëmbë o möön go a fesi a di biibi, ee i mbei a go a wan kemeente nasö wan kulupu di dë a zuntu, di ta fan di töngö fëën.

  • Seeka iseei (Nön 15:28; 16:1): Ee i miti wan sëmbë di ta fan wan woto töngö, nöö mbei möiti u peleiki dëën. Ee i sabi dee töngö di dee sëmbë ta fan a di pisiwata ka i ta peleiki, nöö i sa seeka iseei a fesi u peleiki da de, söseei i sa download Bëibel ku fëlön a di töngö u de buta a di tëlëfön fii. I sa wooko ku di JW Language app tu u lei fa i sa da sëmbë odi a woto töngö.