Skip to content

Skip to secondary menu

Jehovah Kotoigi

Saamakatöngö

I bi kë sabi di tuutuu lei u Gadu ö?

I bi kë sabi di tuutuu lei u Gadu ö?

DI TUUTUU lei faandi? Di tuutuu lei u dee möön muliki soni di libisëmbë ta kë ko sabi a di libi. Kande i bi pakisei u dee soni aki kaa:

  • Tuutuu, Gadu ta booko hën hedi kuu ö?

  • Feti ku sitaafu libi, an o kaba möön sö nö?

  • Andi ta pasa ku wan sëmbë te a dëdë?

  • Dee dëdë sëmbë, sa toona ko a libi baka nö?

  • Un fa mi sa begi te nöö Gadu jei dee begi u mi?

  • Andi mi musu du u abi kölöku a di libi?

Unfa i sa ko sabi dee soni aki? Wanlö buku dë ka sëmbë ta djula taa de sa heepi i u ko sabi dee soni aki. Ma so toon, dee buku ta taki u di wan seei soni, ma töku de an ta kai a wan. So u dee buku taa taki soni di ta gei taa a dë tuu. Ma baka wan pisiten nöö an ta dë sö möön. De ta tooka sikifi ën wan woto fasi nasö de ta puu ën buta woto sondi.

Ma wan kodo buku nöö dë di ta konda soni di i sa futööu. A dë wan buku di ta taki soni di dë tuutuu, an ta lëgëdë. Jesosi Kelestosi bi taki a wan begi da hën tata taa: „Di wöutu fii, hën da tuu” (Johanisi 17:17). A di ten aki, u sabi di wöutu dë kuma di Santa Beibel. A dee woto pisi di ta ko, nöö i sa si dee tuutuu ku gbelengbelen piki u dee soni dee sikifi a liba aki.

 Tuutuu, Gadu ta booko hën hedi kuu ö?

FAANDI MBEI SËMBË KË KO SABI DI SONI AKI: U ta libi a wan goonliba ka libisëmbë ta du gaan hogi hati soni ku woto wan. Son keiki ta lei sëmbë taa Gadu hën kë taa libisëmbë musu kisi sitaafu a sö wan fasi.

ANDI DI BËIBEL TA LEI: Kwetikweti, Gadu an ta mbei hogi hati soni pasa ku sëmbë. A di Beibel buku Jopu 34:10 u ta lesi taa: „Di tuu Gadu an ta du hogi hati soni kwetikweti. Sö seei di sëmbë di abi hii makiti an ta du soni a wan fasi di na fiti.” Gadu abi tumusi bunu soni a pakisei da libi sëmbë. Fëën mbei Masa Jesosi bi lei u begi sö taa: „U tata di dë a hemel kondë, u ta begi taa di tii fii musu ko. Bee di fii kë pasa a goonliba aki leti kuma fa a ta pasa a hemelkondë ala” (Mateosi 6:9, 10). Fu di Gadu ta booko hën hedi kuu sö gaanfa, mbei a du wanlö gaan soni sö taa dee soni di a abi a pakisei sa pasa tuutuu.​—Johanisi 3:16.

Luku sö seei a Kenesesi 1:26-28; Jakobosi 1:13; ku 1 Petuisi 5:6, 7.

Feti ku sitaafu libi, an o kaba möön sö nö?

FAANDI MBEI SËMBË KË KO SABI DI SONI AKI: Di feti di sëmbë ta feti ku de seei, ta mbei gaan hia sëmbë ta lasi libi. Hii u tuu ta tjai di sitaafulibi dë.

ANDI DI BEIBEL TA LEI: Gadu bi taki a fesi u wan ten ka a o mbei hii soni ko bunu a hii di goonliba. Te Gadu bigin tii di goonliba, nöö libisëmbë an o lei feti möön kwetikweti. Ka u de lei feti, nöö de sa mbei dee feti soni u de toon soni u wooko goon. Gadu sa tja wan kaba ko a hii hogi di sëmbë ta du ku sitaafu libi. Di Beibel ta paamusi taa: „Gadu o feki hii wojo wata puu a de wojo, dëdë an o dë möön, na kusumi, na këë nasö pen o dë möön. Dee fositen soni dë pasa go kaa.”​—Akoalimbo 21:3, 4.

Luku sö seei a Psalm 37:10, 11; 46:9; ku Mika 4:1-4.

Andi ta pasa ku wan sëmbë te a dëdë?

FAANDI MBEI SËMBË KË KO SABI DI SONI AKI: Di möön gaansë u dee keiki ta lei taa wan soni dë a libisëmbë dendu di an ta dëdë, ma di ta libi go dou te wan sëmbë dëdë kaa. So sëmbë ta biibi taa dee dëdë sëmbë sa mbei u ta siki nasö dëdë seei. Nöö jaa woto sëmbë di ta biibi taa Gadu ta sitaafu dee hogi-hati sëmbë a wan kamian de ta kai hel. Naandë de ta tjuma fu teego.

ANDI DI BEIBEL TA LEI: Te wan sëmbë dëdë, nöö sö wan sëmbë an dë möön. „Dee dëdë sëmbë an sabi na wan hojo soni möön”, so di Beibel buku Peleikima 9:5 ta taki. Fu di dee dëdë sëmbë an sabi na wan hojo soni möön, fëën mbei de an sa mbei i ko siki nasö kii i tu. Sö seei de an sa heepi i tu.​—Psalm 146:3, 4.

Luku sö seei a Kenesesi 3:19 ku Peleikima 9:6, 10.

 Dee dëdë sëmbë, sa toona ko a libi baka nö?

FAANDI MBEI SËMBË KË KO SABI DI SONI AKI: Hii u tuu kë libi. Sö seei u kë dë ku piizii a di libi ku dee sëmbë di u lobi. Fëën mbei an dë wan foondo soni taa u ta hangi u si dee sëmbë baka di u bi lobi di de bi dë a libi jeti.

ANDI DI BEIBEL TA LEI: Gaansë u dee sëmbë di dëdë, o ko a libi baka. Masa Jesosi pamusi taa „dee sëmbë dee dë a dee geebi ka Masa Gadu ta pakisei de, o libi baka” (Johanisi 5:28, 29). Kuma fa Gadu bi pakisei a fesi kaa taa di goonliba bi musu dë wan paladeisi, nöö dee sëmbë dee o ko a libi baka, o libi dë tu (Lukasi 23:43). Hën da dee sëmbë dee ta tan haika andi Gadu ta taki an o siki möön. De o libi fu teego. Beibel ta taki taa: „Dee leti hati sëmbë wanwan tö o tan libi a di goonliba aki, nöö de sa tan libi u teego nëën dendu.”​—Psalm 37:29.

Luku sö seei a Jopu 14:14, 15; Lukasi 7:11-17; ku Tjabukaman 24:15.

Un fa mi sa begi te nöö Gadu jei dee begi u mi?

FAANDI MBEI SËMBË KË KO SABI DI SONI AKI: Hii ka sëmbë dë kaa, de ta begi. Ma gaansë u dee sëmbë aki ta feni taa Gadu an ta jei dee begi u de.

ANDI DI BEIBEL TA LEI: Masa Jesosi bi lei taa te wan sëmbë ta begi, an musu ta taki di wan seei soni nöömö. A taki taa: „Te wan sembe ta begi, an musu ta taki di wan seei soni hii juu” (Mateosi 6:7). Ee u kë ta Gadu ta haika dee begi fuu, nöö u musu begi a di fasi di hën feni bunu. Ee u kë begi sö, nöö u musu ko lei sabi andi Gadu kë. Nöö kuma fa a kë, nöö sö u musu begi hën. „Hii soni di u ta hakisi hen, di ta kaii ku hën nöö a ta jei u.” Sö di fosu buku u Johanisi ta taki dau.​—1 Johanisi 5:14.

Luku sö seei a Psalm 65:2; Johanisi 14:6, 14; ku 1 Johanisi 3:22.

Andi mi musu du u sa abi kölöku a di libi?

FAANDI MBEI SËMBË KË KO SABI DI SONI AKI: Wanlö sëmbë dë di ta mëni ta möni, bai-nën, nasö wan hanse sinkii o mbei taa de dë kölöku. Ma te de abi dee soni aki nasö de feni de kaa, nöö töku de ta si taa de an abi di kölöku a di libi jeti.

ANDI DI BEIBEL TA LEI: Masa Jesosi bi lei u andi u musu du fu abi kölöku a di libi, di a bi taki taa: „Kölöku u dee sëmbë dee sabi taa de abi Gadu fanöudu” (Mateosi 5:3). Woo sa feni kölöku, sösö te u ta mbei moiti u tapa di möön gaan fuka di u abi; hën da di taanga fii di u abi u ko sabi Masa Gadu ku dee pakisei fëën di a abi da libisëmbë. Dee soni dë u ta feni a di Beibel dendu. Te u ko sabi dee sondi dë, nöö de sa heepi u fuu ko si andi dë tuutuu fanöudu ku andi an dë fanöudu. Te u sa da di Beibel lei pasi u tii dee sondi dee u kë du, nöö a sa heepi u fuu sa abi wan möön bunu libi.​—Lukasi 11:28.

Luku sö seei a Nöngö 3:5, 6, 13-18 ku 1 Timoteo 6:9, 10.

 Sö u bi luku kölö sö fa Beibel ta piki dee soni a liba aki. I bi kë ko sabi möönsö soni ö? Ee i da wan u dee sëmbë di sabi taa jaabi Gadu fanöudu, nöö tuutuu joo kë ko sabi möönsö soni. Kande i bi pakisei u woto soni kuma: Ee a dë sö tuutuu taa Gadu ta booko hën hedi kuu, nöö faandi mbei a da pasi taa sö mëni hogi ku sitaafu libi dë a di goonliba? Unfa mi sa mbei di fasi fa Mi ku di wosudendu u mi ta libi, ko möön bunu? Di Beibel ta dau gbelengbelen piki a dee soni aki. Sö seei ku sö mëni woto soni jeti, di ta mbei i fii bunu.

Ma töku, jaabi u mëni sëmbë di ta fëëë u lesi di Beibel. De ta si hën kuma wan buku di degi tumusi u lesi ku taa a taanga u fusutan. I bi sa kë wan sëmbë heepi i u feni dee piki a di Beibel ö? Jehovah Kotöigi abi tu soni ku andi de ta wooko u sa heepi i.

Di fosu soni ku andi de ta wooko, da wan buku di de ta kai: Andi di Bëibel ta lei u tuutuu? Di buku aki sikifi u heepi sëmbë di naa ten u öndösuku dee gbelengbelen piki a dee tumusi fanöudu soni di dë. Di u tu soni ku andi de ta wooko, da di heepi di de ta heepi sëmbë u sösö fu ko lei sabi di Beibel möön bunu. U ta kai hën wan Beibel lei di i ta kisi te a i pisi. Söndö fii paka wan möni, wan u dee Jehovah Kotöigi di sabi fa u lei sëmbë di Beibel, di ta libi a di pisi kamian kai seei ta libi, sa ko a i wosu nasö wan woto kamian di möön bunu dai. Nöö hini wan wiki a sa ko a i fuun taki pikisö u dee soni di dë a di Beibel dindu. Milijunmilijun sëmbë a hii di goonliba feni wini u di fasi aki, fu di de lei sabi di Beibel möön bunu. Baka di de ko lei sabi di Beibel a di fasi aki, mbei wanlö bi taki ku hii de hati taa: „U feni di tuutuu leei!”

Kwetikweti, möönsö gaan gudu an dë u feni. Di lei u di Beibel ta mbei u fii u biibi aföködeei, buujafasi, di fëëë ku panta libi di sëmbë ta abi. Di lei u di Beibel ta da u houpu, wan maiki ku piizii a di libi. Masa Jesosi bi taki taa: „Te i ko sabi di tuutuu lei, nöö di tuutuu leei o mbei i ko fiii.”​—Johanisi 8:32.