Skip to content

Skip to table of contents

 Pisi 7

Unfa i sa kiija di mii fii

Unfa i sa kiija di mii fii

„Dee soni mi o piki unu tide aki, musu dë a unu hati. Un musu ta lei dee mii fuunu dee soni aki hii juu, u de an fëëkëtë de.”​—Detolonomi 6:6, 7

Di Jehovah seti di wosudendu libi, hën a da mama ku tata di faantiwöutu u kiija dee mii u de (Kolosën 3:20). Un dee mama ku dee tata, unu abi di faantiwöutu u kiija di mii fuunu faa sa lobi Jehovah, söseei faa sa tjëën hënseei te a ko möön bigi (2 Timoteo 1:5; 3:15). Un musu ko sabi andi dë a di mii fuunu hati. Di fasi fa woon ta tja unuseei o heepi ën gaanfa. Ee un kë lei di mii fuunu soni u di Wöutu u Jehovah, nöö a musu dë a unu hati fosu.​—Psalöm 40:8.

 1 NA MBEI DEE MII FII TA FËËË U FAN KU I

DI BËIBEL TA TAKI TAA: „Wan musu hesi u taki soni tumisi e, ma un musu hesi u jei soni” (Jakobosi 1:19). Be dee mii fii, fii taa de sa ko fan ku i hii juu. Dee mii fii musu si taa i dë kabakaba u haika de te de abi wan soni u konda da i. I musu ta dë waiwai ku de sö taa an o taanga da de u de konda da i unfa de ta fii (Jakobosi 3:18). Ee de si kuma joo hogi da de nasö taa joo kuutu de, nöö a sa pasa taa de o ta fëëë u ta konda soni u de da i. I musu abi pasensi ku de, söseei i musu ta lei de hii juu taa i lobi de.​—Mateosi 3:17; 1 Kolenti 8:1.

SONI DI I SA DU:

  • Tei ten u fan ku dee mii fii te de kë piki i wan soni

  • Fan ku de hii juu. Na te de abi wan fuka ufö i musu ta fan ku de

2 POOBA U KO FUSUTAN ANDI DE KË TAKI DA I TUUTUU

DI BËIBEL TA TAKI TAA: „Di sëmbë di sa si di fundu u wan woto, o feni bunu” (Nöngö 16:20). So juu i musu haika bunu andi dee mii fii kë taki da i, sö taa i sa ko fusutan unfa de ta fii tuutuu. Njönku sëmbë lo’ u mbei soni ko möön bigi möön leki fa a dë nasö de lo’ u taki soni söndö u pakisei. „Te wan sëmbë piki wan woto ufö a jei unfa a dë tuutuu, nöö di soni dë da wan don soni. A o kisi sen” (Nöngö 18:13). Hati fii an musu ta boonu hesihesi.​—Nöngö 19:11.

SONI DI I SA DU:

  • Na koti di mii fii buka, söseei hati fii an musu ta boonu ku ën aluwasi andi a ta taki

  • Pakisei fa iseei bi ta fii di i bi dë möön njönku, söseei pakisei andi i bi lobi

 3 MAMA KU TATA MUSU TA WOOKO MAKANDI

DI BËIBEL TA TAKI TAA: „Baa o, haika te i tata ta lei i soni, nöö na tuwë di wëti fii mama” (Nöngö 1:8). Jehovah da mama ku tata di faantiwöutu u taki a dee mii u de liba. Un musu lei dee mii fuunu u de ta lesipeki unu, söseei u de ta piki unu buka (Efeise 6:1-3). Miii ta si te de mama ku de tata an ta du soni „makandi ku wan pakisei” (1 Kolenti 1:10). Ee wan ta kai a wan u wan soni, nöö wan musu taki ën seeka a dee mii fesi, biga di soni dë sa mbei dee mii lasi lesipeki da unu.

SONI DI I SA DU:

  • Un musu taki makandi un pei sitaafu woon ta da dee mii fuunu

  • Ee i mujëë nasö i manu ta pakisei wan woto fasi fa un sa kiija dee mii, nöö pooba u ko fusutan faandi mbei hën a ta pakisei sö

 4 TAKI ANDI WOON DU

DI BËIBEL TA TAKI TAA: „Lei wan womi mii di pasi ka a musu waka” (Nöngö 22:6). Miii an ta ko bumbuu soni ee ja kiija de bunu. Un seeka a fesi andi woon du u kiija dee mii, söseei un pei sitaafu woon ta da de (Psalöm 127:4; Nöngö 29:17). Te i ta kiija miii, na sitaafu nöö i musu ta sitaafu de nöö a kaba, ma i musu ta lei de faandi mbei i ta buta so wëti da de (Nöngö 28:7). Lei de u de ko lobi di Wöutu u Jehovah tu, söseei u de ko fusutan dee mama wëti u Bëibel (Psalöm 1:2). Di soni aki o heepi de u ko abi wan limbo háti.​—Hebelejën 5:14.

SONI DI I SA DU:

  • Heepi dee mii fii u de si taa Gadu da wan tuutuu sëmbë di de sa futoou

  • Heepi de u de sa si un hogi sa miti de te de ta fan ku sëmbë a Internet, söseei heepi de u de sa si unfa de sa koti pasi da dee lö soni dë. Heepi de u koti pasi da sëmbë di ta suku u duumi ku piki mii

„Lei wan womi mii di pasi ka a musu waka”