„Te un ta mëni dee soni dë nöö un musu ta wai e, hii fa un ta tja sömëni pei sitaafu ku fuka a di mindi aki.”​—1 Petuisi 1:6

Hii fa joo ta mbei möiti u abi wan piizii toou libi ku wan piizii wosudendu libi, tökuseei soni di ja bi mëni sa mbei taa na hii juu joo ta dë waiwai (Peleikima 9:11). Gadu ta heepi u a wan lobihati fasi te fuka ta miti u. Te i ta wooko ku dee mama wëti u Bëibel, nöö i ku di wosudendu fii o sa tja dee fuka dë, aluwasi un gaan fuka ko miti unu seei.

 1 FUTOOU A JEHOVAH

DI BËIBEL TA TAKI TAA: „Tuwë hii dee fuka fii tuu da Gadu e, dee sëmbë, biga a a’ toobi ku i” (1 Petuisi 5:7). Nöiti i musu pakisei taa Gadu hën ta tja dee fuka ko miti i (Jakobosi 1:13). Te i ta ko möön zuntu ku Gadu, nöö a o sa heepi i möön bunu (Jesaaja 41:10). ’Konda hii dee soni dee dë a i hati dëën’​—Psalöm 62:8.

Te i ta lesi di Bëibel hiniwan daka ku te i ta öndösuku dee soni i ta lesi, nöö di soni dë o da i taanga. Di wini fëën di joo feni, hën da joo si taa „fa dee hia sitaafu ta miti u a di goonliba aki, nöö Gadu hën ta heepi u fuu feni kötöhati” (2 Kolenti 1:3, 4; Loomë 15:4). Gadu paamusi i taa a o da i kötöhati, „nöö di kötöhati di a o da i dë o bigi pasa hii sëmbë fusutan”.​—Filipi 4:6, 7, 13.

SONI DI I SA DU:

  • Begi Jehovah faa heepi i u na kusumi poi, söseei fii sa si soni limbolimbo

  • Luku andi ku andi i sa du di sa heepi i ku dee fuka fii, nöö wooko ku di wan di i si taa möön bunu

2 LUKU ANDI I KU I WOSUDENDU ABI FANÖUDU

DI BËIBEL TA TAKI TAA: „Sëmbë di abi fusutan ta ko sabi soni u wan woto möön bunu, nöö köni sëmbë ta kë lei soni” (Nöngö 18:15). Pooba u ko fusutan andi ta pasa a di wosudendu fii. Söseei pooba u ko fusutan andi hiniwan u dee sëmbë fii wosudendu a’ fanöudu. I musu ta fan ku de, söseei i musu ta haika de tu.​—Nöngö 20:5.

Andi i sa du te wan lobiwan fii dëdë? Na fëëë u lei wotowan unfa i ta fii. Hoi a pakisei taa ’wata bi pasa a Masa Jesosi wojo’ tu (Johanisi 11:35; Peleikima 3:4). A dë fanöudu fii ta böö, söseei fii ta duumi bunu (Peleikima 4:6). Di soni aki o mbei taa ja o ta booko i hedi ku dee fuka fii sö möön.

SONI DI I SA DU:

  • I musu abi di guwenti u ta fan ku dee sëmbë fii wosudendu. Nöö te wan fuka miti unu, nöö an o taanga da de u ko fan ku i

  • Fan ku wotowan di bi miti dee seei fuka kuma i tu

 3 SUKU HEEPI A WOTOWAN

DI BËIBEL TA TAKI TAA: „Wan tuutuu mati ta lobi hën mati hii juu, nöö hën da wan baaa di de pai u te fuka de” (Nöngö 17:17). Dee mati fii kë heepi i, ma kandë de an saanfa u du ën. Na fëëë u piki de andi i abi fanöudu tuutuuq (Nöngö 12:25). Söseei suku heepi a sëmbë di taanga a di biibi, u de da i degihati. Dee lai u Bëibel di de o da i, o heepi i.​—Jakobosi 5:14.

Joo feni di taanga di i abi fanöudu te i ta nama hii juu ku sëmbë di ta biibi Gadu tuutuu, söseei ku sëmbë di abi futoou a dee soni di Gadu paamusi. Söseei joo feni kötöhati seei te i ta da wotowan degihati. Konda da wotowan unfa i ta biibi a Jehovah ku dee paamusi fëën tjika. Tan heepi wotowan di abi heepi fanöudu, söseei na hai iseei puu u dee sëmbë dee lobi i söseei dee ta booko de hedi ku i.​—Nöngö 18:1; 1 Kolenti 15:58.

SONI DI I SA DU:

  • Fan ku wan u dee mati fii di i ku ën dë möön zuntu, nöö mbei a heepi i

  • Piki ën gbelingbelin andi i abi fanöudu