„Un musu libi ku ën ku bunuhati, ku saka fasi. Nöö un musu abi sapifasi ta mëni di otowan fii ta hoi pasensi dëën.”​—Kolosën 3:12

Te i toou kaa, hën da i seti wan njunjun wosudendu libi. Hii fa joo ta lobi i mama ku i tata, ta lesipeki de hii juu, tökuseei i mujëë nasö i manu ko dë di möön dii sëmbë da i. Di soni aki sa dë wan gaan taanga soni da dee famii fii u fusutan. Ma dee mama wëti u Bëibel sa heepi i u libi bunu ku dee famii fii, hii fa a di wan seei ten i ta mbei möiti u mbei soni waka bunu a di njunjun wosudendu libi fii.

 1 UNFA I MUSU SI DEE FAMII FII

DI BËIBEL TA TAKI TAA: „Lesipeki i mama ku i tata” (Efeise 6:2). Aluwasi un mëni jaa i abi, tökuseei i musu ta lesipeki i mama ku i tata hii juu. Hoi a pakisei taa di mujëë nasö di manu fii seei musu ta buta mëni nëën mama ku ën tata tu, fu di a dë mii u de jeti. „Ee i lobi wan sëmbë, ja o ta haun ku ën”, nöö fëën mbei ja musu fii booko saka u di fasi fa i mujëë nasö di manu fii ta libi ku ën mama nasö ku ën tata.​—1 Kolenti 13:4; Galasia 5:26.

SONI DI I SA DU:

  • Luku bunu fu ja taki soni kuma: „Hii juu dee famii fii ta taki soni ta tjökö mi” nasö „Dee soni dee mi ta du, an ta bunu da i mama möönsö

  • Pooba u ko si soni kumafa i mujëë nasö i manu ta si soni

 2 TJA DI FAANTIWÖUTU DI I ABI A DI TOOU LIBI FII

DI BËIBEL TA TAKI TAA: „Wan womi o go disa hën mama ku ën tata, nöö a o go nama ku ën mujëë, nöö de o toon wan sinkii” (Kenesesi 2:24). Baka te i toou, nöö i mama ku i tata sa fii kuma de abi taki a i liba jeti, söseei a sa kan taa de kë taki da i unfa i musu du soni a di toou libi fii.

Ma i ku i mujëë nasö i ku i manu musu taki te naasë un kë unu mama ku unu tata musu taki dou a di toou libi fuunu. Ma te woon go taki di soni aki ku de, nöö un musu taki ën a wan lobihati fasi. I sa taki wan soni kumafa a dë söndö fii taki ën goofu (Nöngö 15:1). Sakafasi, saapifasi, ku pasensi o sa heepi i u libi bunu ku dee famii fii, söseei de o heepi i fii ’ta tei dee otowan fii kumafa de dë, fu di i lobi de’.​—Efeise 4:2.

SONI DI I SA DU:

  • Ee i si taa dee famii fii ta taki soni a di toou libi fuunu poi, nöö wakiti te i ku i mujëë nasö i manu dë unu wanwan a wan piii kamian, nöö un taki fëën

  • Ju ku i mujëë nasö ju ku i manu musu taki fiti makandi fuun sabi andi woon du te a nama ku dee famii fuunu