Skip to content

Skip to secondary menu

Skip to table of contents

Jehovah Kotoigi

Saamakatöngö

I sa abi wan piizii wosudendu libi

 Pisi 3

Andi un sa du te un abi bookohedi a di toou libi

Andi un sa du te un abi bookohedi a di toou libi

„Un musu ta lobi unu na unu makandi gaanfa. Biga ee i lobi wan sëmbë, nöö ee a ta du sömëni soni seei dee an ta kai, ma nöö ja o si de biga i lobi ën.”​—1 Petuisi 4:8

Fa i ku i mujëë nasö i ku i manu bigi libi makandi aki, woon ta abi bookohedi a di libi fuunu. Dee bookohedi dë sa ko u di wan ta pakisei a di wan seei fasi, u di wan ta fii di wan seei fasi, söseei u di wan kiija a di wan seei fasi tu. Nasö a sa kan tu taa woto sëmbë sa mbei un kisi toobi, söseei soni di wan bi mëni sa tja dee bookohedi dë ko tu.

A sa ko a unu pakisei fuun du kuma wan ta si dee bookohedi dë seepiseepi, ma di Bëibel ta da u lai u heepi u ku dee bookohedi fuu (Mateosi 5:23, 24). Te un ta fiti dee lai u Bëibel, nöö woon feni di möön bunu heepi di dë u feni.

 1 UN TAKI MAKANDI U DI BOOKOHEDI FUUNU

DI BËIBEL TA TAKI TAA: ’Wan ten dë u fan’ (Peleikima 3:1, 7). Un musu abi ten da unuseei, fuun sa taki u di bookohedi fuunu. Mbei i mujëë nasö i manu ko sabi tuutuu unfa i ta fii, söseei mbei a ko sabi unfa i ta pakisei u di soni di pasa. Hii juu i ku i mujëë nasö i ku i manu musu ta „fan ku unu seei gbelingbelin söndö ganjan” (Efeise 4:25). Hii fa i sa fii wan fasi nasö hati fii sa boonu, tökuseei i musu hoi iseei fu wan buja nasö feti ku unuseei. Te i ta piki a wan saapifasi, nöö wan o mbei wan piki soni di un abi ko toon wan gaan toobi.​—Nöngö 15:4; 26:20.

Hii fa a sa pasa taa wan soni an kai ku i, tökuseei hii juu un musu ta fan a wan suti fasi. Hii juu i musu ta lobi i mujëë nasö i manu, söseei ta lesipeki ën tu (Kolosën 4:6). Ee wan toobi ko a unu mindi, pooba u seekëën wantewante, söseei ja musu dökë ku di wotowan fii.​—Efeise 4:26.

SONI DI I SA DU:

  • Buta wan apaiti ten sö taa un sa ta taki fiti makandi te un dë ku wan bookohedi

  • Na koti di wotowan fii buka te a ta fan, haika piii sö. Te di wotowan fii kaba u fan, nöö joo sa fan awaa

 2 HAIKA DI WOTOWAN FII SÖSEEI FUSUTËËN TU

DI BËIBEL TA TAKI TAA: „Un musu ta fii makandi kuma baaa ku baaa, nöö be i ta hopo di otowan fii möön fa i ta hopo iseei” (Loomë 12:10). A dë fanöudu u haika bunu te di wotowan fii ta fan. Pooba u ko fusutan di fasi fa a ta si soni. Mbei möiti u ’fii ku di wotowan fii’, söseei abi „sakafasi” (1 Petuisi 3:8; Jakobosi 1:19). Na du kuma i ta haika di wotowan fii, hii fa ja ta haikëën tuutuu. Ee i bi abi wan soni fii ta du, nöö a bi o bunu u butëën a wan së sö taa i sa buta hii i pakisei a di soni i mujëë nasö i manu ta taki da i. Nasö i sa hakisi ën ee un sa taki u di soni dë bakaten. Ee i ta si i mujëë nasö i manu kuma wan sëmbë di i ku ën musu wooko makandi, ka fii si ën kuma wan felantima fii, nöö ’hati fii an o ta boonu hesihesi.’​—Peleikima 7:9.

SONI DI I SA DU:

  • Haika bunu te di wotowan fii ta fan ku i, aluwasi dee soni dee a ta taki an ta kai ku i

  • Pooba u ko fusutan andi a kë piki i tuutuu. Luku dee soni dee a ta du ku sinkii, söseei haika fa a ta fan

3 MBEI MÖITI GO DOU

DI BËIBEL TA TAKI TAA: „Hiniwan taanga wooko ta tja bunu ko, ma fan wanwan ta mbei sëmbë ko penama” (Nöngö 14:23). Te un taki wan soni kai a wan, nëën da a kaba jeti. Un musu du dee soni dee un tu sëmbë buta taa woon du tu. Ma un musu mbei taanga möiti u sa du de. Te u du sö kaa, nöö woon feni gaan wini (Nöngö 10:4). Ee un tu sëmbë ta wooko makandi, nöö woon „feni paka” u di taanga wooko fuunu.​—Peleikima 4:9.

SONI DI I SA DU:

  • Un musu taki andi hiniwan fuunu o du di o sa heepi unu ku dee bookohedi fuunu

  • Hiniwan ten un musu ta luku ee soni nango möön bunu a di toou libi fuunu