Skip to content

Skip to table of contents

 WOTO 3

Lakabu bi ta biibi a Jehovah

Lakabu bi ta biibi a Jehovah

Boo taa u dë a di foto de kai Jelikou. Di foto aki dë a di köndë Kaana. Dee sëmbë u di köndë aki an ta biibi a Jehovah. Wan mujëë de kai Lakabu ta libi aki tu.

Di Lakabu bi dë wan njönku mujëë mii, a bi jei fa Mosesi bi paati di Bë Ze a tu, ku fa a bi tja dee Isaëli sëmbë kumutu a Egepiti. Söseei a bi jei fa Jehovah bi heepi de u wini dee feti di de bi feti ku dee felantima u de. Ma a ko jei taa dee Isaëli sëmbë seti kampu zuntu ku Jelikou!

U di Lakabu bi ta biibi a Jehovah, mbei a bi tjubi dee tu Isaëli womi dee bi ko tjubi luku di foto

Wan ndeti, hën tu Isaëli womi go tjubi luku di foto. De go a Lakabu pisi, hën a kai de ko a wosu. A di seei ndeti dë, hën di könu u Jelikou jei taa sö tu Isaëli womi ko luku di foto, söseei taa de go a Lakabu pisi. Hën di könu manda womi u go kisi de. Lakabu bi tjubi dee womi a di wosuliba fëën. A piki dee womi di di könu bi manda taa: ’Dee tu womi dee bi ko luku di foto bi ko aki tuu, ma de go kaa. Ee un go a de baka nöunöu, woon sa kisi de jeti!’ I sa faandi mbei Lakabu bi tjubi dee tu womi ö?— U di a bi ta biibi a Jehovah, söseei a bi sabi taa Jehovah o da dee Isaëli sëmbë di köndë Kaana.

Ufö dee tu womi kumutu a di wosu u Lakabu, de paamusi ën taa de o tjubi ën ku hën famii te de o booko Jelikou kaba a sösö. I saandi dee Isaëli womi piki Lakabu faa musu du ö?— De piki ën taa: ’I ta si di bë tatai aki ö? Tei ën, nöö i hëngi ën a di fënsë buka fii. Te i du sö, nöö hii sëmbë di dë a di wosu fii o fika a libi.’ Lakabu du leti kumafa dee tu Isaëli womi piki ën. I saandi pasa baka di dë u?—

Jehovah bi tjubi Lakabu ku hën famii

Baka wantu daka, hën dee Isaëli sëmbë waka sikisi daka longi lontu di foto, wan pasi wan daka. De an bi ta fan, söseei de an bi ta kai wolo tu. Ma a di u seibi daka, hën de waka seibi pasi lontu di foto. Hën hii de tuu bai kai wolo. Hën wë Jehovah mbei dee peni dee bi ta tjubi di foto booko gbulululu kai. Ma di wosu teka di bë tatai bi hëngi a di fënsë buka, an bi booko kai! I sa si ën a di peentje u?— Lakabu ku dee famii fëën bi fika a libi!

 Andi ju sa lei u Lakabu?— Hii dee foombo soni dee Lakabu bi lei u Jehovah mbei taa a bi ta biibi nëën. Iseei ta lei un mëni foombo soni u Jehovah tu. I ta biibi a Jehovah kumafa Lakabu bi ta biibi nëën u?— U sabi taa i ta du ën!