Skip to content

Skip to secondary menu

Skip to table of contents

Jehovah Kotoigi

Saamakatöngö

Lei dee mii fii soni

 WOTO 5

Hii juu Samuëli bi ta du soni a wan leti fasi

Hii juu Samuëli bi ta du soni a wan leti fasi

Sensi di Samuëli bi dë miii, nöö a bi ta libi a di tenti u Gadu, söseei a bi ta wooko a di kamian dë tu. A di kamian aki sëmbë bi ta ko dini Jehovah. I sabi unfa a du ko taa Samuëli bi go ta libi a di tenti u Gadu ö? Boo taki fosu u wantu soni u di mama u Samuëli de kai Hana.

Hana bi kë miii seei, ma an bi sa pai miii. Fëën mbei a begi Jehovah, hën a hakisi ën faa heepi ën. A paamusi Jehovah taa ee a pai wan womi mii, nöö a o mandëën go libi a di tenti faa sa ta wooko da Gadu. Jehovah haika di begi fëën. Bakaten, hën a ko pai wan womi mii. Hën a kai ën Samuëli. Di Samuëli bi abi dii nasö fö jaa, hën Hana du leti kumafa a bi paamusi Jehovah. A tjëën go a di tenti u Gadu faa wooko naandë.

Di gaan mindima u di ten naandë de bi ta kai Eli. A bi abi tu womi mii di bi ta wooko dë tu. Na fëëkëtë taa di tenti dë bi dë di kamian ka de bi ta dini Gadu, nöö sëmbë bi musu ta du bunu soni naandë. Ma dee womi mii u Eli an bi ta du bunu soni seepiseepi. Samuëli bi ta si dee hogi soni de bi ta du. Samuëli bi ta du dee hogi soni di dee womi mii u Eli bi ta du ö?— Wë Nönö. Hii juu a bi ta du soni a wan leti fasi, leti kumafa hën mama ku hën tata bi lei ën.

Andi i si kuma Eli bi musu du ku dee tu womi mii fëën?— A bi musu sitaafu de. An bi musu mbei de wooko a di wosu u Gadu möön. Ma Eli an bi du di soni dë, nöö fëën mbei Jehovah hati boonu ku ën ku dee tu womi mii fëën. Jehovah bi buta taa a o sitaafu de.

Samuëli ta konda di bosikopu u Jehovah da Eli

A wan ndeti di Samuëli bi ta duumi, hën a jei wan sëmbë kai ën: ’Samuëli!’ Hën a kule go a Eli, ma Eli taa: ’Ma kai i.’ Di soni aki pasa tu pasi möön. Di u dii pasi, hën Eli piki Samuëli taa ee a jei di töngö möön, nöö a musu piki taa: ’Gaantangi, Jehovah, i sa fan. Mi ta haika i.’ Samuëli du kumafa Eli piki ën. Hën Jehovah  piki Samuëli taa: ’Piki Eli taa mi o sitaafu ën ku hën wosudendu u dee hogi soni di de ta du.’ I si kuma di bosikopu aki bi taanga da Samuëli faa go konda da Eli ö?— Aai, a bi taanga dëën seei. Ma hii fa Samuëli bi ta fëëë, tökuseei a du di soni di Jehovah bi piki ën faa du. Di soni di Jehovah bi taki pasa sö tuutuu. De kii dee tu womi mii u Eli, hën Eli seei ko dëdë tu.

Samuëli da wan bunu sëmbë di u sa djeesi. Hii fa a bi ta si woto sëmbë ta du hogi soni, tökuseei a bi ta du soni a wan leti fasi go dou. Ju wë? Joo ta du soni a wan leti fasi hii juu, leti kumafa Samuëli bi ta du ö? Ee i du sö, nöö Jehovah o wai ku i, söseei i mama ku i tata o wai ku i tu.

LESI A DI BËIBEL FII