Skip to content

Skip to secondary menu

Skip to table of contents

Jehovah Kotoigi

Saamakatöngö

Lei dee mii fii soni

 WOTO 11

De bi sikifi soni u Jesosi

De bi sikifi soni u Jesosi

I ta si dee womi a di peentje aki ö?— Aki i ta si Mateosi, Maikusi, Lukasi, Johanisi, Petuisi, Jakobosi, Judasi ku Paulosu. Dee womi aki ku Jesosi bi ta libi a di wan seei ten, nöö de bi sikifi soni u Jesosi. Boo go luku andi u sa lei u dee womi aki.

Andi i sabi u dee womi aki?

Dii u dee womi aki bi dë apösutu di bi ta peleiki makandi ku Jesosi. I sabi ambë ku ambë u?— Mateosi, Johanisi, ku Petuisi. Apösutu Mateosi ku Johanisi bi sabi Jesosi bumbuu, nöö hiniwan de sikifi wan Bëibel buku  di ta taki soni u di libi u Jesosi. Apösutu Johanisi bi sikifi di Bëibel buku di u ta kai Akoalimbo, söseei a bi sikifi dii biifi di dë wan pisi u Bëibel tu. Dee biifi dë da Wan Johanisi, Tu Johanisi ku Dii Johanisi. Apösutu Petuisi seei bi sikifi tu biifi di dë wan pisi u Bëibel tu. De ta kai de Wan Petuisi ku Tu Petuisi. A di u tu biifi u Petuisi, a bi sikifi soni u di ten di Jehovah bi taki wan soni di nama ku Jesosi di a bi dë a goonliba aki. A bi taki taa: ’Hën wë da di lobi womi mii u mi. Libi fëën ta kai ku mi.’

Dee woto womi a di peentje ta lei u soni u Jesosi a dee buku di de sikifi tu. Wan u de da Maikusi. Kandë a bi sai dë di de kisi Jesosi, nöö a bi si hii soni di pasa. Wan wotowan da Lukasi. A bi dë wan data, nöö kandë a toon wan biibima baka di Jesosi dëdë.

Tu u dee woto womi di i ta si a di peentje da dee piki baaa u Jesosi, deseei bi sikifi tu pisi u Bëibel tu. I sabi de në u?— Wan u de, de ta kai Jakobosi ku di wotowan de ta kai Judasi. Bigibigi de an bi ta biibi a Jesosi. De bi mëni taa hedi fëën an bi ta wooko bunu. Ma bakaten ufö de ko ta biibi a Jesosi, hën de ko toon biibima.

Di lasiti Bëibel sikifima di i ta si a di peentje di wa taki fëën jeti, da Paulosu. Ufö a toon wan biibima, de bi ta kai ën Saulosu. A bi ta buuse dee Keesitu sëmbë, nöö a bi ta du hogihati soni ku de. I sabi faandi mbei Paulosu bi kë ko dë wan Keesitu sëmbë u?— Wë wan daka, Paulosu bi dë a pasi nango a Damasikusi, hën a jei wan töngö di kumutu a liba ala. Jesosi wë bi ta fan ku ën! Hën a hakisi Paulosu taa: ’Faandi mbei i ta du hogihati soni ku dee sëmbë dee ta biibi a mi?’ Baka di dë Paulosu ko tooka, hën a toon wan biibima. A sikifi 14 pisi u Bëibel. Hën da dee buku kumutu a Loomë te go dou Hebelejën.

Hiniwan daka u ta lesi Bëibel, na sö nö?— Te u lesi di Bëibel, nöö u ta lei sömëni soni u Jesosi. I bi o kë ko sabi möön hia soni u Jesosi ö?—

LESI A DI BËIBEL FII

  • 2 Petuisi 1:16-18

  • Maikusi 3:21; 14:51

  • Judasi 1

  • Tjabukama 9:1-18