Skip to content

Skip to table of contents

 PISI 5

Di Gaan Wata​—Ambë bi haika? Ambë an bi haika?

Di Gaan Wata​—Ambë bi haika? Ambë an bi haika?

Gaansë u dee sëmbë u di ten u Noa bi ta du hogi. Kenesesi 6:5

Adam ku Eva bi pai miii, nöö sëmbë bi ko hia a goonliba. Bakaten, so u dee engel bi tei di së u Saatan di a hopo fia ku Gadu.

De bi ko a goonliba, hën de bia tei libisëmbë sinkii u de bi sa toou ku mujëë. Dee mujëë bi pai womi mii di bi ko dë gaan sinkii womi di bi hogi seei, nöö de bi taanga tu.

Goonliba bi ko fuu ku sëmbë di bi ta du hogi. Di Bëibel taa: „Di hogilibi u libisëmbë bi ko fuu goonliba, nöö hii juu hogi nöö a bi ta pakisei nëën hati.”

 Noa bi haika Gadu, hën a mbei wan ark. Kenesesi 6:13, 14, 18, 19, 22

Noa bi dë wan bunu womi. Jehovah bi piki Noa taa a bi o tja wan gaan wata ko kii dee hogi sëmbë puu.

Söseei Gadu bi taki da Noa taa a bi musu mbei wan gaan gindi boto, di de ta kai wan ark, nöö naandë a bi musu tja di wosudendu fëën ku hii pei mbeti go.

Noa bi ta bai dee sëmbë taa di Gaan Wata bi o ko, ma de an bi ta haikëën. So sëmbë bi ta lafu Noa, wotowan bi ta buuse ën.

Di de kaba mbei di ark, hën Noa tja dee mbeti go nëën dendu.