Skip to content

Skip to secondary menu

Skip to table of contents

Jehovah Kotoigi

Saamakatöngö

Gadu abi bunu buka da u!

 WOTO 9

Unfa i sa abi wan piizii wosudendu libi?

Unfa i sa abi wan piizii wosudendu libi?

1. Faandi mbei wan womi ku wan mujëë musu toou ee de kë abi wan piizii wosudendu libi?

A Jehovah, di piizii Gadu, di bunu buka kumutu ko, nöö a kë taa hii famii dë waiwai (1 Timoteo 1:11). Hën seti di toou libi. A dë taanga fanöudu taa womi ku mujëë toou kumafa lanti wëti ta taki ee de kë abi wan piizii wosudendu libi. A sö wan fasi de o sa kiija dee mii de o pai a wan bunu fasi. Keesitu sëmbë musu lesipeki dee wëti u di köndë di ta taki taa de musu buta de në a lanti buku taa de toou.​—Lesi Lukasi 2:1, 4, 5.

Unfa Gadu ta si di toou libi? A kë taa wan womi ku wan mujëë musu toou, nöö de musu libi makandi u nöömö. Jehovah an kë taa manu ku mujëë du soni di sa mbei de an futoou de seei möön (Hebelejën 13:4). A buuse te sëmbë ta booko toou (Maleaki 2:16). Ma a ta da Keesitu sëmbë pasi u booko toou te di womi tei woto mujëë nasö te di mujëë tei woto womi. Di soni dë nöö sa mbei di womi nasö di mujëë toou ku wan woto sëmbë baka.​—Lesi Mateosi 19:3-6, 9.

2. Unfa wan womi ku ën mujëë musu libi ku deseei?

Jehovah mbei womi ku mujëë u de heepi deseei a di toou libi (Kenesesi 2:18). U di di womi da di hedima u di wosudendu, mbei a musu tei fesi u sölugu dee sëmbë fëën a soni di de abi fanöudu u tan a libi, söseei u lei de soni u Gadu tu. A musu sa dë kabakaba u lei taa a lobi ën mujëë. Manu ku mujëë musu lobi deseei ta lesipeki deseei tu. U di manu ku mujëë da zöndu sëmbë, mbei de musu lei u da deseei paadon. Di soni dë hën o heepi de u abi wan piizii toou libi.​—Lesi Efeise 4:31, 32; 5:22-25, 33; 1 Petuisi 3:7.

 3. I musu go disa i manu nasö i mujëë te di toou libi an nango bunu ö?

Te fuka ta miti i a di toou libi fii, nöö kuma manu ku mujëë, nöö un musu mbei möiti u lei taa un lobi unuseei tuutuu (1 Kolenti 13:4, 5). Di Wöutu u Gadu an ta da sëmbë di toou di taanga u paati te de ta miti fuka di sëmbë guwenti miti a di toou libi.​—Lesi 1 Kolenti 7:10-13.

4. Un dee mii, andi Gadu kë da unu?

Jehovah kë fuun dë waiwai. A ta da unu dee möön bunu lai fuun sa pasa dee njönku jaa fuunu waiwai. A kë fuun feni wini u di köni ku di sabi di dee mama ku dee tata fuunu sabi soni u di libi (Kolosën 3:20). Jehovah kë söseei taa un ta piizii u du soni dëën kuma di Gadu di mbei unu, söseei da di Womi Mii fëën.​—Lesi Pleikima 11:9–12:1; Mateosi 19:13-15; 21:15, 16.

5. Un dee mama ku dee tata, andi dee mii fuunu abi fanöudu u de sa piizii u di libi?

Un musu wooko taanga u sölugu dee mii fuunu. Un musu ta da de njanjan, kamian u tan, ku koosu u bisi (1 Timoteo 5:8). Ma ee un kë u dee mii fuunu dë waiwai, nöö un musu lei de u de lobi Gadu, söseei u de tei di lei fëën (Efeise 6:4). Te dee mii si taa un lobi Gadu, nöö di dë sa abi bunu kaakiti a de liba. Te un ta da de lai di kumutu a di Wöutu u Gadu, nöö di dë o heepi de u de ta pakisei bunu u soni.​—Lesi Detolonomi 6:4-7; Nöngö 22:6.

Miii ta fii bunu te un ta gafa de ku te u ta da de degihati. Söseei de abi kiija ku sitaafu fanöudu. Dee soni aki o heepi de u de an du soni di sa mbei de an ta piizii möön (Nöngö 22:15). Ma wan musu sitaafu de a wan hogihati fasi.​—Kolosën 3:21.

Jehovah Kotoigi tja sömëni buku ko a döö di sikifi apaiti da mama ku tata ku dee mii u de u heepi de. Dee soni di de sikifi a dee buku dë kumutu a di Bëibel.​—Lesi Psalöm 19:7, 11.