Skip to content

Skip to secondary menu

Skip to table of contents

Jehovah Kotoigi

Saamakatöngö

Gadu abi bunu buka da u!

 WOTO 1

Andi da di bunu buka?

Andi da di bunu buka?

1. Andi da di buka di Gadu abi da u?

Gadu kë taa libisëmbë piizii u di libi a goonliba. U di a lobi libisëmbë, mbei a mbei di goonliba ku hii soni di dë nëën. Abiti möön a o hopo du soni sö taa sëmbë u hii köndë sa abi wan bunu libi a di ten di ta ko. A o puu hii dee soni dee ta tja fuka ko da libisëmbë.​—Lesi Jelemia 29:11.

Na wan tii u di goonliba aki puu hogidu, siki nasö dëdë wan daka. Ma wan bunu buka dë. Abiti möön Gadu o mbei di tii fëën puu hii dee tii u goonliba, nöö a o tei de kamian. Dee sëmbë dee o dë a di tii dë basu o dë fiifii, nöö de o dë gösöntu tu.​—Lesi Jesaaja 25:8; 33:24; Daniëli 2:44.

2. Faandi mbei a dë fanöudu taa sëmbë jei di bunu buka?

Te Gadu puu dee hogi sëmbë a goonliba ufö fuka o kaba (Sefania 2:3). Na un ten di soni dë o pasa? Di Wöutu u Gadu bi taki a fesi u dee soni dee ta miti sëmbë nöunöu. Dee hogi soni dee ta pasa nöunöu a goonliba ta lei taa di juu u Gadu zuntu faa du wan soni.​—Lesi 2 Timoteo 3:1-5.

3. Andi u musu du?

U musu lei soni u Gadu a di Wöutu fëën, di Bëibel. A dë kuma wan biifi di wan lobihati tata manda da u. A ta konda da u unfa u sa abi wan möön bunu libi nöunöu kaa ku unfa u sa feni di libi u teego a goonliba a di ten di ta ko. A dë sö tuu taa so sëmbë an o feni ën bunu taa wotowan ta heepi i fii ko fusutan di Bëibel. Ma di okasi di abi u feni wan möön bunu libi a di ten di ta ko, bunu poi fii disëën pasa a i maun.​—Lesi Nöngö 29:25; Akoalimbo 14:6, 7.