Skip to content

Skip to table of contents

Dee taku jeje ta ganjan sëmbë taa dee dëdë sëmbë dë a libi

Dee taku jeje ta ganjan sëmbë taa dee dëdë sëmbë dë a libi

Bëibel ta taki taa Saatan „ta ganjan sëmbë a hii di goonliba” (Akoalimbo 12:9). Saatan ku dee taku jeje fëën an kë taa u biibi Gadu Wöutu, Bëibel. De ta pooba u mbei sëmbë biibi taa dee dëdë sëmbë ta libi go dou a wan woto kamian. Boo go luku unfa de ta du di soni dë.

Poipoi biibi

Libisëmbë, mbeti, fisi ku fou tuu abi di wan seei kaba, de ta dëdë

Sömëni biibi ta lei taa hiniwan sëmbë abi wan akaa di ta libi go dou te di sëmbë dëdë. De ta lei taa di sëmbë ta dëdë, ma di akaa an ta dëdë. Boiti di dë de ta taki gbelin taa di akaa an sa dëdë möönsö.

Ma na di soni dë di Wöutu u Gadu ta lei. Luku andi Bëibel ta taki u di fa Gadu bi mbei Adam: „Jehovah Gadu tei goondoti hën a mbei wan womi. Baka di dë a böö libi go nëën nusu baaku, hën di womi kisi libi” (Kenesesi 2:7). Di tëkisi aki an ta lei taa Gadu bi da Adam wan akaa di bi o libi go dou baka te Adam dëdë.

Mbeti an abi wan jeje di ta libi go dou te de dëdë. Di Gadu bi mbei mbeti, a bi da de libi.​—Kenesesi 1:20, 21, 24, 30.

Di Bëibel ta taki taa te wan sëmbë dëdë, na wan soni fëën ta  libi go dou. Fëën mbei an sa du bunu nasö hogi ku woto sëmbë. Luku wan tu Bëibel tëkisi:

„Na fëëë te i si taa wan sëmbë ta ko gudu, nasö te di wosu fëën ta ko möön hanse. Biga te a dëdë an sa tja na wan soni go ku ën. An o sa tja dee gudu fëën go.”​—Psalöm 49:16, 17.

  • „Hii sëmbë di dë a libi sabi taa de o dëdë, ma dee dëdë sëmbë an sabi na wan hojo soni. De an o kisi na wan paka möön tu, biga sëmbë fëëkëtë hii soni di de bi sa mëni u de. Hii soni di i maun feni u du, du ën ku hii i kaakiti, biga a geebi, di kamian teka joo go, sëmbë an sa wooko, de an sa pakisei soni, de an sabi na wan soni, de an abi na wan köni tu.”​—Pleikima 9:5, 10.

Bëibel ta lei taa wan sëmbë di dëdë aan na wan soni di ta libi go dou

Woto Bëibel tëkisi ta lei taa fa mbeti ta dëdë, sö nöö libisëmbë ta dëdë tu (Pleikima 3:19, 20). Dee sëmbë dee dëdë an sabi na wan wojo soni. Hën da te wan sëmbë dëdë, na wan soni fëën ta libi möön.

Ee i lesi di Bëibel a bigi fëën te kisi kaba fëën, ja o lesi wan daka taa dee dëdë sëmbë dë ku libi a wan woto kamian. Di lei de ta lei sëmbë taa dee dëdë sëmbë nango libi a wan woto kamian an dë a Bëibel. Saatan ku dee taku jeje fëën, de ta paaja di lei dë. Jehovah buuse hii dee lei dë.​—Nöngö 6:16-19; 1 Timoteo 4:1, 2.

 Sëmbë di dë ku gadu a hedi

Dee taku jeje ta du kuma de da dee dëdë sëmbë

Wan woto fasi fa Saatan ta ganjan sëmbë hën da a ta wooko ku sëmbë di dë ku gadu a hedi. Dee sëmbë aki ta kisi buka u dee jeje. De ku te a hia woto sëmbë ta biibi taa dee buka aki kumutu a dee dëdë sëmbë. Ma kumafa u bi si a Bëibel, di soni aki an sa kan.​—Pleikima 9:5, 6, 10.

Wë nöö naasë dee buka dë ta kumutu? De ta kumutu a dee taku jeje! Dee taku jeje sa luku wan sëmbë finifini te a dë a libi. De sabi fa di sëmbë ta fan, unfa a mbei, andi ku andi a du ku andi a sabi. Fëën mbei an taanga da de u djeesi sëmbë di dëdë.​—1 Samuëli 28:3-19.

 Mindimindi woto

Wan woto fasi fa Saatan ta paaja di buka taa dëdë sëmbë ta libi go dou, hën da a ta mbei sëmbë konda woto di deseei mindi. Dee lö pei woto aki ta bia sëmbë fusutan puu a di tuutuu lei u Bëibel.​—2 Timoteo 4:4.

So sëmbë ta mëni taa de si sëmbë di bi toona ko a libi baka

Afiikan nëngë abi sömëni woto ta konda u sëmbë di dëdë di de si libilibi baka. Ma di suti u dee woto aki hën da na a di kamian ka di sëmbë bi ta libi de ta si ën. Wë nöö kai pakisei luku i si: ’Ee di sëmbë di dëdë bi a’ di makiti u ko a libi baka, nöö faandi mbei a bi o go libi a wan longi kamian ka famii ku mati fëën an dë?’

Boiti di dë, an bi sa dë sö taa djei nöö di sëmbë di de si djei di wotowan di dëdë u? Sö wë tu baaa bi ta pleiki a wan pandasi hën de si taa wan gaan womi ta waka a de baka wan tu juu longi. Di de hakisi ën andi a ta suku, hën de ko sabi taa di womi bi mëni taa wan u de bi dë wan baaa fëën di dëdë wan tu jaa kaa. Hii fa de piki ën taa na sö a dë, tökuseei an bi kë biibi. Wë nöö pakisei andi di womi aki o go konda da dee famii ku dee mati fëën!

 Sëmbë ta si soni, de ta sunjan soni nasö de ta jei töngö

Dee taku jeje ta ganjan sëmbë ku sunjan, de ta mbei de si soni nasö jei töngö

Aan misi taa i sabi woto ka sëmbë taa de bi si foombo soni, de jei soni nasö sunjan peipei soni. Dee foombo soni aki ta mbei dee sëmbë dee a ta miti, ta fëëë te na soni. Marein di ta libi a wan Afiikan köndë bi guwenti u jei hën mama mama ta kai ën a ndeti. Marein bi ta fëëë tee a ta bai ta kai wolo ta weki hii sëmbë nëën wosudendu. Te u kaba fëën a bi siki a hedi.

Wë nöö ee dee dëdë sëmbë bi dë a libi tuutuu de bi o ta bë wojo da dee lobiwan u de nö? Kwetikweti. Dee taku bosikopu aki ta kumutu a dee taku jeje.

Ma unfa a dë ku dee bosikopu dee ta djei kuma de ta heepi, ta da sëmbë kötöhati? Wë wan mujëë u Siela Leonu de kai Gbassay bi siki. A bi sunjan wan daka taa hën tata di dëdë bi ko fan ku ën. A piki ën faa waka tooo go a wan pau di a bi sabi, nöö a pii wan uwii fëën mökisi ku wata, nöö a bebe ën. An bi musu fan ku na wan kodo sëmbë ufö a du sö. Wë sö a bi du, hën a ko bëtë.

Wan woto mujëë bi taki taa hën manu bi ko nëën wan ndeti baka di a dëdë. A taki taa a bi hanse seei, nöö dee koosu fëën bi fiti ën.

Dee lö buka aki ku dee soni sëmbë ta si ta djei kuma de  bunu, nöö de ta heepi sëmbë. A Gadu de ta kumutu ö? Nönö, na nëën e. Jehovah da „di Gadu u tuutuu lei” (Psalöm 31:5). An bi o sa kë libi bödjëë ku u nasö ganjan u wan daka. Dee taku jeje nöö ta du sö.

Ma bumbuu taku jeje dë u? Na seei. Hii fa so juu a ta djei kuma de ta heepi sëmbë, tökuseei hii de tuu hogi. Di Didibi bi fan ku Eva, a bi mbei ënseei bumbuu sëmbë (Kenesesi 3:1). Ma andi bi pasa di Eva haikëën, go du andi a bi taki? Wë a dëdë.

Saatan bi piki Eva taa an bi o dëdë. Eva bi biibi ën, ma te u kaba fëën a dëdë

I sabi taa so juu te wan hogi sëmbë kë ganjan wotowan kisi, a ta pëë ënseei bumbuu sëmbë ta fan a wan suti fasi. „Weti tanda, baaka hati”, sö de ta koti wan nöngö na Afiikan. Gadu Wöutu taa: „[Saatan] ta tooka seei ko dë dililii kuma wan basia u Masa Gadu Köndë, ta mbei taa a ta limbo sëmbë wojo.”​—2 Kolenti 11:14.

A di ten aki Gadu an ta fan ku sëmbë a sunjan möön nasö ku wojolimbo sunjan, nöö an ta mbei de jei töngö möön tu. A ta tii de ta lei de ku di Bëibel, di sa mbei wan sëmbë ko ta ’du hiniwan bumbuu wooko di Gadu buta dëën faa du’.​—2 Timoteo 3:17.

Hën da te Jehovah ta bai u fuu luku bunu u Didibi an kisi u ku dee bödjëë fasi fëën, a ta du sö u di a lobi u. A sabi taa dee taku jeje da hogihati felantima.