Skip to content

Skip to table of contents

Dee taku jeje ta da sëmbë taanga u fia ku Gadu

Dee taku jeje ta da sëmbë taanga u fia ku Gadu

So guwenti kumutu u di mindimindi woto taa dee dëdë sëmbë sa si u

Ma faandi mbei Saatan ku dee taku jeje fëën ta wooko taanga sö u ganjan sëmbë? U di de kë fuu fia ku Gadu, leti kumafa deseei du. De kë fuu dini de. Nöö de kë fuu biibi dee mindimindi woto u de, ku söseei fuu du soni di Jehovah an lobi. Gaansë u dee soni aki da guwenti di nama ku dëdë.

Te wan lobiwan fuu dëdë, u ta fii ën seei. Nöö an dë wan föutu soni u mbei sëmbë si taa u ta tjali. Di Jesosi mati Lazalosi dëdë, hën a tjali tee taa ’wata pasa nëën wojo’.​—Johanisi 11:35.

Sömëni soni dë di sëmbë guwenti u du di nama ku dëdë, nöö hii köndë abi fëën guwenti. So u dee guwenti aki Bëibel an ta kuutu. Ma sëmbë ta du so u dee soni u di de ta biibi taa dee dëdë sëmbë dë a libi nöö de sa si dee libiwan. De ta booko didia, ta këë ta bai kai wolo te a bigi, ta du sömëni peipei soni u bei di dëdë. Sëmbë ta du hii dee soni aki u di de fëëë taa di dëdë sa du hogi ku de ee de an du sö. Ma dee dëdë sëmbë „an sabi na wan hojo soni”. Hën da dee sëmbë dee ta du dee lö soni aki, di lei u Saatan de ta paaja.​—Pleikima 9:5.

Woto guwenti kumutu u di mindimindi woto taa dee dëdë sëmbë abi u heepi fanöudu

 Sëmbë ta hoi deseei a so u dee guwenti ku wëti u di de ta biibi taa dee dëdë sëmbë abi heepi fanöudu u dee libiwan, nöö ee de an feni di heepi dë, de sa du hogi ku de. A so köndë de ta tuwë njanjan, de ta puu adjo, ta tuwë lai a wata. A sö wan fasi de ta mëni taa de ta heepi di dëdë faa go dou bunu a Gadu Köndë. Wan woto soni di sëmbë guwenti u du gaanfa da di koti de ta koti njanjan buta a goon ku diingi da di dëdë.

Dee guwenti aki an bunu u di de ta heepi Saatan u paaja dee mindimindi woto fëën di nama ku dëdë. Jehovah bi o feni ën bunu taa u nama ku guwenti di kumutu a dee lei u dee taku jeje u? Nönö e!​—2 Kolenti 6:14-18.

Futuboi u di tuutuu Gadu an ta mökisi deseei na wan tjë sö seei ku guwenti di ta heepi Saatan ku dee soni a ta mindi. Ma de ta luku fa de sa heepi dee libiwan a wan lobihati fasi u de an tjali sö möön. De sabi taa te wan sëmbë böö koti, Jehovah wanwan tö sa heepi di sëmbë dë.​—Jöpu 14:14, 15.

 Gadu ta kuutu obia wooko

So sëmbë ta fan langalanga ku dee taku jeje. Wotowan nango a sëmbë di dë ku gadu a hedi u suku heepi. Dee soni dë da obia wooko. Di tuwë de ta tuwë wata begi soni da wan sëmbë faa ko bëtë, wisi, tofu ku di fan sëmbë ta fan ku dëdë da fasi fa sëmbë ta du obia wooko.

Gadu buuse dee soni aki e. A kë taa hën wanwan tö nöö u musu ta begi ta dini.​—Ëkisodesi 20:5

Bëibel ta kuutu dee soni aki, u di a ta taki taa: „Na wan lukuma musu dë a unu mindi, na wan bonuma, na wan sëmbë di ta suku maaka u ko sabi andi o pasa, na wan tofuma, na wan wisima, na wan sëmbë di nango suku heepi a sëmbë di dë ku gadu a hedi nasö a sëmbë di ta taki a fesi andi o pasa, na wan sëmbë di ta fan ku dëdë. Biga Jehovah ta buuse dee lö pei sëmbë dë gaanfa.”​—Detolonomi 18:10-12.

Faandi mbei Jehovah ta bai u a dee soni aki gaanfa sö?

U di Jehovah kë bunu fuu,  mbei a ta bai u a hii pei fasi u obia wooko. A lobi sëmbë, a ta booko hedi ku de, nöö a sabi taa te sëmbë ta nama ku taku jeje, nöö aan misi te nöö de an o tja fuka fëën bakaten.

Nilda u Blaziliköndë bi dë wan u dee sëmbë dë. A bi dë ku wan gadu a hedi. Dee taku jeje bi poi di libi fëën. A bi konda taa: „Dee taku jeje . . . bi ta ko a mi liba, de bi ta da mi duwengi hebihebi. So juu mi bi ta dë ku mi limbolimbo wojo, so toon ma bi ta sabi soni u miseei möön. Hën wë mi kisi miseei a wan kamian ka de ta hoi lauma. Dee taku jeje tjötjö mi tee taa de da mi senuwe siki. Mi bi ta bebe deesi u saka di senuwe, hën mi bigi ta bebe daan, ta sumuku nöömö. Di soni aki tei jaajaa.”

A ta pasa hiahia taa soni an nango bunu ku dee sëmbë dee ta mbei obia. De sa lasi de wosu, di fii u de, söseei di libi u de

Bakaten Jehovah ku dee Kotoigi fëën heepi Nilda u hai hënseei puu a dee taku jeje basu, nöö nöunöu a ta libi wan bumbuu libi ta feni hia bunu seei. A taki taa: „Mi ta begi hii sëmbë u de an nama na wan tjë sö seei ku dee [taku] jeje.”