Skip to content

Skip to table of contents

Wan gaan bunu ten dë ta ko

Wan gaan bunu ten dë ta ko

Abiti möön de o puu makiti a Saatan ku dee taku jeje

Saatan ku dee taku jeje fëën an o ta ganjan sëmbë nango nöömö. Jehovah bi vinde de puu nëën ala kaa (Akoalimbo 12:9). Abiti möön Gadu o hopo du wan soni möön ku Saatan ku dee taku jeje fëën. Johanisi ta konda andi Gadu bi mbei a si. A taa: „Mi si wan basia u Masa Gadu Köndë möön kumutu a liba ala ta bazia ta ko. Nöö fa a ta ko dë, nöö a dë ku wan söötö mii nëën maun. Nöö di söötö mii dë, hën ta jabi di baaku di na a’ goon. Nöö a dë ku wan gaan këti nëën maun tu. Nöö hën a kisi di gaan bë kaima gbaa, di oto në fëën da di awoo sindeki, hën da di didibi Saatan seei. Nöö hën wë a bui ën ku di këti te a kaba, vinde viiin go a di baaku di na abi goon naandë dendu. Nöö fa a vindëën tuwë go dë, nöö a o sai dë wan dusu jaa longi bifö de o toona lusu ën baka. Nöö hën di basia söötö di baaku buka te a kaba naki sitampu nëën gbai be di kaima tan a di kamian dë. An musu kumutu faa go ta ganjan dee nasiönnasiön sëmbë u goonliba möön, hii dee dusu jaa longi naandë” (Akoalimbo 20:1-3). Bakaten de o kii Didibi ku dee taku jeje fëën puu fiaa.​—Akoalimbo 20:10.

Gadu o kii dee hogihati sëmbë puu a goonliba tu.​—Psalöm 37:9, 10; Lukasi 13:5.

 Dee dëdë sëmbë o toona libi baka!

A goonliba aki dee dëdë sëmbë o toona ko a libi baka

Baka te de puu Saatan ku dee taku jeje a pasi, nöö Jehovah o da libisëmbë gaan hia bunu. Joo mëni jeti taa dee dëdë sëmbë an dë ku libi möön, soni u de kaba a mundu. Jesosi bi tei dëdë djei ku duumi, wan fundu duumi söndö sunjan (Johanisi 11:11-14). A bi du sö u di a bi sabi taa wan juu bi o dou taa dee dëdë sëmbë bi o toona weki ko a libi baka. A bi taki taa: „Wan juu o dou, nöö hii dëdë sëmbë tuu o . . . weki kumutu a geebi toona ko ku libi baka.”​—Johanisi 5:28, 29, maaka ku Tjabukama 24:15.

A goonliba aki de o toona libi baka. Ja o jei buka möön taa sëmbë dëdë, ma joo ta jei piizii bosikopu taa sëmbë weki baka! A o dë wan gaan piizii soni seei u kisi dee lobiwan fuu dee kumutu a geebi, baasa duuu sö!