Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

DI U NËIGI WOTO

U ta libi a "dee lasiti daka” u?

U ta libi a "dee lasiti daka” u?

Andi ta pasa a di ten fuu aki di Bëibel bi taki a fesi taa bi o pasa?

Unfa Gadu Wöutu taki taa sëmbë bi o dë a "dee lasiti daka”?

Un pei bunu soni Bëibel taki taa bi o pasa a "dee lasiti daka”?

I BI haika njunsu a ladio nasö i bi luku teefei, hën i hakisi iseei unfa di goonliba aki o ko u? Hogi ta miti sëmbë söndö u de mëni ën a fesi. Hën mbei na wan sëmbë sa taki a fesi fa di amanjan fëën o dë (Jakobosi 4:14). Ma Jehovah sabi fa soni o pasa a di ten di ta ko (Jesaaja 46:10). Gaanduwe a fesi, di Bëibel, di Wöutu fëën, bi taki taa hogi soni bi o pasa a di ten fuu aki. Ma a bi taki söseei taa gaan bunu soni bi o pasa a di ten di ta ko.

2 Jesosi Keesitu bi taki soni u di Könuköndë u Gadu, di o puu hogidu a goonliba, nöö a o mbei taa goonliba toon wan paladëisi (Lukasi 4:43). Sëmbë bi kë sabi na un ten di Könuköndë bi o ko. Dee bakama u Jesosi bi hakisi ën taa: ’Nöö un maaka joo lei u fuu sa sabi di juu di joo toona ko baka ku di juu di ten u dë aki o kaba?’ (Mateosi 24:3) Jesosi bi piki de taa Jehovah Gadu wanwan tö nöö sabi na un juu di ten di u dë aki o kaba (Mateosi 24:36). Ma tökuseei Jesosi bi taki u soni di bi o pasa a goonliba, leti ufö di Könuköndë bi o tja tuutuu fii ku böö ko da libisëmbë. Dee soni di a bi taki, ta pasa nöunöu a goonliba aki!

3 Ufö u go taki u dee soni di ta lei taa u ta libi ’a di kaba u di ten u dë aki’, un boo buta mëni kölö sö a wan feti di na wan libisëmbë bi sa si. Di feti dë bi feti a hemel, nöö di bakapisi fëën nama a hii u tuu.

WAN FETI BI FETI A HEMEL

4 A di u aiti woto u di buku aki, u bi lei taa Jesosi Keesitu toon könu a hemel, a di jaa 1914 (Daniëli 7:13, 14). Sati baka di Jesosi toon Könu, a hopo du wan soni. Di Bëibel taa: "Wan gaan feti hopo ala. Mikaëli [wan woto në u Jesosi] ku dee basia fëën go feti ku di gaan kaima [Saatan Didibi]. Nöö hën di gaan kaima ku dee basia fëën ta feti baka.”* Saatan ku dee basia fëën, dee taku jeje, lasi di feti dë, hën de kisi de vinde puu a hemel ko a goonliba. Dee woto engel u Gadu dee ta hoi deseei nëën, bi wai seei taa Saatan ku dee taku jeje fëën an dë a hemel ala möön. Ma libisëmbë an bi o wai. Bëibel bi taki taa: "Ma helu u di goonliba…biga di didibi saka ko a unu awaa. Nöö fa a saka ko dë, a ko ku taanga hatiboonu, biga a sabi taa ten fëën ko sati.”—Akoalimbo 12:7, 9, 12.

5 Gaantangi, luku andi bi o dë di bakapisi u di feti di bi feti a hemel. U di Saatan hati boonu mbei a bi o tja helu nasö fuka ko a goonliba. Kumafa joo si, nöö a di lö pisiten dë u ta libi nöunöu. Ma di pisiten dë o "sati”, an o tei longi seei. Saatan seei sabi taa sö a dë. Di Bëibel ta kai di pisiten aki "dee lasiti daka” (2 Timoteo 3:1). U sa dë ku gaan piizii a hati taa abiti möön Gadu o mbei taa Didibi aan kaakiti a sëmbë liba möön! Boo go luku so u dee soni di Bëibel bi taki a fesi taa bi o pasa, di ta pasa nöunöu aki. Dee soni dë ta lei u taa u ta libi a dee lasiti daka. Nöö abiti möön di Könuköndë u Gadu o tja gaan bunu di an o kaba möönsö, ko da dee sëmbë di lobi Jehovah. Boo buta mëni fosu a fö pisi u di maaka di bi o söi na un pisiten u ta libi, kumafa Jesosi bi taki.

GAANGAAN SONI DI BI O PASA A DEE LASITI DAKA

Feti, gaan hangi, gaan hogi

6’Wan köndë o hopo go feti ku di oto köndë, wan könu o hopo go feti ku wan oto könu’ (Mateosi 24:7). A dee höndö jaa di pasa, de kii milionmilion sëmbë a feti. Wan sabima u Ingisiköndë di ta stuka fa soni bi pasa a fosuten bi sikifi taa: "U hii dee jaahöndö di pasa, di u tuwenti jaahöndö bi möön hogi, u di de kii te a hia sëmbë a feti a di jaahöndö dë…. Hiniwan juu kaa feti bi ta feti, boo taa wanwan pasi nöö ja bi ta jei taa feti dë.” Wan feleniki di ta öndösuku fanöudu soni a hii goonliba bi sikifi taa: "Dee sëmbë dee dëdë a feti a di u tuwenti jaahöndö, hia dii pasi möön leki dee sëmbë dee dëdë a feti a di fosu jaahöndö baka di ten u Jesosi, te dou di jaa 1899” (Worldwatch Institute). Möön leki 100 milion sëmbë dëdë a feti sensi 1914. Milionmilion sëmbë ta tja fuka ku pen a hati u di lobiwan u de dëdë a feti. Kandë wan lobiwan fii dëdë a sö wan fasi tu.

7Gaan hangi o dë’ (Mateosi 24:7). Sëmbë di ta öndösuku soni taki taa a dee 30 jaa di pasa, möön hia njanjan ko dë. Ma tökuseei sëmbë ta pena u njanjan, u di de aan möni tjika u bai njanjan nasö goon u paandi soni u njan. A dee pena köndë, milionmilion sëmbë abi wan kodo Amëëkandala nasö wan Euro nöö, u bai soni u njan u wan daka. Gaansë u dee sëmbë dë, dë ku hangi pena. Wan feleniki di ta öndösuku soni u di gösöntu u libisëmbë, taki taa möön leki feifi milion piki mii ta dëdë hiniwan jaa, u di de an ta feni bumbuu njanjan (World Health Organization).

8"Goon o ta seki ta latja a sömëni kamian” (Lukasi 21:11). Kumafa wan feleniki na Amëëkanköndë di ta öndösuku soni u goondoti taki, nöö sensi di jaa 1990, a ta pasa taa söwan 17 pasi goon ta seki hiniwan jaa sö taanga taa a sa booko gaan wosu, nöö a sa latja kamian tu. Di feleniki taki söseei taa hiniwan jaa goon ta seki sö taanga, taa a sa booko gaan wosu kaba a sösö fiaa (U.S. Geological Survey). Wan woto feleniki taki taa: "A dee 100 jaa di pasa, dusudusu sëmbë dëdë u di goon seki latja kamian kii sëmbë. Nöö hii fa sabima mbei wookolai u de sabi soni u goon seki, tökuseei di soni dë an mbei taa hia sëmbë an ta dëdë te goon ta seki ta latja kamian.”

9’Taku siki o dë a mundu ta kii piki mii ku gaan sëmbë tuu’ (Lukasi 21:11). Hii fa data ko sa’ u kula sëmbë möön bunu, tökuseei peipei siki di bi dë kaa, ku siki di sëmbë an bi sabi, ta hopo ko. De sikifi taa 20 peipei siki di sëmbë sabi, kuma tuberculose, malalia, ku cholera ko möön hia a dee teniteni jaa di pasa, ku söseei taa so u dee siki ko möön taanga da data u kula. Boo taa söwan 30 siki hopo ko di sëmbë an bi sabi. So u dee siki aki aan deesi, nöö de ta kii sëmbë tu.

DI FASI FA SËMBË BI O DË A DEE LASITI DAKA

Hia sëmbë an kë tei dee köni lai u Gadu Wöutu

10 Boiti dee gaangaan soni di Bëibel bi taki taa bi o pasa a dee lasiti daka, a bi taki söseei taa soni bi o tooka a di fasi fa sëmbë ta tja deseei. Di apösutu Paulosu bi taki unfa sëmbë bi o dë. A 2 Timoteo 3:1-5, u ta lesi taa: "A dee lasiti daka u di goonliba aki, nöö wan tumisi hogi ten o ko e.” Paulosu taa:

  • sëmbë an o lobi oto sëmbë möön leki deseei nöö
  • sëmbë o abi langahati möön hii soni [langahati u möni, "NW”]
  • miii an o ta saka deseei a de mama ku de tata basu möönsö
  • sëmbë an o ta hoi deseei te de mbei wan buka ("NW”)
  • sëmbë an o abi fii a de hati da na wan kodo sëmbë
  • sëmbë an o ta hoi deseei
  • sëmbë o dë hogi leti kuma taku mbeti
  • sëmbë o ta lobi piizii möön Gadu
  • sëmbë o ta mbei taa de nama ku Gadu, ma de an o ta da di kaakiti u Gadu pasi möönsö a de libi

11 Sëmbë a di pisi wata ka i ta libi, ta tja deseei a sö wan fasi ö? A musu u dë sö. A hii kamian kaa, sëmbë dë di abi taku fasi. Di soni aki ta lei u taa abiti möön Gadu o hopo du wan soni. Biga di Bëibel taki taa: "Te dee hogihatima ta göö kuma ahun, nöö soni nango bunu da dee sëmbë dee ta du takuhati soni ku wotowan. Nöö di soni dë ta pasa u di di juu ta dou taa de musu kii de puu fiaa.”—Psalöm 92:7.

BUNU SONI DI BI O PASA A DEE LASITI DAKA!

12 A dë sö tuutuu taa gaan fuka ta miti sëmbë a dee lasiti daka aki, kumafa Bëibel bi taki a fesi. Ma hii fa di goonliba aki dë fanjanfanjan sö, tökuseei soni nango bunu da dee sëmbë dee ta dini Jehovah.

"Di bunu buka u di Njunjun Tii u Gadu [Könuköndë, "NW”], musu paaja te dou hii goonliba.”—Mateosi 24:14

Jehovah Kotoigi ta pleiki di bunu buka

13"Sëmbë o ko sabi tuutuu soni gaanfa”, sö di buku u Daniëli bi taki a fesi. Un ten di soni dë bi o pasa? A bi o pasa a "di kaba juu” (Daniëli 12:4). Sensi di jaa 1914, Jehovah heepi dee sëmbë dee kë dini ën tuutuu, u de ko fusutan di Bëibel möön bunu. De ko fusutan hia soni di nama a di në u Gadu, dee soni a o du, di lusupaima u Jesosi Keesitu, andi ta pasa te wan sëmbë dëdë, ku söseei taa sëmbë o toona weki baka. Boiti di dë, dinima u Jehovah lei fa de musu libi a wan fasi di sa tja bunu ko da deseei, nöö di sa tja gafa ko da Gadu tu. De ko fusutan möön bunu tu andi di Könuköndë u Gadu o du, ku unfa a o seeka soni a goonliba aki. Andi de ta du ku dee soni de ko sabi? Di hakisi aki ta tja u go a wan woto soni di Jesosi bi taki, di ta pasa tuutuu a dee lasiti daka aki.

14"Di bunu buka u di Njunjun Tii u Gadu [Könuköndë, "NW”], musu paaja te dou hii goonliba”. Sö wë Jesosi Keesitu bi taki, di a bi ta taki andi bi o pasa a ’di kaba u di ten u dë aki’ (Mateosi 24:3, 14). A hii goonliba dee Kotoigi ta pleiki andi da di Könuköndë u Gadu, andi a o du, ku unfa u sa feni dee gaan bunu di a o tja ko. De ta paaja di buka aki a möön leki 235 köndë a möön leki 500 töngö. Milionmilion Kotoigi u Jehovah ta paaja di bunu buka u di Könuköndë fajafaja. De kumutu a "hii pei nasiön, ku hii pei lö, ku hii pei föluku, ta fan hii dee peipei töngö u goonliba tuu” (Akoalimbo 7:9). Dee Kotoigi nango a sëmbë wosu ta lei de soni u Bëibel, söndö u de hakisi möni. Sö de ta lei milionmilion sëmbë kaa di kë ko sabi andi di Bëibel ta lei tuutuu. Di soni aki dë wan gaan soni di ta pasa, u di Jesosi bi taki a fesi taa ’sëmbë bi o buuse’ dee tuutuu bakama fëën!—Lukasi 21:17.

ANDI JOO DU?

15 Wë u si taa sömëni soni di dee tjabukama bi taki a fesi ta pasa tuutuu nöunöu. Di soni dë an mbei taa i ta biibi taa u ta libi a dee lasiti daka u? Te Jehovah feni taa di bunu buka paaja tjika, nöö di "kaba” o ko tuutuu (Mateosi 24:14). Di "kaba” hën da di ten te Jehovah o puu hii hogilibi a goonliba. Jehovah o mbei taa Jesosi ku dee taanga engel kii hii sëmbë di an kë tei di së fëën (2 Tesalonika 1:6-9). Saatan ku dee taku jeje fëën, an o sa ganjan sëmbë möön. Baka u di dë, di Könuköndë u Gadu o tja gaan bunu ko da hii sëmbë di saka deseei a di tii dë basu.—Akoalimbo 20:1-3; 21:3-5.

16 U di di kaba u di seti u Saatan dë zuntu, mbei u musu hakisi useei: ’Andi mi musu du’? A dë wan köni soni taa i lei möön soni u Jehovah go dou, ku dee soni a kë taa u musu du (Johanisi 17:3). I musu ta lei soni u Bëibel fajafaja. Be a ko dë wan guwenti da i taa i ta ko makandi ku woto sëmbë di ta mbei möiti u du di kë u Jehovah (Hebelejën 10:24, 25). Tei di sabi di Jehovah Gadu ta da sëmbë hiahia a hii goonliba. Ee i musu tooka soni a i libi, nöö du ën sö taa Gadu sa feni i bunu.—Jakobosi 4:8.

17 Jesosi bi taki a fesi taa gaansë u sëmbë an bi o buta mëni a dee maaka taa u ta libi a dee lasiti daka. Dee hogihati sëmbë o kisi poi vau sö, te u de kë mëni. Gaansë u sëmbë o panta, leti kumafa sëmbë ta panta te fufuuma ta ko a ndeti (1 Tesalonika 5:2). Jesosi bi taki taa: "Nöö leti kumafa u jei soni bi waka a di ten u Noa, nöö sö nöö soni o dë a di ten Mi ko dë Libisëmbë Mii aki o toona ko…Biga dee sëmbë u di ten naandë, bi ta njan u de ta bebe ta tei mujëë ta da manu, tee dou di daka Noa go a di gaan sipi. De an bi mëni seei taa sö wan hogi dë u ko miti de. Ma te u de kë mëni, nöö hën tjuba kai gbulululu singi di goonliba piii, sawa de puu fia tja go kii puu dë. Nöö mi taki da unu taa leti sö nöö a o dë a di juu ten mi o toona ko.”—Mateosi 24:37-39.

18 Fëën mbei Jesosi piki dee bakama fëën taa: "Dee sëmbë o, u mëni unu seei e, fu wan booko unu hedi ku dee sölugu u di goonliba aki…te nöö u fëëkëtë di Daka dë e. Wan musu ta sai dë ta dööngö ta poi ten te nöö di daka dë kisi unu söndö un mëni. Biga a o ko kai a hii sëmbë tuu liba kuma aviti. Aan fa fii köni te nöö an o kisi i. Hën mbei un musu dë ku wojo ta begi Gadu nöömö fuun sa pasa dee soni u taki aki söndö un lasi di biibi di un abi a mi liba. Nöö un sa ko taanpu a Mi di ko dë Libisëmbë Mii aki fesi söndö fëëë” (Lukasi 21:34-36). A dë wan köni soni taa u ta buta mëni a dee soni di Jesosi taki aki. Faandi mbei? U di dee sëmbë di Jehovah Gadu ku Jesosi Keesitu, di "Libisëmbë Mii”, feni bunu, an o dëdë te di seti u Saatan o kisi poi. Ma de o abi di houpu u libi u teego a di waiti njunjun goonliba di dë sö zuntu!—Johanisi 3:16; 2 Petuisi 3:13.

DEE SONI DI BËIBEL TA LEI U

  • A dee lasiti daka aki, feti dë, gaan hangi dë, goon ta seki ta latja kamian, söseei taku siki ta kii sëmbë.—Mateosi 24:7; Lukasi 21:11.
  • A dee lasiti daka aki, hia sëmbë an lobi wotowan möön leki deseei nöö, sëmbë abi langahati u möni, de lobi piizii möön Gadu.—2 Timoteo 3:1-5.
  • A dee lasiti daka aki, di bunu buka u di Könuköndë ta paaja a hii goonliba.—Mateosi 24:14.

*  Ee i kë ko sabi möön soni di ta lei taa Mikaëli da wan woto në u Jesosi Keesitu, nöö luku Woto fanöudu soni.


Hakisi

1. Naasë u sa lei soni u di ten di ta ko?

2, 3. Andi dee bakama u Jesosi bi hakisi ën, nöö unfa a piki de?

4, 5. (a) Andi pasa a hemel sati baka di Jesosi toon Könu? (b) Kumafa Akoalimbo 12:12 ta söi, nöö andi bi o dë di bakapisi u di feti di bi feti a hemel?

6, 7. Unfa dee soni di Jesosi bi taki u feti ku gaan hangi, ta pasa tuutuu nöunöu aki?

8, 9. Andi ta lei taa dee soni di Jesosi bi taki u goon di o ta seki ta latja kamian, ku taku siki di o ko a mundu, ta pasa sö tuutuu?

10. Unfa iseei si taa sëmbë dë a di ten aki, kumafa 2 Timoteo 3:1-5 bi taki?

11. Andi Psalöm 92:7, taki taa o pasa ku dee hogihatima?

12, 13. Unfa sëmbë ko ’sabi tuutuu soni gaanfa’ a "di kaba juu” aki?

14. Unfa di bunu buka u di Könuköndë paaja tjika, nöö ambë ta paaja di buka aki?

15. (a) I ta biibi taa u ta libi a dee lasiti daka u, nöö faandi mbei? (b) Te di "kaba” ko, nöö andi o pasa ku dee sëmbë di an kë tei di së u Gadu, ku dee sëmbë di saka deseei a di Könuköndë u Gadu basu?

16. Andi bi o dë wan köni soni fii du?

17. Faandi mbei gaansë u sëmbë o panta te dee hogihati sëmbë o kisi poi?

18. Na un soni di Jesosi bi taki, un musu buta mëni?