Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

DI U SEIBI WOTO

Wan tuutuu houpu dë da dee lobiwan fii di dëdë

Wan tuutuu houpu dë da dee lobiwan fii di dëdë

Unfa u du sabi taa dee dëdë sëmbë o toona weki baka?

Unfa Jehovah ta fii u weki dee dëdë sëmbë baka?

Ambë o toona weki baka?

BOO TAA i ta kule da wan hogihati felantima. A taanga möön i, nöö a ta kule hesi möön i tu. I sabi taa aan tjalihati u sëmbë, u di i si kaa fa a kii so u dee mati fii. Aan toobi fa i ta kule hesi tjika, a ta kule ko zuntu ku i nöömö. A djei kuma na wan soni dë fii sa du te an kisi i. Hën wë te wan pisi wan sëmbë ko dou a i bandja. A taanga gaanfa möön di felantima fii, nöö a paamusi i taa a o heepi i. Wë nöö joo böö fëëë seei!

2 Sö wan felantima ta kule a i baka tuutuu. A hii u tuu baka a ta kule. Kumafa i bi lei a di woto a fesi, nöö Bëibel taa dëdë da wan felantima. Na wan fuu sa kule go disëën, nasö feti ku ën. Gaansë fuu si fa di felantima aki kii sömëni u dee sëmbë di u lobi. Ma Jehovah taanga gaanfa möön di dëdë di ta kii u. Hën da di lobihati heepima di söi kaa taa a sa wini di felantima aki. A paamusi taa a o puu di felantima aki a mundu. Dëdë an o dë möön. Di Bëibel ta lei u taa: ’Di dëdë di ta kii u aki, da di lasiti felantima di o kaba a mundu fiaa’ (1 Kolenti 15:26). Wan bunu njunsu wë disi e!

3 Un boo luku kölö sö unfa u ta fii te dëdë kii wan sëmbë fuu. Te u du sö kaa, nöö woo ko fusutan wan soni di o mbei u fii piizii. Wë, Jehovah paamusi taa dee dëdë sëmbë o toona weki baka (Jesaaja 26:19). Gadu o mbei taa de ko a libi baka. Hën u ta kai di wekibaka.

TE WAN LOBIWAN FUU DËDË

4 Wan lobiwan fii lasi libi ö? Wë te dee lö soni dë pasa, nöö u ta dë ku gaan kusumi a hati. A ta dë kuma saanfa-u-du fuu kaba. A dee ten dë, nöö u a’ Gadu Wöutu fanöudu u da u taanga (2 Kolenti 1:3, 4). Di Bëibel ta heepi u fuu fusutan fa Jehovah ku Jesosi ta pakisei u di soni de kai dëdë. Hii juu Jesosi bi ta djeesi hën Tata a soni. Wan woto dë di ta söi fa Jesosi bi fuka di wan mati fëën bi dëdë (Johanisi 14:9). Te Jesosi bi dë a Jelusalen, nöö a bi lo’ u go luku Lazalosi ku dee sisa fëën, Malia ku Maita. De bi ta libi a Betania, wan foto di zuntu ku Jelusalen. De bi toon gaan mati. Di Bëibel taki taa: ’Masa Jesosi lobi Maita, ku Lazalosi, ku Malia gaanfa’ (Johanisi 11:5). Kumafa u bi si a di woto a fesi, nöö Lazalosi bi dëdë.

5 Unfa Jesosi bi fii di hën mati bi dëdë? U ta lesi taa Jesosi go këë pena ku dee famii u Lazalosi di bi ta tjali. Di Jesosi si de, nöö tjali u de bi kisi ën seei. A "fukëën nëën hati gaanfa te a fika piki an sa hoi ën seei möön”. Te wan pisi "wata ta pasa a Masa Jesosi wojo” (Johanisi 11:33, 35). Jesosi bi ta tjali u di saanfa-u-du fëën bi kaba u? Wë nönö. Fu taki ën leti Jesosi bi sabi taa wan foombo soni bi o pasa (Johanisi 11:3, 4). Tökuseei a bi fii di pen ku di fuka di sëmbë ta abi te wan sëmbë u de dëdë.

6 Di fuka u Jesosi ta da u taanga a wan fasi. A ta lei u taa Jesosi ku hën Tata Jehovah buuse dëdë. Ma Jehovah Gadu sa feti ku di felantima aki, nöö a sa wini ën tu! Un boo luku andi Gadu da Jesosi di makiti faa du.

"LAZALOSI, HOPO KUMUTU KO A DÖÖ!”

7 De bi bei Lazalosi a wan sitonu baaku dendu, hën Jesosi hakisi u de logoda di sitonu puu a di baaku buka. Maita piki wante taa de an musu du di soni dë, biga Lazalosi bi dëdë fö daka kaa, nöö di sinkii fëën bi musu u bigi pondi kaa (Johanisi 11:39). Te u luku ën bunu, nöö saanfa-u-du u de bi kaba.

8 De logoda di sitonu puu a di baaku buka, nöö hën Jesosi bai kai Lazalosi ku wan taanga töngö taa: "Lazalosi, hopo kumutu ko a döö!” Nöö andi bi pasa? Di womi di bi dëdë "hopo kumutu ko” (Johanisi 11:43, 44). I sa pakisei fa dee sëmbë dee bi sai dë bi fii piizii ö? Dee sëmbë dee bi sai dë, ee da baaa fëën, famii fëën, mati fëën, nasö sëmbë di bi ta libi a Lazalosi bandja, de tuu bi sabi taa a dëdë. Ma di wan seei womi dë, hën wë bi taanpu a de fesi baka. A djei kuma sö wan soni an bi sa kan. A musu u dë sö taa sömëni sëmbë bi baasa Lazalosi duuu sö. Wë di soni di pasa dë, söi taa Jehovah taanga möön di dëdë di ta kii sëmbë!

Di Lazalosi toona weki baka, nöö sëmbë bi piizii seei.—Johanisi 11:38-44

Jesosi weki Lazalosi puu a dëdë

9 Jesosi an bi taki taa ku hënseei kaakiti a du di foombo soni dë. Di a begi ufö a bai kai Lazalosi, a bi söi limbolimbo taa Jehovah hën ta weki sëmbë puu a dëdë (Johanisi 11:41, 42). Disi nëën nöö da di wan kodo pasi di Jehovah wooko ku di makiti fëën a sö wan fasi e. Di wekibaka u Lazalosi da wan u dee nëigi woto di sikifi a di Wöutu u Gadu, ka sëmbë weki kumutu a dëdë.* A suti seei te u ta lesi ku te u ta öndösuku dee woto aki. De ta lei u taa Gadu an lobi wan sëmbë möön wan wotowan, u di a weki hii pei sëmbë di bi dëdë. A weki njönku sëmbë ku gaan sëmbë, womi nëngë ku mujëë sëmbë, Isaëli sëmbë ku sëmbë di an bi dë u Isaëli. Dee woto aki ta lei fa dee sëmbë bi piizii gaanfa! Kuma di Jesosi weki wan mujëë mii di bi dëdë, nöö a bi "bigi” seei da hën mama ku hën tata e (Maikusi 5:42). Awa, Jehovah bi du wan gaan piizii soni da de, nöö de an bi o fëëkëtëën wan daka.

10 A dë sö tuu taa dee sëmbë di Jesosi bi weki baka, toona dëdë. Hën da u sösö de bi toona weki ö? Nönö! Dee woto u Bëibel aki ta hoi baka da fanöudu lei, nöö de ta da u taanga.

SONI DI U TA LEI U DEE WOTO KA SËMBË TOONA WEKI BAKA

Elia, di mujëë di manu fëën dëdë, ku ën womi mii di toona weki baka

Elija bi weki di womi mii u wan mujëë di manu fëën bi dëdë.—1 Könu 17:17-24

11 Di Bëibel ta lei u taa dee dëdë sëmbë "an sabi na wan hojo soni”. De an dë ku libi möön, nöö de an ta libi go dou a na wan kamian tu. Di woto u Lazalosi ta lei u taa sö a dë tuutuu. Di Lazalosi toona ko a libi baka, a bi konda soni u hemelköndë da sëmbë u? Nasö a bi konda soni u didibi faja di bi o mbei taa sëmbë fëëë u? Nönö. Di Bëibel an taki taa Lazalosi bi konda dee soni dë. A dee fö daka di Lazalosi bi dëdë, ’an bi sabi na wan hojo soni’ (Pleikima 9:5). Lazalosi bi dëdë. A bi dë kuma a bi ta duumi nöö.—Johanisi 11:11.

12 Di woto u Lazalosi ta lei u söseei taa dëdë sëmbë sa toona weki baka tuutuu. An dë wan kontu. Jesosi weki Lazalosi a sömëni sëmbë fesi di bi si andi ta pasa. Dee hedima u keiki seei di bi buuse Jesosi, an bi sa taki taa di maaka dë an bi pasa tuutuu. Ma de bi hakisi deseei ee andi de musu du möön. De taa: ’Wë wa ta du. Wan si fa di man dë [Jesosi] ta du dee foondo wooko fëën nango nöömö nö?’ (Johanisi 11:47) Sömëni sëmbë bi go luku Lazalosi di bi toona weki. Te u kaba fëën, gaansë u dee sëmbë ko ta biibi a Jesosi. Di de si Lazalosi libilibi baka, nöö de bi fusutan limbolimbo taa Gadu hën bi manda Jesosi ko a goonliba. Di soni de bi si dë bi a’ kaakiti a de liba sö tee taa so u dee hogihati hedima u dee Dju keiki bi seeka taa de o kii Jesosi ku Lazalosi.—Johanisi 11:53; 12:9-11.

Petuisi weki Doluka puu a dëdë

Di apösutu Petuisi bi weki Doluka, wan mujëë di bi dë wan bakama u Keesitu.—Tjabukama 9:36-42

13 A dë wan sösö soni u biibi taa dëdë sëmbë sa toona weki baka u? Nönö, biga Jesosi bi lei sëmbë taa wan juu o dou, teka ’hii dee sëmbë dee dë a geebi’ o toona weki baka (Johanisi 5:28). Jehovah hën mbei hii soni di dë ku libi. A taanga u biibi taa a sa toona mbei wan sëmbë libi baka u? Wë nönö, ma u sa fusutan taa Jehovah musu mëni hii soni u dee sëmbë dë. A sa mëni hii soni u dee lobiwan fuu di dëdë u? Sömëni milion teeja dë a mundu di wa sa konda, ma tökuseei Gadu da hiniwan u de wan në! (Jesaaja 40:26) Aai, Jehovah Gadu sa mëni finifini soni u dee lobiwan fuu di dëdë, nöö a dë kabakaba u toona weki de ko a libi baka.

14 Ma unfa Jehovah ta fii u weki dee dëdë sëmbë? Di Bëibel ta lei u taa a ta hangi u weki dee dëdë sëmbë. Di womi de kai Jöpu, di bi ta hoi ënseei a Gadu bi buta di hakisi aki: "Ee wan sëmbë dëdë, a sa toona libi baka u?” Jöpu bi taki u di wakiti a bi o wakiti a di geebi u te di juu bi o dou u Gadu mëni ën. A piki Jehovah taa: "Joo kai mi, nöö mi o piki i. Joo hangi mi, mi di soni di i mbei ku iseei maun.”—Jöpu 14:13-15.

15 Pakisei di soni aki! Jehovah ta hangi u weki dëdë sëmbë ko a libi baka. An ta da piizii a hati u sabi taa sö Jehovah ta fii ö? Ma unfa dëdë sëmbë o toona weki baka a di ten di ta ko? Ambë o toona weki baka, nöö naasë de o weki?

"HII DEE SËMBË DEE DË A DEE GEEBI”

16 Dee woto u Bëibel ka sëmbë bi toona weki baka, ta lei u hia soni u di weki di sëmbë o toona weki baka a di ten di ta ko. Dee sëmbë dee bi toona weki baka a goonliba aki, bi dë makandi baka ku dee lobiwan u de. Te sëmbë o toona weki baka a di ten di ta ko, nöö a di wan seei fasi nöö soni o pasa. Ma soni o dë möön bunu. Kumafa u bi lei a di u 3 Woto, Gadu kë taa hii di goonliba ko toon wan paladëisi. Hën da dee dëdë sëmbë an o toona ko a libi a wan goonliba ka feti, hogidu ku siki dë. De o sa libi u teego a di goonliba aki ka fii o dë, nöö de o dë ku piizii.

17 Ambë o toona weki baka? Jesosi bi taki taa ’hii dëdë sëmbë tuu o jei hën [Jesosi] töngö, nöö de tuu o weki kumutu a geebi toona ko ku libi baka’ (Johanisi 5:28, 29). Akoalimbo 20:13 seei taki taa: "Di ze seei puu hii dee dëdë dee bi dë nëën dendu tuu tja ko, nöö dëdë ku dëdëköndë [nasö Hades] seei puu dee sëmbë u de tja ko tu.” "Dëdëköndë” nasö Hades, da di geebi ka hii sëmbë nango. (Luku Woto fanöudu soni.) De o puu hii dee dëdë sëmbë dee dë naandë tja ko a döö. Hii dee sömëni milion sëmbë dee ta duumi naandë o toona weki baka. Di apösutu Paulosu bi taki taa: "Te sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu” (Tjabukama 24:15). Andi di soni dë kë taki?

18 Sömëni u ’dee sëmbë dee bi libi bunu a Masa Gadu wojo’, bi ta libi ufö Jesosi ko a goonliba. Woto u de sikifi a di Bëibel. Kandë i ta pakisei Noa, Abahamu, Sala, Mosesi, Luti, Ësitë, ku sömëni wotowan. Hebelejën 11 ta taki u so u dee womi ku dee mujëë aki di bi a’ wan taanga biibi a Gadu. Ma dee futuboi u Jehovah dee dëdë a di ten fuu aki seei dë ’sëmbë dee bi ta libi bunu a Masa Gadu wojo’ tu. U di u sabi taa sëmbë o weki baka, mbei wa ta fëëë dëdë möön.—Hebelejën 2:15.

A di Paladëisi, dee dëdë sëmbë o dë ku dee lobiwan u de baka

Sëmbë weki baka a Paladëisi

19 Unfa a dë ku hii dee sëmbë dee an bi ta dini Jehovah nasö dee an bi ta piki ën buka u di de an bi sabi ën wan daka? Gadu an o fëëkëtë dee milionmilion sëmbë dë "dee an bi libi bunu” nëën wojo. De seei a o toona weki baka, nöö de o abi di ten u ko sabi di tuutuu Gadu fu de sa dini ën tu. A wan pisiten u wan dusu jaa, dee dëdë sëmbë dë o toona weki, nöö de o feni di okasi u ko dini Jehovah, makandi ku woto libisëmbë di ta hoi deseei a Gadu. A o dë wan gaan suti ten. Di ten dë wë di Bëibel ta kai di Gaan Kuutudaka.#

20 Hën da hii sëmbë di bi libi a goonliba o toona weki baka u? Nönö. Di Bëibel taki taa so u dee dëdë sëmbë dë a "Gehena” [hën de puu ko "didibi faja” a Saamakatöngö] (Lukasi 12:5). Di në Gehena tei puu u wan dotihipi di bi dë a döösë u Jelusalen u fosuten. Dëdë sëmbë sinkii ku sundju de bi ta tjuma naandë. Dee Dju bi ta si dee dëdë di de tuwë naandë, kuma sëmbë di an bi fiti u de bei a wan geebi, nasö di an bi fiti u toona weki baka. Hën mbei a fiti u tei Gehena djeesi ku di dëdë di wan sëmbë o dëdë kaba a mundu, nöö de an o toona weki baka. Hii di Jesosi o abi di wooko u kuutu libisëmbë ku dëdë sëmbë, tökuseei Jehovah hën da di Gaan Kuutuma (Tjabukama 10:42). Nöiti a o weki dee sëmbë di a si taa de an o kë bia libi möönsö u di de abi takuhati.

DI WEKI SËMBË O WEKI U GO LIBI A HEMEL

21 Boiti taa sëmbë o weki u toona libi baka a goonliba aki, Bëibel ta taki söseei taa sëmbë o weki u go libi kuma jeje a hemel. Bëibel ta taki u wan sëmbë di bi weki baka u go libi a hemel. Hën da Jesosi Keesitu.

22 Baka di de kii Jesosi di a bi dë a goonliba aki, Jehovah an bi disa di Womi Mii fëën dë di bi hoi ënseei nëën, u kaba a sösö a geebi (Psalöm 16:10; Tjabukama 13:34, 35). Gadu bi toona weki Jesosi baka, ma na kuma libisëmbë. Di apösutu Petuisi bi taki taa ’de kii Keesitu di a bi dë wan libisëmbë, ma a toona ko a libi baka kuma wan jeje’ (1 Petuisi 3:18, NW). Di soni aki bi dë wan foombo soni tuutuu. Jesosi bi ko a libi baka kuma wan jeje di abi makiti! (1 Kolenti 15:3-6) Jesosi bi dë di fosuwan di toona weki a sö wan fasi (Johanisi 3:13). Ma an bi o dë di lasitiwan.

23 U di Jesosi bi sabi taa a bi o toona go a hemel, mbei a piki dee bakama fëën taa a bi o go "seeka kamian” da de ala (Johanisi 14:3). Jesosi bi taki taa dee sëmbë dee o go libi a hemel "dë biti”, nasö de dë wan "piki hipi” (Lukasi 12:32). Un mëni sëmbë o dë a di piki hipi u dee bakama u Keesitu dë? Akoalimbo 14:1 taa di apösutu Johanisi taki taa: "Mi si di Sikapu Mii [Jesosi Keesitu] taanputaanpu te a di kununu de kai Sion liba, nöö a dë ku 144.000 sëmbë nëën bandja. Nöö hii dee sëmbë dë tuu ta tja di në fëën ku di në fëën Tata sikifisikifi a de mindifesi.”

24 Dee apösutu dee bi hoi deseei a Jesosi Keesitu, dë söseei a dee 144.000 sëmbë dendu di o toona weki u go libi a hemel. Na un ten de ta weki baka? Di apösutu Paulosu bi sikifi taa de bi o toona weki a di pisiten te Keesitu o toona ko baka (1 Kolenti 15:23). Kumafa joo lei a di u9 Woto, nöö a di ten dë u ta libi nöunöu. Hën da di piki pisi di fika u dee 144.000 sëmbë di ta dëdë a di ten fuu aki, ta toona weki wantewante go libi a hemel (1 Kolenti 15:51-55). Ma di möön gaan pisi u libisëmbë abi di houpu u toona weki baka a di ten di ta ko, sö taa de sa libi a di Paladëisi a goonliba aki.

25 Aai, Jehovah o wini di felantima fuu de kai dëdë, nöö an o dë a mundu möön seei! (Jesaaja 25:8) Ma kandë i ta hakisi iseei taa: ’Andi dee sëmbë dee o toona weki u go libi a hemel o go du ala?’ De o dë wan pisi u di waiti Könuköndë tii a hemel. Woo lei woto soni u di tii aki a di woto di ta ko.

DEE SONI DI BËIBEL TA LEI U

  • Dee woto u Bëibel dee ta taki u sëmbë di bi toona weki, ta da u houpu.—Johanisi 11:39-44.
  • Jehovah ta hangi u tja dee dëdë sëmbë ko a libi baka.—Jöpu 14:13-15.
  • Hii dee sëmbë dee dë a geebi, o toona weki baka.—Johanisi 5:28, 29.

*  U sa lesi woto ka sëmbë toona weki a 1 Könu 17:17-24; 2 Könu 4:32-37; 13:20, 21; Mateosi 28:5-7; Lukasi 7:11-17; 8:40-56; Tjabukama 9:36-42; ku 20:7-12.

#  Ee i kë sabi woto soni u di Gaan Kuutudaka ku di fasi fa sëmbë o kisi kuutu, nöö luku Woto fanöudu soni.


Hakisi

1-3. Un felantima ta kule a hii u tuu baka? Faandi mbei hati fuu o kisi goon te u ta luku andi di Bëibel ta lei u di soni aki?

4. (a) Faandi mbei di soni di Jesosi bi du di wan mati fëën dëdë, ta lei u fa Jehovah ta fii te wan sëmbë dëdë? (b) Ku ambë Jesosi bi ko dë gaan mati?

5, 6. (a) Andi Jesosi du di a bi dë ku dee famii ku dee mati u Lazalosi di bi ta tjali? (b) Faandi mbei di fuka di Jesosi bi fuka ta da u taanga?

7, 8. Faandi mbei dee sëmbë dee bi dë a di geebi u Lazalosi, bi sa biibi taa houpu an dë da Lazalosi möön, ma andi Jesosi bi du?

9, 10. (a) Ambë da di Sëmbë di Jesosi taki taa dëën di kaakiti u weki Lazalosi baka? (b) Andi da so u dee wini joo kisi te i ta lesi dee woto u Bëibel ka dëdë sëmbë bi toona weki baka?

11. Unfa di wekibaka u Lazalosi ta söi taa di soni di sikifi a Pleikima 9:5 dë sö tuutuu?

12. Faandi mbei u sa dë seiki taa Lazalosi bi toona weki baka tuutuu?

13. Faandi mbei u sa biibi taa Jehovah sa weki dëdë sëmbë tuutuu?

14, 15. Kumafa Jöpu bi taki, nöö unfa Jehovah ta fii u weki dëdë sëmbë ko a libi baka?

16. Unfa soni o dë a goonliba te dee dëdë sëmbë o toona weki baka?

17. Un mëni sëmbë o toona weki baka?

18. Ambë dë a dendu u ’dee sëmbë dee bi libi bunu a Masa Gadu wojo’ di o toona weki baka? Nöö unfa di houpu aki abi kaakiti a i liba?

19. Ambë da dee sëmbë "dee an bi libi bunu” a Gadu wojo, nöö un okasi Jehovah da de a wan suti fasi?

20. Andi da Gehena, nöö ambë nango naandë?

21, 22. (a) Andi da di woto fasi fa sëmbë o toona weki baka? (b) Ambë da di fosu sëmbë di bi toona weki u libi kuma wan jeje?

23, 24. Ambë dë a di "piki hipi” u Jesosi, nöö un mëni sëmbë de dë?

25. Faandi woo taki a di woto di ta ko?