Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

DI U ËLUFU WOTO

Faandi mbei Gadu ta da pasi taa libisëmbë ta pena?

Faandi mbei Gadu ta da pasi taa libisëmbë ta pena?

Gadu hën ta mbei taa pena dë a goonliba u?

Andi da di fia di bi bigi a di djai u Eden?

Unfa Gadu o puu dee bakapisi u di pena di libisëmbë ta pena?

BAKA DI wan gaan feti bi pasa a wan köndë, dusudusu mujëë ku piki mii dëdë, hën de bi diki wan gaan baaku bei hii de tuu. Nöö de bi buta pikipiki lakpa pau lontu di kamian ko kai. A hibiwan u dee lakpa pau de bi sikifi: "Faandi mbei?” So toon te wan gaan tjali soni pasa, nöö sëmbë ta buta di hakisi aki. Ku tjali a hati de ta hakisi di soni aki te gaan feti, taku siki, nasö hogi mbei taa lobiwan u de dëdë, wosu u de booko, nasö taa de ta pena a wan woto fasi. Sëmbë ta kë sabi faandi mbei dee hogi aki ta miti de.

2 Faandi mbei Gadu ta da pasi taa libisëmbë ta pena? Ee Jehovah Gadu abi hii makiti, ee a a’ lobi, ee a a’ köni, ee a ta du soni a wan leti fasi, nöö faandi mbei takulibi dë sö hia a goonliba? I hakisi iseei dee soni aki wan daka kaa u?

3 A dë wan föutu soni u hakisi faandi mbei Gadu ta da pasi taa libisëmbë ta pena u? So sëmbë fëëë taa te de ta buta di lö hakisi aki, hën da de aan biibi tjika, nasö taa de an ta lesipeki Gadu. Ma te i ta lesi di Bëibel, nöö joo si taa sëmbë di bi a’ biibi ku di bi a’ gaan lesipeki da Gadu bi a’ dee lö hakisi aki tu. Di tjabukama Habaki bi dë wan u dee sëmbë dë. A bi hakisi Jehovah taa: "Faandi mbei i ta mbei mi ta si taku soni sö? Faandi mbei i ta dë piii ta luku fa sëmbë ta du hogi? Faandi mbei mi musu si fa sëmbë ta fufuu soni ku fa de ta pena wotowan? Faandi mbei sëmbë ta mbei toobi ku deseei sö? Faandi mbei de ta fia ku deseei sö?”—Habaki 1:3.

Jehovah o puu di pena di libisëmbë ta pena

Wan bei

4 Jehovah bi gandji da di tjabukama Habaki u di a bi hakisi ën dee soni dë u? Nönö, an gandji dëën, ma a mbei a sikifi dee soni dë a di Wöutu fëën dendu, di Bëibel. Gadu bi heepi ën tu faa ko sabi möön hia soni, nöö a bi heepi ën u di biibi fëën ko möön taanga tu. Jehovah kë du di wan seei soni dë da i tu. Na fëëkëtë taa di Bëibel ta lei taa Gadu "a’ toobi ku i” (1 Petuisi 5:7). Möön leki hibiwan libisëmbë, Gadu ta buuse hogilibi ku di fuka di pena ta tja ko da libisëmbë (Jesaaja 55:8, 9). Wë nöö, faandi mbei pena dë a goonliba sö?

FAANDI MBEI LIBISËMBË TA PENA GAANFA SÖ?

5 So sëmbë u peipei keiki go hakisi hedima u keiki ku leima u keiki, faandi mbei libisëmbë ta pena gaanfa sö. Hiniwan juu kaa dee hedima u keiki ta piki de taa Gadu hën kë taa libisëmbë ta pena, nöö a bi buta a fesi gaanduwe kaa unfa soni bi o pasa ku un pei hogi bi o miti sëmbë. Hedima u keiki piki sömëni sëmbë taa sëmbë an tjika u sabi fa Gadu ta wooko, ku söseei taa Gadu ta tja dëdë ko ta kii gaan sëmbë ku piki mii tuu, sö taa de sa go libi ku ën a hemel. Kumafa i bi lei, nöö na wan daka seei Jehovah Gadu ta mbei taa hogi ta pasa. Di Bëibel taa: "Na tuu seei taa di tuu Gadu ta du hogi e. Di Sëmbë di abi hii makiti an ta du fanafiti soni wan daka!”—Jöpu 34:10.

6 I sabi faandi mbei sëmbë ta mbei di föutu u da Gadu di hoginë u di pena di dë a goonliba u? Gaansë u de ta da Gadu di hoginë u di de mëni taa Gadu hën ta tii di goonliba aki. De an sabi wan gaan soni di Bëibel ta lei di an taanga u fusutan. A di u 3 Woto u di buku aki, i bi lei taa Saatan Didibi hën da di tiima u di goonliba aki.

7 Di Bëibel ta taki limbolimbo taa: ’Hii sëmbë u di goonliba aki tuu dë a didibi basu’ (1 Johanisi 5:19). Te i ta pakisei di tëkisi aki, an ta mbei i fusutan faandi mbei pena dë sö hia u? Dee sëmbë u di goonliba aki ta söi taa de abi dee fasi u di jeje di "ta ganjan sëmbë a hii di goonliba” (Akoalimbo 12:9). Saatan abi hogihati, a ta ganjan sëmbë, nöö a a’ takuhati tu. Hën mbei dee sëmbë dee dë nëën basu abi hogihati, de ta ganjan sëmbë, nöö de abi takuhati tu. Di soni aki da wan u dee soni di mbei taa libisëmbë ta pena gaanfa sö.

8 Di u tu soni di mbei taa libisëmbë ta pena gaanfa sö, hën da libisëmbë ko abi zöndu sensi di sëmbë bi hopo fia ku Gadu a di djai u Eden, kumafa u bi si a di u 3 Woto. Zöndu libisëmbë ta feti u basi wotowan, nöö di soni aki mbei taa feti ta feti, sëmbë ta peeta wotowan, nöö hia sëmbë ta pena tu (Pleikima 4:1; 8:9). Nöö di u dii soni di mbei taa libisëmbë ta pena hën da "hogi ta miti de a di ten di de an mëni” (Pleikima 9:11). U di di goonliba aki na abi Jehovah kuma Tiima u tjubi ën, mbei so juu sëmbë sa pena u di de dë a wan kamian a wan juu di wan hogi pasa.

9 A ta da u kötöhati te u sabi taa na Gadu hën ta mbei taa libisëmbë ta pena. Na hën ta mbei taa feti, hogidu, pena nasö woto fuka ta miti sëmbë di ta mbei taa de ta pena. Tökuseei u musu sabi faandi mbei Gadu ta da pasi taa dee soni aki ta pasa. Ee hën da di Makiti Gadu u mundu, nöö a abi di makiti u tapa dee soni dë. Nöö faandi mbei an ta du sö? Di lobihati Gadu di u ko sabi, sa’ faandi mbei.—1 Johanisi 4:8.

WAN GAAN FIA BI BIGI

10 Ee u kë sabi faandi mbei Gadu ta da pasi taa libisëmbë ta pena, nöö u musu buta mëni baka a di ten di pena bigi a goonliba. Di Saatan mbei taa Adam ku Eva pasa Jehovah buka, nöö di soni dë tja wan fanöudu hakisi ko. Saatan an fia taa Jehovah aan di makiti u tii. Saatan seei sabi taa Jehovah abi hii makiti. Saatan bi fia taa Jehovah aan di leti u tii libisëmbë. Di Saatan kai Gadu wan ganjansëmbëma di an kë u dee sëmbë di a ta tii feni bunu, nöö a sö wan fasi a söi taa Jehovah na wan bunu tiima (Kenesesi 3:2-5). Boo taa Saatan taki taa soni o go möön bunu da libisëmbë te Gadu an ta tii de. A sö wan fasi Saatan bi kuutu taa Jehovah aan di leti u tii hii soni.

11 Adam ku Eva bi hopo fia ku Jehovah. Te u luku ën bunu, nöö de bi taa: ’Wa abi Jehovah fanöudu faa dë u Tiima. U seei sa sabi da u seei andi da bunu ku hogi.’ Andi Jehovah bi o du? Unfa a bi o lei dee engel ku hii libisëmbë taa dee sëmbë dee fia ku ën aan leti, ku söseei taa di fasi fa a ta tii da di möön bunuwan tuutuu? Kandë so sëmbë bi o taki taa Gadu bi musu kii hii dee sëmbë dee bi hopo fia ku ën, nöö a mbei wotowan. Ma Jehovah bi taki taa dee bakamii u Adam ku Eva bi musu fuu di goonliba, söseei a bi kë taa de bi musu libi a wan paladëisi a goonliba aki (Kenesesi 1:28). Hibiwan juu kaa Jehovah ta du dee soni a ta taki (Jesaaja 55:10, 11). Boiti di dë, ee Jehovah bi kii dee sëmbë dee bi hopo fia ku ën a di djai u Eden, nöö di soni dë an bi o mbei taa woto sëmbë ko sabi ee hën abi di leti u tii tuutuu.

Wan mësitë ku dee mii fëën kalasi

Di siköö mii köni möön di mësitë u?

12 Boo luku wan woto u fusutan di soni aki. Wan mësitë ta lei dee mii fëën kalasi unfa de musu mbei wan sömu. Wan mii u di kalasi köni, ma a ta masa sëmbë tu, nöö a feni taa di fasi fa di mësitë ta puu di sömu, an bunu. Di mii aki ta hoi nöömö taa a sabi möön di mësitë unfa u puu di sömu. So u dee mii a di kalasi feni taa a abi leti, nöö deseei ta hoi baka dëën. Andi di mësitë o du? Ee a jaka dee masa fasi mii dë puu a di kalasi dendu, nöö andi dee woto mii o mëni? Dee woto mii o mëni taa dee mii dë bi abi leti, na sö nö? Kandë dee woto mii u di kalasi an bi o lesipeki di mësitë möön, nöö de bi o mëni taa di mësitë fëëë taa dee mii o lei ën taa aan leti. Ma boo taa di mësitë disa di masa fasi mii be a lei dee woto mii unfa a bi o puu di sömu.

13 Jehovah du di wan seei soni nöö. Hoi a pakisei taa na dee sëmbë dee fia ku Gadu a Eden nöö bi ta luku andi ta pasa. Milionmilion engel bi dë ta luku tu (Jöpu 38:7; Daniëli 7:10). Di soni di Jehovah bi o du ku dee sëmbë dë bi o abi kaakiti a dee woto engel liba, ku söseei hii woto libisëmbë. Wë andi Jehovah du? A da pasi be Saatan lei fa a bi o tii libisëmbë. Gadu disa libisëmbë tu be de tii deseei a di tii u Saatan basu.

14 Di mësitë a di woto di u luku aki, sabi taa di masa fasi mii ku dee woto mii dee hoi baka dëën, aan leti. Ma a bi sabi tu taa te a disa de be de lei fa de bi o puu di sömu, nöö di soni dë bi o bunu da hii di kalasi. Te dee mii dë an bi puu di sömu bunu, nöö hii dee woto mii bi o si taa di mësitë da di möön bunu sëmbë u tja di kalasi. De bi o fusutan faandi mbei di mësitë puu dee mii dë a di kalasi. Söseei Jehovah bi sabi taa hii limbohati libisëmbë ku engel bi o feni wini te de bi o si taa Saatan ku dee sëmbë dee hoi baka dëën an bi a’ leti, ku söseei taa libisëmbë an sa tii deseei. Leti kuma Jelemia di bi libi gaanduwe a fesi, de bi o ko sabi di fanöudu soni aki: "Ke Jehovah ooo, mi sabi bumbuu taa libisëmbë an tjika u sabi de pasi. Na wan libisëmbë seei di ta waka sa taki naasë a musu tuwë futu.”—Jelemia 10:23.

FAANDI MBEI A TEI SÖ LONGI?

15 Ma faandi mbei Jehovah da pasi taa libisëmbë ta pena sö longi? Nöö faandi mbei an ta tapa pasi u hogi an pasa? Wë, luku tu soni di di mësitë u di woto an bi o du. Di fosu soni hën da an bi o tapa di masa fasi mii be a lei fa a bi o puu di sömu. Di u tu soni hën da di mësitë an bi o heepi ën puu di sömu. Wë luku tu soni tu di Jehovah an du. Di fosu soni hën da Jehovah an tapa Saatan ku dee sëmbë dee bi hoi baka dëën u söi taa de a’ leti. Fëën mbei a bi bunu taa Jehovah da pasi sö longi be libisëmbë tii deseei. A dee dusudusu jaa di pasa, libisëmbë pooba peipei fasi u tii deseei. Libisëmbë go a fesi te u luku dee soni sabima ta mbei ku woto soni. Ma u ta si taa hogilibi, pena, takulibi ku feti ko möön hia seei. Nöunöu libisëmbë söi kaa taa de aan di leti u tii.

16 Di u tu soni hën da Jehovah an heepi Saatan u tii di goonliba. Ee Gadu bi tapa pasi taa hogihati soni an ta pasa, nöö a bi o hoi baka da dee sëmbë di fia ku ën, na sö nö? Gadu bi o mbei sëmbë mëni taa sonte libisëmbë sa tii deseei, söndö u hogi ta pasa. Ee Jehovah bi du sö, nöö a bi o dë wan ganjansëmbëma tu. Ma ’Gadu an sa ganjan sëmbë möönsö’.—Hebelejën 6:18.

Gadu o heepi i fii hoi dou te i dë ku fuka

Wan mujëë ta kisi taanga a di Wöutu u Gadu

17 Ma andi u sa taki u dee taku bakapisi di ko u di libisëmbë ta fia ku Gadu sö longi? A bunu fuu mëni taa Jehovah abi hii makiti. Fëën mbei a sa puu hii dee taku bakapisi di ko u di libisëmbë ta pena, nöö a o du ën tu. Kumafa u lei kaa, sëmbë an o poi di goonliba möön, ma di goonliba o toon wan paladëisi. Sëmbë di ta buta biibi a di lusupaima u Jesosi, an o abi zöndu möön, nöö ka u sëmbë dëdë, de o toona weki baka. Hën da Gadu o mbei Jesosi "poi dee wooko u di didibi” (1 Johanisi 3:8). Jehovah o du hii dee soni aki a di möön bunu ten. U sa wai taa an du di soni aki a fesi, biga u di a hoi pasensi mbei u kisi di okasi u feni di tuutuu biibi sö taa u sa dini ën (2 Petuisi 3:9, 10). Nöunöu Gadu ta suku dee limbohati sëmbë dee kë dini ën, nöö a ta heepi de be de hoi dou sö taa de pasa hiniwan soni di ta pooba de a di buuja goonliba aki.—Johanisi 4:23; 1 Kolenti 10:13.

18 Kandë so sëmbë ta hakisi deseei: Ee Gadu bi mbei Adam ku Eva a sö wan fasi taa de an bi sa hopo fia ku ën, nöö sëmbë bi o pena sö u? Ufö i piki di hakisi aki, nöö i musu mëni wan gaan dii kado di Jehovah da i.

ANDI JOO DU KU DI KADO DI GADU DA I?

19 Kumafa u si a di u 5 Woto, Gadu bi mbei libisëmbë a sö wan fasi taa de sa du soni ku deseei kë. I ta fusutan un bigi di soni aki dë u? Gadu mbei gaan hia beti, ma de aan di töönzön u du soni kuma libisëmbë (Nöngö 30:24). I bi o wai ee Gadu bi mbei u sö u? Nönö, u ta wai taa u sa dë di lö pei sëmbë di u kë dë, u sa libi kumafa u kë, u sa tei mati ku ambë u kë, kai ko möön. U lobi te u sa du andi u kë. Wë di soni dë Gadu bi kë da u.

20 Jehovah an ta piizii te u ta du soni dëën ku guunjan kuma sëmbë duwengi u (2 Kolenti 9:7). Ee wan sëmbë piki wan mii faa go konda da hën mama nasö hën tata taa a lobi de, unfa di mama nasö di tata bi o fii? Kandë a bi o wai. Ma boo taa di mii seei waka go nëën mama nasö tata nöö a piki ën taa: "Maama o, nasö taata o, mi lobi i e”, di mama nasö di tata an bi o möön wai ö? Wë a dë fanöudu fii go pakisei andi joo du u di Jehovah mbei i a sö wan fasi taa i sa du soni ku iseei kë. Saatan, Adam, ku Eva an du bunu kwetikweti. De tapa u dini Jehovah Gadu. Andi joo du?

21 I abi di okasi u söi taa joo du wan bunu soni ku di kado di Gadu da i. I sa dë wan u dee milionmilion sëmbë di tei di së u Jehovah. Dee sëmbë dë ta mbei Gadu piizii u di de söi limbolimbo taa Saatan da wan mindisonima, ku söseei taa an sa tii a wan bunu fasi (Nöngö 27:11). I sa du di seei soni tu, te i tei di möön bunu fasi u libi di dë. Woo taki u di soni aki a di woto di ta ko.

DEE SONI DI BËIBEL TA LEI U

  • Na Gadu hën mbei taa di goonliba hogi sö.—Jöpu 34:10.
  • Di Saatan taki taa Jehovah da wan ganjansëmbëma di an kë taa dee sëmbë di a ta tii, feni bunu, nöö a sö wan fasi a söi taa Jehovah na wan bunu tiima.—Kenesesi 3:2-5.
  • Jehovah o mbei taa di Womi Mii fëën di dë Könu u di Könuköndë, puu di pena libisëmbë ta pena, nöö a o puu dee taku bakapisi fëën tu.—1 Johanisi 3:8.

Hakisi

1, 2. Un pei pena ta miti sëmbë nöunöu, nöö andi de ta hakisi deseei?

3, 4. (a) Andi ta lei u taa an dë wan föutu soni u hakisi faandi mbei Gadu ta da pasi taa libisëmbë ta pena? (b) Unfa Jehovah ta pakisei u hogilibi ku söseei u di pena di libisëmbë ta pena?

5. Andi dee hedima u keiki ta piki te sëmbë hakisi de faandi mbei libisëmbë ta pena, ma andi di Bëibel ta lei?

6. Faandi mbei gaansë u sëmbë ta mbei di föutu u da Gadu di hoginë u di pena di dë a goonliba?

7, 8. (a) Unfa dee sëmbë u di goonliba aki ta söi taa de abi dee fasi u di tiima u de? (b) Unfa zöndu ku ’hogi di ta miti u a di ten di wa mëni’ ta mbei taa libisëmbë ta pena?

9. Faandi mbei u sa dë seiki taa Jehovah sabi faandi mbei a ta da pasi taa libisëmbë ta pena jeti?

10. Andi da di fia di Saatan fia ku Gadu, nöö unfa a du ën?

11. Faandi mbei Jehovah an bi kii dee sëmbë dee bi hopo fia ku ën a di djai u Eden?

12, 13. Konda wan woto di ta lei faandi mbei Jehovah da pasi be Saatan toon tiima u di goonliba aki, ku söseei faandi mbei Gadu disa libisëmbë be de tii deseei.

14. Un wini a bi o tja ko u di Jehovah da pasi be libisëmbë tii deseei?

15, 16. (a) Faandi mbei Jehovah da pasi taa libisëmbë ta pena sö longi? (b) Faandi mbei Jehovah an tapa pasi taa hogihati soni ta pasa?

17, 18. Andi Jehovah o du ku hii dee taku bakapisi di ko u di libisëmbë ta tii deseei a di tii u Saatan basu?

19. Andi da di gaan dii kado di Jehovah da u, nöö faandi mbei u musu si ën kuma wan gaan soni?

20, 21. Unfa u sa söi taa woo du wan bunu soni ku di kado di Gadu da u, nöö faandi mbei u musu du sö?