Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

DI U TENI-A-AITI WOTO

Dopu ta mbei taa u ko dë möön zuntu u Gadu

Dopu ta mbei taa u ko dë möön zuntu u Gadu

Na un fasi wan Keesitu sëmbë musu dopu?

Un maiki i musu dou fii sa tei dopu?

Unfa wan sëmbë ta butëën libi a Gadu maun?

Andi da di apaiti soni di ta mbei taa wan sëmbë hopo go tei dopu?

"MATI, wë wata dë aki. Na u mi dopu wante nö?” Di soni aki wan hei sëmbë u Etiopia di bi libi a di fosu jaahöndö bi hakisi. Wan bakama u Keesitu de kai Filipi bi lei ën taa Jesosi bi dë di Mësiasi di Gadu bi paamusi. U di dee soni di Etiopia womi dë bi lei a Bëibel bi dou hën hati, mbei a hopo du wan soni. A bi söi taa a kë tei dopu!—Tjabukama 8:26-36.

Wan hei sëmbë u Etiopia di bi libi a di fosu jaahöndö

2 Ee i lei soni finifini a dee fosu woto u di buku aki ku wan u dee Kotoigi u Jehovah, nöö kandë i feni taa di juu dou awaa u hakisi iseei: ’Na u mi dopu wante nö?’ I ko sabi taa Bëibel paamusi u taa sëmbë sa libi u teego a di Paladëisi (Lukasi 23:43; Akoalimbo 21:3, 4). Söseei i ko saandi ta pasa ku wan sëmbë te a dëdë, nöö i ko sabi taa sëmbë o toona weki baka tu (Pleikima 9:5; Johanisi 5:28, 29). Kandë i ko nama ku dee Jehovah Kotoigi a dee komakandi u de, nöö iseei si fa de ta libi kumafa di tuutuu biibi ta lei (Johanisi 13:35). Ma aan misi taa di möön gaan soni di i du, hën da i bigi tei Jehovah Gadu kuma mati.

3 Unfa i sa söi taa i kë dini Gadu? Jesosi bi piki dee bakama fëën taa: "Un musu…ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de” (Mateosi 28:19). Jesosi seei bi du di soni dë u di a bi tei dopu a wata. De an bi jaa wata nëën sinkii nöö, nöö de an bi munjëën hedi ku pikisö wata nöö tu (Mateosi 3:16). De tei di wöutu "dopu” puu u wan Giiki wöutu di kë taki "doki”. Hën da te wan bakama u Keesitu ta dopu, nöö hii hën sinkii ta dë a basu wata.

4 Ee wan sëmbë kë dë mati u Jehovah Gadu, nöö a musu tei dopu a wata. Te i tei dopu, nöö i ta mbei hii lanti ko sabi taa i kë dini Gadu. A sö wan fasi i ta söi taa i ta piizii u du di kë u Jehovah (Psalöm 40:7, 8). Ma ee i kë tei dopu, nöö wanlö maiki dë di i musu dou.

I MUSU SABI SONI U BËIBEL, NÖÖ I MUSU A’ BIIBI TU

5 I bigi kaa ku di fosu soni di i musu du. Unfa sö? U di i ta lei soni a Bëibel hii juu sö taa i ko sabi Jehovah Gadu ku Jesosi Keesitu (Johanisi 17:3). Ma woto soni dë di i musu ko sabi jeti. Dee Keesitu sëmbë kë ’ko sabi bumbuu fa Gadu kë taa de musu libi’ (Kolosën 1:9). Wan soni di o heepi i gaanfa, hën da te i nango a dee komakandi u dee Jehovah Kotoigi. A dë fanöudu taa i nango a dee lö komakandi dë (Hebelejën 10:24, 25). Te i nango hii juu a dee komakandi, nöö joo ko sabi möön hia soni u Gadu.

Wan fanöudu soni di wan sëmbë musu du ee a kë tei dopu, hën da a musu tei di soifi lei a Wöutu di u Gadu

Wan sëmbë di ta lei soni u Bëibel

6 An dë fanöudu taa i ko sabi hii soni u Bëibel ufö i sa tei dopu. Di hei sëmbë u Etiopia bi sabi wanlö soni, ma sëmbë bi musu heepi ën faa fusutan so u dee pisi u di Bëibel (Tjabukama 8:30, 31). Sö a dë taa i musu lei hia soni jeti. Te i luku ën bunu, ja o kaba u lei soni u Gadu wan daka (Pleikima 3:11). Ma ufö i sa tei dopu, i musu ko sabi dee möön fanöudu lei u Bëibel, nöö i musu fiti de a i libi tu (Hebelejën 5:12). I musu ko sabi soni kuma andi ta pasa ku wan sëmbë te a dëdë, faandi mbei di në u Gadu ku di Könuköndë fëën dë fanöudu.

7 Ma di sabi wanwan an tjika, biga di Bëibel taa: "An dë taa Gadu sa a’ piizii möönsö ku wan sëmbë di an ta biibi e. Kwetikweti” (Hebelejën 11:6). Di Bëibel ta konda da u taa di so u dee sëmbë u di fosuten Kolenti bi jei di buka di dee bakama u Jesosi bi ta paaja, nöö de bi "ko ta biibi tu ta tei dopu” (Tjabukama 18:8). A di wan seei fasi, di lei i ta lei soni u Bëibel, musu mbei i biibi taa Bëibel da di Wöutu u Gadu di a buta sëmbë sikifi. Di lei i ta lei soni u Bëibel musu taanga di biibi fii a dee paamusi u Gadu ku söseei taa di dëdë u Jesosi sa puu i a hogi basu.—Josua 23:14; Tjabukama 4:12; 2 Timoteo 3:16, 17.

KONDA DEE TUU LEI U BËIBEL DA WOTOWAN

8 Fa i si di biibi fii ta taanga aki, nöö ja o sa hoi dee soni dee i lei fii iseei nöö, joo konda de da wotowan (Jelemia 20:9). Joo kë konda soni u Gadu da wotowan seei, ku söseei dee soni a o du.—2 Kolenti 4:13.

Di biibi fii musu mbei taa i konda dee soni i lei da wotowan

Wan womi ta konda dee soni a lei da wotowan

9 I sa bigi konda a wan köni fasi dee tuu lei u Bëibel da dee famii fii, dee mati fii, dee sëmbë dee ta libi zuntu fii ku wooko kompe fii. Baka wan pisi ten, joo kë pleiki makandi ku dee Jehovah Kotoigi kumafa de seeka soni. Te i kë du sö, nöö na fëëë u go taki ku di Kotoigi di ta lei i soni u Bëibel. Ee a djei kuma i dou dee maiki u go a di pleikiwooko, nöö soni o seeka sö taa i ku di Kotoigi di ta lei i soni u Bëibel, miti ku tu gaanwomi u di gemeente.

10 Di soni dë o mbei taa joo ko sabi so u dee gaanwomi dee ta tii di hipi u Gadu (Tjabukama 20:28; 1 Petuisi 5:2, 3). Ee dee gaanwomi dë si taa i ta fusutan nöö i ta biibi dee möön fanöudu lei u Bëibel, taa libi fii ta kai ku dee maiki u Gadu, ku söseei taa i kë dë wan Kotoigi u Jehovah tuutuu, nöö de o piki i taa i sa pleiki di bunu njunsu kuma wan pleikima di an dopu jeti.

11 Ma kandë dee gaanwomi o feni taa i musu disa so guwenti di i a abi ku söseei taa i musu tooka soni a di fasi fa i ta libi sö taa i dou dee maiki fii sa go a di pleikiwooko. Kandë i musu kaba ku soni di i bi ta du tjubitjubi. Fëën mbei bifö i hakisi u toon wan pleikima di an dopu jeti, nöö i musu kaba ku gaan zöndu kuma fanafiti libi a di së u manu ku mujëë, bebe daan dööngö ku söseei soni de ta kai drugs.—1 Kolenti 6:9, 10; Galasia 5:19-21.

DI AWOO LIBI FII MUSU HATI I NÖÖ I MUSU BIA LIBI

12 Woto soni dë di i musu du ufö i sa tei dopu. Di apösutu Petuisi bi taki taa: ’Dee hogilibi fuunu musu hati unu te nöö un bia disa de…Nöö Gadu an o hoi unu a bëë möön’ (Tjabukama 3:19). Hën da di awoo fasi fa i bi ta libi musu hati i te na soni. Ee wan sëmbë bi ta libi wan jajo libi, nöö tjali musu kisi ën taa a bi ta libi a sö wan fasi. Ma ee wan sëmbë an bi ta libi a di fasi dë, tökuseei di awoo libi fëën musu hati ën. Faandi mbei? Biga hii libisëmbë da zönduma, nöö u musu kisi paadon u Gadu (Loomë 3:23; 5:12). Ufö i bigi lei soni u Bëibel, ja bi sabi andi da di kë u Gadu. Wë nöö ja bi o sa libi kumafa Gadu kë, na sö nö? Fëën mbei a dë fanöudu taa di awoo libi fii musu hati i.

13 Baka di dë, nöö i musu ’bia libi’. Ja musu tjali u dee soni i bi du nöö. I musu bia disa di awoo fasi fa i bi ta libi, nöö i musu dë kabakaba taa bigi u tide joo ta libi leti a Gadu wojo. Hën da ufö i tei dopu, di awoo libi fii musu hati i, nöö i musu bia libi tu.

BUTA I LIBI A GADU MAUN

14 Wan woto fanöudu soni dë di i musu du ufö i tei dopu. I musu buta i libi a Jehovah Gadu maun.

15 Te i ta begi Jehovah Gadu ku hii i hati taa i kë buta i libi nëën maun, nöö i ta paamusi ën taa hën wanwan tö joo ta dini u nöömö (Detolonomi 6:15). Ma faandi mbei wan sëmbë bi o kë du sö wan soni? Wë pakisei taa wan womi ta pidi wan mujëë. Möön a ta ko sabi soni u di mujëë dë, ta si dee bumbuu fasi fëën, möönmöön a o ko lobi ën. Baka wan pisiten, nöö a musu u hakisi di mujëë ee an kë toou ku ën. Te hën ku ën toou kaa, nöö woto wooko o ko nëën liba. Ma u di a lobi di mujëë, mbei a toou ku ën.

16 Te i ko sabi Jehovah ku te i ko lobi ën, nöö joo kë dini ën ku hii i hati, ja o disa na wan soni tapa i fu ja dini ën kumafa a kë. Hiniwan sëmbë di kë waka a di Womi Mii u Gadu baka, Jesosi Keesitu, ’musu disa di soni di ënseei kë du’ (Maikusi 8:34). U ta söi taa u disa dee soni useei kë du te wa ta mbei dee fii fuu ku dee soni u kë du tapa u u piki Gadu buka a hii soni. Hën da ufö i sa tei dopu, di möön fanöudu soni a i libi musu dë u du di kë u Jehovah Gadu.—1 Petuisi 4:2.

NA FËËË TAA JA O HOI ISEEI A GADU

17 So sëmbë ta naanaa u buta de libi a Gadu maun u di de ta fëëë pikisö u du sö wan gaan soni. Kandë de ta fëëë taa Gadu o kai de a kuutu te de an libi kuma wan sëmbë di buta ënseei nëën maun. U di de ta fëëë taa de o mbei föutu ku söseei taa de o mbei Jehovah fii tjali, mbei de feni taa a möön bunu ee de an buta de libi nëën maun.

18 Te i ko lobi Jehovah, nöö joo kë buta i libi nëën maun, söseei joo mbei taanga möiti u libi kumafa i paamusi ën (Pleikima 5:4). Na soni u taki taa baka te i buta i libi a Jehovah maun, nöö joo kë "libi bunu nëën wojo, leti kumafa a fiti u dee sëmbë fëën musu ta libi” (Kolosën 1:10). U di i lobi Jehovah, mbei ja o feni taa a taanga da i poi u du di kë fëën. U dë seiki taa di soni di apösutu Johanisi bi sikifi, o kai ku i. A bi taa: "Ee u lobi Masa Gadu tuu, nöö woo hoi dee wëti fëën dee a da u fuu hoi. Nöö dee wëti fëën an hebi da u poi.”—1 Johanisi 5:3.

19 An dë fanöudu taa i musu dë wan sëmbë di an ta mbei föutu ufö i sa buta i libi a Gadu maun. Jehovah sabi andi i sa du, nöö an o hakisi i fii du wan soni di ja sa du tu (Psalöm 103:14). A kë taa soni nango bunu da i, nöö a o heepi i tu (Jesaaja 41:10). I sa dë seiki taa ee i ta futoou Jehovah ku hii i hati, nöö hënseei "o buta i a tololoo pasi”.—Nöngö 3:5, 6.

TEI DOPU U SÖI TAA I BUTA I LIBI A GADU MAUN

20 Te i ta pakisei dee soni u taki djunsu aki, nöö de o heepi i fii begi Jehovah u buta i libi nëën maun. Hiniwan sëmbë di lobi Gadu tuutuu musu "piki a lanti fesi taa a a’ biibi, nöö di soni dë o mbei taa a feni heepi” (Loomë 10:10, NW). Unfa i ta du di soni dë?

I begi Gadu u piki ën taa i kë buta i libi nëën maun ö?

Wan womi ta begi

21 Piki di gaanwomi di ta tei fesi da dee woto gaanwomi u di gemeente taa i kë tei dopu. A o seeka soni taa woto gaanwomi ko luku so u dee möön fanöudu lei u Bëibel makandi ku i. Ee dee gaanwomi dë feni taa i kaba u tei dopu, nöö de o piki i taa i sa tei dopu a di fosu okasi di o ko.* A dee okasi dë, wan baaa ta hoi wan taki ka a ta konda andi da di dopu sëmbë ta dopu. Baka di dë, nöö di takima ta kai dee sëmbë dee o tei dopu u de piki tu hakisi di na taanga u piki seei. Di dë da wan u dee fasi fa de ta "piki a lanti fesi” taa dee a’ biibi.

22 Di dopu seei hën ta mbei taa sëmbë ko sabi taa i buta i libi a Gadu maun ku söseei taa i dë wan Jehovah Kotoigi awaa. Te wan sëmbë ta tei dopu, nöö hii hën sinkii ta dë a basu wata. A sö wan fasi a ta lei hii lanti taa a butëën libi a Jehovah maun.

DI SONI DI DOPU FII KË TAKI

23 Jesosi bi taki taa dee bakama fëën bi o dopu "a di në u di Tata, di Womi Mii, ku di santa jeje” (Mateosi 28:19, NW). Di dë kë taki taa wan sëmbë di kë tei dopu musu sabi taa Jehovah Gadu ku Jesosi Keesitu abi makiti gaanfa (Psalöm 83:18; Mateosi 28:18). Söseei a ta fusutan gbelingbelin unfa di santa jeje u Gadu, di kaakiti fëën, ta wooko.—Galasia 5:22, 23; 2 Petuisi 1:21.

Te wan sëmbë ta tei dopu, hën da a dëdë, u di a disa di awoo fasi fa a bi ta libi, nöö a ko a libi baka faa du di kë u Gadu

De ta dopu wan womi

24 Ma dopu an dë wan sootu pei wasi nöö. A ta söi taa i du wan gaan fanöudu soni. Te de saka i go a basu wata, hën da i dëdë u di i kaba ku di awoo fasi fa i bi ta libi. Te i hopo ko a liba, hën da i ko a libi baka fii du di kë u Gadu. Hoi a pakisei taa a Jehovah Gadu maun i buta i libi, ja buta i libi a wan wooko basu, a woto libisëmbë basu nasö a wan feleniki basu. Te i buta i libi a Gadu maun, nöö i tei dopu, hën da i bigi u abi wan bunu matifasi ku Gadu. Joo ko dë gaan mati ku ën seei.—Psalöm 25:14.

25 Te i tei dopu, nöö nëën da i feni heepi eti e. Di apösutu Paulosu bi sikifi taa: ’Un musu ta biinga nöömö ku gaan lesipeki, ku panta u Gadu, be un feni heepi nëën’ (Filipi 2:12). Bigi i bigi awaa fa i tei dopu dë. Di soni aki i musu hakisi iseei: ’Unfa mi sa hoi miseei a Gadu be a ta lobi mi?’ Di lasiti woto u di buku aki o piki di hakisi dë.

DEE SONI DI BËIBEL TA LEI U

  • Te wan bakama u Keesitu ta tei dopu, nöö hii hën sinkii ta dë a basu wata, na munjan nöö a ta munjan sinkii.—Mateosi 3:16.
  • Ufö wan sëmbë tei dopu, nöö a musu bigi lei soni u Bëibel, a musu söi taa a a’ biibi; baka di dë a musu fii tjali u di awoo libi fëën, a musu bia libi, nöö a musu butëën libi a Gadu maun.—Johanisi 17:3; Tjabukama 3:19; 18:8.
  • Ee i kë buta i libi a Jehovah maun, nöö i musu disa dee soni iseei kë du, leti kumafa so sëmbë bi du u toon bakama u Jesosi.—Maikusi 8:34.
  • Te wan sëmbë ta tei dopu, hën da a dëdë, u di a kaba ku di awoo fasi fa a bi ta libi, nöö a ko a libi baka faa du di kë u Gadu.—1 Petuisi 4:2.

*  Dopu da wan u dee soni di dë u si a dee kring komakandi ku dee kongres di Jehovah kotoigi ta hoi hiniwan jaa


Hakisi

1. Faandi mbei wan hei sëmbë u Etiopia bi hakisi u tei dopu?

2. Faandi mbei i musu pakisei fundu u dopu?

3. (a) Un wooko Jesosi bi da dee bakama fëën? (b) Unfa wan sëmbë ta dopu a wata?

4. Andi wan sëmbë ta söi te a tei dopu a wata?

5. (a) Andi da di fosu soni di i musu du fii sa tei dopu? (b) Faandi mbei dee komakandi dë fanöudu?

6. I musu sabi hii soni u Bëibel ufö i sa tei dopu ö?

7. Andi musu dë di bakapisi u di lei i ta lei soni u Bëibel?

8. Andi o mbei taa joo kë konda dee soni i lei da wotowan?

9, 10. (a) Ambë i sa bigi konda dee tuu lei u Bëibel da? (b) Andi i musu du ee i kë pleiki makandi ku dee Jehovah Kotoigi kumafa soni seeka?

11. Andi wan sëmbë musu tooka nëën libi ee a kë dou dee maiki u go a di pleikiwooko?

12. Faandi mbei a dë fanöudu taa di awoo libi fii musu hati i?

13. Andi da bia libi?

14. Un fanöudu soni i musu du ufö i tei dopu?

15, 16. Andi a kë taki te i buta i libi a Gadu maun, nöö andi ta mbei wan sëmbë du di soni dë?

17. Faandi mbei so sëmbë ta naanaa u buta de libi a Gadu maun?

18. Andi o mbei taa joo kë buta i libi a Jehovah maun?

19. Faandi mbei ja musu fëëë u buta i libi a Gadu maun?

20. Faandi mbei i musu mbei sëmbë ko sabi taa i buta i libi a Jehovah maun?

21, 22. Unfa i sa "piki a lanti fesi” taa i a’ biibi?

23. Andi a kë taki te wan sëmbë ta tei dopu "a di në u di Tata, di Womi Mii, ku di santa jeje”?

24, 25. (a) Andi di dopu ta söi? (b) Un hakisi u musu piki?