Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

WOTO FANÖUDU SONI

Ambë da di hedibasia de kai Mikaëli?

Ambë da di hedibasia de kai Mikaëli?

BËIBEL an ta taki hia soni u di basia [nasö engel] u Masa Gadu de kai Mikaëli. Ma te Bëibel ta taki soni u Mikaëli, nöö hii juu a ta du wan soni. U ta lesi a di buku Daniëli taa Mikaëli ta feti ku dee basia dee ko hogi, nöö a di biifi u Judasi a ta fia ku Saatan. Söseei na Akoalimbo a ta feti ku Didibi ku dee basia fëën. Di hoi Mikaëli ta hoi baka da di tii u Jehovah ku di feti a ta feti ku dee felantima u Gadu ta lei taa a ta libi kumafa di në fëën dë. Di në fëën kë taki "Ambë dë kuma Gadu”? Ma ambë da Mikaëli?

So toon wan sëmbë ta abi möön leki wan në. Sö wë de bi ta kai di gaan tata Jaköpu Isaëli tu, nöö di apösutu Petuisi seei de bi ta kai Simon (Kenesesi 49:1, 2; Mateosi 10:2). Leti sö nöö di Bëibel ta lei taa di woto në di Jesosi Keesitu bi abi ufö a ko a goonliba da Mikaëli, nöö hën a abi jeti di a go a hemel. Boo go luku wanlö tëkisi di ta hoi baka da di soni di u taki aki.

Hedibasia. Di Wöutu u Gadu ta kai Mikaëli "di hedibasia” u dee woto basia u Masa Gadu (Judasi 9). Hoi a pakisei taa Mikaëli de ta kai di hedibasia. Di soni dë kë taki taa na wan woto basia dë kuma ën. Di Bëibel ta taki u wan hedibasia nöö, an ta taki u dee hedibasia. Boiti di dë Jesosi ta du di wooko u wan hedibasia. A 1 Tesalonika 4:16 u ta lesi u Masa Jesosi Keesitu di weki baka taa: "Masa seei o bazia kumutu a hemel ku wan gaan töngö ta kai sëmbë, awa, ku wan töngö u wan hedibasia.” Hën da Jesosi abi wan töngö u wan hedibasia. Fëën mbei di tëkisi aki ta lei u taa Jesosi da di hedibasia de kai Mikaëli.

Fesima u sodati. Di Bëibel taa: "Mikaëli ku dee basia fëën go feti ku di gaan kaima…ku dee basia fëën” (Akoalimbo 12:7). Hën da, Mikaëli da di Fesima u hii dee bumbuu basia u Gadu. Söseei Akoalimbo ta lei taa Jesosi da di Fesima u hii dee sodati u Masa Gaangadu köndë (Akoalimbo 19:14-16). Nöö di apösutu Paulosu ta taki soni u "Masa Jesosi” ku "dee makiti basia fëën” (2 Tesalonika 1:7, NW). Hën da di Bëibel ta konda soni u Mikaëli ku "dee basia fëën” ku söseei u Jesosi ku "dee basia fëën” (Mateosi 13:41; 16:27; 24:31; 1 Petuisi 3:22). Ma di Wöutu u Gadu an ta taki a na wan kamian taa tu pei kulupu bumbuu basia dë a hemel. A ta taki nöö taa Mikaëli da Fesima ku söseei taa Jesosi da Fesima. Fëën mbei u sa fusutan taa Mikaëli nöö da Jesosi Keesitu di abi makiti a hemel.

← Luku di kapitel