Skip to content

Skip to secondary menu

Skip to table of contents

Jehovah Kotoigi

Saamakatöngö

Andi di Bëibel ta lei u tuutuu?

DI FOSU WOTO

Ambë da Gadu tuutuu?

Ambë da Gadu tuutuu?

Gadu ta booko hën hedi ku u tuutuu ö?

Unfa Gadu dë? A abi wan në u?

U sa ko zuntu u Gadu ö?

I BUTA mëni wan daka kaa a di fasi fa piki mii ta hakisi soni ö? Gaansë u de ta hakisi soni fa i si de sa’ u fan, kuma di mii i ta si a di footoo aki. De ta hakisi soni kuma, andi da di soni dë, nasö, faandi mbei a dë sö. Kandë i ta pooba seei u piki dee hakisi u de, ma na hii juu i ta saanfa i musu piki de. So toon ee i piki de bunu seei, tökuseei de ta toona hakisi i: Ma faandi mbei a dë sö?

2 Na piki mii nöö ta hakisi soni. U ta hakisi soni te u ta ko gaan sëmbë tu. Te wa sabi naasë wan kamian dë, nöö u ta hakisi sëmbë. U ta hakisi soni tu, sö taa hogi an miti u nasö te u kë ko sa’ soni. Ma hia sëmbë an ta hakisi soni möön u ko sabi dee möön fanöudu soni. Boo taa de an ta pooba möön u feni piki u dee möön fanöudu hakisi.

Wan piki mii ta hakisi soni

3 Unfa i pakisei u di hakisi di dë a di kafiti u di buku aki, nasö u dee hakisi a dee fosu pisi u di buku aki? Nasö unfa i feni dee hakisi a di bigi u di woto aki. Dee hakisi dë, da so u dee möön fanöudu soni di i sa hakisi iseei. Ma sömëni sëmbë an ta mbei möiti möön u ko sabi dee fanöudu soni dë. Faandi mbei? A dë sö taa di Bëibel aan dee piki ö? So sëmbë feni taa dee piki u dee hakisi dë taanga poi u fusutan. Wotowan ta fëëë u kisi sen te de o hakisi soni. Nöö so sëmbë feni taa a möön bunu u disa dee soni dë da hedima u keiki ku leima. Unfa i si ën?

4 Kandë a dë sö taa i kë ko sabi dee möön fanöudu soni u di libi. Kandë so toon i ta hakisi iseei: ’Faandi mbei u ta libi? Wan möön bunu libi dë u? Unfa Gadu dë tuutuu?’ A bunu fii hakisi iseei dee soni aki, te kuma i feni bunu piki di i sa futoou. Di möön gaan leima Jesosi Keesitu bi taki taa: "Un musu ta hakisi soni, nöö woon kisi. Un musu ta suku soni, nöö woon feni. Un musu ta naki di döö, nöö di döö o jabi da unu.”—Mateosi 7:7; NW.

5 Ee i "ta suku” u feni dee piki u dee möön fanöudu hakisi, nöö joo si taa na u sösö i mbei möiti (Nöngö 2:1-5). Aan toobi andi woto sëmbë sa piki i, dee piki u feni, nöö i sa feni de a di Bëibel. Dee piki an taanga poi u fusutan. Di möön bunu soni hën da de o da i houpu, söseei de o tja kölöku ko da i. De sa heepi i tu fii abi wan bunu libi nöunöu kaa. Boo buta mëni a wan hakisi di ta toobi sömëni sëmbë.

A DË SÖ TAA GADU AN TA BOOKO HËN HEDI KU U Ö?

6 Gaansë u sëmbë bi o piki taa aai. U di de feni taa ee Gadu bi ta booko hën hedi ku u, nöö di goonliba an bi o dë sö. Biga te u ta luku andi ta pasa a goonliba, nöö feti tö u ta si, sëmbë ta buuse wotowan, söseei hia sëmbë dë ku tjali a hati. Nöö an kaba jeti e. U ta suwaki, u ta pena, söseei sëmbë di u lobi ta dëdë. Hën mbei gaansë u sëmbë ta taki taa ee Gadu bi ta booko hën hedi ku u, nöö an bi o disa dee soni aki pasa ku u, na sö nö?

7 Ma wan möön hogi soni seei hën da dee leima u keiki ta mbei sëmbë pakisei taa Gadu aan fii da sëmbë. Unfa sö? Wë te hogi miti sëmbë, nöö de ta taki taa sö wë Gadu kë taa a musu pasa e. Te i luku ën bunu, nöö dee leima aki ta da Gadu di hoginë u dee hogi soni dee ta pasa. Ma sö wan sëmbë Gadu dë u? Andi di Bëibel ta lei u tuutuu? Jakobosi 1:13 taa: "Te nöutu ta miti wan sëmbë, nöö an musu taa Gadu hën ta du ku ën e, biga Gadu an ta du hogi soni ku sëmbë, söseei sëmbë an sa du hogi soni ku ën tu” (NW). Fëën mbei u sa taki taa na Gadu hën ta mbei taa hogi ta pasa a goonliba (Jöpu 34:10-12). A dë sö tuu taa Gadu ta disa hogi soni be de pasa. Ma te wan sëmbë ta disa wan soni be a pasa, ku te a ta mbei taa wan soni pasa, nöö na di wan seei soni.

8 Luku di woto aki. Wan köni tata di a’ lobihati, abi wan gaan womi mii di ta libi nëën mama ku tata wosu jeti. Di womi mii mbei toobi taa an kë tan ku de möön, hën wë di tata disëën faa go fëën. Hën a go fëën go libi wan taku libi, u te fuka miti ën. Wë nöö di tata hën mbei taa fuka miti ën u? Wë nönö (Lukasi 15:11-13). Söseei di libisëmbë buta a de hedi taa de o libi a wan fasi di na bunu, nöö Gadu disa de be de libi fa de kë. Ma na Gadu hën mbei taa de ko abi fuka bakaten. Hën mbei an bunu kwetikweti u da Gadu di hoginë u dee fuka libisëmbë abi.

9 Gadu sa’ faandi mbei a disa libisëmbë be de go waka wan taku pasi. A dë wan köni Gadu di abi makiti, söseei a mbei hii soni. Hën mbei an abi u konda da u faandi mbei a du sö. Ma u di Gadu lobi u, mbei a konda hii soni da u. Woo taki möön fini u di soni aki a di u 11 Woto. I sa abi di futoou taa na Gadu hën ta mbei taa fuka ta miti u. Ma hën wanwan tö ta da u di houpu taa u sa kumutu a fuka basu!—Jesaaja 33:2.

10 Wan woto soni hën da Gadu dë santa (Jesaaja 6:3). Hën da a dë limbolimbo söndö föutu. Na wan pikisö hogi seei dë nëën. Hën mbei u sa futoou ën hii juu. Ma libisëmbë ta ko hogi so toon, hën mbei na hii juu u sa futoou de. Dee möön bunu sëmbë dee ta tii seei aan di makiti u seeka soni ko möön bunu a goonliba. Ma Gadu abi hii makiti. A sa seeka hii soni ko bunu baka, nöö a o du ën tu. Te Gadu o hopo du wan soni, nöö a o mbei taa hogidu kaba a mundu!—Psalöm 37:9-11.

UNFA GADU TA FII TE HOGI TA MITI U?

11 Unfa Gadu ta pakisei u dee soni dee ta pasa a goonliba ku dee soni dee ta miti i? Wë di Bëibel ta lei u taa Gadu "lobi letilibi” (Psalöm 37:28). Hën da a ta booko hën hedi gaanfa te soni an nango bunu. A kë taa soni waka bunu. A buuse hii pei hogilibi. Di Bëibel taa di hogi bi fuu goonliba a di ten di pasa, nöö Gadu "bi fii ën gaanfa te nëën hati dendu” (Kenesesi 6:5, 6). Gadu an tooka (Maleaki 3:6). Te kuma tide, Gadu an lobi seei te a ta si di pena di dë a hii di goonliba. Gadu an lobi te sëmbë ta pena. Di Bëibel taa Gadu "a’ toobi ku i”.—1 Petuisi 5:7.

12 Faandi mbei u sa dë seiki taa Gadu an lo’ u si te sëmbë ta pena? Boo luku wan woto soni. Di Bëibel ta lei u taa Gadu mbei sëmbë kumafa hënseei dë (Kenesesi 1:26). U di Gadu abi bunu fasi, mbei taa u seei abi bunu fasi tu. A ta toobi i, te i ta si taa sëmbë di na du hogi ta pena u? Ee a ta toobi i, nöö i sa dë seiki taa a ta toobi Gadu möön gaanfa seei.

13 Wan u dee möön gaan soni di u kuma libisëmbë sa du, hën da u sa lobi wotowan. Di soni aki seei ta söi fa Gadu dë. Di Bëibel ta lei u taa Gadu "hatiböö da lobi”, nasö "Gadu da lobi” (1 Johanisi 4:8, NW). U ta lobi wotowan biga Gadu lobi sëmbë. Lobi bi o mbei taa i du wan soni sö taa di pena ku di hogilibi di i ta si, kaba a goonliba u? Ee i bi a’ di makiti u du sö wan soni, ja bi o du ën u? Aai! I sa dë seiki taa Gadu o puu pena ku hogilibi a goonliba. Dee paamusi dee dë a dee fosu pisi u di buku aki na sunjan, nasö soni di wa sa futoou. Dee paamusi u Gadu o ko tuu! Ee i kë abi biibi a de, nöö i musu ko sabi möön hia soni u di Gadu di paamusi de.

GADU KË TAA I KO SABI AMBË DËËN

14 Andi i bi o du ee i kë taa wan sëmbë ko sabi i? Ja bi o konda i në dëën u? Gadu a’ wan në u? Sömëni keiki ta konda taa hën në da "Gadu” nasö "Masa”, ma dee wöutu aki na në disi. A dë di wan seei soni leti kuma te de ta kai wan sëmbë "gaama” nasö "kabiteni”. Di Bëibel ta lei u taa peipei fasi dë fa de ta kai Gadu. So u de da "Gadu” nasö "Masa”. Ma di Bëibel ta lei u tu taa Gadu a’ wan në. Hën në da Jehovah. Psalöm 83:18 taa: "Di në fii da Jehovah. I wanwan tö da di Kaba Heiwan u hii mundu.” Ee di Bëibel fii aan di në aki, nöö i sa go luku Woto fanöudu soni u di buku aki, nöö joo sa faandi mbei. Te i luku ën bunu, nöö di në u Gadu bi sikifi sömëni dusu toon di de bi sikifi Bëibel a fesiten. Hën da Jehovah kë taa i ko sabi di në fëën, söseei a kë fii kai ën nëën në. U sa taki taa a da u di Bëibel sö taa i sa ko sabi ambë dëën.

Wan mujëë ta konda hën në da wan wotowan

Te i kë wan sëmbë ko sabi i, nöö i ta konda i në dëën, na sö nö? A di Bëibel, Gadu ta konda hën në da u

15 Di në di Gadu da hënseei kë taki hia soni. Di në fëën, Jehovah, ta söi taa Gadu sa du hii dee soni di a paamusi, söseei a sa du hii dee soni dee a abi a pakisei.* Gadu abi wan apaiti në. Na wan woto sëmbë abi di në aki. Hën wanwan tö sa tja di në aki. Jehovah dë wan apaiti Gadu a peipei fasi. Unfa sö?

16 U bi si taa Psalöm 83:18 bi taa Jehovah "wanwan tö da di Kaba Heiwan”. Söseei Jehovah wanwan tö di Bëibel ta kai di "makiti Gadu u mundu”. Akoalimbo 15:3 taa: "Ke Masa Gadu ooo, di makiti Gadu u mundu, dee soni dee i ta du, de bigi e. Aai. De foondo tu. Fa i sai dë, nöö i dë di könu ta tii fu nöömö. Hii dee fasi fii seei dee i abi, de tuu dë gbelingbelin söndö ganjan, nöö i a leti a dee soni i ta du.” Dee wöutu "makiti Gadu u mundu”, ta lei u taa na wan sëmbë nasö na wan woto gadu abi makiti kuma Jehovah. Di makiti u Jehovah bigi te na soni. Dee wöutu "könu ta tii fu nöömö”, ta lei u wan woto soni u Jehovah. Hën wanwan tö an abi wan bigi, hii juu kaa Jehovah bi dë. Psalöm 90:2 taa: "Ke Gadu ooo, i bi dë hii juu kaa, joo dë Gadu u nöömö.” Di soni aki an ta foondo u ö?

17 Jehovah dë apaiti tu, u di hën wanwan tö mbei hii soni. Akoalimbo 4:11 taa: "Ke Masa Gadu o, i bigi. I nöö waiti tjika fii kisi gafa e. I wanwan fiti fii kisi hei, ku makiti a mundu o. Biga fa i sai naandë, nöö i wë mbei hii soni u mundu tuu. Nöö fu di i bi kë sö, nöö hën mbei i mbei de buta fa i si de sai dë.” Hii soni di i sa kai ko kaa, Jehovah hën mbei de buta dë. Jehovah hën mbei dee jeje a hemelköndë, dee hia teeja dee i ta si a liba te ndeti, dee peipei pau-njanjan, ku söseei dee fisi dee ta libi a lio ku ze!

I SA KO ZUNTU U JEHOVAH U?

18 So sëmbë ta fii wan fasi te de ta lesi u dee waiti fasi Jehovah abi. De ta fii kuma de an sa ko zuntu u sö wan Gaangadu wan daka. Nasö de ta fii kuma Gadu an o buta mëni a de wan daka. Ma a bunu fuu pakisei sö u? Di Bëibel ta lei u wan woto soni. A ta lei u taa Jehovah "an dë longi poi ku hibiwan fuu” (Tjabukama 17:27). Di Bëibel ta da u di degihati aki: "Ko zuntu u Gadu, nöö a o ko zuntu fii tu.”—Jakobosi 4:8, NW.

Di Bëibel ta lei u taa Jehovah da di lobihati Gadu di mbei hii soni

Dee soni Gadu mbei

19 Unfa i sa ko zuntu u Gadu? Wë di fosu soni di i musu du, hën da i musu go dou ku di soni di i ta du nöunöu aki. I musu ta lei u ko sabi Gadu. Jesosi bi taa: "Nöö andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki” (Johanisi 17:3). Bëibel ta lei u taa te u ko sabi Jehovah ku Jesosi, nöö woo feni "di libi u teego”! Kumafa u si kaa, nöö "Gadu, hën abi lobi” (1 Johanisi 4:16). Jehovah abi woto waiti fasi. A abi fasi di ta hai sëmbë ko nëën tu. Di Bëibel ta lei u taa Jehovah dë ’wan Gadu di abi tjalihati u sëmbë, a lobi sëmbë, hati fëën an ta boonu hesi, a ta du te a hia bunu u di a abi lobi, söseei tuutuu soni tö a ta taki’ (Ëkisodesi 34:6). Jehovah dë wan "bunu Gadu, söseei a dë kabakaba u da sëmbë paadon” (Psalöm 86:5). Gadu abi pasensi (2 Petuisi 3:9). An ta disa sëmbë fëën (Akoalimbo 15:4, NW). Möön i ta lesi di Bëibel, möönmöön joo ko si fa Jehovah ta söi dee fasi aki. Söseei joo ko si taa a abi woto fasi di ta hai sëmbë ko nëën.

20 A dë sö tuu taa ja sa si Gadu, biga a dë wan jeje (Johanisi 1:18; 4:24; 1 Timoteo 1:17). Ma te i ta lei soni u Gadu a di Bëibel, nöö joo ko sabi ën. A o dë kuma te i ta lei ko sabi wan sëmbë. Leti kumafa wan psalöm sikifima bi taki, joo si "dee waiti fasi u Jehovah” (Psalöm 27:4; Loomë 1:20). Möön i ko lei soni u Jehovah, möönmöön joo ko si taa a dë tuutuu. Nöö joo ko fusutan faandi mbei i musu lobi ën, söseei joo ko möön zuntu fëën.

Wan tata ku ën womi mii

Wan bumbuu tata lo’ dee mii fëën gaanfa. Di soni dë ta lei u taa u Tata a hemelköndë, lobi u möön gaanfa seei

21 Joo ko fusutan faandi mbei di Bëibel ta lei u taa u musu si Jehovah kuma u Tata (Mateosi 6:9). Jehovah hën da u libi, ma na di soni dë nöö a bi kë da u. A kë taa u abi di möön bunu libi di dë, leti kumafa wan lobihati tata bi o kë da dee mii fëën (Psalöm 36:9). Di Bëibel ta lei u taa libisëmbë seei sa ko toon mati u Jehovah (Jakobosi 2:23). Pakisei di soni aki pikisö. I sa ko toon wan mati u di Gadu di mbei hii soni!

22 Fa i si i ta lei soni u di Bëibel aki, nöö sëmbë di kë bunu fii o kë tapa i fu ja lei go dou. Kandë de o ta fëëë taa joo disa dee soni i bi ta biibi, go a wan woto keiki. Wë nöö na mbei na wan sëmbë tapa i fii ko dë mati ku di möön bumbuu sëmbë di dë.

23 Ma soni o dë di ja o fusutan wantewante. I musu abi sakafasi u hakisi sëmbë soni, ma ja musu naanaa u di i ta sen. Jesosi bi taki taa a bunu u abi sakafasi, leti kumafa piki mii abi sakafasi (Mateosi 18:2-4). Leti kumafa u sabi, piki mii ta hakisi hia soni. Gadu kë taa i ko feni dee piki u dee fanöudu hakisi. Di Bëibel ta gafa so sëmbë di bi giii u ko sabi Gadu. De bi ta lesi Gadu Buku finifini ta wegi ta luku u dë seiki taa dee soni de bi lei, dë di tuutuu lei.—Tjabukama 17:11.

24 Di möön bunu fasi fa i sa ko sabi Jehovah, hën da te i ta öndösuku di Bëibel. Di Bëibel tooka u hii dee woto buku. Na un futu? A di woto di ta ko woo taki u di soni dë.

DEE SONI DI BËIBEL TA LEI U

  • Gadu ta booko hën hedi ku hiniwan fuu.—1 Petuisi 5:7.
  • Di në u Gadu da Jehovah.—Psalöm 83:18.
  • Jehovah ta kai i fii ko zuntu fëën.—Jakobosi 4:8.
  • Jehovah abi lobihati, a lobi sëmbë, söseei a a’ tjalihati u sëmbë.—Ëkisodesi 34:6; 1 Johanisi 4:8, 16.

*  Ee i kë sabi möön fini andi di në u Gadu kë taki, ku ee i kë sabi unfa sëmbë bi ta kai di në dë, nöö luku Woto fanöudu soni.


Hakisi

1, 2. Faandi mbei a bunu so toon u hakisi soni?

3. Faandi mbei sömëni sëmbë an ta mbei möiti möön u feni dee piki u dee möön fanöudu hakisi?

4, 5. Andi da so u dee möön fanöudu soni u di libi, di u sa hakisi u seei? Faandi mbei u musu suku dee piki?

6. Andi mbei gaansë u sëmbë ta taki taa Gadu an ta booko hën hedi ku u?

7. (a) Unfa dee leima u keiki ta mbei sëmbë pakisei taa Gadu aan fii da sëmbë? (b) Andi di Bëibel ta lei te nöutu ta miti u?

8, 9. (a) Unfa i bi o söi taa an dë di wan seei soni te wan sëmbë ta disa wan soni be a pasa, ku te a ta mbei taa wan soni pasa? (b) Faandi mbei an bi o bunu u da Gadu di hoginë u di a disa libisëmbë be de waka wan taku pasi?

10. Faandi mbei u sa biibi taa Gadu o seeka hii soni ko bunu baka?

11. (a) Unfa Gadu ta pakisei u hogilibi? (b) Unfa Gadu ta fii te i ta pena?

12, 13. (a) Faandi mbei u abi bunu fasi kuma lobi, nöö unfa lobi ta mbei u si dee soni dee ta pasa a goonliba? (b) Faandi mbei i sa dë seiki taa Gadu o du wan soni tuutuu sö taa fuka kaba a goonliba?

14. Andi da di në u Gadu? Faandi mbei u musu kai ën nëën në?

15. Andi di në Jehovah kë taki?

16, 17. Andi u sa lei u Jehovah te u ta luku dee wöutu aki: (a) "makiti Gadu u mundu”? (b) "Könu ta tii fu nöömö”? (c) Di Gadu di "mbei hii soni u mundu”?

18. Faandi mbei so sëmbë ta fii kuma de an sa ko zuntu a Gadu wan daka, ma andi di Bëibel ta lei u?

19. (a) Unfa u sa ko zuntu u Gadu, nöö un bunu di soni dë o tja ko da u? (b) Undi u dee fasi u Gadu i möön lobi?

20-22. (a) A dë sö taa u di wa sa si Gadu, nöö wa sa ko zuntu fëën u? Konda faandi mbei. (b) Andi sëmbë di kë bunu fii sa kë taa i musu du, ma andi i musu du?

23, 24. (a) Faandi mbei i musu go dou u buta hakisi u dee soni i ta lei? (b) Faandi woo taki a di woto di ta ko?