Skip to content

Skip to table of contents

Jehovah ta paka dee sëmbë dee ta suku ën ku hii de hati

Jehovah ta paka dee sëmbë dee ta suku ën ku hii de hati

„Te wan sëmbë joo ko [a Gadu], nöö i musu biibi taa a dë. Nöö söseei tu i musu biibi taa a ta paka dee sëmbë dee ta suku ën ku wan hati.”HEBELEJËN 11:6.

KANDA: 85, 134

1, 2. (a) Unfa lobi ku biibi nama ku deseei tjika? (b) Un hakisi woo luku a di woto aki?

DI TATA fuu Jehovah, paamusi dee dinima fëën taa a o mbei de feni gaan bunu. A dë wan fasi fa a ta lei u taa a lobi u, nöö u lobi ën u di „hën fosu lobi u” (1 Johanisi 4:19). Te u ko ta lobi Jehovah möön gaanfa, nöö woo ta biibi ën möön gaanfa tu, söseei woo möön dë seiki taa a o paka dee sëmbë dee a lobi.Lesi Hebelejën 11:6.

2 Jehovah ta paka dee dinima fëën! Di soni aki da wan u dee fanöudu soni di a ta du. Fëën mbei te u dë seiki taa Gadu o paka dee sëmbë dee ta suku ën ku hii de hati, nöö nëën ufö u sa taki taa u ta biibi Gadu tuutuu. Faandi mbei u taki sö? Wë u di „biibi hën da wan soni dë a i hati i ta mëni nöö i sabi gbelingbelin taa joo feni ën nöömö” (Hebelejën 11:1). Te wan sëmbë abi biibi, hën da a dë seiki taa Gadu o mbei dee sëmbë dee ta dini ën ku hii de hati feni gaan bunu. Wë un wini u ta feni te u ta biibi taa Gadu o paka u? Unfa Jehovah bi paka dee  dinima fëën a di ten di pasa, nöö unfa a ta paka de a di ten aki? Wë boo go luku.

JEHOVAH PAAMUSI DEE DINIMA FËËN TAA A O MBEI DE FENI GAAN BUNU

3. Andi Jehovah paamusi u te u luku andi sikifi a Maleaki 3:10?

3 Jehovah Gadu paamusi dee dinima fëën taa a o paka de. A ta piki u taa u musu dini ën ku hii u hati, söseei u musu abi di futoou taa a o mbei u feni gaan bunu. Jehovah taa: „Un pooba mi luku.” Hën a taki möön taa: „Nöö woon si fa mi o jabi dee döö u liba ala, sö taa bunu o kai ko a unu liba kuma tjuba. Mi o mbei un feni bunu sö tee, taa na wan soni o makei unu” (Maleaki 3:10). U ta lei taa u dë ku tangi a hati da di soni aki te u ta pooba Jehovah luku kumafa a piki u.

4. Faandi mbei u sa futoou di soni di Jesosi paamusi u a Mateosi 6:33?

4 Jesosi paamusi dee bakama fëën taa Gadu o heepi de, te de buta di Könuköndë a di fosu kamian a de libi. (Lesi Mateosi 6:33.) Jesosi bi sa taki di soni dë, u di a bi sabi taa hii juu dee soni di Gadu paamusi ta pasa tuutuu (Jesaaja 55:11). Fëën mbei u sa dë seiki taa ee u ta biibi Jehovah ku hii u hati, nöö a o du di soni di a paamusi u. A taa: „Ma o disa i seepi, kwetikweti. Na wan juu mi o disa i wanwan möönsö” (Hebelejën 13:5). Di soni di Jehovah paamusi u aki, ta heepi u fuu sa futoou dee soni di Jesosi taki a Mateosi 6:33.

Jesosi lei dee bakama fëën taa Gadu o paka de u di möiti di de ta mbei (Luku palaklafu 5)

5. Faandi mbei di soni di Jesosi piki Petuisi ta da hii u tuu taanga?

5 Wan daka, apösutu Petuisi bi hakisi Jesosi  taa: „Uu bi disa hii soni seei ko ta waka a i baka, nöö un paima u o feni?” (Mateosi 19:27) Jesosi an bi bai Petuisi di a bi hakisi ën di soni aki, ma a bi piki dee bakama fëën taa Gadu bi o paka de u di de bi disa soni u dini ën. Dee apösutu ku woto sëmbë dee bi dini Gadu ku hii de hati, o tii makandi ku Jesosi a liba ala. Ma Jesosi bi taki tu taa nöunöu kaa Gadu ta paka dee dinima fëën. A taa: „Hii dee sëmbë dee disa de wosu, ee nasö de baaa, ee nasö sisa, tata, mama, miii, pandasi kamian, hiniwan soni fu di a kë waka a mi baka hedi, mi taki da unu taa dee lö sëmbë dë an o lasi. Biga de o toona feni dee soni naandë höndö toon baka, nöö te fu kaba fëën nöö de o feni di libi u teego a Gadu tu” (Mateosi 19:29). Hii dee bakama u Jesosi sa feni mama ku tata, baaa ku sisa, söseei miii a di kemeente a di ten aki. Di soni aki dii möön dee soni dee u disa u di Könuköndë u Gadu hedi.

„WAN HANKA” DI TA MBEI DI BIIBI FUU DË GINGIN

6. Faandi mbei Jehovah ta paamusi dee dinima fëën taa a o paka de?

6 Hii fa u ta feni sömëni gaan bunu nöunöu kaa, tökuseei u ta wakiti fuu feni dee möön gaan bunu a di ten di ta ko (1 Timoteo 4:8). Jehovah paamusi dee dinima fëën taa a o paka de. Nöö u di u sabi di soni aki, mbei a ta heepi u fuu hoi dou aluwasi fuka ta miti u. Te u dë seiki taa Jehovah o „paka dee sëmbë dee ta suku ën ku wan hati”, nöö woo sa hoi useei a Jehovah u nöömö.Hebelejën 11:6.

7. Unfa di biibi fuu dë kuma wan hanka?

7 A di taki di Jesosi bi hoi a di kuun liba, a bi taki taa: „Un musu ta wai da di dë e. Un musu ta piizii seei, biga a Masa Gadu Köndë ala woon feni wan gaan paima. Biga leti sö nöö wë de bi du ku dee tjabukama u Gadu dee bi dë bifö unu” (Mateosi 5:12). So u dee dinima u Gadu o feni di paka u de a Gadu Köndë ala. Wotowan o feni di libi u teego a wan paladëisi a goonliba aki. Di soni aki seei da wan soni di musu mbei u „ta wai” seei (Psalöm 37:11; Lukasi 18:30). Di biibi fuu sa dë „kuma wan hanka” di ta mbei di biibi fuu dë gingin (Hebelejën 6:17-20). Leti kumafa wan hanka ta hoi wan boto te gaan ventu ko, sö nöö te di biibi fuu taanga, nöö a sa heepi u fuu hoi useei gingin a Gadu. A sa da u taanga fuu hoi dou te fuka ta miti u.

Jehovah paamusi dee dinima fëën taa a o paka de, nöö u di u sabi di soni aki, mbei a ta heepi u fuu hoi dou aluwasi fuka ta miti u

8. Unfa di biibi di u ta biibi taa Jehovah o paka u, ta heepi u fu wa ta booko u hedi gaanfa poi?

8 Di biibi di u ta biibi taa Gadu o paka u, sa heepi u fu wa ta booko u hedi gaanfa poi. Leti kumafa fatu u kii sindja sa mbei i fii bunu, sö nöö dee soni dee Gadu paamusi u sa da u kötöhati. A ta da u kötöhati te u sabi taa Jehovah o heepi u te u tuwë dee fuka fuu dëën (Psalöm 55:22). U dë seiki taa Gadu „sa du soni gaanfa möön leki fa u ta begi ën” (Efeise 3:20). Na heepi nöö  Jehovah o heepi u, ma a o heepi u „gaanfa möön fa u ta begi ën”!

9. Unfa u sa dë seiki taa Jehovah o mbei u feni dee gaan bunu dee a paamusi u?

9 Ee u kë feni di paka di Jehovah o da u, nöö u musu ta biibi Jehovah ku hii u hati, söseei u musu ta piki ën buka a soni. Mosesi bi piki dee Isaëli sëmbë taa: „Ma Jehovah di Gadu fuunu, o mbei un feni gaan bunu, te un ta piki hën buka a soni, söseei te un du hii soni soifi kumafa a piki unu tide. Jehovah di Gadu fuunu o mbei un feni gaan bunu kumafa a paamusi unu” (Detolonomi 15:4-6). I dë seiki taa Jehovah o mbei i feni gaan bunu ee i ta dini ën ku hii i hati go dou ö? I sa futoou di soni di sikifi aki.

JEHOVAH HËN BI PAKA DE

10, 11. Unfa Jehovah bi paka Josëfu?

10 Jehovah mbei sëmbë sikifi Bëibel fuu sa feni wini fëën. A di Bëibel u ta feni sömëni woto di ta lei unfa Gadu bi paka dee dinima fëën a di ten di pasa (Loomë 15:4). Josëfu bi dë wan u dee sëmbë aki. Di fosu soni hën da, dee baaa fëën sei ën kuma saafu. Bakaten, di mujëë u di basi fëën mindi soni dëën, hën de butëën a dunguwosu a Egepiti. Jehovah bi go disa Josëfu di a bi dë a dunguwosu ö? Wë nönö! Di Bëibel ta taki taa: „Hii juu Jehovah bi ta dë ku Josëfu. A bi ta lei ën taa a ta hoi hënseei nëën”, nöö „Jehovah bi dë ku Josëfu, nöö a bi ta mbei hii dee soni dee Josëfu bi ta du, ta waka bunu” (Kenesesi 39:21-23). Hii fa soni bi ta taanga da Josëfu, tökuseei a bi ta wakiti di Gadu fëën ku pasensi.

11 Baka wantu jaa, hën Falao puu Josëfu a dunguwosu, hën di saafu aki di bi abi sakafasi bi ko toon di u tu möön hei tiima u Egepiti (Kenesesi 41:1, 37-43). Josëfu ku hën mujëë pai tu womi mii, hën ’Josëfu kai di fosuwan Manase, nöö hën a bi taki taa ’Gadu mbei mi fëëkëtë hii dee fuka u mi, ku hii di wosu u mi tata’. A kai di wotowan Efalahim, nöö hën a bi taki taa ’Gadu mbei mi pai mii a di köndë ka mi bi ta pena’ (Kenesesi 41:51, 52). Jehovah bi paka Josëfu u di hoi di a bi ta hoi hënseei nëën, nöö a bi sa heepi dee Isaëli sëmbë ku dee Egepiti sëmbë u hangi pena an kii de. Wë Josëfu bi sabi taa Jehovah hën bi pakëën, nöö a bi sabi tu taa hën bi mbei a feni gaan bunu tu.Kenesesi 45:5-9.

A musu u dë sö taa Jesosi bi ta piizii seei u mbei di në u Gadu ko santa

12. Unfa Jesosi bi hoi hënseei a Gadu di tesi bi miti ën?

12 Jesosi Keesitu seei bi piki Gadu buka, hii fa sömëni tesi bi ta miti ën, nöö Jehovah bi pakëën. Andi bi heepi Jesosi faa hoi hënseei a Gadu? Di Wöutu u Gadu ta piki u taa: „Masa Jesosi bi dë a goonliba aki, hënseei bi abi wan maaka nëën fesi tu di a bi ta biinga u dou nëën. Hën da di wai di a o wai a bakaten. Nöö fëën mbei aluwasi fa di sitaafu u di lakpa pau [posu, NW] bi hebi dëën u tjai, ma tökuseei a tjëën e, dee sëmbë. An bi a’ toobi ku di sen di de dëën naandë” (Hebelejën 12:2). A musu u dë taa Jesosi bi ta piizii seei u mbei di në u Gadu ko santa. Gadu bi lei Jesosi taa libi fëën ta kai ku ën, nöö a bi dëën sömëni gaandi. Di Bëibel taki  taa „a go sindo fëën a di kaba hebi kamian a di letimaun së u Gadu ala”. U ta lesi a di Bëibel tu taa: „Masa Gaangadu weki ën tja go buta a di möön kaba hei kamian u mundu. Hën a dëën wan në di hei möön hii në.”Filipi 2:9.

JEHOVAH AN TA FËËKËTË DEE BUNU SONI DEE U TA DU

13, 14. Unfa Jehovah ta si dee soni dee u ta du dëën?

13 U sa dë seiki taa Jehovah ta tei hii dee soni dee u ta du dëën u bigi. A ta sabi te wa dë seiki u wan soni, nasö te u ta si kuma wa o sa du wan soni. A ta booko hën hedi ku u gaanfa te u ta booko u hedi ku wooko soni, nasö te wa sabi fa woo sölugu dee sëmbë fuu wosudendu. Söseei a sabi te wa sa du dee soni dee u bi guwenti u du a di dini fëën, u di u ko siki, nasö u di u ta fii booko saka. U sa dë seiki taa Jehovah ta tei ën u bigi te u ta hoi useei nëën, aluwasi fuka ta miti u.Lesi Hebelejën 6:10, 11.

14 Hoi a pakisei tu taa Jehovah hën da „di sëmbë di ta haika begi”. U sa dë seiki taa te u ta begi ën, nöö a o ta haika u (Psalöm 65:2). Di Tata fuu ka „hii kötöhati ta kumutu” o da u hii soni di u abi fanöudu fuu sa dë mati ku ën u nöömö. So juu a sa mbei dee baaa ku dee sisa fuu ko da u kötöhati (2 Kolenti 1:3). Jehovah ta wai te u abi tjalihati da wotowan. Di Bëibel taki taa: „Di sëmbë di ta du bunu da dee möfina sëmbë ta leni Jehovah wan soni, nöö a o toona paka di sëmbë dë da di bunu di a du” (Nöngö 19:17; Mateosi 6:3, 4). Fëën mbei te u ta da dee baaa ku dee sisa fuu soni, söseei te u ta heepi de, nöö Jehovah ta si dee bunu dee u ta du kuma wan soni di u leni ën. Nöö a paamusi u taa hënseei o paka di paima dë.

DEE PAKA DEE U TA FENI NÖUNÖU KAA, SÖSEEI DEE WOO FENI A DI TEN DI KO

15. Un paka i ta wakiti fii feni? (Luku di peentje a bigi u di woto.)

15 Jesosi o paka dee salufu Keesitu sëmbë, u di a buta ’wan paima kabakaba da de kaa, fu di de bi ta libi a wan leti fasi nëën wojo’ (2 Timoteo 4:7, 8). Ma di soni aki an kë taki taa i möön lagi a Gadu wojo u di joo feni wan woto paima. Milionmilion u dee „oto sikafu” ta wakiti fajafaja u libi u teego a wan paladëisi a goonliba aki. Naandë „de o piizii seei biga bööböö libi o dë pasa maaka.”Johanisi 10:16; Psalöm 37:11.

16. Un kötöhati u ta feni a 1 Johanisi 3:19, 20?

16 So juu u sa fii taa wa ta du hia soni a di dini u Jehovah tjika, nasö so juu u sa pakisei taa Jehovah an ta wai ku dee soni dee u ta du. So juu u sa fii tu kuma wa fiti u kisi na wan paka seei. Ma nöiti u musu fëëkëtë taa „Gadu hei möön libisëmbë hati”. (Lesi 1 Johanisi 3:19, 20.) Te u ta dini Jehovah u di u ta biibi ën, söseei u di u lobi ën, nöö u sa dë seiki taa a o paka u, aluwasi a sa djei kuma dee soni dee u ta du dëën an bigi sö.Maikusi 12:41-44.

17. Andi da wantu u dee paka di u ta feni nöunöu kaa?

17 Hii fa u ta libi a dee lasiti daka u di hogi goonliba u Saatan aki, tökuseei Jehovah ta mbei dee sëmbë fëën feni gaan bunu. A ta mbei u ko sabi te a hia soni, söseei a ta mbei u feni kötöhati, u di u abi sömëni baaa ku sisa a hii së u goonliba (Jesaaja 54:13). Kumafa Jesosi bi paamusi u, nöö Jehovah ta paka u nöunöu kaa, u di a ta da u baaa ku sisa a hii së u goonliba di lobi u (Maikusi 10:29, 30). Boiti di dë, Gadu ta paka dee sëmbë dee ta suku ën ku hii de hati, u di a ta da de kötöhati pasa maaka, nöö a ta mbei de fii  bunu, söseei a ta mbei de ta dë waiwai.Filipi 4:4-7.

18, 19. Unfa dee dinima u Jehovah ta si di paka di a ta paka de?

18 Di Tata fuu Jehovah, ta paka dee dinima fëën a hii së u goonliba. Luku di woto u Bianca di ta libi na Alumanköndë. A taki taa: „Ma tjika u da Jehovah tangi u di fasi fa a ta heepi mi ku dee bookohedi u mi, söseei fa a ta dë ku mi hiniwan daka. Di goonliba buuja seei, nöö sömëni bookohedi dë nëën. Ma fa mi ta wooko makandi ku Jehovah, nöö mi ta fii taa a ta tjubi mi. Te mi du wan soni dëën, nöö a ta toona paka mi höndöhöndö toon möön hia.”

19 Luku di woto u Paula di ta libi a Kanada di abi 70 jaa. A bi abi wan siki nëën baka mindi bonu di bi ta tapëën faa du sömëni soni. A taki tu taa na u di di siki fëën ta tapëën faa hopo du soni, mbei an musu ta du di diniwooko fëën möön. A taki tu taa: „U di ma sa nango a kamian kumafa mi kë, mbei mi ta peleiki ku tëlëfön, söseei mi ta peleiki a hiniwan okasi di mi feni. Mi abi wan buku ka mi ta sikifi Bëibel tëkisi, söseei ka mi sa toona go luku wantu fanöudu soni di mi bi sikifi tei a dee buku fuu. Mi ta du di soni aki u da miseei taanga. Mi ta kai di buku dë ’Di buku di ta heepi mi u mi hoi dou.’ Ee u ta buta pakisei a dee soni dee Jehovah paamusi u, nöö woo ta si dee bookohedi fuu kuma soni u wan pisiten nöö. Hii juu Jehovah dë a u bandja u heepi u, aluwasi fa soni ta waka a di libi fuu.” Kandë di libi fii an dë kuma di u Bianca nasö di u Paula. Ma tökuseei i sa pakisei dee fasi fa Jehovah bi paka i, nasö fa a bi paka wotowan di i sabi. A dë wan gaan bunu soni seei taa Jehovah ta paka i a di ten aki, söseei taa a o paka i a di ten di ta ko!

20. Andi u sa ta wakiti taa woo feni te u ta mbei hii möiti u dini Jehovah ku hii u hati?

20 Ja musu fëëkëtë taa joo „feni gaan paima seei a Gadu” te i ta begi ën ku hii i hati. I sa dë seiki taa baka te i „ta du kumafa Masa Gadu kë”, nöö joo ’kisi dee soni dee a bi paamusi i’ (Hebelejën 10:35, 36). Fëën mbei boo ta du soni u mbei di biibi fuu ko taanga, söseei boo mbei hii möiti fuu dini Jehovah. U dë seiki taa Jehovah o paka u!Lesi Kolosën 3:23, 24.