Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  tuwalufumu-liba 2016

Te i ta buta pakisei a soni di nama ku di jeje nöö joo feni libi, söseei joo feni kötöhati

Te i ta buta pakisei a soni di nama ku di jeje nöö joo feni libi, söseei joo feni kötöhati

’Ee di Akaa [jeje, NW], u Gadu ta tii u, nöö a dee fëën soni woo ta buta pakisei.’LOOMË 8:5.

KANDA: 57, 52

1, 2. Faandi mbei dee salufuwan kë sabi soni u Loomë kapitë 8?

TE WOO mëni di dëdë u Jesosi, nöö kandë woo lesi Loomë 8:15-17. Dee tëkisi aki ta taki unfa dee salufuwan du sabi taa de o go libi a liba ala u teego. Loomë 8:1 ta taki unfa dee salufuwan „ku Masa Jesosi Keesitu nama tjika”. Ma dee soni dee sikifi a Loomë kapitë 8 nama ku dee salufuwan nöö u? Dee soni dee sikifi a Loomë kapitë 8 sa heepi dee sëmbë dee o libi u teego a goonliba aki tu ö?

2 Loomë kapitë 8 bi sikifi möön gaanfa da dee salufuwan. De kisi di jeje, nöö de ’kë di ten ko poi, di Gadu buta faa tja de ko a lanti ko lei taa de da miii fëën. Biga te di juu dë kisi, nöö Gadu o tooka dee sinkii u de puu de a dëdë basu’ (Loomë 8:23). A di ten di ta ko de o dë miii u Gadu a liba ala. Jehovah wooko ku di lusupaima u da de paadon u dee zöndu u de. A tei de kuma sëmbë di ta libi a wan leti fasi, sö taa de sa ko dë miii fëën.Loomë 3:23-26; 4:25; 8:30.

3. Faandi mbei dee sëmbë dee abi di biibi taa de o libi u teego a goonliba aki seei musu lei soni u Loomë kapitë 8?

 3 A bigi u di buku Loomë, Paulosu bi sikifi soni u wan womi. Di womi aki an bi dë wan salufuwan, ma tökuseei Jehovah bi ta si ën kuma wan sëmbë di bi ta libi a wan leti fasi nëën wojo. Di womi aki da Abahamu. Abahamu bi ta libi gaanduwe kaa ufö Jesosi ko paka di lusupaima da u. (Lesi Loomë 4:20-22.) A di ten aki Jehovah sa si dee Keesitu sëmbë dee abi di biibi taa de o libi u teego a goonliba aki kuma sëmbë di ta libi a wan leti fasi nëën wojo tu. De seei sa feni wini u dee soni dee sikifi a Loomë kapitë 8.

4. Andi u musu hakisi useei te u ta lesi Loomë 8:21?

4 A Loomë 8:21, u ta lesi taa Jehovah ta paamusi u taa di njunjun goonliba fëën o ko seiki, nöö libisëmbë o kumutu a zöndu ku dëdë basu. Di tëkisi aki ta taki taa „hii dee soni Gadu mbei tuu o feni di fii naandë”. I ta si iseei a di njunjun goonliba dë u? Boo go luku andi u musu du fuu sa libi a di njunjun goonliba u Gadu.

TE „DI KË FUU LIBISËMBË HATI [SINKII, NW] TA TII I”

5. Fuun soni Paulosu bi ta taki a Loomë 8:4-13?

5 Lesi Loomë 8:4-13. A Loomë kapitë aiti Paulosu ta taki u tu pei sëmbë. Dee sëmbë aki da dee sëmbë dee ta du dee „soni di nama ku di sinkii”, ku dee sëmbë dee ta mbei ’di jeje u Gadu ta tii’ de. So sëmbë ta pakisei taa Paulosu bi ta taki soni u dee sëmbë dee an bi dë Keesitu sëmbë ku dee sëmbë dee bi dë Keesitu sëmbë. Ma a di tëkisi  aki Paulosu bi ta sikifi wan biifi da dee Keesitu sëmbë, dee Gadu bi kai „ko dë apaiti sëmbë dëën” (Loomë 1:7). Hën da dee sëmbë dee ta du dee „soni di nama ku di sinkii”, ku dee sëmbë dee ta mbei ’di jeje u Gadu ta tii’ de, tuu bi dë Keesitu sëmbë. Unfa de bi tooka ku deseei?

6, 7. (a) Andi da so u dee soni di di wöutu „sinkii” kë taki a di Bëibel? (b) Andi Loomë 8:4-13 ta taki u di wöutu sinkii?

6 Te di Bëibel ta taki u di wöutu „sinkii”, nöö a sa kë taki peipei soni. So juu a sa dë libisëmbë sinkii (Loomë 2:28; 1 Kolenti 15:39, 50). Söseei a sa kë taki di dë di sëmbë dë famii ku deseei. Di Bëibel ta taki taa „a libisëmbë fasi” Jesosi „bi dë di bakamii fu Könu Dafiti”, nöö Paulosu kai dee Dju sëmbë „dee Isaëli sëmbë u mi”.Loomë 1:3; 9:3.

7 Andi Paulosu bi kë taki, di a bi taki u dee sëmbë dee ta du dee „soni di nama ku di sinkii” kumafa a sikifi a Loomë 8:4-13? Ee u kë feni di piki, nöö u sa luku Loomë 7:5. A di tëkisi aki Paulosu bi sikifi taa: „A wan ten dë dee hogi pakisei dee bi dë a u hati bi ta wooko a u liba [sinkii, NW] . . . biga wa sa hoi dee wëti u Gadu.” Aki Paulosu ta piki u taa sëmbë di ta du dee „soni di nama ku di sinkii”, da sëmbë di ta buta pakisei a dee soni di di zöndu sinkii u de ta kë, nöö de ta du hiniwan soni di de kë.

8. Faandi mbei Paulosu bi musu bai dee salufu Keesitu sëmbë taa de an bi musu ta du dee „soni di nama ku di sinkii”?

8 Faandi mbei Paulosu bi bai dee salufu Keesitu sëmbë dee ta du dee „soni di nama ku di sinkii?” Nöö faandi mbei hii Keesitu  sëmbë a di ten aki musu haika di soni di Paulosu bi taki aki? Wë u di hiniwan sëmbë di ta dini Gadu ku hii ën hati, sa bigi ta mbei dee soni di di zöndu sinkii fëën ta kë, ko dë dee möön fanöudu soni nëën libi. Paulosu bi sikifi taa so u dee baaa a Loomë bi ko dë saafu u „dee soni deseei hati kë”. Kandë ku di soni aki a bi kë taki taa womi ku mujëë soni, njanjan, nasö woto soni bi dë dee möön fanöudu soni a de libi (Loomë 16:17, 18; Filipi 3:18, 19; Judasi 4, 8, 12). Wan pisiten wan soni bi ta pasa a di kemeente u Kolenti. Wan baaa bi ta duumi ku „ën tata mujëë” (1 Kolenti 5:1). A bi dë gbelingbelin u si taa dee fesiten Keesitu sëmbë bi abi di lai u Paulosu fanöudu, sö taa de an bi musu ta du dee „soni di nama ku di sinkii”.Loomë 8:5, 6.

9. Fuun soni Loomë 8:6 an ta taki?

9 Di soni di Paulosu bi taki aki dë da u a di ten aki tu. Wan sëmbë di ta dini Jehovah sömëni jaa kaa seei sa bigi ta du dee „soni di nama ku di sinkii”. Wë Paulosu bi kë taki taa nöiti wa musu ta pakisei dee soni kuma njanjan, wooko, piizii ten nasö te wan womi ku wan mujëë lobi deseei ö? Wë nönö. Dee soni aki da soni di u ta du hiniwan daka. Jesosi seei bi ta njan suti njanjan, nöö a bi da woto sëmbë soni u njan tu. A bi sabi tu taa a bi musu ta böö dendu. Nöö Paulosu bi sikifi taa di duumi di wan womi ku hën mujëë musu ta duumi ku deseei da wan fanöudu soni a di tööu libi.

Andi dee soni dee u ta taki ku wotowan ta lei? (Luku palaklafu 10, 11)

10. Andi dee wöutu „ta buta pakisei” kë taki?

10 Andi Paulosu bi kë taki ku dee wöutu „ta buta pakisei”? Di Giiki wöutu di Paulosu bi tei, kë taki taa i ta buta hii i pakisei a wan soni di i kë du. Wan könima bi taki taa dee sëmbë dee ta du di soni aki, „ta möön kë sabi soni u wan soni, de ta taki hii juu u wan soni”, söseei de ta buta pakisei nöö a dee zöndu fii u de. De ta mbei dee fii aki ta tii de a de libi.

Andi da di möön fanöudu soni a u libi?

11. Andi da dee soni dee sa ko dë dee möön fanöudu soni da u?

11 Dee Keesitu sëmbë u Loomë bi musu ta öndösuku deseei, nöö de bi musu ko si na un soni de bi ta buta pakisei. Andi da „dee soni di nama ku di sinkii”? A di ten aki, useei musu pakisei luku andi da di möön fanöudu soni da u. Fuun soni u lo’ u taki? Andi u lo’ u du möön gaanfa? Kandë so sëmbë sa ko si taa hii juu de ta pakisei u bebe dee peipei win, u bisi de wosu, u bai njunjun soni u bisi, u du soni di nama ku wooko, nasö u go a fakansi. Dee soni aki an föutu. De sa dë soni di sëmbë ta du hiniwan daka. Jesosi seei bi mbei win a wan tööu, nöö Paulosu bi piki Timoteo „faa bebe wan piki win” da di bëë di bi ta hati ën (1 Timoteo 5:23; Johanisi 2:3-11). Ma na di win bi dë di möön fanöudu soni a de libi. Ma unfa a dë ku u? Andi da di möön fanöudu soni a u libi?

12, 13. Faandi mbei u musu ta köni ku dee soni dee u ta buta pakisei a de?

12 Paulosu bi piki u taa: ’Ee u ta du dee soni di nama ku di sinkii, nöö u ku Gadu paati kaa e. Wa abi di libi u teego’ (Loomë 8:6, NW). Andi Paulosu bi kë taki ku di soni aki? Te u ta du dee „soni di nama ku di sinkii”, nöö u ku Jehovah an o dë mati möön, söseei woo dëdë a di ten di ta ko. Ma di soni  aki an musu u pasa sö. Wan sëmbë sa tooka di fasi fa a ta libi. I ta mëni di womi u Kolenti di bi ta libi fanafiti a di së u manu ku mujëë soni, di de bi musu puu a di kemeente u? Wë a bi tooka di fasi fa a bi ta libi. An bi ta libi fanafiti a di së u manu ku mujëë soni möön, ma a bi bigi ta dini Jehovah a wan limbolimbo fasi baka.2 Kolenti 2:6-8.

13 Di womi aki bi dë wan womi di bi ta du dee „soni di nama ku di sinkii” gaanfa seei, ma tökuseei a bi sa tooka di fasi fa a bi ta libi. Fëën mbei ee wan Keesitu sëmbë a di ten aki an ta du dee soni dee Jehovah ta piki ën, ma a ta du dee soni di di zöndu sinkii fëën ta kë, nöö hënseei sa tooka tu. Te u ta hoi di soni di Paulosu bi taki a pakisei, nöö a o heepi u fuu tooka hiniwan soni a u libi.

„BUTA PAKISEI A SONI DI NAMA KU DI JEJE”

14, 15. (a) Na un soni Paulosu bi piki u taa u musu ta buta pakisei? (b) Andi an kë taki te wan sëmbë ta „buta pakisei a soni di nama ku di jeje”?

14 Baka di Paulosu bi taki andi sa pasa te u ta „buta pakisei a soni di nama ku di sinkii”, hën a bi taki taa: „Te i ta buta pakisei a soni di nama ku di jeje nöö joo feni libi, söseei joo feni kötöhati.” Wan gaan bunu paka woo sa feni seei!

15 Ma te wan sëmbë ta „buta pakisei a soni di nama ku di jeje”, nöö an kë taki taa an ta fusutan dee soni di ta pasa a goonliba aki möön. An kë taki taa wan sëmbë ta pakisei soni u Jehovah wanwan, nasö ta taki soni u di Bëibel wanwan. Dee fesiten Keesitu sëmbë bi ta libi kuma dee woto sëmbë nöö. Pakisei dee fesiten Keesitu sëmbë. De bi lo’ u njan suti njanjan, de bi ta tööu, de bi ta pai miii, nöö de bi ta wooko tu.Maikusi 6:3; 1 Tesalonika 2:9.

Di möön fanöudu soni da Paulosu bi dë di dini di a bi musu dini Gadu

16. Andi Paulosu bi ta si kuma di möön fanöudu soni nëën libi?

16 Ma Paulosu ku dee woto fesiten Keesitu sëmbë an bi ta mbei dee soni dee u kai djunsu dë ko dë dee möön fanöudu soni a de libi. Biga u sabi taa Paulosu bi ta mbei tenti faa sa feni möni. Ma an bi ta si di wooko fëën kuma di möön fanöudu soni. Di möön fanöudu soni da Paulosu bi dë di dini di a bi musu dini Gadu. Paulosu bi ta buta hii ën pakisei a di peleikiwooko, ku di lei di a bi musu lei sëmbë soni u Gadu. (Lesi Tjabukama 18:2-4; 20:20, 21, 34, 35.) Dee baaa ku dee sisa u Loomë bi musu ta djeesi Paulosu, nöö di wan seei soni useei musu ta du a di ten aki tu.Loomë 15:15, 16.

17. Un wini woo feni te u ta „buta pakisei a soni di nama ku di jeje”?

17 Unfa di libi fuu o dë te u ta buta pakisei a di dini di u ta dini Jehovah? Loomë 8:6 ta taki taa: „Te i ta buta pakisei a soni di nama ku di jeje nöö joo feni libi, söseei joo feni kötöhati.” Te u ta du di soni aki, hën da u ta mbei di jeje u Jehovah tii di hati fuu, nöö u ta lei u pakisei kumafa a ta pakisei. Jehovah ta paamusi u wan suti libi nöunöu kaa, nöö a di ten di ta ko woo feni teego libi.

U musu da Jehovah tangi, u di a mbei u feni tuutuu kötöhati

18. Unfa u sa feni kötöhati te u ta „buta pakisei a soni di nama ku di jeje”?

18 Andi Paulosu bi kë taki di a bi taki taa: „Te i ta buta pakisei a soni di nama ku di jeje nöö . . . joo feni kötöhati? Hii sëmbë kë feni  kötöhati, möönmöön di tuutuu kötöhati. Ma wantu sëmbë nöö ta feni di kötöhati aki. U musu da Jehovah tangi, u di a mbei u feni tuutuu kötöhati. U sa libi fiifii ku dee famii fuu, söseei ku dee baaa ku dee sisa a di kemeente. U di u da zöndu libisëmbë, mbei so juu u ku dee baaa ku dee sisa fuu sa ko abi wan toobi. Te di soni aki pasa, nöö u ta du di soni di Jesosi taki. A bi taki taa: „Go a di otowan go seeka di taki” (Mateosi 5:24). Hoi a pakisei taa dee baaa ku dee sisa fii ta dini Jehovah tu, „di Gadu fuu di nëën wanwan tö sëmbë ta feni kötöhati”.Loomë 15:33; 16:20.

19. Un apaiti soni u sa feni?

19 Te u ta „buta pakisei a soni di nama ku di jeje”, nöö u ku Gadu o dë mati. Di tjabukama Jesaaja bi sikifi taa: „Joo [Jehovah] mbei soni waka bunu da dee sëmbë di ta pakisei bumbuu soni, u di de ta buta futoou a i.”Jesaaja 26:3; lesi Loomë 5:1.

20. Faandi mbei i ta tei di lai di sikifi a Loomë kapitë 8 u bigi?

20 Aluwasi u abi di biibi taa woo libi u teego a liba ala nasö a goonliba aki, tökuseei hii u tuu sa feni wini u dee soni dee sikifi a Loomë kapitë 8. U ta tei ën u bigi seei taa di Bëibel ta piki u taa u musu ta buta pakisei a di dini di u ta dini Jehovah, ka fuu ta buta u pakisei a dee zöndu fii fuu. U sabi taa te u ta „buta pakisei a soni di nama ku di jeje”, nöö woo sa feni wan gaan paka. Paulosu bi sikifi taa: „Ma nöö Gadu, na paka a ta paka u. Soni a ta da u fu sösö, hën da di libi u teego di u sa feni a Jesosi Keesitu u Masa.”Loomë 6:23.