Skip to content

Skip to secondary menu

Skip to table of contents

Jehovah Kotoigi

Saamakatöngö

Di Hei Wakitimawosu (u lei soni a komakandi)  |  tinimu-liba 2016

Go a fesi a di biibi te i ta peleiki a wan kamian ka de ta fan wan woto töngö

Go a fesi a di biibi te i ta peleiki a wan kamian ka de ta fan wan woto töngö

„Dee soni dee i piki mi, mi tjubi de a mi hati.”PSALÖM 119:11.

KANDA: 142, 92

1-3. (a) Ku andi u musu ta booko u hedi möön gaanfa? (b) Un bookohedi ta miti dee sëmbë dee go lei wan njunjun töngö, nöö andi u sa hakisi useei? (Luku di peentje a bigi u di woto.)

A DI ten aki sömëni Jehovah Kotoigi ta du di soni sikifi a di tjabukama woto di ta taki taa woo paaja di bunu buka da „hii pei nasiön sëmbë, ku hii pei lö, ku hii pei föluku dee ta fan hii dee peipei töngö u goonliba” (Akoalimbo 14:6). I da wan u dee sëmbë di ta lei wan woto töngö u? So u dee sëmbë aki nango heepi kuma sëndëlengi, nasö de nango peleiki a wan köndë di abi möön peleikima fanöudu. Wotowan bigi nango a dee komakandi u dee kemeente ka de ta fan wan woto töngö a di köndë ka de ta libi.

2 Hii dee dinima u Gadu musu ta booko de hedi möön gaanfa, sö taa de ku dee sëmbë u di wosudendu u de ko abi wan taanga biibi (Mateosi 5:3). So juu a sa pasa taa u ta abi te a hia soni u du sö tee taa a ta taanga da u fuu feni ten u lei useei  soni u Bëibel bumbuu. Ma dee sëmbë dee go heepi a wan kemeente ka de ta fan wan woto töngö ta abi möön bookohedi.

3 Dee sëmbë dee go heepi a wan kemeente ka de ta fan wan woto töngö musu lei wan njunjun töngö, ma de musu mbei möiti tu u de sa ta lei deseei dee fundu soni u Gadu hii juu (1 Kolenti 2:10). Unfa de o sa du di soni aki ee de an ta kaba fusutan dee soni de ta taki a di kemeente? Nöö faandi mbei mama ku tata di go heepi a wan kemeente ka de ta fan wan woto töngö musu mbei möiti u di tuutuu lei dou a dee mii u de hati?

WAN SONI DI SA POI DI DË DI U KU JEHOVAH DË MATI

4. Andi sa poi di dë di u ku Jehovah dë mati?

4 Te wa sa fusutan dee lei u Bëibel a wan woto töngö, nöö di soni aki sa dë wan soni di sa poi di dë di u ku Jehovah dë mati. Di Nehemia toona go a Jelusalen, hën a si taa so u dee mii an bi sa’ u fan Hebelejëntöngö. (Lesi Nehemia 13:23, 24.) U di dee mii aki an bi sa fusutan di Wöutu u Gadu, mbei de an bi sa dë mati u Jehovah möön.Nehemia 8:2, 8.

5, 6. Andi dee mama ku dee tata dee go heepi a wan kemeente di ta fan wan woto töngö bi ko si, nöö faandi mbei sö wan soni bi ta pasa?

5 So u dee mama ku dee tata dee go heepi a wan kemeente ka de ta fan wan woto töngö, bi ko si taa dee mii u de an bi ta dini Jehovah fajafaja sö möön. U di dee mii u de an bi ta kaba fusutan dee soni di de bi ta lei a dee komakandi, mbei dee soni di de bi ta lei an bi ta dou de hati. Wan baaa de kai Pedro bi foloisi kumutu a Zuid-Afiikan ku dee sëmbë fëën, hën de go libi a Ösutualia. Di baaa aki bi taki taa: „Te u ta taki u soni di nama ku Bëibel, nöö a musu sa dou u hati, söseei u musu sa fusutëën bunu.” [1] (Luku di pisi a kaba u di woto.)Lukasi 24:32.

6 Te u ta lesi wan soni a wan woto töngö, nöö an o dou u hati sö kuma te u bi o lesi ën a u mamabëë töngö. Söseei u di a taanga u fan ku wotowan a wan woto töngö, mbei u sa ko wei, nöö di soni dë sa mbei wa ta dini Jehovah fajafaja sö möön. Fëën mbei hii fa u dë fajafaja u heepi a wan kemeente di ta fan wan woto töngö, tökuseei wa musu mbei na wan soni poi di dë di u ku Jehovah dë mati.Mateosi 4:4.

DE AN BI MBEI NA WAN SONI POI DI DË DI DE KU JEHOVAH DË MATI

7. Unfa dee Babilon sëmbë bi pooba u mbei Daniëli du soni kuma de, söseei faa dini dee gadu u de?

7 Di Daniëli ku dee mati fëën bi dë a katibo a Babilon, hën dee Babilon sëmbë bi pooba u mbei de du soni kuma de, söseei de bi kë u de dini dee gadu u de. Unfa dee Babilon sëmbë bi du di soni aki? Wë de bi lei de „di töngö u dee Kalideja sëmbë”, söseei de bi da de Babilon në (Daniëli 1:3-7). Di njunjun në u Daniëli bi nama ku di gadu Bel, di möön nëbai gadu u Babilon. Fëën mbei a sa kan taa Könu Nebukatnesali bi kë u Daniëli biibi taa dee gadu u Babilon taanga möön Jehovah, di Gadu u Daniëli.Daniëli 4:8.

U di Daniëli bi ta lei soni a dee Santa Buku dee bi sikifi a Hebelejëntöngö hii juu, mbei hën ku Jehovah bi dë gaan mati u nöömö

8. Andi Daniëli bi ta du fu hën ku Jehovah dë gaan mati u nöömö?

8 Di Daniëli bi dë a Babilon, hën de bi dëën dee suti njanjan u di könu. Ma a bi „buta taa” an bi o pasa di wëti u Gadu (Daniëli  1:8). U di hii juu a bi ta lei soni a dee Santa Buku dee bi sikifi a Hebelejëntöngö, mbei hën ku Jehovah bi ko dë möön gaan mati, hii fa a bi ta libi a wan woto köndë (Daniëli 9:2). Ma hii fa a bi ta libi söwan 70 jaa kaa a Babilon, tökuseei de bi ta kai ën Daniëli jeti, a di Hebelejën në fëën.Daniëli 5:13.

9. Unfa di sëmbë di sikifi Psalöm 119 bi ta si di Wöutu u Gadu?

9 Di sëmbë di sikifi Psalöm 119 bi abi bookohedi, u di dee sëmbë u di könu famii bi ta taki hogi fëën. Ma di Wöutu u Gadu bi dëën taanga, nöö a bi heepi ën fu an bi dë kuma dee woto sëmbë (Psalöm 119:23, 61). A bi da di Wöutu u Gadu pasi faa dou hën hati.Lesi Psalöm 119:11, 46.

DU SONI FII KU JEHOVAH SA DË GAAN MATI U NÖÖMÖ

10, 11. (a) Un maaka u musu abi te u ta lei soni a di Wöutu u Gadu? (b) Unfa u sa dou wan maaka di u buta da useei?

10 Hii fa u ta abi sömëni soni ta du a di kemeente, söseei a di kamian ka u ta wooko, tökuseei hii u tuu musu ta buta wan ten u lei useei soni u Bëibel, söseei u hoi di Wosudendu Dini (Efeise 5:15, 16). Di maaka fuu an musu dë taa u ta lesi sömëni bladsëidë u di Bëibel, nasö u ta seeka wan piki da di komakandi nöö a kaba. Ma u musu mbei di Wöutu u Gadu dou u hati, söseei a musu taanga di biibi fuu.

11 Ee u kë dou wan maaka di u buta da useei, nöö u musu ta du soni a wan köni fasi. Te u ta lei useei soni u Bëibel, nöö na dee soni dee woto sëmbë abi fanöudu nöö u musu ta pakisei, ma u musu ta pakisei dee soni dee useei abi fanöudu tu (Filipi 1:9, 10). U musu fusutan taa te u ta seeka useei da di peleikiwooko, da dee komakandi, nasö fuu hoi wan taki, nöö kandë wa ta luku unfa u sa du dee soni dë a u eigi libi. Hii fa wan sëmbë di ta boi wan soni musu u tesi di soni di a boi ufö a da woto sëmbë ën, tökuseei di piki sö di a tesi dë an o sa hoi ën a libi. Ee a kë dë gösöntu, nöö hii juu a musu ta boi bumbuu soni fu hënseei sa njan. Sö nöö a dë tu ee u kë ko dë gaan mati u Jehovah, nöö u musu ta lei soni u di Bëibel hii juu. Te u ta lei useei soni u Bëibel a sö wan fasi, nöö woo feni dee soni dee u abi fanöudu.

12, 13. Faandi mbei sömëni sëmbë ta feni taa a möön bunu u lesi di Bëibel a de mamabëë töngö?

12 Sömëni u dee sëmbë dee go heepi a wan kemeente ka de ta fan wan woto töngö ta si taa a möön bunu u lei deseei soni a de mamabëë töngö (Tjabukama 2:8). Dee sëndëlengi seei sabi taa ee de kë heepi a wan woto töngö go dou, nöö de an sa ta buta pakisei a dee soni de ta jei a dee komakandi nöö.

13 Alain di ta lei Pëlsiatöngö söwan aiti jaa longi kaa, taki taa: „Te mi ta seeka miseei da  dee komakandi a Pëlsiatöngö, nöö mi lo’ u buta pakisei a di töngö seei. U di mi fusutan hën ta wooko möön gaanfa, mbei di soni di mi ta lesi an ta dou mi hati. Fëën mbei hii juu mi ta buta wan ten u lei miseei soni u Bëibel, söseei u lei soni a dee buku fuu a mi mamabëë töngö.”

SUKU U DOU DEE MII FII HATI

14. Andi mama ku tata musu du, nöö faandi mbei de musu du ën?

14 Dee mama ku dee tata dee dë Keesitu sëmbë musu mbei möiti u di tuutuu lei dou dee mii u de hati. Luku di woto u Serge ku hën mujëë Muriel di ta heepi möön leki dii jaa kaa a wan kemeente ka de ta fan wan woto töngö. De bi ko si taa di womi mii u de di bi abi 17 jaa an bi ta dë waiwai te a bi nango a di peleikiwooko, nasö a dee komakandi. Muriel taki taa: „Di womi mii fuu hati bi ta boonu te a bi musu go peleiki a wan woto töngö, biga fosufosu a bi lo’ u peleiki a Faansitöngö, di mamabëë töngö fëën.” Serge taki taa: „Di u bi ko si taa di soni aki bi ta toobi di womi mii fuu faa go a fesi a di biibi, hën u foloisi go baka a di kemeente ka u bi dë.”

Mbei möiti be di tuutuu lei dou a dee mii fii hati (Luku palaklafu 14, 15)

15. (a) Andi sa heepi dee mama ku dee tata u de sabi ee de musu foloisi go a wan woto kemeente? (b) Andi Detolonomi 6:5-7 ta lei mama ku tata?

15 Andi sa heepi mama ku tata u sabi ee de musu toona foloisi go a wan kemeente ka de ta fan di töngö di dee mii u de ta fusutan möön bunu? Di fosu soni di de musu du, hën da de musu sabi ee de o abi ten ku  kaakiti tjika u heepi dee mii u de u lobi Jehovah, söseei u lei de wan woto töngö a di wan seei ten. Di u tu soni di de musu du, hën da de musu sa si ee dee mii u de an kë peleiki, ee de an kë go a dee komakandi, söseei ee de an kë heepi a wan kamian ka de ta fan wan woto töngö. U dee soni aki hedi mama ku tata musu taki ee de o foloisi go baka a di kemeente ka de ta fan di töngö di dee mii u de ta fusutan möön bunu. Te dee mii ko dë gaan mati ku Jehovah kaa, nöö de mama ku de tata sa luku ee de o toona go heepi a wan kemeente ka de ta fan wan woto töngö.

16, 17. Andi bi heepi so mama ku tata u lei dee mii u de soni u Jehovah?

16 So u dee mama ku dee tata feni fasi u lei dee mii u de soni u Jehovah a de mamabëë töngö, hii fa de dë a wan kemeente, nasö a wan kulupu ka de ta fan wan woto töngö. Wan baaa de kai Charles abi dii mujëë mii di abi 9 jaa te go miti 13 jaa. De nango a wan kulupu ka de ta fan Lingalatöngö. Charles taki taa: „U bi ta lei soni u Bëibel a u mamabëë töngö, söseei u bi ta hoi di Wosudendu Dini a u mamabëë töngö. Ma u bi ta lei soni a di Lingalatöngö makandi, söseei u bi ta pëë soni a di töngö, sö taa dee mii bi sa ta piizii u lei di töngö.”

Mbei möiti fii lei di töngö u di köndë ka i dë, nöö ta da piki a dee komakandi (Luku palaklafu 16, 17)

17 Wan baaa de kai Kevin abi tu mujëë mii. Wan u de abi feifi jaa, nöö di wotowan abi aiti jaa. Kevin ta mbei möiti u lei dee mujëë mii fëën di tuutuu lei, u di de an ta kaba fusutan dee soni de ta lei a di woto töngö  kemeente ka de nango. Kevin taki taa: „Mi ku mi mujëë ta lei hiniwan u dee mujëë mii fuu soni a Faansitöngö, u di a dë di mamabëë töngö u de. Söseei u nango wan pasi a wan liba a wan komakandi a Faansitöngö, nöö te fakansi, nöö u nango a dee könklësi dee ta hoi a u mamabëë töngö.”

18. (a) Unfa Loomë 15:1, 2 sa heepi i u du soni a wan köni fasi te i musu heepi dee mii fii? (b) Andi so mama ku tata taki taa u sa du? (Luku di pisi a kaba u di woto.)

18 Mama ku tata musu luku andi möön bunu da dee mii u de, söseei andi sa heepi dee mii u de u de ku Jehovah ko dë gaan mati. [2] (Luku di pisi a kaba u di woto.) (Galasia 6:5). Muriel taki taa hii fa hën ku hën manu kë heepi go dou a di kemeente ka de ta fan wan woto töngö, tökuseei de bi taki taa de o foloisi, u di de kë heepi di womi mii u de faa ko möön lobi Jehovah. (Lesi Loomë 15:1, 2.) Nöunöu Serge ko fusutan taa a bi du di möön bunu soni. A taki taa: „Sensi di u toona go baka a di Faansitöngö kemeente, hën di womi mii fuu go a fesi seei a di biibi, u tefa a tei dopu tu. Nöunöu a ta du di kowoonu pioniliwooko. A ta pakisei u toona go heepi a wan kulupu ka de ta fan wan woto töngö!”

BE DI WÖUTU U GADU DOU I HATI

19, 20. Unfa u sa lei taa u lobi di Wöutu u Gadu?

19 Jehovah lobi hii sëmbë. A mbei di Bëibel dë u feni a höndöhöndö töngö sö taa „hii sëmbë” sa ko sabi soni u di tuutuu lei (1 Timoteo 2:4). A sabi taa u ku ën sa ko dë gaan mati te u ta lesi di Bëibel a di töngö di u ta möön fusutan.

20 Hii u tuu musu mbei möiti fuu ku Jehovah sa ko dë gaan mati. U sa du di soni aki te u ta lei soni u di Bëibel a di töngö di u ta fusutan möön bunu. Woo sa heepi dee sëmbë fuu wosudendu u de sa dë gaan mati ku Jehovah tu. Söseei woo lei taa u lobi di Wöutu u Gadu tuutuu.Psalöm 119:11.

^ [1] (palaklafu 5) So u dee në aki tooka.

^ [2] (palaklafu 18) Ee i kë feni mama wëti u Bëibel di sa heepi i a di wosudendu fii, nöö luku di woto „Fa fu kweki pikin na ini wan tra kondre—Den problema nanga den blesi” di dë a di Waktitoren u 15 u tinimu-liba 2002.